Rm 5
5
Mekabe, élat a ényiñ
(1 Pi 1:3-9; 1 Yo 4:9-10; Rm 8:32)
1Amu bia lañeban ane bezôsôô be bôt amu mbunan, bia be Zambe bi ntoo *mvo'é amu Yésus Krist Nti wongan. 2E be nye, a zene ya mbunan, bi mbili anyiin e mvame Zambe a tabe je été. A bi bili mevak me ndi nleme ya étôto'o Zambe. 3A fe na, ja'an e mintaé miangan été, bi bili ndi *nlem a mbunane na, mintaé mia kô'ôlane njiban, 4a njiban wo ve ngul e *meve'ele été; a njibane *meve'ele wo biaé ndi *nlem. 5A ndi *nlem é ne te soo mejôba'ane, amu nye'ane Zambe ô nga miaseban e minleme miangan, a Mfufube Nsisim a nga vebane be bia. 6Yaa, éyoñe te bi ngenan atek, Krist a nga wu asu mbia be bôt éyoñ é mbe ntiñetan. 7E ne ayaé na, môt a wu ajô zôsôa môt. Ndô'ôtô môt a ne jibi wu ajô mbamba môt. 8Ve Zambe a liti abim avé *a nye'e bia vôme nyôna na: éyoñe te bi ngenane bebo mam *abé, Krist a nga taté wu amu ajô dangan. 9Nge bi mbili mekabe éyoñe ji amu metyi mé, biyoñe tañeya bia ye bo ngule ya sa'ale ayaa Zambe. 10Bi nga too besiñ be Zambe, ve bi maneya bo élat a nye, a zene ya awu mone wé, biyoñe tañeya, éyoñ bi ntoo nlatan a nye, bia ye nyiiban amu ényiñe jé. 11A fe na, bi nto mebune be Zambe amu Nti wongan Yésus Krist, amu jôé dé, bi nga bo élat bia be Zambe.
Adam a Yésus Krist
(1 Ko 15:21-22; 41-49, 50-57; Rm 6:23)
12Ajô te, aval ane *abé e nga nyiine *si nyô amu môte wua, a amu *abé te, awu e nga zu. Amu nalé, awu e nga kui e be bôt bese, amu bese be nga bo *abé. 13Valé Zambe a ngenane te ve Môze metiñ, *abé e nga too *si nyô. Ve mbôle metiñ me nji tabe, Zambe a nji leb *abé. 14Ve da, ataté Adam a kui Môze, awu e nga too, ja'ane be bôt be nji bo aval *abé Adam a nga bo, nye a mbe éve'ela'a nyô a nga yiane zu e melu ôsu. 15Ve akôsa bo nalé, mveane *mvam ô vo'o ve'ane wu nleban. Amu zene nyôna na, nge amu *abé môte wua, awu e nga zu e be bizu'u bi bôt, abim avé *mvam Zambe, nyô é nga vebane be môte wua, Yésus Krist, ja ye veban abui abui e be bizu'u bi bôt. 16Nalé fe na mveane zesé Zambe wo selan *abé môte wua a mam ma tôñ été. Ntyi'an ajô wo su'ulane mekua, ve minkoban abui amu mveane mvame Zambe, môt a su'ulane kabe. 17Amu nge amu nkobane môte wua, awu e nga zu jôô, abim avé ba ba nyoñ abui *mvam a mveane *zôsôô e be Krist étam étam, ba ye jôô ényiñ été. 18Tyi'ibi na, amu nkobane môte wua, bôte bese be nga nyoñe mekua, avale te fe amu mboone *zôsôô môte wua, mekabe ma ve ényiñ e be bôte bese. 19Amu melo me môte wua, bizu'u bi bôt bi nga bobane bebo *abé, avale te fe amu mewô'ô me môte wua, bizu'u bi bôt bia ye kabe. 20Metiñ me nga zu ane minkoban mia ye bo abui. Ve vôm *abé e nga bo abui, vôm ate *mvam é nga dañedañ. 21Nalé ate, aval ane *abé e nga jôô a kui awu, nde te amu *zôsôô, *mvam ja jôô asu ényiñe ya nnôm éto, amu Yésus Krist Nti wongan.
Currently Selected:
Rm 5: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
