Rm 4
4
Abraham ésaa bebuni
(Met 15:5-6; Ga 3:6-9,29; Sam 32:5-7)
1Nde bia ye jô aya ajô mvamba wongan Abraham? Jé nje a nga nyoñ a zene minsôn' 2Nge Abraham a nga kabe amu mimboone mi mam, wôna a bili éfia ya bo je mebun, ve saa ñhe asu Zambe. 3Yaa, ntilan wo jô jô aya? Wo jô na: Abraham a nga bi mbunan mfa'a Zambe, ane ô nga lañebane nye *zôsôô. 4Amu môt a bo ésaé, e ma'ane mé me nji lañeban ane mveane *mvam, ve aval ane jôm é ne énjé a yiane nyoñ. 5Ve mfa'a môt a nji bo ésaé, ve buni môt a kale mbia môt, mbunane wé wo lañebane nye *zôsôô. 6Amu nalé David a kobô ajô môte Zambe a lañe *zôsôô, saa amu mimboon mi mam, vôm a jô na:
7Ebotan a ba bikotekot biap bi ntoo *njaman,
a mam *abé map me nto mbutan;
8ébotan a môt,
nyô Nti a ye bo te ta'asan *abé.
9Ye ébotane ji é ne ve asu ba be ne ntyi'ibane metye, ye é nji bo fe asu ba be ne minsôso? Bia jô na: Mbunan Abraham ô nga lañebane nye mfa'a *zôsôô. 10Ve nsili ô ne na: E nga bobane nalé a za zene? Ye ôsusua, ye mvuse ntyi'an atyele wé? Sa mvus ve éyoñe te a ngenane te tyi'iban atyel. 11Ve ndeme ntyi'an atyel é nga vebane be nye aval ane sitame *zôsôô a nga nyoñ amu mbunan, éyoñ a nga to nsôso. Ajô te ñhe a nga boban éyoñe jia jia ésaa bebuni bese be ne minsôso, ane *zôsôô ke a ne lañebane be be, 12a *bebuni be ne ntyi'ibane metye, mbe bete, saa ve amu be ne bôte ya mvoñe bôt é ne ntyi'ibane metyel étam, ve amu ba ba'ale fe mbunane ésaa wongan Abraham, te yen a za tyi'iban atyel.
13E ne bebela: saake amu mba'alane metiñ, v'amu *zôsôô a so amu mbunan, nde ngaka'a ya nyoñe si ane ngap é nga veban e be Abraham a e mvoñe bôte jé. 14Nge amu mba'alane metiñ nde ba bo benyoñe ngap élik, wôna mbunan wo volô jé, a *zen éte, ngaka'a é ne momo. 15Amu metiñ ma dutu ayaa. A vôme metiñ me nji bo, ntyamane metiñe ke ô ne momo. 16Ajô te ngaka'a é nga veban amu mbunan, nde ja ye bo mveane zesé Zambe mfa'a mvoñe bôt Abraham ése, sa mfa'a ba ba ve metiñe mewôk étam, ve nalé fe mfa'a ba bese ba buni, aval ane Abraham a nga buni, Abraham a ne ésaa bia bese, 17aval ane ntilane wo jô na: Me nga bo wo ésaa meyoñe me bôt abui. A ne ésaa wongan asu nyô a nga buni; e Zambe a wômôlô miñwuan a bo biôm bi ne momo na bi tabe. 18A ntabane ndi nleme mfa'a jôme môt a mbe te ngule ya ve'e fe'e ya tabe je mebun, ve nye, a nga buni, a su'ulane bo ésaa *meyoñ abui, aval ane njôane wuna na: Nalé e mvoñe bôte jôé ja ye bo. 19A nji bo bisô amu nyôle jé, akôsa bo a ntoo bebé ntete mimbu a minga wé Sara, wua ane nyô mbôk, be mbe ane miñwuan mfa'a miaé. 20Be nji sôane ngaka'a Zambe. Ve be nga bo ngule minlem, amu mbunan a ve Zambe duma. 21Be mbe njalan a ndi nleme na e jame Zambe a tiñetiya, a bili ngule ya tôé de. 22Amu ajô te mbunan ôte ô nga lañebane nye mfa'a *zôsôô. 23Amu na, sa ve mfa'a wé étam, nde ntilan wo jô na: E nga lañebane nye. 24Ve nalé fe mfa'a wongan, bia bete mbunan wo ye fe lañeban, amu bia fe bia buni nyô a nga wômôlô Nti wongan e miñwuan; 25nyô a nga wu ajô minkobane miangan a wômô mfa'a mekabe mangan.
Currently Selected:
Rm 4: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
