Nlb 9
9
Abô'ô Pak e *nkôte si ya Sinayi
(Yas 5:10-11; 2 Minkte 30; 35:1-19)
1Ane Nti a nga kobô môze e *nkôte si ya Sinayi a jô na: 2Bone b'Israél ba yiane jem abô'ô Pak éyoñ é ne ntelan. 3Mia ye jeme de éyoñ é ne ntelan, nalé a ne na e *môs awôm a nyini ya ngone nyô, e zañe ngô'é ébaé; mia ye jeme de aval ane memvinda a minjôan y'été bi né. 4Nde Môze a nga kobô bone b'Israél na be jem abô'ô Pak. 5Ane be nga jeme de e ngon ôsu é too melu awôm a menyin, e zañe ngô'é ébaé, e *nkôte si ya Sinayi. Bone b'Israél be nga bo avale Nti a nga bendé Môze. 6Ve bôt be nga nnambe mbim be nji bo *mfuban môs ôte. A amu nalé, be nji bi nkañesane ya jeme Pak. Be nga ke yene Môze a Aron; 7be nga jô Môze na: Bi nji bo *mfuban amu nnambane mbim, ye bia yiane zuu mveane wongan e be Nti aval'ane bone b'Israél bevo'o bese, amu ngum éyoñ ô ne ntelan mfa'a jame te' 8Môze a nga yalane be na: Yañga'an me taté yem e jame Nti a jô ajô denan. 9Nde Nti a nga kobô Môze na: 10Kobô'ô bone b'Israél na: Nge môt éziñ ya be mia, nge miaé mienan mia zu a nji bo *mfuban amu nnambane mbim, nge na a ne e dulu ôyap, a ye jem abô'ô Pak amu duma Nti. 11Jame te da ye boban e ngone baa é too melu awôm a menyin, e zañe ngô'é ébaé; Pak éte ja ye diban a belet é ne te mvusan a bilo'o bi n'ayô. 12Ba ye bo te naane bika'é a kui mametyé a ba ye bo te bu'u éves éziñ. Ba ye jeme Pak aval'ése é ne nkôman. 13Nge môt a ne *mfuban a a nji bo dulu, ve a vañe bene jeme Pak ba ye vaa nye e bôte bé été, amu a nji liti Nti mvean éyoñ ja yian: môt ate a ye be'e mekua ya *abé dé. 14Nge *ntabe a too e be mia a jeme Pa'a Nti, a ye wulu aval'e ne njôan a mbendan ajô Pak. Njôan wo ye bo wua e be mia asu *ntabe a bialébialé.
Nsume nkut
(Nlb 10:11-36; Yo 10:4-27; Mt 6:10)
15E *môs be nga telé *tabernakel, nsume *nkut ô nga yametane *nda éndelé é nga bili biôme y'élat. Ataté mamengô'é a kui mametyé, nsume nkute te ô nga faé. 16Nalé a nga boban éyoñ ése: nsume *nkut ô nga solé *nda a faé a alu. 17Eyoñ ése nsume *nkut ô nga kôlô e vôme *nda éndelé é né, bone b'Israél be nga bôlé vôm ate a ke tabe e vôme be nga yene nsume *nkut ô maneya beta yametan. 18Ajô te bone b'Israél be nga bôlé éyoñe Nti a jôya, a vule fe minkan éyoñe Nti a jôya. Be nga tabe vôm éziñ nté ôse nsume *nkut ô mbe e *tabernakel yôp. 19Nge nsume *nkut ô nga tabe a ayap e *tabernakel yôp, bone b'Israél be nga bo Nti mewôk, teke kôlô vôm ate. 20Ve nge ô nga tabe abe melu, éto a nkôlan bi nga boban avale Nti a nga bendé. 21Nsume *nkut ô nga tabe vôm éziñ v'ataté mamengô'é a kui mametyé, nge na ve môse wua a alu da: ve nné ane wo kôlô, bone b'israél fe be kôlô. 22Nge wo tabe e *nda éndelé yôp mimôs mibaé, ngume ngon, nge lôte valé, bone b'israél teke kôlô te na nsume *nkut ô kôlôya. 23Ntaban a nkôlane bone b'Israél bi nga boban v'a abendé Nti. Be nga bo bisaé biap mfa'a Nti avale Emien a nga bendé Môze.
Currently Selected:
Nlb 9: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
