Nlb 8
8
Nkômane be lambe
(Nk 27:20-21; Yo 8:12)
1Ane Nti a nga kobô Môze na: 2Kobô'ô Aron a jô nye na: Éyoñ wo ye bo ô boké'é belambe, zamgbwa ba yiane ve éfufub ôsu y'ébi bifufup. 3Aron a nga bo nalé a telé belambe ôsu ébi bifufub avale Nti a nga bendé Môze. 4Ebi bifufup é mbe mboon avale di: afibe or ataté tin a kui mesam fo'o ve or a ne mbiban; be nga bo ébi bifufup be tôñe éve'ela Nti a nga ve Môze.
Ntelan bone be Lévi bito
(Nlb 3:5-51; Lv 8; 1 Minkte 23:24-32)
5Nti a nga kobô Môze na: 6Nyoñe bone be Lévi ézezañe bone b'Israél a tune be. 7Mame ya ntunane wop ma ye boban avale di: wo ye miame be mendime me ntunan e nyôl, amané ya valé ba ye tyeñe mimvote ya nyôl ése a sôbe mengômesane map: ba ye bo ntunan éyoñ éte. 8Ba ye nyoñe nnôme nyak, avut mfu'an a mbon; womien wo ye nyoñe nnôme nya'a mfe asu metuna'a me *njaman abé. 9Bone be Lévi ba ye zu bebé e *nda éndelé bendôba'ane, a wo ye sulane bôte bese y'Israél. 10Bone be Lévi ba ye zu bebé ôsu Nti a bone b'Israél ba ye beté be mo. 11Aron a ye bo jam da liti mveane bone be Lévi e be Nti señe bone b'Israél bese, a ba ye teléban asu ya bo Nti ésaé. 12Bone be Lévi ba ye beté mo map e minlô beyôm benyak, a wo ye tyi'i wua asu metuna'a me *njaman abé, a nyô mbok asu mvean ô ne ngumba e mfa'a Nti: nalé mveane ndem asu bone be Lévi wo ye boban. 13Wo ye telé bone be Lévi tetele ôsu Aron a bone bé, a wo ye bo jame ya ve be e be Nti. 14Wo ye kandé bone be Lévi ézezañe bone b'Israél bevo'o bese: bone be Lévi ba ye bo émbam. 15Eyoñe mam mete me maneya, bone be Lévi ba ye bo ésaé e *nda éndelé bendôba'ane. Avale wo ye tune be a ve be Nti nde le: 16amu be ne mvebane ngumba e mfa'a wom ézezañe bone b'Israél, me nga nyoñe be éjiane mintôle mise ya bone b'Israél. 17Amu ntôl ôse ya bone b'Israél ô ne éñwom, to'o mi ya bôt, to'o mi ya betit; e *môs me nga wôé mintôle mise y'Ejipte ñwô me nga telé mie étyi e mfa'a wom. 18A me nga nyoñe bone be Lévi éjiane mintôle mise ya bone b'Israél. 19Me nga ve bone be Lévi e be Aron a bone bé ézezañe bone b'Israél na be saé e *nda éndelé bendôba'an éjiane bone b'Israél, a na be vaa minsem asu bone b'Israél: éyoñe te ébubua éziñ ja ye bo te bibi bone b'Israél amu nsubane ya subu *tabernakel bebé.
20Môze, Aron a Israél ase be nga bo bone be Lévi e mam mese Nti a nga bendé Môze ajô dap. 21Nde bone be Lévi be nga tuneban a sôbe mengômesame map. Aron a nga bo e jam da telé be na be bo Nti ésaé; a nga bulu nsem asu dap: nalé ba ye tuneban. 22Eyoñe nalé a maneya, bone be Lévi be nga zu bo ésaé jap e *nda éndelé bendôba'ane, Aron a bone bé be fombô'ô be avale Nti a nga bendé Môze ajô bone be Lévi.
23Ane Nti a nga kobô Môze na: 24Jame di da fombô bone be Lévi na: Ataté mimbu mewôm mebaé a mitan a ke ôsu, mone Lévi ase a ye bo ésaé e *nda éndelé bendôba'ane. 25Ataté mimbu mewôm metan, a ye jô'é bisaé bié a a ye bo te beta saé. 26Ve ba ye bo nguleya volô bobenyañ e *nda éndelé bendôba'ane mfa'a ya ba'ale biôm bi ne mvebane na ba yiane ba'ale; Ve ba ye bo te beta bi ngum ésaé. Avale di wo ye bo mfa'a bone be Lévi asu biôm ba yiane ba'ale.
Currently Selected:
Nlb 8: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
