Nlb 30
30
1Ane Môze a nga kalane bone b'Israél mebendé mese a nga nyoñ e be Nti.
Atiñe ya mintiñetan
(Dt 23:22-24; Ekl 5:3-6; Ef 5:22-24; 1Tim 2:11-14)
2Ane Nti a nga kobô bivete ya *meyoñ y'Israél a jô na: Atiñe Nti a nga ve nde di: 3Eyoñe môt a ye tiñeti Nti *atiñ nge nyoñe ntyi'an a ngana asu dé émien, a ye bo te tyam njôane wé, a ye bo aval'ése e nga kui ny'anyu.
4Ve nge ngone minga é ngenan é nyiñik e *nda b'ésaa, ja tiñeti Nti *atiñ a ve émien mfa'a ya bo jame te, 5nge ésaa a yemeya ntiñetane wé a mvean a veya émien asu ya bo jame te, a a tabe évô te jô ngo jé jam, wôna ngone minga éte ja ye bo e mam mese a nga tiñeti, a mvean a nga ve émien asu ya bo mam mete, wo ye fe bo ñyemetan; 6ve nge ésaa a nji kañese mintiñetane mié e *môs a nyoñe foé y'été, wôna, mise mia ye bo momo a mvean a nga ve émien asu ya bo mintiñetane mite fe wo ye bo momo; a Nti a ye jamé ngone minga éte amu ésaa a nji kañese mintiñetane mié.
7Nge a ke aluk e koé na a maneya bo *mintiñetan mite, nge na a maneya ve émien asu ya bo mintiñetane mite, 8éyoñe nnôm a yemeya jame te, a tabe évô e *môs a te de yem, *mintiñetan mié mia ye bo ñyemetan a mintyi'an asu dé émiene fe mia ye bo ñyemetan. 9Ve nge nnôm a nji kañese mie e *môs a yeme jame te, nnôm a tyameya *mintiñetan mite a mejô me nga kui anyu dé asu ya ve émien e mboone ya bo mintiñetane mite, me fe me ntoo momo. A Nti a ye jamé nye. 10Ntiñetane nkuse minga, nge wu minga a kôlôya aluk wo ye tabe ñyemetan. 11Nge minga a ngenan e ndaa aluk a tiñeti mam nge kane ngana, 12a nnôm a yemeya jame te, nge a nji jô nye jam nge bene mboone wé, mintiñetane mié mi tele, avale te fe mvean a nga ve émien; 13ve nge nnôm a ben e *môs ba kate nye jame te, mintiñetane mié a mejô y'anyu dé bia ye bo momo, amu nnôm a beneya bie, a Nti a ye jamé nye. 14Nnôm a ne nguleya ben nge kañese *mintiñetan nge mengana minga ate a nga bo. 15Nge nnôm a tab'évô *môs ane *môs te jô nye jam, nnôm ate a yemete *mintiñetan a mengana minga ate a nga bo, amu a nga tab'évô e *môs a nga yeme jame te. 16Ve nge a tyam *mintiñetan a mengana mete e *môs a nga yeme bie, nnôm ate a ye be'e mbe'e ya *abé ngal a nga bo.
17Minjôane Nti a nga kate Môze mi fombô'ô mintiñetane minga a ne nlu'an, a ngone minga é ne nkoé a too e *nda b'ésaa mmie le.
Currently Selected:
Nlb 30: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
