Nlb 29
29
Abô'ô mfefé mbu asu nkañane Zambe
(Lv 23:23-32; Né 8:2-12; Lv 16)
1E ngone zamgbwale é too alu da, mia ye sulan asu ya kañe Nti. Mia ye bo te bo ésaé éziñe ya bisaé bienan ya *môs ôse, amu ô ne mia môse ya nloñane metoñ. 2Mia ye ve Nti nnôm nya'a wua, nnôme ntômba wua a bitoñe mintômba zamgbwa asu mimvean mi ne ngumba, mi too mbamba menyum e be Nti. 3Mia ye fe ve avut, mfu'an a mbon: kili ébu asu nnôme nyak, kili ésaman asu nnôme ntômba, 4a kili éla asu étoñe ntômba ése. 5Nnôm ékela wua, asu *njaman abé: éyoñe te mbulane nsem wo ye boban asu denan. 6Mimveane mite mise mia ye veban te lañe mveane ya *môs ôse ô ne ngumba a mimvean mi ne ngumba ya *môs ôsu ya ngon, a mimvean mi avut a mi mi woon. Nti Emien a ye wô'ô mbamba menyum y'été mvaé.
Môse ya beta njaman
7E Ngone zamgbwale nyô é too melu awôm, mia ye sulan asu ya kañe ma, mia ye tyi bidi a bo teke bo ésaé. 8Mia ye ve Nti mimvean mi ne ngumba, mi too mbamba menyum: nnôm nya'a wua, nnôme ntômba wua, a bitoñe mintômba zamgbwa bi ne mbu wua, biôm bite bise bi too tek'ayeñ. 9Tit ése ja ye veban, a mvean avut mfu'an a mbon: kili ébu asu nnôme nyak, kili ésaman asu nnôme ntômba, 10kili éla asu étoñe ntômba ése. 11Mia ye fe ve nnôm ékela asu ya nyoñe *njaman. Mimvean mite mise mia ye veban ane metuna'a ma veban asu *njaman abé ya *môs ôte, ñwô ô ne beta môse ya *njaman abé, te lañe fe mimvean mi ne ngumba mia vebane *môs ôse, a mimvean mi avut a woon.
Abô'ô menda bindelé
(Lv 23:33-43; Dt 16:13-15; Né 8:14-18)
12E ngone zamgbwale é too melu awôm a metan, mia ye sulan asu ya kañe Nti, a mia ye bo te bo ésaé éziñ ya bisaé mi wô'ô bo. Mia ye jem abôk tañe melu zamgbwa asu Nti. 13E *môs ôsu mia ye ve nye mimvean mia di'ibane nduan, mi too mbamba menyum e mfa'a Nti: beyôm benyak awôm a belaa, beyôm mintômba bebaé, bitoñ mintômba bi ne mbu wua awôm a binyin, biôm bite bise bi too ne selem. 14Tit ése ja ye veban a mvean avut, mfu'an a mbon: kili ébu asu beyôm benya'a awôm a belaa; kili ésaman asu nnôme ntômba ase, 15a kili éla asu étoñ ése ya bitoñ mintômba awôm a binyin. 16Mia ye fe ve nnôm ékela asu metuna'a ya nyoñe *njaman. Mimvean mite mise mia ye bebe e mimvean mi ne ngumba ya *môs ôse yôp a mimvean mi avut a woon.
17E môse baa, mia ye ve bitoñ beyôm benya'a awôm a bibaé, beyôm mintômba bebaé a bitoñ mintômba awôm a binyin bi ne te k'ayeñ, 18a mimvean mi woon asu beyôm benyak, beyôm mintômba a bitoñ mintômba, avale tañe jap é né, a aval'ane mvinda é né. 19Mia ye ve nnôm ékela asu *njaman abé, te lañe mimvean mi ne ngumba ya nnôm éto, a mvean avute wé a mveane woone wé.
20E môse lale mia ye ve beyôm benyak awôm a wua, beyôm mintômba bebaé a bitoñe mintômba awôm a binyin, bi too ne selem, 21a mvean avut, a woon asu beyôm benyak, beyôm mintômba a bitoñe mintômba ane tañe jap é né, a aval'ane mvinda é né. 22Mia ye fe ve nnôm ékela asu *njaman abé, te lañe mimvean mi ne ngumba ya nnôm éto, mvean avute wé a mveane woone wé.
23E môse nyini, mia ye ve beyôme benya'a awôm, beyôme mintômba bebaé a bitoñe mintômba bi ne te k'ayeñ awôm a binyin, 24a mvean avut a woon, asu beyôm benyak, beyôm mintômba a bitoñ beyôm mintômba, ane tañe jap é né, avale mvinda é né. 25Mia ye fe ve nnôm ékela asu *njaman abé, te lañe mimvean mi ne ngumba ya nnôm éto, mvean avute wé a mveane woone wé. 26E môse tane mia ye ve beyôm benya'a ébu, beyôm mintômba bebaé a bitoñ mintômba bi ne tek'ayeñ awôm a benyin, 27a mvean avut a woon asu beyôm benyak, beyôm mintômba a bitoñe mintômba, ane tañe jap é né, avale mvinda é né. 28Mia ye fe ve nnôm ékela asu *njaman abé, te lañe mimvean mi ne ngumba ya nnôm éto, mvean avut a mveane woone wé.
29E môse saman mia ye ve beyôm benya'a muam, beyôme mintômba bebaé, a bitoñe mintômba bi ne te k'ayeñ awôm a binyin 30a mvean avut a woon asu beyôm benyak, beyôme mintômba a bitoñ mintômba ane tañe jap é né, avale mvinda é né. 31Mia ye fe ve nnôm ékela asu *njaman abé, te lañe mimvean mi ne ngumba ya nnôm éto, mvean avute wé a woone wé.
32E môse zamgbwale, beyôme benyak zamgbwa, beyôme mintômba bebaé a bitoñe mintômba bi ne te k'ayeñ awôm a binyin, 33a mvean avut a woon asu beyôm benyak, beyôm mintômba a bitoñe mintômba ane tañe jap é né, avale mvinda é né. 34Mia ye fe ve nnôm ékela asu *njaman abé, te lañe mimvean mi ne ngumba ya nnôm éto, mvean avute wé a woone wé.
35E môse muam, ñwô mia ye sulan asu ya dib abôk; mia ye bo te bo ésaé ya bisaé mia bo éyoñ ése. 36Mia ye ve Nti mimvean mia di'ibane nduan, mi too mbamba menyum e be Nye: nnôme nya'a wua, nnôme ntômba wua a bitoñe mintômba bi ne te k'ayeñ awôm a binyin. 37Tit ése ja ye veban a mimvean mi avut a woon. 38Mia ye fe ve nnôm ékela asu metuna'a ya *njaman abé. Mimveane mite mia bebe e mimveane mi ne ngumba ya *môs ôse a mimveane mi avute y'été a woon.
39Mimvean mia yiane ve Nti mimôse *mebôk mmie le; mimvean mite mia ye bebe e mimvean mi ne ngumba, e mimvean mi avut a e mimvean mi woon, nalé fe e metuna'a ya nlatane ngbwa mi ne ve nye aval'ane *nlem wo kômbô nge asu ya jalé ntiñetan éziñ.
Currently Selected:
Nlb 29: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
