Nlb 24
24
1Balam a yene na Nti a nga yene mvaé ya botane Israél nde a nji fe ke jeñe jame ya jô e be Nti aval'ane biyoñe bivok; v'a nga lum asu dé mfa'a ya *nkôte si. 2Ane a nga bete mis a yen Israél a maneya vule minkan avale meyoñe mé me né. Nde Nsisime Zambe ô nga too be nye. 3Ane a nga tote mejô ya nkulan a jô na:
Nkulane mejô Balam, e mone Béor,
nkulane mejô môt a yene mam ane me né,
4nkulane mejô môt a wô'ô mejô me Zambe,
môt a yen ñyenane ya Nyô a ne ngul'ése,
nyô a kute meboñe si a mise mé ma kuiban,
5A Yakob, menda bindelé môé me n'abeñ!
Menda môé, a Israél!
6Ma mialan ane atôñe mendim,
Ane mefube bidi me ne e fefele beta ôsôé
Ane meyañe Nti a nga bé,
Ane bilé bi sédre nsa'a ôsôé.
7Mendim ma fuluku e mekobe mé été,
a mvoñe jé ja faa *mvo'é amu abui mendim.
Njôô bôte wé a dañ Agag,
a éjôé jé ja bo bo ngu.
8Zambe a nga vaa nye Ejipte;
a bili ngule nyat e mfa'a wé.
A mine *meyoñ mese me ne besiñe bé;
a bu'u bivese biap,
a balé be meveñ a mekoñ m'élaé mé,
9A sômbô si, a a bômbô si ane ngbwengbwem,
a aval'ane ayo'o tit,
za a ye bo nye na a kôlô si'
Môt a botane wo a bo'o ébotan,
a biyo'é bi bo'o be nyô ase a yo'é wo.
10Ane Balak a nga yaa Balam; nd'a nga kute kôp a jô Balame na: Me nga loone wo na ô yo'é besiñe bam, ve tame yene na ô jaléya be a bibotan tañe biyoñe bilaa. 11A ntoo éyoñe ji ve tup a ke e jale dôé! Me nga tiñeti na ma ye jalé wo a duma, ve Nti a kamane wo na ô bo te nyoñe bie. 12Nde Balam a nga yalane Bala'a na: Ye sa avale bifia di e nde me nga kobô minlôman ô nga lôme ma: 13to'o na Balak a ve ma *nda jé éto njalan a argent a or, me se nguleya té fe'e éziñ é too mvaé nge *abé é too Nti e ngame yat; ve ma ye ba'alan e jame Nti a ye jô' 14Eyoñe ji me nga ke e be bôte bam, za'ak ma ye kate wo e jame ayoñe te da ye bo ayoñe bôte dôé melu ma zu.
15Ane Balam a nga kobô mejô mé ya nkulan a jô na:
Nkulane mejô Balam, e mone Béor,
Nkulane mejô ya môt a yene mam ane me né,
16Nkulane mejô ya môt a wô'ô nkobô Zambe,
nyô *a yem asimesane ya Nyô a dañe yôp,
nyô a yene ñyenane ya Nyô a ne ngul'ése,
nyô a kute meboñe si a mise mé ma kuiban,
17Me lôô nye ve saa éyoñe ji.
Ma nye'e me lôô nye ve sa ñhe bebé,
Oteté wo so be Yakob,
Ntum éjôé wo tebe Israél.
A balé mevel me Môab meveñ,
a a mane wôé bone be Sét.
18A nyoñe si Edom a nyoñe nkôle Séyir,
a bone b'Israél ba dañ.
19Nyô a so be Yakob a jô'ô ane mben,
a wôé *mebuka'a ya tison.
20Balam a nga yen Amalék,
nde a nga jô na: Amalék a ne ayoñ ôsu ya *meyoñ!
V'asu'ulan, a ye ke e njañ.
21A nga yene fe Bekénieñ a jô na:
Étaba'a jôé é ne ngu
a dumba'a dôé e ne akôme yôp.
22Ve kan a ye bili e minkaba'a mi nduan été.
A Asur a ye su'ulane kee wo e minkôm.
23A nga tote mejô mefe a jô na:
Ngo'é! Za a ye nyiñ mvuse mboone Zambe'
24Ve besitima ba ye so Kitim.
Ba ye tibili Asur, ba ye fe tibili Eber;
Nye fe a ye ke e njañ.
25Ane Balam a nga tebe tetele a bulan e jale dé, Bala'a fe a nga ke e zene jé.
Currently Selected:
Nlb 24: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
