Mt 5
5
Mvom a be
(Mk 3:13; Lk 6:12-13, 20; 6-21-26)
1Ayene a nga yene bizu'u bi bôt, nde a nga bete nkôle yôp, a tabe si; beyé'é bé be mane nye subu bebé. 2Ane a nga kui anyu dé a jô be na: 3Mvom a bôt be ne azoé e minsisime biab été, amu éjôé ya yôp é ne énjap. 4Mvom a bôte ba wô'ô ôlun, amu ba ye volebane minlem. 5Mvom a bôt be ne bivôvoé minlem amu ba ye nyoñe *si nyô ane *ngab élik. 6Mvom a ba ba wô'ô *zôsôô zaé a évé amu ba ye jaé. 7Mvom a ba ba wô'ô bôte befe éngôngo amu be fe ba ye kooban éngôngo. 8Mvom a ba be nee mfubane minlem amu ba ye yene Zambe. 9Mvom, a bôte ba miase *mvo'é amu ba ye lobane jôé na bone be Zambe. 10Mvom a ba ba wu étibela'a amu *zôsôô amu éjôé ya yôp é ne énjap. 11Mvom a mia éyoñ ése ba taa mia a tibili a kobô mia kane nkobô ébiasé ése amu ma. 12Va'an a fôn amu na ma'an me ne mia abui yôp. Avale te fe nde be nga tibili bekulu mejô be nga zu mia ôsu.
Mi ne nku; mi ne lambe
(Mk 9:50; 4:21; Lk 14:34-35; 8:16-18)
13Mia mi ne nku ya *si nyô. Nge nku wo bo éyôs, jé é ne bo na ô beta bo nku? Ô ntoo teke fe jôm, wo yiane wuabane fé na bôt be tibi wô a mebo. 14Mi ne éfufube ya émo ji, e tison é se ngule ya sobô é too nlôñan e nkôle yôp. 15Nde fe na be nji bo'é lambe a telé nye éwolo si, ve telé nye e tawôlô yôp a nga faé asu bôte bese be ne *nda été. 16Avale te nde éfufube jenan ja yiane faé e mise me bôt, nalé ba ye yene mbamba mimboone mienan a ve ésoo wônan a ne yôbe duma.
Me nji zu tyame metiñ, ve bo me
17Te simesane na me nga zu tyame metiñ nge bekulu mejô; me nji zu tyam, ve bo. 18Bebela émien, ma kate mia na, akekui yôp a si bia ye lôt, ôyôm ékanga wua nge ntene wua ya kalate metiñ wo ye bo te kôlô, ve akekui mam mese me maneya boban. 19Ajô te, nge môt éziñ, e metiñe ma, a ye tyame ve di da dañe tyôtyoé, a ye'ele fe bôte befe nalé, a ye lobane jôé na: nyô a dañe tyôtyoé éjôé ya yôp; ve nyô a ye bo me a ye'ele fe me nalé, nye a ye lobane jôé na: beta môt éjôé ya yôp. 20Amu ma kate mia na, nge *zôsôô wônan teke dañe nyô *beyeme bekalate a befarizieñ, mi se ngule ya nyiin éjôé ya yôp.
Mewôé me bôt. Fulu élat
(Mk 11:25; Lk 12:57-59)
21Mi nga wôk ane be nga jô bôbetôle na: Wo ye bo te wôé môt, amu nyô a wôé môt a yiane mekua e *nda mejô. 22Ve me ke ma jô mia na: nyô ase a wô'ô monyañ ôlun, nye fe a yiane mekua ya *nda mejô; nge môt éziñ ke a jô monyañe na: Raka nalé a ne na ôkukut, a yiane ke e beta aba mejô; a nge môt éziñ a jô na akut, a yiane ke ébé nduan. 23Ajô te nge wo be'e mveane wôé na wo ke beté wô ata'a metuna'a yôp, ô ke simesane valé na monyoñ a bili wo jam e *nlem, 24li'i mveane wôé ata'a si valé, ô bulane mvus, ô taté ke mane lat a monyoñ, éyoñe te ñhe ô zu ke ve mveane metuna'a wôé. 25Jika'a mane kui *tyiñ a môte mia nye mi bili ajô nté mia nye mi ngenan e zene zañ, e môte mia nye mi bili ajô a za kee wo e be *ntyi'i mejô, nye ke a kele wo e be mone bezimbi na a wua wo e *nda mimbôk. 26Ma kate wo bebela na ô se nguleya kôlô vôm ate nge ô nji taté ya'an étune kabe ja su'ulan.
Ajô *mejian a jôm ja tindi môt a bo abé
(Mt 18:8-9; Mk 9:43, 47-48)
27Mi nga mane wôk ane e nga jôban na: Te bo *mejian. 28Ve ma ma kate mia na: e môt ase a fombô minga a nkômban éziñ e *nlem, a boya *mejian a minga ate e nleme wé été. 29Nge dise dôé ya mbo nnôm da tindi wo na ô bo *abé, fôndé'é de ô wua de ôyap; amu asu dôé, e ne mfi na ébu'a nyôle jôé jia é jañ a lôte na ngume nyôle wôé ô ke étôtôlan. 30Nge wo wôé ya mbo nnôm wo kolé wo ôbak: tyi'i wô a wua wô ôyap, amu e ne mfi wôé na ébu'a jia ya bibu'a biôé é jañ a lôte na ngume nyôle wôé ôse ô ke étôtôlan.
Ajô nsuane minga
(Mt 19:7-9; Mk 10:4-5; 10-12; Lk 16:18)
31E nga jôbane na: Môt a suu minga wé a va'a minga ate kalate ntyaman aluk. 32Ve ma ma jô mia na: nyô ase a suu minga wé, vengevenge ve amu *mejian, a bo nye a be'e mekua *mejian, a nyô ase a lu'u minga a ne nsuan, a ntoo mbo *mejian.
Te kalane minka
33Nalé fe na e nga jôban e be bôbetôle na: Wo ye bo te tyame ngana jôé, ve wo ye tôé mengana môé asu masa wôé. 34Ve ma ma jô mia na: môt a bo'o bo'o te ve'ele kalane minkaa; te kalane yôp, amu e ne éto njôane Zambe, 35te kalane si, amu é ne ételé ya mebo mé; te kalane Yérusalém, amu a ne tisone beta njô bôt, 36te kalane nlô wôé, amu ô se nguleya veñesane kongo ésile jia ya nlô wôé éfumulu nge évindi. 37Nkobô wônan ô bo'o ve yaa, yaa; momo, momo! Mam ma bebe yôbe valé ma so be mbia Môt.
Dis da tañe dis
38Mi nga wôk ane e nga jôbane na: Dis da tañe dis, asôñ da tañ asôñ. 39Ve ma ma jô mia na: Te litane ngule jenan asu be mbia môt éziñ; ve nyô a bibi wo abaé amañe ya mbo nnôm, veñesa'ane fe nye di avok; 40a nyô a kômbô kee wo aba mejô na a wôlé wo éwomane jôé, jôké'é fe nye kôt; 41a e môt a ye bi wo a ngu na ô telé nye *zen tañe kiliméta jia a étun kele telé nye kiliméta élaa. 42Nge môt a sili wo jôm, va'a nye je; môte ki a sili wo ékôla te lume nye mvus.
Ô nyeke'e môt a siñe wo
(Lk 6:27-28, 32-38)
43Mi nga wôk ane e nga jôbane na: Wo ye nye'e môt a ne éngôé a vini nsiñe wôé. 44Ve ma ma jô mia na: mi nyeke'e besiñe benan a ye'elan ajô bôte ba tibili mia. 45Nalé mia ye bo fo'o bone b'ésoo wônan a ne yôp, amu nye a bo na jôp e tôô asu mbia be bôt a asu mbamba be bôt, a noo fe mveñ asu bezôsôô a bikotekote bi bôt. 46Amu nge mia nye'e ve bôte ba nye'e mia, ma'ane mevé mia ye nyoñ été? Ye benyoñe *toya bebien be nji bo nalé avale da' 47A nge mia batane ve bobenyoñ étam, za étua jame mia bo? Ye bikule bi nji bo avale da nalé' 48Ajô te nde mia mia ye bo ntute *zôsôô ane ésoo wônan a ne yôp a ne ntute *zôsôô.
Currently Selected:
Mt 5: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.