Mt 4
4
Satan a bôbôlô Yésus
(Mk 1:12-13; Lk 4:1-13)
1Eyoñe te Nsisim ô nga be'e Yésus a kee nye fé été na Satan a bôbôlô nye. 2Eyoñ a tabeya mimôse mewôm menyin a melu fe mewôm menyin teke di, a nga su'ulane wô'ô zaé. 3Nde mbôbôlô bôt a nga subu nye bebé a jô na: Nge ô ne mone Zambe, jô'ô meko'o mana me veñesane belet. 4Nye ke a nga yalan a jô na: E ne ntilane na: Môt a nji nyiñ a belet étam, ve nalé fe a ajô ese da so anyu Zambe. 5Eyoñe te *satan a nga nyoñe nye a kee nye e mfufube tison, a telé nye ôzolom nkume ya *nda Zambe 6a jô nye na: Nge ô ne mone Zambe womien yô'ô a tebe si amu e nga tilibane fo'o na: A ye bendé be éngele asu dôé na be be'e wo abo dôé e za kômôtô akok. 7Ane Yésus ke a nga jô nye na: E ne fe ntilane na: Te bôbôlô Nti e Zambe wôé. 8Nde *satan a nga beta kee nye étun beta nkôle yôp, a nga mane kee a liti nye bijôé bise ya si ése a duma ese y'été, 9a jô nye na: E biôme bisese'e bi, ma ye ve wo bie, nge ô kumbu si a kañe ma. 10Eyoñe te Yésus a zu jô nye na: Kelek a Satan! Amu e nga tilibane fo'o na: Wo ye kañe Nti e Zambe wôé a nye étam wo ye saane nye. 11Eyoñe te ñhe nje *satan a nga li'i nye, ateme na beéngele be nga zu a saane nye.
Yésus a ke tabe Galilé
(Mk 1:14-15; Lk 4:14-15)
12Awô'ô a nga wô'ô na Yôanes a biliya, a nga ke ôyap e Galilé. 13Eyoñ a kôlôya Nazarét, nde a nga ke tabe Kapernawum, e sii Zabuloñ a Néftali; 14Ndemben nkobô *nkulu mejô Ezayi a nga kobô ô jalébane na:
15E sii Zabuloñ a sii Néftali,
e zene mañ, e Yordane yat,
Galilé *meyoñ!
16E mvoñe bôt é nga too dibi été,
é yeneya beta éfufup.
E bôte be nga too sii dibi awu
éfufup é faéya asu dap.
17Ataté éyoñe te, Yésus a nga ke a yôtane foé a jô na: Kôñela'ane minlem, amu ayoñe ya yôp e ntoo bebé.
Yésus a taté tobe beyé'é
(Mk 1:16-20; Lk 5:1-11)
18A wulu'u mfôme mañ ya Galilé, nde a yene bobenyañ bebaé: Simon Pierre baa monyañ wé André be wu'a avot e mañ amu be mbe beyobe kos; 19ane a nga jô be na: Tôñane ma a ma ye bo mia beyobe bôt. 20Ane be nga li'i memvot été te ébien a tôñe nye. 21Eyoñ a kôlôya valé a subu ôsu, nde a nga yene bobenyañ befe bebaé: Yakob Zébédé a Yôanes monyañ wé, ane a nga loone fe be. 22Be fe be nga li'i éfunga été te ébien a ke ba tôñe nye.
Yésus baa bizu'u bi bôt
(Mk 1:39; Lk 4:44; 6:17-18)
23Ane a nga wulu e Galilé ase a va'a ñye'elan e meba me Zambe map; a yôta'ane Mbamba Foé y'Ejôé; a yete'e aval ôkon ese a aval éyem ése e be bôt. 24Duma dé e nga yiane Siri ase; be nga zuu nye minkôkone mise mi bili akone mevale meva nge na be nga bili éndeñela'a amu mintaé mevale meva: bebe'e mimbia minsisim, ba menyôl me ne ñyemelan, ba be ne mimbôbôk, a a nga saé be. 25Bizu'u bi bôt bi nga ke bia tôñe nye bi so'o Galilé, Dékapôl, Yérusalém, Yudé a Yordan yat.
Currently Selected:
Mt 4: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.