Mt 19
19
Nye'elane Yésus ajô nsuane minga
(Mk 10:1-12; Dt 24:1-4; Mt 5:31, 32, 1Ko 7; Lk 16:18)
1Nde da zu bo na, éyoñe Yésus a maneya kobô mejô mete, a nga kôlô Galilé a ke mefôla me si ya Yudé, e Yordane yat. 2Ane ézu'u minsamba mi bôt é nga tôñe nye a a nga saé je wé.
3Befarizieñ be nga zu be nye na be ve'ele nye be jô'ô na: Ye é ne nkañesane na môt a suu minga wé amu aval étom ése' 4Nye be na: Ye mi nji yeme na Nté biôm, atata'a, a nga té be fam a minga' 5A a nga jô na: Amu nalé, fam ja ye li'i ésaa a nyia a a ye lat a minga wé a ba ye bo bebaane nsône wua. 6Avale ya na be bo te beta bo bebaé ve nsône wua. Ajô te jôme Zambe a lateya, môt a nji yiane kandé je. 7Nde ba jô nye na: Amu jé ñhe Môze a nga bendé mveane kalate ntyaman aluk a nsuane minga' 8Nye ke be na: Môze a nga ve mia nguleya suu binga benan amu ayete ya minleme mienan, ve atata'a mam, nalé a nji tame boban. 9Ma jô mia na: Nyô a suu minga wé, vengevenge ve a lateya a fame fe, a lu'u fe minga mfe, a ntoo fame *mejian. 10Ane beyé'é bé be nga jô nye na: Nge nalé nye a né e zañe fam a minga wôna mfi ô nji bo na môt a luk. 11Nye be na: Saa ñhe bôte bese mbe be ne wô'ô ajô di, ve ba e ne be mveban. 12Yaa! Miaé miziñ mi nga bialé nalé e mebume benyia bap; mivo'o ke a mboone bôt; ve mife mi nga bo mibiene nalé amu éjôé ya yôp.
Jôka'an ayôme bongô e zu be ma
(Mk 10:13-16; Lk 18:15-17)
13Ane be nga zuu ayôme bongô na a beté de mo a ye'elan. Nde beyé'é be nga viane bamé be. 14Ve Yésus a nga jô na: Jôka'an ayôme bongô, a te kamane de na e zu be ma, amu éjôé ya yôp é ne jôme mevale me bôte ma. 15Eyoñ a maneya beté be mo, a nga kôlô valé.
Nkukume ndômane môt
(Mk 10:17-31; Lk 18:18-30; 13:30)
16Nde môt éziñ a nga zu be nye a sili nye na: Za mbamba jam ma yiane bo na me yen ényiñe ya nnôm éto' 17Yésus a nga jô nye na: Amu jé wo sili ma nsili ajô mbamba jam? Môte wua a ne mbamba; nge wo kômbô ñhe nyin ényiñ, ba'ale'e mebendé. 18Nye Yésus na: Mebendé mevé? Yésus nye na: Te wôé môt, te bo *mejian, te wup, te bôte môt ajô, 19semé'é ésoo baa nyua a wo ye nye'e môt a ne wo bebé ane womien. 20Ane ésoé ndôman éte é nga jô nye na: Me ba'aleya mam mete mese; jé éfe ja beta jembane ma' 21Yésus a nga jô nye na: Nge wo kômbô bo te ayeñ, kelek a kuan akume dôé a ve minzôzoé, a wo ye bi akum e yôp a za'a va a tôñe ma. 22Eyoñ ésoé ndôman é nga wô'ô ajô te, nde a nga ke a wô'ô ôlun; amu é mbe fo'o na a nga bili biôm abui.
Nju'u na nkukum ô nyiin éjôé Zambe
(Mk 10:28-31; Lk 18:28-30)
23Yésus a nga jô beyé'é bé na: Ma jô mia bebela na nkukum ô ne ayaé ya nyiin éjôé ya yôp. 24Ma beta jô mia na: E ne tyi'ibi be kamel na a tulan *abé ôndôndo a dañe na nkukum ô nyiin éjôé Zambe. 25Eyoñe beyé'é be wô'ôya nalé, be nga kame beta nkaman be jô'ô na: Za ñhe a ne nyiiban' 26Eyoñ a fombôya be, Yésus a nga jô be na: Jame te é se nguleya boban e mfa'a bôt, ve mfa'a Zambe, mam mese me ne boban. 27Ane Pierre a nga yalan a jô nye na: Tame yen, bi maneya li'i mam mese a tôñe wo, za jame ñhe da yange bia' 28Yésus a nga jô be na: Ma jô mia bebela na: Mia mi maneya tôñe ma, éyoñe mam ma ye bobane mimfefé, éyoñe mona môt a ye tabe éto njôane jé, mia fe mia ye tabe bito bi njôan awôm a bibaé a tyi'i *meyoñ ya Israél awôm a mebaé mejô. 29A nyô ase a nga li'i menda, nge bobenyañ nge bekal nge ésaa nge nyia, nge *bon, nge mefup amu jôé dam, a ye nyoñ a lôte ntete biôm a bi fe ényiñe ya nnôm éto. 30Abui bôt é tele ôsu éyoñe ji ba ye tebe mvus a ba be tele mvus ba ye tebe ôsu.
Currently Selected:
Mt 19: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.