Mt 16
16
Befarizieñ a Besadusieñ ba kômbô yen étua jam
(Mk 8:11-13; Lk 12:54-56)
1Nde Befarizieñ a Besadusieñ be nga zu, asu ya ve'ele nye, a sili nye na a liti be ndem ja so yôp. 2Nye ve yalan a jô be na: Eyoñe ngô'é é kuiya, mia jô na: Eyoñ é ne abeñ amu yôp é ne évele; 3mametyé ke na: Den, nkulu a ye vuñ, amu yôp e ne ane évele ane ékukut: nde, mia yeme yemelan avale yôp e né, ve mendeme ya biyoñ, mi te nguleya yemelane me! 4Mvoñe bôt é ne *abé a *mejian ja yi ndem! Mfa'a ajô ndem, ba ye bo te liti be fe ve nyô Yôna. Ane a nga li'i be a ke.
Mvusu Befarizieñ a Besadusieñ
(Mk 8:14-21)
5Eyoñe be keya e kindi'i fok, beyé'é be nga vuane nyoñe belet. 6Yésus nye be na: Ntyee! Bala'ane miabebien mfa'a mvusu Befarizieñ a Besadusieñ! 7Mfa'a wop, be nga bili ôsimesane vina na: E ne na bia te vuane nyoñe belet. 8Ve Yésus a nga yeme nalé a jô be na: A bôte ya ôyôme mbunan amu jé mia fas abui ajô ya na mi nji bi belet' 9Mi ngenan te wô'ô nga? Ye mi teke simesane belet étan, asu bôte toyini étan, a tañe minkoé mi nga kee je' 10Nge belet zamgbwa asu bôte toyini ényin a tañe minkoé mi nga kee je' 11Mia kate wô'ô aya na me nji kobô mia ajô belet éyoñe me mbe me jô'ô mia na: Bala'ane miabebien mfa'a mvusu Befarizieñ a Besadusieñ! 12Nde be nga yeme na a nji jô na be ba'ale bebien mfa'a mvusu belet, ve mfa'a nye'elane Befarizieñ a Besadusieñ.
Pierre a kulane na: Yésus a ne Mesi
(Mk 8:27-30; Lk 9:18-21)
13Eyoñe be kuiya éfuse si Sézaré ya Filip, Yésus a nga sili beyé'é bé na: Bôte ba jô na mona môt a ne za' 14Be na: Mfa'a bevok, a ne Yôanes Babtist, ba bevo'o ke na Elie a bevo'o ke Yérémi nge wua ya bekulu mejô. 15Nye be na: Ve mia mia jô na me ne za' 16Simon Pierre ve nyoñe nkobô a yalane nye na: Ô ne Krist e mona vevea Zambe. 17Yésus a nga beta nyoñe nkobô a jô nye na: Mvom a wo Simon, e mone Yôna, amu saa ke minsôn nge metyi mbie bia te kulane wo jame te, ve Esaa wom a ne yôp. 18A ma ma jô wo na: Ô ne Pierre, a ako'o te yôp, ma ye lôñe keké jam, a mimbé y'étôtôlan mia ye bo te dañe je ngu. 19Ma ye ve wo bidiba'a ya éjôé ya yôp; jam ese wo ye kañese e *si nyô da ye kañeseban e yôp a e jam ese wo ye ben e *si nyô, da ye beneban e yôp. 20Ajô te a nga bendé beyé'é a ayo'o ese na be bo te kate môte na a ne Krist.
Yésus a kate foé ya awu a ñwômane wé
(Mk 8:31-9:1; Lk 9:22-27)
21Ataté éyoñe te, Yésus a nga taté na a kobô beyé'é béé ne ngeññ na:
Ma yiane kee Yérusalém na me tôbane nju'u abui e be bemvendé, bivete betuni a beye'ele metiñ. Ma ye wôéban, ve môse lale, ma ye wômô. 22Pierre, éyoñ a dutuya nye be tebe bebaé, a nga taté na a bamé nye na: Zambe a kama'ane wo, a Nti! Momo, avale jame te da ye bo te kui be wo!
23Ve nye, éyoñ a veñesaneya, a nga jô Pierre na: Kôlô'ô! Kele ma mvus, a Satan! Ô ne ma ékolé ôbak, amu avale wo yene mam e nji bo di Zambe, ve di bôt.
24Nde Yésus a jô beyé'é bé na: Nge môt a kômbô tôñe ma, a tame ben émien, a beke'e *krôa jé a a za'a tôñe ma. 25Bebela na: Nyô a kômbô kaman ényiñe jé a ye dimili je, ve nyô a dimili ényiñe jé amu ma, a ye je beta bi. 26Mfi jé môt a ye yene na a nyoñe *si nyô ése ve a viane jañele nsisime wé? Nge na, jé môt a ye ve mvol a nsisime wé' 27Amu mona môt a ye zu a beéngele béé étôto'o Esaa été: éyoñe te a ye ya'ane môt ase a ne mimboone mié mi né.
28Ma jô mia bebela na: bôte b'éziñ ya ba be ne va ba ye bo te wu ve tame yene mona môt a za'ak aval ane njô bôt.
Currently Selected:
Mt 16: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.