Lk 6:27-49

Ve ma jô e mia mia vô'ôlô ma na: Nyeka'ane besiñe benan, bo'one ba ba vini mia mvaé, bota'ane ba ba yo'é mia, ye'ela'an ajô ba ba kpwe'ele mia. Nge môt éziñ a bibi wo amañe da, ke'e fe di avok. Nge môt a nyoñe wo alô'ô dôé, te kamane nye na a nyoñe fe wo kôt. Môt a sili wo jôm, va'a nye je a te sé môt a nyoñe wo biôme mvôla. E jam mia kômbô na bôt be bo asu denan, bo'one de avale da asu dap. Nge mia nye'e e bôt ba nye'e mia, za akéva ba ye ve mia? Bebo *abé fe ba nye'e e bôt ba nye'e be. Nge mia bo mvaé e be bôt ba bo mia mvaé za akéva ba ye ve mia? Bebo *abé fe ba bo avale te. Nge mia ve bikôla e be bôt mia buni na mia ye nyoñe be be, za akéva ba ye ve mia? Bebo *abé fe ba ve bebo *abé bikôla, nalé ba ye nyoñe mvol. Ve nyeka'ane besiñe benan, bo'one mvaé a va'ane bikôla tee ndinlem ya bulane nyoñ. Ma'ane menan ma ye bo anen a mia ye bo bone be Nyô A Dañ Oyabe yôp, amu a ne mbaa *nlem e be ba be ne bikalak a ba be ne kpwala. Koone bôt éngôngo ane ésoo wônan a koo bôt éngôngo. Te tyi'ane bôte mejô, nalé mia ye bo te tyi'ibane mejô, te veane bôte mekua a mia ye bo te vebane mekua, jama'an a mia ye jamban. Va'an a ba ye ve mia; ba ye sôé jôm é ne mbamba mve'an abume denan été é too njinan, nse'esan a kui na é fuluku; amu ba ye ve'e mia a ôvek mia ve'e wô. A nga ku fe be *nkana na: Ye ndindim ô ne liti ndindime *zen? Ye bebaane ba ye bo te ku ébé' Nyé'é a nji dañe nye'ele; ve ñye'é ase a ne njalan ayé'é dé été a ye bo ane nye'ele wé. Amu jé wo yene évua é ne e dise monyoñ, ve teke yene mbôñ ô ne e dise dôé womien' Nge na ô ne nguleya jô monyoñ aya na: A mojañ, jôké'é me vaa wo évua é ne wo dis, e wo ô ne teke yen mbôñ ô ne wo dis? A *môte bebadu'u taté'é vaa e mbôñ ô ne dise dôé, mvus éte wo ye yen a vaa évua é ne e dise monyoñ. Teke mbamba élé a wume mbia ébuma, nge mbia élé ki a wume mbamba ébuma. Amu élé ése ba yeme je a ébuma é ne énjéé. Be nji kolé befig e biyo, a be nji koé bibuma bi ndi'i woon e minsinik. Mbamba môt a nyoñe mvaé a soo je e mbamba akume ya e nleme wé, a mbia môt a nyoñ *abé da so nye e mbia akume wé, amu anyu môt da kobô e jam e ne nye njalan e *nlem. Amu jé mia loone me na: Nti, Nti! Ve teke bo jam ma jô' Môt ase a zu be ma, a wô'ô mejô mam a bo me, ma ye liti mia e môt a funane nye: a funane môt a nga lôñe *nda. A nga fa'a si édok a bôôé mbôka'a akôme yôp. Ndôn é nga kui, ôsôé ô nga jimbi *nda éte, ve teke kui na é kpwé *nda éte si, amu é mbe mbamba nlôñan. Ve nyô a wôk teke bo a funane môt a nga lôñe *nda e si teke mbôka'a. Ôsôé ô nga jimbi je; été été é nga ku, a *nda éte é nga tyamé beta njamban.