Lk 5
5
Angônda nsôme kos
(Mt 4:18-22; Mk 1:16-20; Yo 21:1-11)
1Mbôlô nkunda bôt ô nga ke avôl ya bômane nye na be wô'ô mejô me Zambe a na a mbe e fefele ébata'a mendim ya Genézarét, 2e nde a yen e kindi'i ébatak bone bilelé bibaé, beyobe kos be ndôme sis été, be sôbe mevote map, 3e nde a bet élélé jia y'été é mbe e ji Simon, ve sili Simon na a ke ôbe ôyap a si. Wôna a nga tabe si, e nde a ye'ele bôt a too élélé été.
4Eyoñ a nga suu nkobô, a nga jô Simon na: Kelek e vôme mendim me n'édok, a wu'ane mevote menan na mi yop. 5Simon a nga yalane nye na: A Nye'ele bia te saé ngum alu teke bi jôm, v'amu wo jô, ma ye wua mevot. 6Eyoñ a boya nalé, e nde be nga bi étua abui kos, a mevote map me nga tuui. 7Be nga febe bôte bevo'o mo e mbe be mbe élélé évok été na be zu volô be. Be nga zu a jalé bilélé bibaane a kui na bi nyoñ e mendim. 8Eyoñe Simon Pierre a nga yene nalé a nga ku Yésus meboñ a jô na: A Nti, kele ma ôyap amu me ne mbo *abé. 9Amu woñ ô nga bi nye, émien a ba bese baa be nye be mbe, amu nsôme mevot be nga bo. 10Avale te fe mfa'a Yakob a Yôanes, bone be Zébédé, bemvôé be Simon. Yésus nye Simon na: Te ko woñ; ataté éyoñe ji, wo zu bo nyô a yobe bôt. 11Ane be nga zuu bilelé e kindik, ve li'i biôme bise a tôñe nye.
Nzezam ve saéban
(Mt 8:2-4; Mk 1:40-45; Lk 17:12-19; Sam 51:12)
12Yésus a mbe e jia ya bitison: e nde môt éziñ, zame nyôl ne nyaññ, a nga yene nye, ve ku asu e butu si a ye'elane nye na: A Nti, nge wo kañese nalé, ô ne nguleya bo ma *mfuban. 13Yésus ve same wo a nnambe nye a jô na: Ma kañese nalé, bo'o *mfuban. Eté été, *zam é nga kôlô be nye. 14Wôna a nga bendé nye na a bo te kobô de môt éziñ. Ve a nga jô nye na: Kele liti womien e be Ntuni, a ve mvean asu Ntunane wôé avale Môze a nga bendé, nalé jame te da ye bo be ngaa.
15Duma dé e nga dañe mialan a ézu'u minsamba mi bôt e nga sulan asu ya vô'ôlô nye a saéban mfa'a ya akone dap. 16Ve nye a mbe a wondé'é e mevôm me ne tee bôt a ye'elane Zambe.
Mbôbôk wo saéban
(Mt 9:1-8; Mk 2:1-12; Sam 103:3)
17Yésus a mbe a ye'ele'e *môs éziñ. Befarizieñ a beye'ele metiñ be mbe be too si; be nga so minlam mise ya Galilé, Yudé a Yérusalém, a e ngule Nti é nga litiban e ñyetan akon. 18Bôte b'éziñ be be'e môt a mbe mbôbôk énoñ, be mbe be jeñek na be nyiñeli nye a bôôé nye ôsu vié. 19Mbôlô be mbe te yem e vôme be ne nyiine nye, amu bôt, e nde be nga bet andil a sili nye si a énoñe jé be lôtôk *abé be nga tup a kui ézezañ ékôane bôt, ôsu be Yésus. 20Eyoñ a yeneya mbunane wop, Yésus a nga jô môt ate na: Mam *abé môé me ntoo *njaman. 21Beyeme bekalate a Befarizieñ be nga taté na ba fas a jô na: Nyôna a ne za a kobô ébiasé? Za a ne jamé mam *abé, ye sa Zambe étam' 22Yésus a nga yem asimesane dap, ve nyoñe nkobô a jô be na: Amu jé mia bi aval asimesane te e minleme mienan été' 23Jé ja dañe tyi'ibi ya jô: Mam *abé môé me ntoo *njaman, ye jô na: Kôlô'ô si a wulu'u' 24V'amu mi yeme na mona môt a bili ngul ya jamé mam *abé e *si nyô, e nde te ma bendé wo mbôbô'ô na: Kôlô'ô si, nyoñek énoñe jôé, a kelek e *nda jôé. 25A été été, a nga kôlô si be too, ve to'é énoñe jé a nga bôô yôp a ke e *nda jé a kañe'e Zambe. 26Bese be nga semé a be nga kañe Zambe. Njalan a woñ, be mbe be jô'ô na: Bi yeneya bitua bi mam e môse wu.
Lévi a loban - Nsili ajô ntyiane bidi
(Mt 9:9-17; Mk 2:13-22)
27Mvuse mam mete, Yésus a nga kui a tôban *nyoñe toya, jôé na Lévi, a too wofis betoya. A nga jô nye na: Tôñe ma. 28Lévi a nga li'i biôme bise, a kôlô si a tôñe nye.
29Lévi a nga bo nye beta dina e *nda jé, beta nsamba benyoñe *toya a bôte befe baa be be be nga too tawôlô. 30Befarizieñ a *beyeme bekalate bap be nga nyiñ a jô beyé'é béé na: Amu jé mia be benyoñe *toya a bebo *abé mia di' 31Yésus a nga nyoñe nkobô a jô be na: Saa ke ba be ne *mvo'é ba yi *dokita, ve minkôkon. 32Me nji zu loone bezôsôô be bôt, ve bebo *abé na be kôñelane minlem.
33Be nga jô nye na: Beyé'é be Yôanes, ane ba Befarizieñ, ba tyi bidi mbane mban a bo meye'elan, ve émbôé ba di a nyu. 34Yésus a nga jô be na: Ye mi ne bo na bemvôé be nlu'u minga be tyi bidi e nté baa be nlu'u minga be né' 35Mimôs mia zu éyoñe ba ye vaa be nlu'u minga, éyoñe te ba ye tyi bidi mimôse mite. 36A nga kane fe be *nkana na: Môt éziñ a vo'o nyabe éfuse ya mfefé éyé na a futi je e nnôm éyé; jam da ye kui e ne na a viane nyabe éyé é ne mfefé a éfus a nga futi été é boo teke lu'ane nnôm éyé. 37Teke môt a futi mfefé woon e minnôme mendek bikôp; jame da ye kui e ne na mfefé woon wo ye bo na mende'e bikôp me tôtan, émien a nga sôôé, a mende'e bikôp me mane ndaman. 38Ve ba futi mfefé woon e mimfefé mende'e bikôp. 39A teke môt a ne bo na nge a mane nyu nnôme woon, a kômbô nyu mfefé, amu a jô na: E nnômô a ne mvaé.
Currently Selected:
Lk 5: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.