Josuạ 6

1Ona jokhecʼ Israelko lạgitʼ Jerikho nagraha reakʼ phaṭok duạr do kajakte siń esetʼ akan tahẽkana. Onḍe khon do okoe hõ bako oḍok hecʼ daṛeakʼkan tahẽkana ar bolo hõ bako bolo daṛeakʼkan tahẽkana.

2Unre Probhu Isor do Josuại metadea, “Ńelme, iń do Jerikho nagraha, ar onaren raj ar onaren sanam bir lạṛhạiko amakʼ tireń jimạ akatʼkoa. 3Ape do sanam palṭonkowante nagraha beṛhaete mitʼ dhao ạcurokʼpe; ar turui din hạbicʼ onkaepe. 4Ar eae naekeko do bheḍa dereń reakʼ eae goṭecʼ sakwa do bondobos-sinduk laha lahate idikʼa. Ar eaeakʼ dinre ape do nagraha beṛhaete eae dhaope ạcurokʼa ar ona sãote naekeko do sakwako oroṅa. 5Ar tinre naekeko do mitʼ dhãote sakwako oroṅa unre sanam hoṛko ãṭ aṛaṅtepe hohoya. Onate nagraha reakʼ pạcri bhit do lạnduṛ ńurokʼa ar Israelko do onateko decʼ bolokʼa.”

6Unre Nunren hopon Josuạ do naekeko hohowatʼkoteye metatʼkoa, “Ape do goha-sinduk gogpe ar eae naekeko do eae goṭecʼ sakwa sapʼkate Probhu Isorakʼ sinduk laha lahateko calakʼma.” 7Ona tayom hoṛkoe hukumatʼkoa, “Ape do laha idikʼpe ar nagraha beṛhaete ạcurokʼpe. Ar palṭonko do Probhu Isorakʼ bondobos sinduk laha lahateko calakʼma.”

8Josuạ do hoṛko galmaraoakoe sạtketʼ khan Probhu Isor samaṅre eae naekeko do eae goṭen bheḍa dereń reakʼ sakwa oroṅ oroṅteko mohnḍayena ar onko tayomte do Probhu Isorakʼ bondobos-sinduk. 9Ar okoe naekeko sakwako oroṅetʼ tahẽkan onko laha lahate do khanḍa bhanḍako sapʼakatʼ palṭonko ar sinduk tayom tayomte do rurukhiyạkoge. Ar naekeko do goṭa hor sakwa oroṅtegeko tahẽyena. 10Josuạ do laharege hoṛko noae hukumatʼko tahẽkana, “Ape do ãṭ aṛaṅte alope hohoya se aṛaṅate alope roṛa se mocate jãhãn saḍe hõ alope oḍoka. Menkhan oka hilokʼ ãṭ aṛaṅte hohoń metape eken enhilokʼge ãṭ aṛaṅtepe hohoya.” 11Nonkate Josuạwakʼ hukumte Probhu Isorakʼ sinduk do nagraha beṛhaete mitʼ dhaoko ạcur ạgukeda. Ar ona tayom do akoakʼ ḍerateko ruạṛ calaoena ar ńindạ do ḍerareko aṅgayena.

12Dosar hilokʼ Josuạ do ạḍi setakʼre jạpitʼ khone beretʼena ar naekeko do Probhu Isorakʼ sindukko gokʼkeda. 13Ar eae naekeko do eae goṭen bheḍa dereń reakʼ sakwa oroṅ oroṅte Probhu Isorakʼ sinduk laha lahateko senena. Ar khanḍa banḍawante palṭonko do onko laha lahate ar Probhu Isorakʼ sinduk tayomre do rurukhiyạ dolko; ar purạ okte sakwa reakʼ saḍe do ańjomena. 14Nonkage dosar hilokʼ hõ onko do nagraha beṛhate mitʼ dhaoko ạcurena ar ḍerateko ruạr calaoena. Onko do turui din onkageko kạmikeda.

15Eaeakʼ dinre onko do ạḍi setakʼreko beretʼena ar eae dhao nagraha beṛhaeteko ạcurena. Eken enhilokʼge onko do eae dhao nagraha beṛhaeteko ạcurena. 16Ar eae dhao ạcurokʼ jokhecʼ tinre naekeko do sakwa mitʼ dhaoteko oroṅkeda unre Josuạ do hoṛkoe hukumatʼkoa, “Ãṭ aṛaṅte hohoepe, ente Probhu Isor do nagrahae jimạ akatʼbona. 17Nagraha ar ona bhitri reakʼ sanamakʼge Probhu Isor ńutumte sarapakʼ ar nosṭokʼ lạgitʼ hoyokʼa. Eken Rahab kusumbi ar uni oṛakʼren okoeko menakʼko onko moto jiwetʼko tahena, ente abonren disạm cikʼyạkin hoṛe oko doholetʼkinạ. 18Menkhan okako jinis do sarapanakʼ tabere menakʼ ona khon pharakre tahenpe jemon ona khon jãhãnakʼ apnar lạgitʼpe ạgujoṅte ape cetanre bạṛicʼakʼpe ạgujoṅ. Arpe onka lekhan Israelkoakʼ ḍera cetanre bạṛicʼakʼpe ạguiya ar muhinrepe paṛao ocokoa. 19Sanam sona, rupạ ar pitạl ar mẽṛhẽtʼ reakʼ jinisko Probhu Isor ńutumte begar akana; ar ona iạte onako do uniyakʼ khajańci kandhare calakʼa.”

20 # Ibr 11.30 Sakwa saḍe são sãote hoṛko do ãṭ aṛaṅteko hohokeda. Ar sakwa saḍe iạte tinre hoṛko do ãṭ aṛaṅteko hohokeda unre Jerikho nagraha reakʼ pạcri do lạnduṛ ńurena. Onate sanam hoṛ do nagraha bhitriteko boloyena arko dokholkeda. 21Onko do khanḍa banḍawante herel ar maejiuko, gidrạ ar haṛam buḍhiko, ḍaṅgrako, bhiḍiko, gadhako ar eṭakʼ sanam jiwiyankoko marao cabaketʼkoa.

22Ar okoe disạm cikʼyạkin do disạm ńel ạgui lạgitʼkin hecʼlen Josuạ do unkine metatʼkinạ, “Uni kusumbi ṭhen oka ben kiriạlen ona leka uniyakʼ oṛakʼte senkate uni ar uniren sanam hoṛko oḍok ạguko ben.” 23Niạ katha ańjomkate unkin disạm cikʼyạkin juạn hoṛ do Rahabakʼ oṛakʼte bolokate uni ar uniren go-baba, boehako ar oṛakʼren hoṛkokin oḍok ạguketʼkoa. Onko do Rahabakʼ gharońjren sanamkoko oḍok ạguketʼkote Israelkoakʼ ḍera bahrereko tahẽ ocoatʼkoa.

24Ona tayom onko do goṭa nagraha ar ona bhitri reakʼ jotowakʼko jeretʼ giḍikada, menkhan sona, rupạ, tama ar mẽṛhẽtʼ reakʼ jinisko do Probhu Isorakʼ khajańci oṛakʼreko jarwakeda. 25#Ibr 11.31Ar Josuạ do okoe kin hoṛ disạm cikʼyạ lạgitʼ Jerikhoteye kolletʼkin ar Rahab kusumbi unkine oko doholetʼ kinte Josuạ do uni, ar uniren apattetʼakʼ gharońjren ar oṛakʼren eṭakʼkoe rukhiyạketʼkoa. Ar rahab do Israelko talare teheń hạbicʼe girobasokʼ kana.

26 # 1 Raj 16.34 “Inạ tayom Josuạ do kiriạyenteye menkeda, “Jerikho nagraha okoe hoṛ arhõe benao rakab unire do Probhu Isorakʼ sarap paṛaokʼa:

Pạhilicʼ hoponakʼ jiwite uni do ona reakʼ rehetʼe rakaba,

ar huḍińicʼ hoponakʼ jiwite ona reakʼ phaṭok duạrkoe gathaoa.”

27Probhu Isor do Josuạ sãoteye tahẽyena, ar uniyakʼ ńutum do goṭa disạmre pasnao idiyena.

Currently Selected:

Josuạ 6: SBT

Highlight

Copy