Hosea 8
8
Probhu Isor do Israel murhutʼ sewa iạteye dusiyedea
1“Am do siṅgạ oroṅme. Probhu Isorren hoṛko upạrte bạiri do pajhaṛ cẽṛẽ lekae hijukʼkana, ente hoṛko do iń emakʼ bondobos reakʼko bebatao akada ar ińakʼ ạn-ạri upạrteko hul akada. 2Israel do iń ṭhen rakʼ rakʼteye menetʼkana, ‘E ińren Isor, ale do amle aṅgocetʼmea.’ 3Menkhan okaṭakʼ bhageakʼ kan Israel do onae nihạ̃t giḍi akada, onate bạiri do uniko khudạu baṛayea. 4Ińakʼ hukum chaḍage onko do rapajko bahal akatʼkoa; ińakʼ hukum chaḍage onko do mukhiyạko bachao akawana. Onko do sona ar rupạren boṅgako benaoetʼkote sorbonasreko paṛaokʼkana. 5E Samariạ, amren mĩhũ-boṅga doń nihạ̃t giḍi akadea. Ar onako upạrtege ińakʼ edre seṅgel do jolokʼkana. Bogekʼ lạgitʼ amren hoṛ do ar tinạkʼ din lagaoakoa? 6Israelren hoṛge uni mĩhũ doko benao akadea. Mitʼṭen kạrigolge uni doe benao akadea; onate uni do Isor doe baṅkana. Samariạren uni mĩhũ hopon doe rạputʼ gejer ocokʼa.
7“Onko do hoegeko era ar sesre do hoe bharḍoko irạ. Phosol reakʼ gelere do jãhãn danage bạnukʼa; ona khon holoṅ do ohoge ńamlena. Ar onare jãhãnakʼge hoyokʼ ona do bidisiạ hoṛgeko jom cabaea. 8Israel doko utʼ ocoakana; bạṛicʼakʼ jinis leka onko do ńitokʼ eṭakʼ jạtrenko talare menakʼkoa. 9Onko do eskar eskar ạcur baṛaekan bir gadha leka Ạsur hạbicʼko sen akana. Ar Ephrayim do ṭakate dulạṛiạkoe ạgu akawana. 10Onko do eṭakʼ jạtrenko sãote ṭakateko gate akanre hõ iń do mitʼ domte jarwakateń sạjạikoa. Onko do disạm cakʼlaokoren rapajkoakʼ santao iạteko caba utạrokʼa.
11“Ephrayim do acʼakʼ ghạṭko sạṅgińtae lạgitʼ aema pinḍkoe benao akawana, menkhan onako do kạkại reakʼ pinḍkantaea. 12Ińakʼ ạn-ạri reakʼ ḍher kathage onko lạgitʼ iń olleda, menkhan onko do bidisiạ hoṛkoakʼ jãhãnakʼ jinis menteko hudisleda. 13Iń ńutumte janwar samaṅkate onko do ona reakʼ jelko jojomkana menkhan iń Probhu Isor do onkore kusi bạnuńa. Ńitokʼ iń do onkoakʼ dusṭạmi reakʼ kathań disạite kại reakʼ sạjạiyiń emakoa; ar onko do Misorteko ruạṛ calakʼa. 14Israelren hoṛ do akoren sisirjạuicʼ hiṛińkate maraṅ maraṅ oṛakʼko benaojoṅ kana; Ar Jihudạren hoṛko hõ pạcrite nagrahako esetʼ ạcurakada. Menkhan Iń do onkoakʼ nagrahako cetanre seṅgeliń kola ar ona do onkoakʼ sanam gaṛkoe jarkhartakoa.”
Currently Selected:
Hosea 8: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
