Hosea 12
12
1Ephrayim do hoeye jomeda; uni do goṭa din purub reakʼ hoeye khudạueda ar eṛe katha ar bedhorome ḍhereda. Uni do Ạsurrenko sãoteye bondoboseda ar Misor do jạitun reakʼ sunume kolae kana.”
2Jihudạ upạrte Probhu Isorakʼ mitʼṭecʼ mambla menakʼtaea; Jakobakʼ colon lekate uni doe sạjạiyea ar uniyakʼ kạmi lekate kuṛạiye emaea. 3#Gen 25.26 #Gen 32.24-26 Eṅgatakʼ kukhire tahenrege Jakob do acʼren boehawakʼ iḍiye sapʼletʼtaea; ar harakate do Isor sãoteye lạṛhạiyena. 4#Gen 28.10-22 Uni do Serma goḍet sãoteye lạṛhạilena ar uniye bhagaokedea; ar daya ńam lạgitʼ uni do rakʼ rakʼteye nehõrlena. Uni do Bethelre Probhu Isore ńamledea ar onḍe do Probhu Isor sãote kathaye roṛleda. 5Uni kangeae phạdkoren Probhu Isor do; ar Probhu Isor ńutumtege uni do hoṛko disạiyea. 6Ńitokʼ do E Jakob bõsren hoṛko, aperen Isor ṭhen ruạṛ hijukʼpe; pạtiạranko hoyokʼpe, dhorom reakʼ bicạrpe ar sanam ghuṛi aperen Isor lạgitʼ koyokʼ horre tahenpe.
7Probhu Isore meneda, “Bepari Ephrayim do ṭhok reakʼ tulạgeye beoharetʼkana; uni do julumgeye kusiyakʼkana. 8Uniye mena, ‘iń do ạḍiń kisạ̃ṛ akana, ḍher dhon duribgeń jogaṛ akada. Ińakʼ sanam kạmiko talare hoṛko do ińakʼ dos se kại do bako sendra ńamtińạ.’ 9#Lev 23.42,43 Menkhan E Ephrayim, ińge amren Probhu Isor do; ińge Misor khoniń oḍok ạguakatʼmea. Amakʼ niṭakatʼ porobko reakʼ okte leka arhõ am do tạmbureń tahẽocomea. 10Iń do nạbiko ṭhen kathań roṛ akada, onko do ḍher dorsoniń emakatʼkoa ar onko hotete aema kathageń roṛakada.”
11Gilead do bedhoromteye perecʼgea; uniren hoṛ doko ạuṛiyakʼgea. Onko do Gilgolre ḍher ḍaṅgrako samaṅketʼkoa. Onkoakʼ pinḍko do casetʼkan jumire dhiri ḍạṅko leka ḍhergea. 12#Gen 29.1-20 Jakob do Aram disạmteye dạṛleda; ar Israel do bạhu ńame lạgitʼ din mạjur reakʼe kạmileda ar bhiḍi gupi kạmi hõe kạmileda. 13#Exo 12.50,51 Probhu Isor do Misor khon Israel ạguiye lạgitʼ mitʼṭen nạbiye beoharledea; uni hotete uniye ńel todarot ledea. 14Menkhan Ephrayim do Probhu Isore edre ocokedea; ona iạte uniren Probhu Isor do uniyakʼ bạṛicʼ kạmi lạgitʼ unigeye dạyireye paṛaoea ar uniyakʼ henosta do uniregeye paṛao ocoya.
Currently Selected:
Hosea 12: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
