Exodus 9
9
Misor cetanre mõṛẽakʼ duk-Janwarkore mahamạri
1Niạ tayom Probhu Isor do Moseye metadea, “Pharao ṭhen senkate menme, Ibrikoren Probhu Isore meneda, ‘iń sewawạń lạgitʼ ińren hoṛko sen ocoakome. 2Menkhan am do bam sen ocoakokana onkom sapʼ dohoyetʼkoa, 3onate ṭạnḍire menakʼko amren sadomko, gadhako, ũṭko, ḍaṅgrako, bhiḍiko, meromko, cetanre usạrage ińakʼ tite mitʼṭecʼ mahamariń hoeocoya. 4Menkhan Israelkoren gại ḍaṅgrako do Misorrenko khoniń begarkoa. Ar onkoren tinạkʼ gại-ḍaṅgra menakʼko onko do mitʼṭen hõ bako gujukʼa.’ ”
5Ar Probhu Isor do ona mahamạri reakʼe ṭhik dohokada. Uniye menakada, “Gapage noa disạm cetanre onań paṛao ocoya.” 6Dosar hilokʼ Probhu Isor doe onkakeda. Onate Misorren sanam gại-ḍaṅgra ar bhiḍi meromko gocʼ cabayena, menkhan Israelkoren gại-ḍaṅgrako do mitʼṭen hõ bako gocʼlena. 7Pharao do hoṛ kolkateye baḍaekeda, Israelkoren mitʼṭen gại-ḍaṅgra hõ bako gocʼakana. Enhõ Pharao do mone keṭecʼketʼtaea; ar hoṛko bae sen ocowatʼkoa.
Misor cetanre turuiyakʼ duk-Ojoko
8Ona tayom Probhu Isor do Mose ar Arone metatʼkinạ, “Bhaṭa khon thoṛagan torocʼ hatao ben. Ar Pharaoakʼ mẽtʼãhã samaṅre Mose do coṭ secʼe uḍiạuma. 9Khan ona do lemeń dhuṛi leka goṭa Misor disạm cetanre pheḍokʼa. Onate goṭa Misorren hoṛko ar janwarkoakʼ hoṛmore ojoko rakabokʼa.”
10 #
Sod 16.2
Unre Mose ar Aron do bhaṭa khon torocʼ hataokate Pharao samaṅre kin teṅgoyena. Ar Mose do coṭ secʼ onae uḍiạuketʼ khan manwa ar janwarkore ojoko rakapʼena. 11Gonokko do Mose samaṅre ar bako teṅgo daṛeada, ente onko hõ eṭakʼ Misri hoṛko leka ojo rakapʼatʼkoa. 12Menkhan Probhu Isor do Pharaoakʼ mon artetʼgeye keṭecʼ ocoketʼtaea. Onate Probhu Isor okae menletʼ onkage hoyena. Mose ar Aronakʼ katha Pharao do bae luturada.
Misor cetanre eaeakʼ duk-Arel
13Unre Probhu Isor do Moseye metadea, “Am do ạḍire beretʼkate Pharao samaṅrem teṅgokʼa, arem metaea, Ibrikoren Probhu Isore meneda, ‘iń sewawạń lạgitʼ ińren hoṛko sen ocoakome, 14ente noa tayom am ar amren kạmiyạko ar hoṛko cetanre iń do sanam lekan duk iń kola. Ar unrem bujhạu daṛeakʼa, goṭa dhạrtire iń leka ar celege bạnukʼkoa. 15Iń do ińakʼ daṛeń uduga ar amren hoṛko cetanre nonkan mahamạriń kola onate dhạrti khonpe marao utạrokʼa. 16#Rom 9.17Menkhan am do jiwetʼ iń dohomea jemon ińakʼ daṛeń udukʼ daṛeam ar goṭa dhạrtire ińakʼ ńutum lại pasnaokʼtiń. 17Am do ńitʼ hõ ińren hoṛko upạrtem teṅgo akana ar bam sen ocoako kana. 18Ona iạte gapa ṭhik niạ oktege botoranakʼ arel iń kola one onka Misor disạmre tisge baṅ hoyakan. 19Ona iạte ṭạnḍire amren tinạkʼ gại ḍaṅgrako ar manwako menakʼko onko ṭhen katha kolme jemonko aḍ daṛeakʼ. Ar jãhãe hoṛ se gại ḍaṅgra oṛakʼte bako hijukʼ ar ṭạnḍiregeko tahen enḍekhan onko do arel ńurakoteko gujukʼa.’ ”
20Unre Pharaoren kạmiyạko tinạkʼ do Probhu Isorakʼ kathate botor hecʼatʼko onko do usạra akoren golamko ar gại-ḍaṅgrako oṛakʼteko ạguketʼkoa. 21Menkhan okoe ona bako luturatʼ onko do akoren golamko ar gại-ḍaṅgrako ṭạnḍiregeko dohokatʼkoa.
22Probhu Isor do Moseye metadea, “Serma secʼ amakʼ ti tiyạrme. Onate goṭa misor disạmren hoṛko, janwarko ar ṭạnḍi reakʼ dare nạ̃ṛĩko cetanre arel ńurokʼa.”
23Unre Mose do serma secʼ acʼakʼ ṭheṅgae tulkeda. Ar Probhu Isor do huḍur ar arele kolketʼte ńurokʼ ehopʼena ar ona sãote seṅgel ńurokʼ hõ ehopʼena. Nonkage Probhu Isor do Misor disạmre arele kolkeda. 24#Sod 8.7; 16.21Eken arel ńurokʼ do baṅ, ona são sãote bijli hõ malkaokʼkan tahẽkana. Misor raj reakʼ etohopʼ khon ńit hạbicʼ goṭa disạmre nonka do ar tishõ baṅ hoyakan tahẽkana. 25Misor disạm reakʼ ṭạnḍikore okoe manwa ar gại ḍaṅgrako tahẽkan onko do celege arel khon rukhiyạ do bako ńamleda. Arelte ṭạnḍi reakʼ sanam phosol do nosṭo cabayena ar dare reakʼ ḍạrko rạputʼ ńurhạyena. 26Menkhan Israelko okareko tahẽkan ona Gosenre do arel baṅ ńurlena.
27Pharao do unre Mose ar Aron hohowatʼkinteye metatʼkinạ, “Niạ bar doń kại akada. Probhu Isor do ṭhikgeye kạmiakatʼa. Iń ar ińren hoṛgele dusigea. 28Am do Probhu Isor ṭhen nehõrokʼme. Huḍur ar arel do ḍherge hoyakana. Niạ dhao doń sen ocoapea. Nonḍe do ar tahen baṅ hoyokʼtapea.”
29Mose do uniye metadea, “Nagraha khon oḍok katege iń do Probhu Isor ṭhen ti tulkateń koejoṅa. Onate huḍur ar arel ńurokʼ hõ thirokʼa. Ar noatem bujhạu daṛeakʼa, dhạrti do Probhu Isorakʼ kangea. 30Menkhan ińiń baḍaea, am ar amren kạmiyạko do Probhu Isor ńitʼ hõ bape botorae kana.”
31Arel iạte Misor reakʼ sanam musnạ ar jao do nosṭo cabayena. Ona oktere jao do gele akan tahẽkana ar musnạ hõ bhoṭokʼ akan tahẽkana, 32Menkhan guhum ar guḍmạ guhum do baṅ ṭuṭi chacka chakʼ lena ente unhõ belekʼ okte do baṅ hoyakan tahẽkana.
33Ona tayom Mose do Pharao ṭhen khone oḍok senena. Ar nagraha khon oḍok kate uni do Probhu Isor ṭhen ti tulkateye koekeda. Unre rimil saḍe ar arel ńurokʼ thirena. Ar dakʼ ńurokʼ hõ thirena. 34Menkhan Pharao ar uniren kạmiyạko do tinre, huḍur, dakʼ ar arel ńurokʼ thirena unre onko do arhõko kạikeda. Onko do arhõ monko keṭecʼketʼtakoa. 35Probhu Isor do Mose hotete cetʼlekae menletʼ onkage Pharaoakʼ mon do keṭecʼentaea; uni do Israelko bae sen ocowatʼkoa.
Currently Selected:
Exodus 9: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
