Exodus 8
8
Misor cetanre dosarakʼ duk-Roṭeko
1Ona tayom Probhu Isor do Moseye metadea, “Senkate Pharao noa katham metaea, Probhu Isore meneda, ‘iń sewawạń lạgitʼ ińren hoṛko sen ocoakome. 2Ar onko bam sen ocoako khan iń do goṭa disạm cetanre roṭekoń kolkoa. 3Nil gaḍa do roṭekote perejokʼa, ar onko do gaḍa khonko rakapʼ hijukʼte amakʼ oṛakʼ duạrkore, giticʼ oṛakʼkore, amakʼ aṭetʼkore, amren kạmiyạkoakʼ oṛakʼkore, amren hoṛkoakʼ oṛakʼkore, amakʼ culhạre ar amakʼ holoṅ sipiyakʼ gamlareko don bolokʼa. 4Onko roṭe do am cetanre ar amren hoṛko cetanre ar amren kạmiyạko cetanreko don baṛaya.’ ”
5Ona tayom Probhu Isor do Moseye metadea, “Aron do noa katham metaea, ‘Misor disạm reakʼ joto gaḍa, nala ar pukhri cetanre amakʼ ṭheṅga tultam ar disạm cetanre roṭe ạgukom.’ ”
6Unre Aron do Misor reakʼ sanam dakʼ cetanre acʼakʼ tiye tiạrkeda. Ar onate roṭeko rakapʼ hecʼente disạmko perecʼ cabakeda. 7Ar gonokko hõ akoakʼ jạdu reakʼ jorte onkageko udukʼkeda. Onko hõ Misor disạmre roṭeko ạguketʼkoa.
8Pharao do unre Mose ar Aron hohoatʼkinteye metatʼkinạ, “Probhu Isor nehõrae ben jemon uni do iń ar ińren hoṛko cetan khon roṭekoe ocokʼko. Iń do hoṛkoń sen ocoakoa jemon senkate Probhu Isor ńutumte dãṛẽko samaṅ daṛeakʼ.”
9Mose do Pharaoe metadea, “Roṭeko jemon am ar amakʼ oṛakʼ-duạr bạgikate gaḍareko tahen, onate ma lạiyạńme tinre am ar amren hoṛko lạgitʼ iń nehõrokʼa. Okte do amge ṭhikạńme.”
10Pharaoe roṛ ruạṛadea, “Enḍekhan ona do gapage hoyokʼma.”
Moseye menkeda, “Onkage hoyokʼa. Ar onatem bujhạu daṛeakʼa, aleren Probhu leka do ar cele Isorge bạnukʼkoa. 11Roṭe do am ar amakʼ oṛakʼ-duạr, amren kạmiyạko ar amren hoṛko ṭhen khonko oḍok calakʼa. Ar eken gaḍa dakʼregeko tahena.”
12Noa katha menkate Mose ar Aron do Pharao ṭhen khonkin ruạṛena. Ar Pharao cetanre Probhu Isor oka duke kolakatʼ ona babotre Mose do Probhu ṭhene rakʼkeda. 13Unre Probhu Isor do uniyakʼ katha lekae kạmikeda. Oṛakʼ-duạr, raca ar ṭạnḍikore tinạkʼ roṭeko tahẽkan sanamgeko gocʼena. 14Ar hoṛko do onkoko jarwaketʼkoa ar onate disạmre ạḍi bạṛicʼ so rakapʼena. 15Pharao do roṭe khon rukhiyại ńamketʼ khan uniyakʼ mon do arhõ keṭecʼ ruạṛentaea ar unkinakʼ katha do bae moneyada. Probhu Isor cetʼlekae menletʼ onkage hoyena.
Misor cetanre tesarakʼ duk - sĩkṛĩcʼko
16Unre Probhu Isor do Moseye metadea, “Aron do acʼakʼ ṭheṅga tulkate ot reakʼ dhuṛire da dalem metaea. Onate ona dhuṛi khon sĩkṛĩcʼko hoyokʼa ar goṭa Misor disạmko pereja.”
17Aron ar Mose do onkagekin kạmikeda. Aron do acʼakʼ ti tiạrkate ot reakʼ dhuṛiye dalkeda ar onate manwa ar janwarko cetanre sĩkṛĩcʼko apʼena. Unre Misor disạm reakʼ sanam dhuṛiko do sĩkṛĩcʼ hoyena. 18Ar gonokko hõ akoakʼ jạdu reakʼ jorte sĩkṛĩcʼ ạguko reakʼko kurumuṭukeda menkhan bako daṛeada. Ar sĩkṛĩcʼ do manwa ar janwar cetankore abokʼko ehopʼena. 19#Luk 11.20Noa ńelte gonokko do Pharaoko metadea, “Noare do Isorakʼ ti menakʼa.” Menkhan enhõ Pharaoakʼ mon do keṭecʼge tahẽyena; uni do Mose ar Aronakʼ katha bae luturada. Probhu Isor okae menletʼ onkage hoyena.
Misorre ponakʼ duk - kãṛã loṭocʼko
20Inạ tayom Probhu Isor do Moseye metadea, “Ạḍi setakʼre beredokʼme ar Pharao tinre gaḍa ghaṭteye calakʼa unre uni samaṅre teṅgokʼme. Ar unim metaea, Probhu Isore meneda, ‘iń sewawạń lạgitʼ ińren hoṛko sen ocoakome. 21Ar bam sen ocoako khan am ar amren sanam kạmiyạko ar amren hoṛko cetanre ar amakʼ oṛakʼ-duạrkore durum durum kãṛã loṭocʼ iń kolkoa. Misorrenkoakʼ oṛakʼ-duạr ar sanam jaega do kãṛã loṭocʼkote perejokʼa. 22Menkhan enhilokʼ do Gosen disạmiń begara, ente onḍe do ińren hoṛko girobasokʼ kana. Onḍe do jãhãn kãṛa loṭocʼge bako tahena. Ar onatepe baḍae daṛeakʼa, iń Probhu Isorge noa disạmre minạńa. 23Ar mitʼṭecʼ bekʼgarakʼ#8.23: Adomakʼ torjomare mitʼṭecʼ bekʼgarakʼ; Hebrewte do bańcaoakʼ. iń dohoya ińren hoṛko ar amren hoṛko talare. Ar gapage noa hahaṛawakʼ do ńelokʼa.’ ”
24Probhu Isor doe onkakeda. Pharaoakʼ raj oṛakʼre ar uniren kạmiyạkoakʼ oṛakʼkore durum durum kãṛã loṭocʼko boloyena. Ar onkote goṭa Misor disạm do perecʼena.
25Unre Pharao do Mose ar Aron hoho ạgu ocoketʼkinteye metatʼkinạ, “Ape do noa disạmrege jãhãre senkate aperen Isor ńutumte dãṛẽ samaṅpe.”
26Moseye menkeda, “Menkhan noa do cetʼ ṭhikakʼ hoyokʼa? Aleren Probhu Isor ńutumte ale okaṭakʼle samaṅ ona do Misorrenko ṭhen hirkhạwakʼkana. Misorren okaṭakʼko hirkhạwakʼ ona dãṛẽ onkoakʼ mẽtʼãhã samaṅrele samaṅ khan onko do cetʼ dhirite bako tińlea? 27Aleren Probhu Isorakʼ hukum leka ale do hahaṅkar talate pe din reakʼ horte senkate uni ńutumte dãṛẽle samaṅa.”
28Pharaoe menkeda, “Aperen Probhu Isor sewae lạgitʼ iń do hahaṅkarteń sen ocoapea. Menkhan ḍher sạṅgiń do alope calakʼa. Ar ńit aben do iń lạgitʼ nehõrokʼ ben.”
29Moseye menkeda, “Am ṭhen khon ruạṛkatege Isor ṭhen liń nehõrokʼa jemon gapage maharaj ar uniren kạmiyạko ar uniren hoṛko cetan khon noko kãṛã loṭocʼko calao cabakʼa. Menkhan Probhu Isor ńutumte janwar dãṛẽ samaṅokʼakʼ lạgitʼ senokʼ do maharaj jemon aloe eṛele.”
30Noa tayom Mose do Pharao ṭhen khon ruạṛkate Probhu Isor ṭhene nehõrena, 31Probhu Isor hõ Moseyakʼ kathae ańjomkeda. Uni do Pharao ar uniren kạmiyạko ar uniren hoṛko cetan khon loṭocʼkoe ocokʼketʼkoa. Mitʼṭen kãṛã loṭocʼhõ ar bako tahẽlena. 32Menkhan niạ dhao hõ Pharao do acʼakʼ mone keṭecʼketʼtaea ar hoṛko bae sen ocoatʼkoa.
Currently Selected:
Exodus 8: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
