Dosar Biboron 34
34
Moseyakʼ gujukʼ
1Ona tayom Mose do Moab ṭạnḍi khon Nebo burute, Jerikho mohnḍa muhunḍire menakʼ Pisga reakʼ muthnireye decʼena. Ar Probhu Isor do onḍe khon goṭa disạme udukʼadea. Uni do Gilead khon Dan hạbicʼ goṭa jaega, 2Napthali reakʼ sanam jaega, Ephrayim ar Manaseakʼ jaega ar pạchim secʼ jalapuri aṛe hạbicʼ Jihudạ reakʼ sanam jaegae udukʼadea. 3Ona chaḍa uni do Negeb disạm ar khijur disạm Jerikho nagraha ar ona sor jordan gaḍa dạkhin secʼ reakʼ bilạn ṭạnḍi khon Seyir hạbicʼ sanam jaegae udukʼadea. 4#Gen 12.7; Gen 26.3; Gen 28.13Ona tayom Probhu Isor do uniye metadea, “Noage ona disạm do one Abraham, Isạhak ar Jakob ṭhen kiriạkateń menletʼ, ‘Noa disạm do aperen bõskoń emakoa.’ Ar noa disạm do amakʼ mẽtʼteń ńel ocoketʼmea, menkhan gaḍa paromkate onḍe calakʼ do baṅ hoyokʼtama.”
5Probhu Isor okae menletʼ onkage Probhu Isorren guti Mose do Moab disạmreye gocʼena. 6Moab disạm reakʼ Beth-peor ṭhen okaṭakʼ buru tala otet tahẽkan onḍege Probhu Isor do uniye topakadea, menkhan uniyakʼ topa okare menakʼa ona do teheń hạbicʼ okoehõ bako baḍaea. 7Gujukʼ jokhecʼ Moseyakʼ umer do mitʼsae bargel bochor tahẽkana. Ar unhõ uni do ńeńel reakʼ daṛe se hoṛmo reakʼ daṛe hõ baṅ komaolentaea. 8Ar Israelko do Moab reakʼ bilạn ṭạnḍire Mose lạgitʼ pegel din hạbicʼko homor halaṅkeda. Ar ona tayom do homor halaṅokʼ reakʼ dinko mucạtʼena.
9Nunren hopon Josua cetanre Mose do tiye capoade tahẽkante uni do ạkilte ar Jiuteye perecʼena. Onate Israelko do uniyakʼ katha leka calakʼko ehopʼena ar Probhu Isor Mose hotete okae hukumletʼ ona dokʼhoko ehopʼena.
10Teheń hạbicʼ Israelko talare Mose lekan ar cele nạbiyakʼ janam hõ baṅ hoyakana one uni tulucʼ Probhu Isor do gate leka samna sạmniye galmaraoetʼ tahẽkan. 11Probhu Isor do Mose hotete Misor disạmre Pharao raj ar uniren kạmiyạko ar uniyakʼ goṭa disạm cetanre okako hahaṛa kạmi ar cinhạkoe kolletʼ onka do celege bako daṛeakawada.
12Ar sanam Israelkoakʼ mẽtʼãhã samaṅre Mose okaṭakʼ maraṅ daṛeye udukʼletʼ se okako botoranakʼ kạmikoe kạmiletʼ onka do celege tishõ bako kạmi daṛeakawada.
Currently Selected:
Dosar Biboron 34: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
