Dosar Biboron 32

1“E serma, ińakʼ kathako luturakʼme;

E Ot, ińakʼ moca reakʼ katha ańjomtińme.

2Ińakʼ cecetʼakʼ do jạṛi dakʼ leka

ńurokʼma,

ińakʼ katha do sisir dakʼ leka

rińjikʼma.

Legecʼ ghãs cetanre

poroe poroe dakʼ leka,

ar aṛakʼ sakamko cetanre

achaṛ dakʼko lekage.

3Iń do Probhu Isorakʼ ńutumiń jạhirtaea.

Ape do aboren Isorakʼ

ṭhonok reakʼ sarhaotaepe.

4“Uni kangeae asray buru do,

uniyakʼ kạmi do sạbitgetaea;

uniyakʼ sanam horko do hok reakʼ kana.

Uni do ṭekʼhãḍicʼ Isor kanae,

unire jãhãn behokakʼ do bạnukʼanaṅ;

uni do sạri are dhoromgea.

5“Acʼren hoṛko do

unire bạṛicʼko beohar akada.

Onkoakʼ dos dạgi iạte

uniren hopon ar hoponera doko baṅkana.

Onko do bin pạtiạran ar phepṛa hoṛ kanako.

6E bebuj, ar bin ạkilan jạtrenko!

Probhu Isor do cetʼ

nonkagepe halawaea?

Uni do cetʼ aperen baba

ar sisirjạuicʼ doe baṅkana?

Unige coṅ ape mae sirjạu akatʼpe;

ar jạtrenko lekate unige

ape doe kajak akatʼpea.

7“Sedaeakʼ ona dinko reakʼ katha disạipe;

aperen ḍher din laharen

hapṛamkoakʼ kathako baṛe hudispe.

Onako din reakʼ kathako

aperen apatko ṭhen kulijoṅpe,

onko do apeko lạiyapea;

ar haṛam hoṛko kulikope,

onko do apeko bujhạuapea.

8 # Apos 17.26 Maraṅ Isor do tinre eṭakʼ jạtrenko

sompottiye hạṭińatʼkoa,

ar manwa hoponko tinre

eṭakʼ eṭakʼ jạtreye hạṭińketʼkoa,

unre Israel jạtrenkoakʼ lekhae

disạ dohṛaketʼte

eṭakʼ jạtrenkoakʼ simạnakoe

ṭhik dohoatʼkoa. 9Probhu Isorakʼ bakhra do

acʼren hoṛkoge;

ar Jakob doe Israel jạtena

acʼakʼ ạidạri bakhra.

10“Uni do hahaṅkar disạmreye ńamkedea,

hińjrạukʼkan mitʼ nisun jaegare.

Uni doe esetʼ ạcurkedea, are jotonkedea;

ar mẽtʼ reakʼ joti lekage

uni doe horhokedea.

11Pajhaṛ cẽṛẽ acʼakʼ tukại ebhenetʼtae

hoponko cetanre phạ̃kṛạ̃kʼe phad phadaoetʼtaea,

ar cetʼleka onko cetanre

uni do lap lapae uḍạukʼkan,

ar cetʼleka onko rakapʼko lạgitʼ

acʼakʼ phạ̃kṛạ̃kʼe lap lapakakʼkan,

ar cetʼleka acʼakʼ phạ̃kṛạ̃kʼte

onkoe gugu idiyetʼko.

12Probhu do eskarge uniye

ạyur ạguyedea,

uni sãote cele debota hõ bako tahẽkana.

13“Uni do pirthimi reakʼ usul jaegareye

decʼ sen ocokedea

disạm reakʼ mitʼ buru khon eṭakʼ burute;

ar ot baṛge reakʼ phosole jom ocokedea.

Uni do dumur rasa hõe cepecʼadea

buru khoṅkor khon ńamokʼakʼge,

uni do cạṭạni dhiri khon

jạitun sunum hõe emadea.

14Uni do palrenkoakʼ dahe

ar bhiḍi meromko reakʼ toa,

ar bhiḍi hoponkoakʼ jele jom ocokedea,

Basan disạmren palren

merom bodakoakʼ itil do

guhum reakʼ mĩhĩ holoṅ tulucʼe jom ocokedea.

E Israel, am do darkha reakʼ

rasagem ńũ akada.

15“Menkhan Jisurun doe moṭayena are phandakeda.

E Jisurun, am do ḍher jomte

ạḍim moṭayena.

Ona tayom uni do acʼren sisirjạuicʼ

Isore bạgi giḍiadea,

ar acʼakʼ asrayokʼ buru hõe

nihạ̃t giḍikada.

16Ạnạṛi Isor sewawae iạte

uni do ạḍiko ãṭ ocokedea,

ar hirkhạwakʼkoteko khĩs ocokedea.

17 # 1 Kor 10.20 Onko do bạṛicʼ jiuko teṅgenatʼkoa.

okoe do Isorko baṅkan,

onko do nãwã boṅga ńutumte

samaṅokʼakʼ porobko porobena,

okoe do sor din lahareko upelakan,

okoe do aperen hapṛamko

bako botorakokan tahẽkan.

18Ape do ona asray burupe

nihạ̃t giḍiakada

okoe doe aperen babakan;

uni Isor dope hiṛiń akadea

okoe do eṅgat leka bedon talate

noa dhạrtiteye ạguakatʼpe.

19“Ona ńelte Probhu Isor do acʼren hopon ar hoponerako khon

acʼakʼ mẽtʼãhãe danaṅketʼtaea,

ente onko do edreteko khĩs ocoakadea.

20Uni doe menkeda, “Iń do onko khon

ińakʼ mẽtʼãhãń danaṅtińạ,

ar sesre cetʼ hoyokʼtako onań ńela;

ente onko do peṛta pirthimi

ar bin pạtiạran hoponko kanako.

21 # 1 Kor 10.22; Rom 10.19 Isore baṅkan nonkanicʼko sewawaekante

ar bako botorạńkante

onko do ińko ãṭ ocoakadińa;

ar onkoren boṅga murhutʼko iạte

ińko khĩs ocoakadińa.

Okoe do jạtrenko baṅkan onkoakʼ tire soprotkate

onkoń jaljalao ocokoa;

ar mitʼṭen bebuj jạtrenkoakʼ tire soprotkate

onkoń khĩs ocokoa.

22Ińakʼ edre do seṅgel leka salgao akana;

ona seṅgel do khạndri

Seol hạbicʼ jolokʼkana.

Ona seṅgel do dhạrti ar ona reakʼ

sanamakʼ phosolkoe joma

ar buruko reakʼ rehetʼko hõe jeretʼakʼa.

23“Iń do joto lekan muhinko ạgukate

onko upạrteń jarwaea;

ar ińakʼ sarko do onko

cetanreń teraṅa.

24Onko do reṅgecʼteko loraokʼa

ar durdurạukʼ ruạ ar bisanakʼ rogteko

capoṭokʼa.

Onko upạrte iń do kaṭaha janwarko

ar dhuṛire leńokʼkan bisan bińkoń

kolkoa.

25Onkoren hopon ar hoponerako do nagraha bahrere

tarwaṛe reakʼ hạnteko gujukʼa,

ar oṛakʼ bhitrire botorteko udạsokʼa.

Onkoren juạn koṛa ar kuṛiko, kạṭicʼ gidrạko

ar haṛam buḍhiko doko marao utạrokʼa.

26Iń doń menleda, onko doń

kaṭra kuṭrạ cabakoa,

manwako tala khon onkoakʼ disạ doń

meṭao utạra.

27Menkhan iń doń baḍaekan tahẽkana

bạiriko do bạḍạiteko perejokʼa

ar begor bujhạuteko roṛa

baṅma onkoakʼge jitạu do hoyakana;

Probhu Isor do noako reakʼ cetʼge bae ceka akada.”

28Israel jạtrenko talare bhage solha

emokʼ hoṛge bạnukʼkoa,

ente onko do jãhãn buj sujge bạnukʼtakoa.

29Ạklinanko tahẽlen khan honaṅ

ona kathako bhujhạukea ses dosa cetʼ hoyokʼtakoa mente.

30Mitʼ hoṛ do cekate hajar hoṛkoe lagakoa,

ar bar hoṛ ńelte cekate gel hajar hoṛko ńir pharakokʼa,

onkoakʼ asray buru

bạirikoakʼ tire

onko bae ạkhrińleko khan,

ar Probhu Isor hõ bạirikoakʼ tire

onko bae soprot leko khan?

31Bạirikoakʼ asray buru do aboakʼ

asray buru leka do baṅkana,

noa do aboren bạirikoakʼ bicạr phanḍaoakʼ kana.

32Probhu Isore meneda, “Onkoakʼ darkha nạ̃ṛĩ do

Sodom reakʼ darkha nạ̃ṛĩ khon

ar Gomora reakʼ khet khonge omon akana.

Onkoakʼ darkha nạ̃ṛĩre do bis menakʼa,

ar darkha thopako do haṛhatʼgetakoa.

33Onkoakʼ darkha rasa do bińakʼ bis leka,

ayaṅ bińakʼ botoranakʼ bis lekage.

34Ona do iń ṭhen doho-baege menakʼa,

ińakʼ dhon oṛakʼre mohor chapakatʼge.

35 # Rom 12.19; Ibr 10.30 Behok reakʼ sạjại emokʼ reakʼ ạidạri do ińakʼge;

okoeyakʼ oka kuṛại onage uniń emaea.

Okte purạulen khan bạirikoakʼ jaṅga do leńjedokʼtakoa;

onkoakʼ maraokʼ reakʼ din do

sor hecʼakana.

Onko lạgitʼ oka ṭhik dohoakan,

ona do usạrage onkore paṛaokʼa.”

36 # Ser 135.14 Probhu Isor tinreye ńela,

acʼren hoṛkoakʼ daṛe do caba akana,

guti se sạdhin okoeyakʼ daṛege bạnukʼa,

unre uni doe acʼren hoṛko sejokʼa,

ar acʼren gutiko cetanreye mãyãkʼa.

37Unre uni doe mena,

“Okayenako onkoren debotako do?

Okayena onkoakʼ ona buru do

one okareko asraylen?

38Okayenako onko debotako do

okoe do onkoren teṅgen janwarkoakʼ itilko jomletʼ,

ar onkoakʼ coḍor samaṅokʼakʼ

ar darkha rasako ńũletʼ?

Ńitokʼ onko do hecʼkateko

goṛowape ma,

ar asray hõko emape ma.

39Ńitokʼ hudisokʼpe ar ńelpe

ińkangeạń uni do;

iń chaḍa ar cele Isorge bạnukʼkoa.

Ińge gogocʼicʼ ar ińge jiwetʼicʼ,

ińge ghạghạlicʼ, ińge bokʼgeyicʼ;

ińakʼ ti khone bańcao daṛeakʼ

nonkan celege bạnukʼkoa.

40Iń do serma secʼ ti tiạr kateń meneda,

jaejugiń jiwetʼ leka iń meneda,

41Ińakʼ malkaokʼkan tarwaṛe

iń doń lasertińạ,

ar bicạr reakʼ ray

purạu lạgitʼte ona doń saba,

ar ińren bạirikoń sạjạikoa,

okoe ińko hirkhạwạń

onko do kuṛạiyiń emkatakoa.

42Makʼ gocʼ ar bondi akan hoṛkoakʼ

mãyãmiń ńũ ocoyte

ińakʼ sarkoń bul

ocoytińa;

ar ińakʼ tarwaṛe do jele joma,

bạiriren mukhiyạkoren mathako reakʼge.

43 # Rom 15.10; Sod 19.2 E sanam jạtren hoṛko,

Probhu Isorren hoṛko sãote

uni baṛe sarhaoepe,

ente acʼren gutikoakʼ mãyãm reakʼe

hala hạliya,

uni do acʼren bạirikoe sạjạikoa

ar acʼakʼ disạm ar acʼren hoṛkoakʼ

kại ikại reakʼe bondobosa.

44Mose ar Nunren hopon Josuạ do senkate noako sereń sanam hoṛkin ańjomatʼkoa. 45-46Mose do sanam Israelko noako katha galmaraoakoe mucạtʼketʼ khane metatʼkoa, “Okako katha ape samaṅre goha leka tahen lạgitʼ teheńiń metatʼpe onape disạ dohokakʼa ar ạn-ạriko joton salakʼpe manaote aperen hopon ar hoponerakope hukum daṛeako. 47Ape lạgitʼ noa do ạuṛi katha baṅkana, menkhan apeakʼ jion kangea. Jordan gaḍa tinrepe paromokʼa ar ona disạmpe dokhola unre noako kathape dohoya ar ḍher din jiwetʼpe tahena.”

Moseyakʼ gujukʼ reakʼ katha

48 # Num 27.12-14; Bib 3.23-27 Enhilokʼ Probhu Isor do Moseye metadea, 49“Am do Jerikho samaṅ reakʼ Moab disạm reakʼ Abarim buru reakʼ Nebo muthnite dejokʼme ar sompotti lekate Israelko okaṭakʼ Kanan disạmiń emako lạgidokʼkan ona mitʼ dhao ńelme. 50Amren dadam cetʼleka Hor reakʼ burureye gocʼente acʼren hapṛamko ṭhene senen onkage amhõ Nebo bururem gujukʼa ar amren hapṛamko ṭhenem senokʼa. 51Cedakʼ je, Sin hahaṅkarre Kades reakʼ Meriba-dakʼ ṭhen Israel hoponko talare iń tulucʼ biswạsben rạputʼleda ar Israel hoponko talare baben sonotledińạ. 52Onate okaṭakʼ disạm Israelkoń emako lạgidokʼkan ona do eken sạṅgiń khonem ńela menkhan onḍe do bam bolo ńama.”

Currently Selected:

Dosar Biboron 32: SBT

Highlight

Compare

Copy