Daniel 11

1Iń apnar hõ Madae Darjawesakʼ rajokʼ pạhil bochorre Mikayel goṛowae lạgitʼ iń senlena ariń daṛe ocokedea.

Utạr ar dạkhinren rapajko

2“Ńitokʼ iń okań metam ona do sạrige hoyokʼa. Parasre arhõ pea rapajko rajokʼa. Onko tayom ar mitʼṭen raj do eṭakʼkin khon ḍher kisạ̃ṛe hoyokʼa. Uni do acʼakʼ dhon duribko iạteye daṛe idikʼte Junạn rajosṭi upạrte sanamkoe udgạukoa. 3Unre mitʼṭen daṛean raje upelokʼa ar maraṅ daṛeteye rajokʼa; uni do acʼakʼ kusi lekae kạmiya. 4Ar uniye upelokʼ tayom uniyakʼ rajosṭi do rạpudokʼte pon hạṭińokʼtaea. Uniyakʼ rajosṭi do acʼren bõsrenkoakʼ tire do baṅ calakʼa; ar ona rajosṭiko okoeyakʼ tire calakʼa onko do lahaten raj leka daṛe do bako hoyokʼa, ente onkoakʼ rajosṭi do jarkharokʼte eṭakʼkoakʼ tire calakʼa.

5“Dạkhin secʼren raj do daṛeanicʼe hoyokʼa, menkhan uniren mitʼṭen subedar do uni khon hõ bạ̃ṛti daṛeye hoyokʼa ar mạlikiye calaoa. Uniyakʼ mạliki do maraṅ okocʼ mạlikige hoyokʼtaea. 6Ado thoṛa bochor tayom uni do utạr secʼren raj sãoteye gatekʼa. Ar dạkhin rajren hoponera do utạrren raj tulucʼ midokʼ lạgitʼe hijukʼa, menkhan uni hoponerawakʼ sopo reakʼ daṛe do baṅ tahẽ idikʼa, uni utạrren raj ar uniren hoponko hõ bako tahẽ idikʼa; menkhan uni raj hoponera ar uni soṅgeteko senen, uniren hopon ar uniye sãohaledeyicʼ, onko doko soprot ocokʼa.

7“Ar onako din tayom khange uni raj hoponera reakʼ rehetʼ reakʼ kahleko mod khon mitʼṭecʼ kahle do uni rajakʼ jaegare omon rakapʼa, uni do lạṛhại phạdko upạrteye hijukʼa, ar utạrren rajakʼ gaṛteye bolokʼa; ar onko upạrte lạṛhạikateye jitạukʼa. 8Uni do onkoren debotako, dul muṭhạn sanam boṅgako, rupạ ar sonako reakʼ damanakʼ jiniskoe luṭjoṅa ar Misorteye idiya. Ar thoṛa bochor lạgitʼ uni do utạrren raj upạrte jhãp emokʼe ikạ hataṛkakʼa. 9Ona tayom utạrren raj do dạkhin rajakʼ rajosṭiteye bolokʼa, menkhan uni do acʼakʼ disạmte ruạṛ calakʼ hoyokʼtaea. 10Uniren hoponko do lạṛhạiko ehoba, ar aema gadel lạṛhại phạdko jarwakoa, onko do banbạsi leka lạṛhại lạṛhạite dạkhin rajakʼ gaṛ hạbicʼko calakʼa.

11“Unre dạkhinren raj do edreteye oḍok hijukʼa ar utạrren raj upạrteye lạṛhạiya. Utạrren raj do maraṅ lạṛhại phạdkoe teṅgolekore hõ enhõ onko doko bhagao ocokʼa. 12Ar dạkhinren raj do lạṛhại phạdko bondikateye idiko tayom bạḍạiteye perejokʼa ar hajar hajar hoṛkoe gocʼkoa, enhõ uni do mucạtʼ hạbicʼ do bae ṭikạu tahena. 13Utạrren raj do pạhil lạṛhại phạdko khon arhõ maraṅ lạṛhại phạdkoe jarwakoa; ar thoṛa bochor tayom uni do maraṅ lạṛhại phạdko ar ḍher mal jalkoanteye laha idikʼa.

14“Ona jokhecʼ ḍher hoṛko do dạkhinren raj upạrteko teṅgona, ar amren hoṛko modren jor bokʼjor hoṛ doko teṅgona dorson reakʼ katha purạukʼ lạgitʼ; menkhan onko doko gurokʼa. 15Ona tayom utạrren raj do hecʼkate mitʼṭecʼ pạcrite esetʼ nagrahae gherao eseda ar onae ạidạrijoṅa. Ar dạkhinren lạṛhại phạdko do teṅgo daram reakʼ daṛege baṅ tahentakoa; onkoren bhage lạṛhại phạdko hõ onko upạrte bako teṅgo ṭarhao daṛeakʼa. 16Unre jhãp emokʼko do akoakʼ kusi lekako kạmiya; onko upạrte celege bako teṅgo daṛeakʼa. Uni do ṭhonok disạm upạrteye teṅgona ar ona do ekalte uni gobolokʼa. 17Uni do acʼakʼ goṭa rajosṭi reakʼ daṛe salakʼ onḍe hijukʼ lạgitʼe goṭaea ar dạkhinren raj sãoteye gatekʼa. Ar ona rajosṭi marao lạgitʼ uni do acʼren hoponera dạkhinren raj sãoteye baplayea, menkhan uniyakʼ goṭawakʼ do baṅ jo bahakʼtaea se jãhãn bhạlạige baṅ hoyokʼtaea. 18Ona tayom utạrren raj do sạṅgiń disạmko secʼe moneyakʼa ar aema disạmkoe dokhola, menkhan mitʼṭen subedar do uniyakʼ ona jitạukʼ reakʼ bạḍạitetʼe caba utạrtaea ar uniyakʼ hekʼnostage ạcur ruạṛaea. 19Inạ tayom uni do acʼakʼ disạm reakʼ gaṛteye ruạṛ hijukʼa, menkhan uni doe ńurokʼa; ar ńamge bae ńamokʼa.

20“Ar uniyakʼ jaegare okoe raje hoyokʼ uni do rajosṭi reakʼ ṭhonoktetʼ ruạṛ ạguiy lạgitʼ khajna ukʼṭhạukoe kolkoa. Menkhan thoṛa bochor bhitrirege uni doe marao utạrokʼa; noa maraokʼ do jãhãn edre se lạṛhại talate do baṅ hijukʼa.

21“Okoe do raj hoyokʼ reakʼ ạidạri bae em ocoakan nonkan mitʼṭen nihạ̃ticʼge uniyakʼ jaegare raje hoyokʼa. Ar hoṛko do khạtirjoma tinreko tahena unrege uni do soṛojontro talate rajosṭiye dokhol joṅa. 22Ar uni samaṅ khon lạṛhại phạdko doko laga ńir ocokʼa arko rạputʼ gejer ocokʼa ar bondobosren mạlik hõe rạputʼ gejer ocokʼa. 23Bondobos tayom uni raj doe bukʼlạua ar thoṛa hoṛkoakʼ goṛote ektiạriye hameṭ joṅa. 24Kisạ̃ṛ disạmrenko tinre khạtirjoma menteko hudisokʼa unrege uni do onko cetanre jhãpe ema ar uniren hapṛamko ar onko hapṛamkoren hapṛamko oka bako ceka daṛeakatʼ uni do onae kạmiya. Ar recʼ ạguwakʼ ar luṭakʼ jinisko ar dhon duribko uni do acʼren hoṛko talareye em hạṭińakoa. Uni do gaṛko dhaṅdhaser lạgitʼe soṛojontroya, menkhan ona do thoṛa din lạgitʼ hoyokʼa.

25“Uni do maraṅ lạṛhại phạdante dạkhinren raj upạrte acʼakʼ daṛe ar dile uskurtaea. Dạkhinren raj do maraṅ daṛean lạṛhại phạdkoanteye lạṛhạiya, menkhan uni upạrte oka soṛojontro hoyokʼ ona iạte bae teṅgo daram daṛeakʼa. 26Okoe do rajakʼ jomakʼ reakʼ hĩsko ńam onkoge uniko maraoea. Uniren maraṅ lạṛhại phạdko tahẽlenre hõ onko do ḍhergeko gocʼ ocokʼa. 27Ar nukin banar rajge bạṛicʼakʼ secʼkin mohnḍakʼa ar ṭebilre duṛupʼkate apan ạpin talare eṛe kathakin roṛa, menkhan onate bạkin jo bahakʼa, ente unkinakʼ jotowakʼ reakʼ mucạtʼ do niṭ akatʼ okterege hijukʼa. 28Utạrren raj do ḍher dhon-duribante acʼakʼ disạmteye ruạṛ calakʼa, menkhan uniyakʼ ontor do sonot bondobos birudre tahena. Uni do acʼakʼ kusilekae kạmiya ar ona tayom do apnarakʼ disạmteye ruạṛ calakʼa.

29“Niṭ akatʼ oktere uni do arhõ dạkhin disạm cetanre jhãpe ema, menkhan pạhil dom leka niạ dom do baṅ hoyokʼa. 30Ente Kitim reakʼ jahajko do uni upạrte hijukʼa ar uni doe as chuṭạukʼa. Unre uni do ruạṛkate sonot bondobos birudte acʼakʼ kusilekae kạmiya. Uni do ruạṛ hecʼkate okoe sonot bondobosko bạgi akatʼ onkoe moneyakoa. 31#Dan 9.27; 12.11; Mat 24.15; Mrk 13.14 Uni ṭhen khon kol ocoakan lạṛhại phạdko doko hijukʼa ar sonot ṭhạ̃i, ar aotan gaṛko bhonḍa ar din hilokʼ reakʼ samaṅokʼakʼko caba ocoya. Ona tayom onko do jarkharakʼ ujạṛakʼgeko bạisại oṭokakʼa. 32Ar bondobosko rạputʼetʼkan hoṛko do cĩkạ̃ṛ cĩkạ̃ṛ kathateye ạnḍicʼkoa; menkhan akoren Isorko baḍayedekan hoṛko do teṅgo kajak akanko tahena ar onako teṅgo darama.

33“Onko hoṛko modre okoekoakʼ bujhạu reakʼ daṛe menakʼtako onko do ḍher hoṛko cetʼakoa, enhõ thoṛa okte hạbicʼ onko talare ḍherkoge tarwaṛe ar seṅgel lepʼ, kạidạu ocokʼ ar luṭ ocokʼteko gurokʼa. 34Ar unre gurokʼko do thoṛa goṛoko ńamgea ar aema hoṛ do cĩkạ̃ṛ cĩkạ̃ṛ kathakoteko onko tulujokʼa. 35Ar ạkilanko modre adom adomko doko gurokʼa jemonko niphuṭ ocokʼa, arko pạṛchạ ocokʼ arko sapha ocokʼ mucạtʼ okte hạbicʼ, ente unhõ mucạtʼtetʼ do niṭ akatʼ okterege hoyokʼa.

36 # 2 Th 2.3,4; Sod 13.5,6 “Utạrren raj do acʼakʼ kusi lekae kạmiya. Uni do bạḍạiteye perejokʼa ar sanam debotako khone maraṅokʼa udugokʼa ar debotaren Isor upạrte hõ maraṅ maraṅ kathae roṛa; ar raṅgao ạuri cabakʼ hạbicʼ uni doe jo bahakʼa, ente okaṭakʼ ṭhik dohoakan ona do hoyokʼgea. 37Uni do acʼren hapṛamkoren debotako hõ bae hetaoakoa ar maejiukoren hạ̃sasicʼ debota hõ baṅ, uni do cele debotage bae hetaoakoa, ente sanamko cetanre acʼ do sorosicʼe udugokʼa. 38Onko bodolte uni do aotan gaṛkoren debotakogeye manotkoa; ar okoe debotako do akoren hapṛamko bako oromakatʼko onkoge uni do sona, rupạ, damanakʼ mạnik dhiriko ar sandeskoteye manotkoa. 39Uni do bidesren debotakoakʼ goṛote kajak kajak gaṛko acʼakʼ kusi lekae laṛcaṛa, ar jãhãege uniko aṅgoce onko doe manotkoa are maraṅkoa; ar onko do aema hoṛko cetanre mạliki cakʼlaokoe benaokoa, ar jumi jaega do damteye hạṭińakoa.

40“Mucạtʼ oktere dạkhinren raj do uni tulucʼe ropokʼa; ar utạrren raj do rãt gạḍiko, aswariko ar ḍher jahajante uni upạrte hoe bharḍo lekae hijukʼa. Uni do aema disạmko cetanre jhãpe ema ar banbạsi lekae ạtu saphakoa. 41Uni do ṭhonok disạmte hõe bolokʼa. Ar ḍher disạmko do ńurokʼa, menkhan goṭa Edom, Moab ar Amonren joto khon bhage hoṛko do uniyakʼ ti khon bańcaoko ńama. 42Ḍher disạm cetanre uni do acʼakʼ ektiạriye ḍher ocoytaea; ar Misor hõ uniyakʼ gobolre hijukʼa. 43Misor reakʼ sanam sona rupạ ar dhonko do uniyakʼ ạidạrire hijukʼa ar Libiạ ar Kusrenko do uni gobolreko hijukʼa. 44Menkhan purub ar utạr reakʼ khobor ńamkate uni doe torasokʼa ar edre iạte ḍher hoṛ gocʼko lạgitʼe oḍokʼ hijukʼa. 45Doreão ar mońj sonot buruko talare uni do acʼakʼ raj tạmbui bereda. Menkhan uni do acʼakʼ mucạtʼ secʼgeye mohnḍakʼa ar celege uni do bako goṛowaea.

Currently Selected:

Daniel 11: SBT

Highlight

Copy