Daniel 10

Hidekel gaḍa aṛere Danielakʼ dorson

1Parasren raj Koresakʼ rajokʼ tesarakʼ bochorre okoe do Beltesasare ńutum ocolen uni Daniel ṭhen mitʼṭecʼ katha sodorena. Katha do sạrikana ar ona do mitʼṭecʼ maraṅ kosṭo reaṅge. Mitʼṭecʼ dorson hotete uni doe bujhạu ocoyena. 2Ona jokhecʼ iń Daniel do pe hapta hạbicʼiń homor halaṅkeda. 3Ona pe hapta ạuri mucạdokʼ hạbicʼ jãhãn bhage jomakʼ do bạń jomleda, jel se darkha rasa hõ bạń cakha ạikạuleda ar sunum hõ bạń ojokʼana. 4Pạhil cando reakʼ bargel ponakʼ dinre iń do maraṅ gaḍa Hidekel aṛereń teṅgo akan tahẽkana. 5#Sod 1.13-15; 2.18; 19.12 Un jokhecʼ iń doń beṅgetʼ rakapʼketʼ khan mĩhĩ musnạ kicricʼ horokʼ akatʼ ar ḍanḍare khạṭi sona reakʼ totolakʼteye tol akan mitʼṭen hoṛiń ńelkeda. 6Uniyakʼ hoṛmo do Boidorjomuni leka, mẽtʼãhã do bijli leka, mẽtʼãhã do jolokʼkan mosal leka, ti-jaṅga do pạlis akatʼ tamba leka ar uniyakʼ aṛaṅ do ḍher hoṛkoakʼ sabad leka.

7Iń Daniel do eskarge ona dorsoniń ńelkeda; iń sãoten hoṛ do ona bako ńel ńamleda, menkhan onko do nunạkʼko botorena je, onko doko ńir okoyena. 8Onate iń eskarge ona dorson do ńeńeliń ehopʼena. Ińre jãhãn daṛege baṅ tahẽlena, ińakʼ mẽtʼãhã do keklesetʼentińạ ar iń doń laṅga idiyena. 9Ona tayom do uni hoṛakʼ kathań ańjom ńamkeda ar uniyakʼ katha ańjomtorage iń do otre acetge ombakʼ akaniń tahẽyena. 10Unre mitʼṭecʼ ti do ińe joṭetʼkedeń khan banar ti ar gunṭhite thar tharaoakʼ tulucʼe kaḍa ocokedińa. 11Uniye metadińạ, “E Isorren dulạṛiạ Daniel, iń okaṭakʼ katha lạiyam lạgitʼ ona do mońjte moneyakʼme. Ma beretʼme, ente iń do am ṭheniń kol ocoakana.” Uni noa kathae metadiń khan iń do thar tharaokʼ tulucʼ iń teṅgoyena.

12Uni do roroṛe ehopʼena, “E Daniel, alom botorokʼa, ente buj ńam lạgitʼ ar amren Isor samaṅre nindhạnokʼ lạgitʼ amakʼ monem lagaoketʼ pạhil hilokʼ khonge amakʼ kathako do ańjom akantama; ar iń do amakʼ kathako iạtegeń hecʼakana. 13#Sod 12.7 Menkhan Paras rajosṭiren mukhiyạ do bargel pạhil din hạbicʼe tạkicʼ daramledińa. Unre Mikayel ńutuman mukhiyạ serma goḍetkoren mitʼṭen do iń goṛowạń lạgitʼe hecʼena, ente iń do Paras rajko talare iń eskargeń tahẽkana. 14Ar ńitokʼ doń hecʼakana bujhạu ocome lạgitʼ darakan dinkore amren hoṛkore cetʼ hoyokʼa mente. Ente dorson do darakan dinko reakʼkangea.”

15Uni do tinre niạ kathae metadińạ unre iń doń tumbutʼ akan tahẽkana, ar ińakʼ mocare cetʼ kathage baṅ tahẽkana. 16Unre manwa leka ńelokʼicʼ uni serma goḍet, okoe do iń samaṅreye teṅgo akan tahẽkan, uni do ińakʼ luṭikine joṭetʼketʼtińạ, ar moca jhicʼentińte uniń metadea, “E ińren kĩsạ̃ṛ noa dorson iạte monre ạḍi dukiń ńameda ariń nijor idikʼkana. 17E ińren kĩsạ̃ṛ, iń doń amren gutikana, iń do cekate am sãote kathań roṛa? Ińakʼ daṛe do bạnukʼtińạ ar ińre sahẽtʼhõ bạnukʼa.”

18Unre manwa leka ńelokʼicʼ uni serma goḍet do arhõ ińe joṭetʼkedińa ar daṛeye emadińa. 19Uni do ińe metadińạ, “E Isorren dulạṛiạ, alom botorokʼa. Amakʼ suluk baṛe hoyokʼma. Diljoṅme ar daṛean hoyokʼme.”

Uni do iń sãote kathae roṛketʼ sãote iń do daṛe ńamketʼteń menkeda, “E ińren kisạ̃ṛ, ma roṛme, ente am do daṛem emadińạ.”

20-21Unre uni do ińe metadińa, “Amem baḍaea cetʼ lạgitʼ am ṭheniń hecʼakana? Sạriyakʼ puthire oka olakan ona baḍae ocome lạgitʼgeń hecʼakana. Parasren mukhiyạ upạrte lạṛhại lạgitʼ iń do usạrateń ruạṛ calakʼa ar ińiń calaolen tayom Junạnren mukhiyạ hõ lạṛhại lạgitʼe oḍok hijukʼa. Amren hoṛkoren mukhiyạ uni Mikayel chaḍa ar okoehõ uni upạrte teṅgo goṛowạńko do bạnukʼkoa.

Currently Selected:

Daniel 10: SBT

Highlight

Copy