Daniel 1
1
Daniel ar uniren pea gate (1.1—6.28)
Nebukadnesarakʼ dorbarre juạn koṛako
1 #
2 Raj 24.1; 2 Bõs 36.5-7 Jihudạren raj Jehoyakimakʼ rajokʼ tesarakʼ bochorre Babelren raj Nebukadnesar do Jerusalemte hecʼkate nagrahae gherao ạcurkeda. 2#2 Raj 20.17,18; 24.10-16; 2 Bõs 36.10; Jes 39.7,8 Probhu Isor do uniyakʼ tire Jihudạren raj Jehoyakime soprotkedea ar uni sãote Isorakʼ oṛakʼ reakʼ adomakʼ bhajanko hõe emadea. Ar ona bhajanko uni do Babelte acʼren debotawakʼ mundilre idikate onḍenakʼ khajańci oṛakʼreye dohokada.
3Tayomte raj do acʼren mukhiyạ cạkrạ Aspenase hukumadea jemon uni do Israelren raj gharońjrenko ar manotan gharońjrenko tala khon adom juạnkoe ạguko. 4Onko juạnko do ńelokʼte mońj, ạkilan, niphuṭ, cecetʼakʼte perecʼ ar raj dorbarre kạmi lạgitʼ lek lekako hoyokʼ. Aspenas doe hukum ocoyena jemon uni do onko juạnko Babel reakʼ pạrsi ar sahitto reaṅe cetʼako. 5Raj do acʼakʼ jomakʼ khon din hilokʼ reakʼ jomakʼ ar darkha rasa emako reakʼ hõe hukumkeda. Nonkate pe bochor cetʼako tayom onko do raj ṭhenko ạgu ocokʼa.
6Noko modre Jihudạ gusṭiren Daniel, Hananiạ, Misayel ar Asariạ takoko tahẽkana. 7Uni cạkrạkoren sordar do onkoakʼ nãwã ńutume dohoketʼtakoa; Daniel do Beltesasar, Hanaiạ do Sadrak, Misayel do Mesak ar Asariạ do Abed-nego ńutume emadea.
8Daniel do menkhan mone moneteye goṭakeda, rajakʼ jomakʼ ar darkha rasate apnar do bae besaphakʼa. Ar apnar jemon aloe besaphakʼ onate uni cạkrạkoren sordar ṭhene arojkeda. 9Isor do uni cạkrạkoren sordarakʼ monre Daniel lạgitʼ daya ar mãyãe ńam ocokeda. 10Tobe uni cạkrạkoren subedar do Daniele metadea, “Okoe ape lạgitʼ jomakʼ ar darkha rasae bebosta akatʼ uni ińren maharaj doń botorae kana. Uni do ape umerren eṭakʼ juạnko khon cedakʼ apeakʼ mẽtʼãhã do muline ńeltapea? Noate raj do ape iạte ińakʼ bohokʼe makʼ ńur ocoytińạ.”
11Uni cạkrạkoren subedar do Daniel, Hananiạ, Misayel ar Aasriạ noko jotonko lạgitʼ okoe hoṛe dohokede Daniel do uniye metadea, 12“Am do dayakate gel din amren guti baṛe biḍạu aṭkarkate ńeleme; am do eken aṛakʼ sakam ar ńũi lạgitʼ dakʼ emalem. 13Ona tayom rajakʼko jometʼ onko juạnko sãote aleakʼ mẽtʼãhã ạribạndhikate ńeltaleme ar oka lekam ńelle onkage amren ale gutiko sãote beoharme.” 14Onate uni doe rạjiyena ar gel din onkoe biḍạu aṭkarketʼkoa.
15Gel din mucạtʼre ńelena rajakʼko jometʼkan tahẽkan joto juạnko khon onko do arhõ mońj ar hoṛmowanko hoyakana. 16Unre uni hoṛ do rajakʼ jomakʼ ar darkha rasae ocokʼketʼte ona bodolte onko do aṛakʼ sakamge emakoe ehopʼena. 17Ar Isor do ạkilte, bidiạte, sahittote ar joto lekan bujteye perecʼketʼkoa ar bujhạu reakʼ daṛe hõe danatʼkoa; ar Daniel do sanam lekan dorson ar kukmũ reakʼ bhedko hõe bhaṅgao daṛeakʼkan tahẽkana.
18Ado raj samaṅre onko juạnko idiko reakʼ okte hoyen khan uni cạkrạkoren sordar do Nebukadnesar samaṅre onkoe idiketʼkoa. 19Raj do onko sãote katha roṛkateye bujhạu daṛeada je, Daniel, Hananiạ, Misayel ar Asariạ soman do okoe hõ bạnukʼkoa; onate noko pon hoṛ do rajakʼ kạmireko bahal ocoyena. 20Ạkil ar bud ar jotowakʼ kathakore raj do onko kuliketʼkoteye bujhạu daṛeada, onko do acʼakʼ goṭa rajosṭiren sanam gukʼniko ar ojhako khon hõ gel doboṛko sorosgea.
21Ar Daniel do Kores rajakʼ rajokʼ pạhil bochor hạbicʼ raj kạmire bahal akane tahẽyena.
Currently Selected:
Daniel 1: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
