1 Rapajko 3
3
Ạkil ńam lạgitʼ Solomonakʼ koejoṅ
(2 Bõsbudạ 1.3-12)
1Solomon do Misorren raj Pharaoren hoponerae baplakedete uni tulucʼ gatekʼ reakʼe ehopʼkeda. Solomonakʼ raj gaṛ, Probhu Isorakʼ oṛakʼ ar Jerusalem beṛhaete pạcri ạuriye sạt hạbicʼ acʼren bạhu do Dạudakʼ nagrahareye dohokedea. 2Ar hoṛko do unrehõ than boṭkocʼkore akoren janwarkoko dãṛẽyetʼko tahẽkana, ente un hạbicʼ hõ Probhu Isor dewa sewawae lạgitʼ jãhãn oṛakʼ hõ baṅ benao akan tahẽkana. 3Solomon do Probhu Isore dulạṛedekan tahẽkana, onate acʼren apattetʼ Dạudakʼ hukum lekageye senokʼkan tahẽkana; menkhan uni do than boṭkocʼkore janwarkoe dãṛẽyetʼko tahẽkana ar dhupe jeretʼetʼ tahẽkana.
4Mitʼdin raj do janwar samaṅko lạgitʼ Gibeonteye senlena, ente dãṛẽ samaṅko lạgitʼ onḍenakʼ than boṭkocʼge maraṅ utạrakʼ tahẽkana. Ar Solomon do onḍe mitʼ hajar janwarkote jeredokʼ samaṅokʼakʼe samaṅkeda. 5Gibeonre ńindạ jokhecʼ Probhu Isor do kukmũ talate Solomon ṭhene sodorena. Isor do uniye metadea, “Iń ṭhen okam khoj ona reakʼ jotowakʼge amiń emama.”
6Unre Solomone roṛ ruạṛkeda, “Ińren ạpuń amren guti do ḍher pạtiạrem udukʼ akadea, ente uni do amre pạtiạre tahẽkana ar dhorom ar soṛageye tahẽkana. Teheń siṅghạsonre duṛupʼ lạgitʼ am do mitʼṭen hoponem emakawadea ar nonkate amakʼ asambheṛ pạtiạrem udukʼae kana.
7“E ińren Probhu Isor, ińren ạpuń Dạudakʼ jaegare ńitokʼ do amren guti rajem hoyoco akadea. Menkhan ińakʼ umer do komgea, onate bạń baḍaea cetʼ lekate ińakʼ dạyikiń palona. 8Ar amren guti do nonḍe amem bachao akawan hoṛko talarege menaea. Ar onko do nonkan mitʼṭecʼ maraṅ jạtren kanako, one onko do ohoko lekha caba daṛelen. 9Onate amren hoṛko ḍanṭaoko lạgitʼ okaṭakʼ ṭhik ar okaṭakʼ do bhul kan ona baḍae lạgitʼ amren gutiyakʼ ontorre bujhạu lạgitʼ daṛe emaeme; ente amren noko maraṅ jạtrenko ḍanṭaoko reakʼ daṛe do okoeyakʼ menakʼa?”
10Solomon noae khojketʼte Probhu Isor do ạḍiye kusiyena. 11Isor do uniye metadea, “Am do ḍher din bahaokʼ reakʼ, se am lạgitʼ dhon-durib, se amren bạirikoakʼ gujukʼ hõ bam khojlakʼa menkhan mońjte bicạr chinḍạu reakʼ bujgem khojakada, 12Onate am okaṭakʼem khojakatʼ onageń emama. Iń do amakʼ ontorre nonkan ạkil ar bud bicạr reakʼ daṛeń emama ńelme noa lahare nonka do celege bako tahẽkana ar tayomte hõ onka do ar bako hoyokʼa. 13Ona chaḍa am oka bam koeyakatʼ ona hõń emam kana. Iń do nonkan dhon-durib ar manotiń emama one am lahaten cele rajakʼge baṅ tahẽkan ar am tayom hõ baṅ tahentakoa.” 14Amren ạpum Dạud leka ińakʼ sanam niạm ar hukumkom manao idi ar ińakʼ hortem taṛam enḍekhan ḍher diniń bahao ocomea.” 15Inạ tayom Solomon doe ebhenena are bujhạukeda, uni doe kukmũkan tahẽkana.
Tayomte Solomon do Jerusalemteye ruạṛ calaoena ar Probhu Isorakʼ goha tạmbu samaṅreye teṅgoyena ar ạḍi utạr janwarkote jeredokʼ samaṅokʼakʼ ar sulukren samaṅokʼakʼe samaṅkeda. Ar ona tayom do acʼren sanam kạmiyạko lạgitʼ mitʼṭecʼe bhojkeda.
Solomonakʼ ạkilanakʼ bicạr
16Mitʼdin barea kusumbi maejiu do raj ṭhenkin hecʼena. 17Unkin modre mitʼ hoṛ doe menkeda, “E ińren mạlik, ạliń do mitʼ oṛakʼrege liń tahẽnkana. Ar onḍe liń tahẽkanre ińren do mitʼṭen koṛa gidrạń janamkedea. 18Ińren gidrạwakʼ janam pe din tayom nui maejiuren hõ mitʼṭen koṛa gidrại hoyentaea. Ona oṛakʼre do ar celege bako tahẽkana, eken ạliń bar hoṛge liń tahẽkana.
19Ńindạ jokhecʼ nui maejiu do acʼren gidrại ten gocʼkedetaea. 20Ar tala ńindạ amren kạ̃ṛmĩ do tinreń jạpitʼ akatʼ tahẽkana, unre uni do beretʼkate ińren gidrạ hataokate acʼakʼ hạmbutʼreye dohokedea ar acʼren gocʼicʼ gidrạ do ińakʼ hạmbutʼreye doho oṭokadea. 21Ado ạuri aṅga marsalokʼre ińren gidrạ do toa nunuwae lạgitʼ iń beretʼen khan gidrạ do gocʼgeń ńelkedea. Ar setakʼ marsalen khan mońjteń ńelkedea uni do ińren gidrạ doe baṅkana.”
22Unre eṭakʼ maejiu doe menkeda, “Baṅ, baṅ, jiwetʼ gidrạ doe ińren kana ar gocʼicʼ do uniren.”
Menkhan pạhilicʼ maejiu do ạḍi murukteye menkeda, “Baṅa, gocʼicʼ doe amren kana ar jiwetʼicʼ doe ińren kana. Nonkate unkin do raj samaṅrege jhogṛakʼ kin ehopʼena.
23Raje metatʼkinạ, “Nuiye meneda, ‘ińren gidrạ doe jiwetʼgea.’ Ar hạni hõe meneda, ‘baṅa, amren gidrạ doe gocʼgea ar ińren doe jiwetʼicʼ kana.’ ”
24Unre raje menkeda, “Mitʼṭecʼ tarwaṛe ạguwạńpe.” Ar raj do mitʼṭecʼ tarwaṛeko ạguadea. 25Uni doe hukumkeda, “Jiwetʼicʼ gidrạ do talate paṛagepe ar nukin hạṭiń ạkinpe.”
26Ado okoeren gidrạ jiwetʼgeye tahẽkan uni do gidrạ lạgitʼ mon khad badaoentaete raje metadea, “E ińren mạlik, nehõram kạnạń, gidrạ do alogem gojea; unige emaeme baṛe.”
Menkhan eṭakʼ maejiu doe menkeda, “Uni do ińren hõ baṅ ar amren hõ aloe hoyokʼma. Uni do talate paṛage hoyokʼa.”
27Unre raj doe hukumkeda, “Jiwetʼicʼ gidrạ do pạhilicʼ maejiu emaepe. Ar alope paṛagea; ente uni kangeae uniren eṅgattetʼ do. ”
28Rajakʼ bicạr ańjomkate Israelren sanamkoakʼ monre raj cetanre botor caṛhaoena, ente onkoko ńelkeda, bicạr chinḍạu lạgitʼ Isor do monre ạkile emakawadea.
Currently Selected:
1 Rapajko 3: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
