1 Rapajko 21
21
Nabatakʼ darkha bagwan
1Inạ tayom Jisriyelren Nabatakʼ darkha bagwan khạtirte mitʼṭecʼ ghoṭna hoyena. Niạ darkha bagwan do Jisriyelren Samariạ rajakʼ Ahabakʼ raj doṅgol aṛerege tahẽkana. 2Ahab do Nabate metadea, “Amakʼ darkha bagwan imạńme ona do sobji bagwaniń benaoa, ente ona do ińakʼ raj doṅgol aṛerege menakʼa. Ona bodolte iń do arhõ bhage darkha bagwaniń emama arem menkhan ona reakʼ ṭhik dam hõń emama.”
3Menkhan Nabate roṛ ruạṛkeda, “Ạpuń ar goṛomiń ṭhen khoniń ńamakatʼ sompotti amiń emam ona Probhu Isor do aloe hoyocoyma.”
4“Ińren ạpuń ar goṛomiń ṭhen khon ńamakʼ sompotti do bạń em daṛeama.” Ahab do Jisriyelren Nabatakʼ niạ katha iạte acʼakʼ mẽtʼãhãe kurkunḍucʼketʼtaea ar oṛakʼteye calaoena. Uni do aṭetʼre eṭakʼ secʼ samaṅkateye giticʼ hapeyena ar cetʼhõ bae jom-ńũleda.
5Niạ ńelte acʼren bạhu Isebel do uniye kulikedea, “Cedakʼem mon duk akana? Cedakʼ bam jom ńũiyeda?”
6Raj do uniye roṛ ruạṛadea, “Jisriyelren Nabatiń metade tahẽkana uniyakʼ darkha bagwan jemon iń ṭhene ạkhriń ar ona bodolte eṭakʼ mitʼṭecʼ darkha bagwan hõ emaeyiń menleda, menkhan uni do acʼakʼ ona darkha bagwan imạń bae rebenlena.”
7Unre uniren bạhu Isebel doe menkeda, “Am do cetʼ Israelkoren raj dom baṅkana? Ma beretʼme, ar jom-ńũiyme, ar rạskạkʼme. Jisriyelren Nabatakʼ darkha bagwan do ińiń emama.”
8Unre Isebel do Ahabakʼ ńutumte olakʼ ciṭhiko olkate ona cetanre Ahabakʼ chapkoe emada ar Nabat nagrahare girobasokʼ kan murubbiko ar lekman hoṛko ṭhene kolkeda. 9Uni do ona ciṭhireye olkeda, “Ape do upạs lạgitʼ lại sodorpe ar hoṛko talare Nabat do laha reakʼ mitʼṭecʼ mońj utạrakʼ ṭhạ̃ire duṛupʼakʼpe emaea. 10Ar uni samaṅ reakʼ duṛupʼakʼ ṭhạ̃ire do barea bạṛicʼ hoṛpe duṛupʼkinạ. Unkin do niạ mente uni upạrte gohakin emma, uni do Isor ar raj upạrte bemanotakʼ kathae roṛ akada mente. Ar ona tayom onḍe khonpe or oḍokea ar dhiritepe tiń gojeya.”
11Onate Nabatakʼ nagraharen murubbiko ar lekman hoṛ do Isebelakʼ olakʼ ciṭhi lekako kạmikeda. 12Onko do upạs reakʼko lại sodorketʼte Nabat do hoṛko talare mitʼṭecʼ mońj utạrakʼ ṭhạ̃ireko durupʼkedea. 13Ar ona tayom barea dusṭami hoṛ do hecʼkate Nabat samaṅrekin duṛupʼente uni upạrte niạ gohakin emkeda, uni do Isor ar raj upạrte bemanotakʼ kathae roṛ akada. Ona tayom hoṛko do nagraha bahrete Nabatko or oḍok idikedete dhiriteko tiń gocʼkedea. 14Ona tayom onko mukhiyạko do Isebel ṭhen khoborko kolkeda, Nabat do dhiriteye tiń gocʼ ocoakana.
15Ar Nabat do dhiriteye tiń gocʼ ocoakana menteye ańjomketʼ khan Isebel do Ahabe metadea, “Do calakʼme, ar Jisriyelren Nabatakʼ darkha bagwan okaṭakʼ do am ṭhen ạkhriń bae menletʼ ona hatme. Ente uni do ar jiwetʼ do bạnuiya, uni doe gocʼena.” 16Nabatakʼ gujukʼ reakʼ katha ańjomkate Ahab do darkha bagwan dokhol lạgitʼe senena.
17Unre Tisbiren Eliạ ṭhen Probhu Isorakʼ niạ katha sodorena, 18“Samariạre Israelren Ahab raj sãote ńapamokʼ lạgitʼ oḍok calakʼme. Uni do ńitokʼ Nabatakʼ darkha bagwanre menaea. Uni do ona hatjoṅ lạgitʼ onḍeye sen akana. 19Unim metawea, Probhu Isore meneda, ‘am do cetʼ mitʼṭen hoṛ gocʼkate uniyakʼ sompotti bam dokhol lạgidokʼ kana?’ Ona tayom unim metaea, Probhu Isore meneda, ‘Setako okare Nabatakʼ mãyãmko caṭokʼ jom akatʼ onḍege onko do amakʼ mãyãm, hẽ amakʼ mãyãm hõko caṭokʼ jomtama.’ ”
20Ahab do niạ katha ańjomkate Eliại metadea, “E ińren bạiri, niạ dhao dom ńam akadińạ.”
Eliại roṛ ruạṛkeda, “Hẽ, ńam akatʼmegeạń, ente Probhu Isorakʼ mẽtʼre oka bạṛicʼakʼ kan ona onkae lạgitʼge am dom kiriń akana. 21Onate Probhu Isore meneda, ‘iń do am cetanre muhinkoń ạguiya. Ariń marao giḍikama. Golamge cetʼ sạdhinge cetʼ am bõsren mitʼke mitʼ herel hoṛ doń marao cabakoa. 22Amren bõsko do Nabatren hopon Jerobiam ar Ahiạren hopon Basakʼ bõsren lekań hoyocoytakoa, ente am do ińakʼ pitem caṛhao ocoakatʼtińạ ar Israelkom kại ocoakatʼkoa. 23#2 Raj 9.36 Ona chaḍa Isebel reaṅ hõń meneda, Jisriyel reakʼ bhit ṭhen uni do setako jomea. 24Amren okoeko hoṛ nagrahareko gujukʼ onko do seta ṭhenko jom ocokʼa ar okoe ṭạnḍireko gujukʼ onko do cẽṛẽko ṭhenko jom ocokʼa.’ ”
25Bạhuttetʼakʼ uskurte Probhu Isorakʼ mẽtre okaṭakʼ bạṛicʼakʼ kan onage kạmi lạgitʼ Ahab doe ạkhriń ocoakan tahẽkana. Uni leka ar okoehõ nonka do bako kạmiakada. 26Israelko samaṅ khon Probhu Isor do okoe Amorikoe laga ńirletʼko onko leka boṅga murhutʼkoe pujạwakote bạṛicʼakʼe kạmiyetʼ tahẽkana.
27Ahab do Probhu Isorakʼ katha ańjomkate acʼakʼ kicricʼe oṛecʼketʼtaea ar gõṛẽ kicricʼe horokʼketʼte upạse ehopʼena. Uni do gõṛẽ kicricʼ horokʼ kategeye giticʼkokʼ kan tahẽkana ar mạ̃hir monteye dãṛã baṛaekan tahẽkana.
28Unre Probhu Isor do Tisberen Eliại metadea, 29“Ńeleme Ahab do iń samaṅre cetʼ lekae nindhạn akana! Uniye nindhạn akante uniyakʼ jionre niạ muhin do bạń ạguiya, menkhan uniren hoponakʼ jionre ar uniyakʼ bõsko cetanreń paṛao ocoya.”
Currently Selected:
1 Rapajko 21: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
