1 Rapajko 20
20
Benhadad do Samariại akromonetʼkan
1Aramren raj Benhadad do acʼren sanam lạṛhại phạdkoe jarwaketʼkoa. Uni do pegel bar rapajko ar ạḍi utạr sadomko ar rãt gạḍiko soṅgekate Samariạ akromon lạgitʼe gherao ạcurkeda. 2Uni do thoṛa hoṛko nagrahateye kolkatʼkote Israelren Ahab raj niạ kathae baḍae ocokedea, “Benhadade meneda, 3‘amakʼ sona ar rupạ do ińakʼ kana, ar amren napae napae bạhuko ar gidrạko hõ ińren kanako.’ ”
4Israelren raj doe roṛ ruạṛkeda, “Ińiń meneda, ińren mạlik maharaj, am okam menetʼ ona do ṭhikgea. Iń ar ińakʼ jotowakʼge amakʼ kangea.”
5Tayomte onko hoṛ do Ahab ṭhen arhõ ruạṛ hecʼenteko menkeda, “Benhadade meneda, ‘amakʼ sona ar rupạ, bạhuko ar gidrạko emạń lạgitʼ iń do hoṛ iń kolletʼkoa. 6Menkhan gapa niạ oktere ińren gutiko am ṭheniń kolkoa. Onko do amakʼ raj oṛakʼ ar amren gutikoakʼ oṛakʼreko sendraea ar okako jinis do amakʼ mẽtʼre damanakʼ kan ona jotoko ạgu daraea.’ ”
7Unre Israelren raj do disạmren sanam murubbiko hohoatʼkoteye metatʼkoa, “Ńelpe, nui hoṛ do bạṛicʼ lạgitʼe kurumuṭukana, ente uni do ińren erako gidrạko ar sona-rupạkoń emae lạgitʼe dạbiyetʼ kana ar iń hõ ona emae reakʼ iń hẽkʼ akawadea.”
8Unre murubbiko ar sanam hoṛko menkeda, “Uniyakʼ katha do alom ańjomtaea ar oka dạbiteakʼ hõ alom manaotaea.”
9Onate Ahab do Benhadadren hoṛkoe metatʼkoa, “Ińren mạlik maharajpe metaea, uniyakʼ pạhil dạbiteakʼ lekate jotowakʼgeń kạmiya, menkhan dosarakʼ dạbiteakʼ do bạń purun daṛeataea.” Ar hoṛko do onage Benhadadko lạiyadea.
10Benhadad do unre Ahab ṭhen niạ sombate kolkeda, “Ińren sanam hoṛko mimitʼ muṭkate emako leka dhuṛi hõ jodi Samariạre tahentam enḍekhan debotako do ińko sạjạyińma ar ona do ạḍi bạṛicʼ sạjạige.”
11Israelren raje menkeda, “Unipe metawaea, ‘okoe hoṛ tarwaṛeante ńit hõ lạṛhạire bae pheḍakan uni do lạṛhạire jitạukate ruạṛ hecʼakan hoṛ leka aloe phulạukʼ ma.’ ”
12Benhadad ṭhen niạ khobor tinre seṭerena unre uni ar eṭakʼ rajko do tạmbure bubulakʼko ńuńukan tahẽkana. Uni do acʼren hoṛkoe hukumatʼkoa, “Jhãp em lạgitʼ sapṛaokʼpe.” Onate onko do nagraha akromon lạgitʼko sapṛaoena.
Ahab ṭhen Benhadade bhagao ocoyen
13Inạ okte Israelren Ahab raj ṭhen mitʼṭen nạbi hoṛ do hecʼkate niạ kathae lạikeda, “Probhu Isore meneda, ‘am do cetʼ onko maraṅ lạṛhại phạdkom ńeletʼko kangea? Iń do teheńge amakʼ tire onkoń jimạkoa ar onatem baḍae daṛeakʼa, iń kangeạń Probhu Isor do.’ ”
14Ahabe kuliyana, “Menkhan okoe hotete uni doe onkaea?”
Nạbi doe roṛ ruạṛkeda, “Probhu Isore meneda, eṭakʼ eṭakʼ ṭoṭharen disạm cakʼlaoko tabere okoe lạṛhại juạnko menakʼko onkoge onako onkaea.”
Ahabe kuliyana, “Lạṛhại do okoeye ehopʼ lahaya?”
Nạbiye roṛ ruạṛkeda, “Amgem ehopʼ lahaya.”
15Ahab do niạ katha ańjomkate eṭakʼ eṭakʼ disạm cakʼlaoko taberen lạṛhại juạnkoe jarwaketʼkoa. Onate onko do barsae pegel bar hoṛko hoyena. Ar ona tayom uni do Israelren sanam lạṛhại phạdko mitʼ ṭhene jarwaketʼko khan onko do eae hajar lạṛhại phạdko hoyena. 16-17Onko do tikin okteko oḍok hecʼena. Ar eṭakʼ eṭakʼ ṭoṭharen disạm cakʼlaokoren onko lạṛhại juạnkoge pạhilteko oḍok calaoena.
Benhadad ar uni sãoten pegel bar rapajko do ńu bulkatere hõ bubulakʼko ńuńukan tahẽkana. Ona jokhecʼ Benhadad do khoj khobor hatao lạgitʼ okoe hoṛkoe kolletʼko onko do uniko metadea, “Samariạ khon hoṛko oḍok hijukʼ kana.”
18Uni doe menkeda, “Sulukokʼ lạgitʼko oḍok hecʼakanre hõ jiwetʼtepe sapʼkoa, ar lạṛhại lạgitʼko oḍok hecʼakanre hõ jiwetʼtepe sapʼkoa.”
19Ar inạkʼtege onko lạṛhại juạnko do ako tayomreko tahẽkan lạṛhại phạdante akromonko ehopʼena. 20Ar mitʼke mitʼ tạkicʼ daram hoṛko gocʼketʼkoa. Ona ńelte Aramrenko doko dạṛkeda ar Israelko do onkoko khudạu idiketʼkoa. Menkhan Aramren raj Benhadad do acʼren adom aswariko soṅgekate sadomre decʼkateye dạṛkeda. 21Israelren raj doe laha idiyente sarecʼ sadomko ar rãt gạḍikoe maraoketʼtakoa ar Aramrenkoakʼ ạḍiye loksanketʼ takoa.
22Tayomte uni nạbi do Israelren raj ṭhen hecʼkateye menkeda, “Amakʼ daṛe do ḍhertam ar cetʼ cekae hoyokʼtama ona hudisokʼme, ente Aramren raj do kalom arhõe akromonmea.”
23Aram rajren gutiko hõ niạ sopolha rajko emadea, “Onkoren debotako do bururen debota kanako, onate onko do abo khon hõko daṛegea. Menkhan onko sãote bilạn ṭạnḍire bon lạṛhại enḍekhan khạṭige onko do bon bhagao daṛeakoa. 24Am do mitʼṭecʼ kạmime. Rapajko ocokʼkate onkoakʼ jaegare subedarko bahalkom. 25Ona chaḍa okoe lạṛhại phạdko gocʼentam onkage arhõ lạṛhại phạdko benao rakapʼkom, sadom bodolte sadom ar rãt gạḍi bodolte rãt gạḍi. Enḍekhan abo do bilạn ṭạnḍire Israelko sãote lạṛhạire bon jitạukʼa. Ar unre khạṭige onko khon do daṛeanko bon hoyokʼa.” Uni do onkoakʼ kathateye rạjiyena ar onka lekae kạmikeda.
26Dosar bochor Benhadad do Aramrenkoe jarwaketʼkote Israelko sãote lạṛhại lạgitʼ Aphekteye rakapʼ calaoena. 27Ar Israelko hõko jarwayena. Ar onkoakʼ jomakʼko reakʼ bebosta hoyen khan onko do Aramrenko sãote lạṛhại lạgitʼko oḍok hecʼena. Ar Aramrenko samaṅreko ḍerayena. Unre onko ńelte ako do barea huḍiń merom palren lekako hudisena, ente Aramrenko do goṭa disạmko chạplạu esetʼ akatʼ tahẽkana.
28Unre Isorren mitʼ hoṛ do hecʼkate Israelren raje metadea, “Probhu Isor do niạ kathae meneda, ‘Aramrenko doko hudiseda Probhu Isor doe bururen Isor kana, bilạn ṭạnḍiren doe baṅkana; ona iạte iń do onko maraṅ lạṛhại phạdko amakʼ tireń jimạkoa, ar nonkatepe baḍae daṛeakʼa je, iń kangeạń Probhu Isor do.’ ”
29Eae din hạbicʼ onko do mohnḍa muhnḍi ḍera akangeko tahẽyena. Ar eae din hilokʼre onko do lạṛhạiko ehopʼena. Ar Israelko do mitʼ dinre mitʼ lakh Aramren lạṛhại phạdkoko gocʼketʼkoa. 30Ar sarecʼ lạṛhại phạdko do Aphekteko dạṛkeda ar onḍe onkoren bargel eae hajar lạṛhại phạdko cetanre bhit dasao ńurena. Ar Benhadad do onḍeye dạṛketʼte oṛakʼ bhitri reakʼ mitʼṭecʼ kandhareye okoyena.
31Benhadadren kạmiyạko do uniko metadea, “Ńelme, alele ańjomakada Israelren rapajko do dayawanko kanako. Dela, abo do gõṛẽ kicricʼ horokʼkate ar bohokʼre baber reakʼ binḍi tolkate Israelren raj ṭhen bon calakʼa. Hoedaṛeakʼa uni do jomakʼte jiwiye rukhiyạitama.”
32Onko do gõṛẽ kicricʼ horokʼkate ar bohokʼre baber reakʼ binḍi tolkate Israelren raj ṭhen senkateko menkeda, “Amren guti Benhadade meneda, jemon dayakate jiwetʼem dohoye.”
Raje roṛ ruạṛkeda, “Uni do cetʼ ńit hõ jiwetʼge menaea? Uni doe ińren boeha kana.”
33Onko hoṛ do bhagegea menteko hudisketʼte usạrako mengotʼkeda, “Hẽ, Benhadad do khạṭige amren boeha kanae.”
Raje menkeda, “Do senkate ạguiyepe.” Ado Benhadade oḍokʼ hecʼen khan Ahab do acʼakʼ rãt gạḍireye decʼkedea.
34Benhadade menkeda, “Amren ạpum ṭhen khon ińren ạpuń okako atoye hatakatʼ ona do amiń ruạṛama. Ińren ạpuń cetʼleka Samariạre bajarkoe bạisạuletʼ onkage amhõ Damesek reakʼ eṭakʼ eṭakʼ jaegakore bajarkom bạisạu daṛeakʼa.”
Ahabe menkeda, “Mitʼṭecʼ bondobos lekate am doń aṛakʼmea.” Ar noa menkate uni do Benhadad sãote mitʼṭecʼ bondobose bandhaokeda are aṛakʼkadea.
Ahabakʼ dos
35Probhu Isorakʼ hukumte cela-nạbiko modren mitʼ hoṛ do acʼren sãotenicʼe metadea, “Dayakate daleńme baṛe.” Menkhan uni hoṛ do bae rạjilena.
36 #
1 Raj 13.24
Unre uni nạbiye menkeda, “Am do Probhu Isorakʼ katham bebataoketʼte iń ṭhen khonem calakʼ são sãote mitʼṭen dhạcri kul do ame gocʼmea.” Ar uni hoṛe calaoen torage mitʼṭen dhạcri kul do uni ńel ńamkedeteye gocʼkedea.
37Uni nạbi do ar mitʼ hoṛe ńamkedeteye metadea, “Dayakate daleńme.” Ar uni hoṛ do uniye dal ghạlkedea. 38Ona tayom uni nạbi do hor aṛere teṅgokate raj lạgitʼe koyokʼ hor akatʼ tahẽkana. Uni do acʼakʼ bohokʼe dạhṛiketʼtaete mẽtʼhãe danaṅketʼtaea ar acʼakʼ bhese bodolkeda. 39Ar raj do ona horteye calakʼkan tahẽkan jokhecʼ nạbi do raj hohoadeteye metadea, “Amren guti do lạṛhại talareń senlena. Unre mitʼṭen hoṛ do mitʼṭen bondi akade hoṛ ạgukedeteye metadińạ, ‘nui hoṛ horho hataṛeme. Are atʼlen khan uniyakʼ jiwi bodolte amakʼ jiwi calakʼtama, ar baṅ khan pegel are keji rupạ do juribana lekate emokʼ hoyokʼtama.’ 40Menkhan amren guti do kạmi reakʼ bhiṛreye tahẽkanre uni do okate coe calaoena.”
Unre Israelren raje menkeda, “Ona sạjạige amre paṛaokʼa. Amakʼ mocatege ona dom menakada.”
41Unre uni nạbi do usạra mẽtʼhãe ńel ocoyente bohokʼ khon kicricʼe ocokʼkeda ar Israelren raj do nạbiko modren mitʼhoṛ kanae menteye oromkedea. 42Uni nạbi do raje metadea, “Probhu Isor do niạ kathae meneda, ‘okoe do ḍahaokʼ maraokʼ reakʼ sarapiń emade tahẽkan am do unim aṛakʼkedea. Onate uniyakʼ jiwi bodolte amakʼ jiwi ar uniren hoṛko bodolte amren hoṛkoakʼ jiwi hataokʼa.’ ” 43Onate Israelren rajakʼ mẽtʼãhã do mulinetaea ar edrete acʼakʼ raj dolan Samariạteye calaoena.
Currently Selected:
1 Rapajko 20: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
