मत्ती 26
26
येसुत सेत्परी तम् डीःबल
(मर्कुस् १४:१-२; लुका २२:१-२; युहन्न ११:४५-५३)
1येसुचे चु जम्मनो तम्मा लोप्जेत्प बीसेम् र्हङ्की डबमात सुङ्ज्यी, 2“एङ्यीमाचे स्येःबलनो मुब, देरेम् ङ्य्हीरेत् लीप्चे नीस्तार् पर्ब खस्ये मुब, ओसेम् म्हीइ ज क्रुस्री च्योबरी सोप्तीस्ये मुब।”
3हुजु बेलोरीनो गोदोब्न्हङ्की ङ्हच्छ्यङ् लम्बु कैयाफाइ दर्बार्री ङ्हच्छ्यङ् लम्बुमातेङ् म्हीमाकी एल्डर्मा र्हुब् तज्यी। 4हुजुरी थेङ्यीमाचे येसुत खुसुक्ले चुङ्ज्यीम् सेत्पे तम् डीःज्यी। 5ओसेम् थेङ्यीमाचे पङ्ज्यी, “तर नीस्तार् पर्बइ बेलोरी चु लक् स्य्हेङ्ब अत, अय्हीन् पङ्सम् म्हीमान्हङ् खइलबइल तस्ये मुब।”
बेथानीयारी येसुइ क्ररी अत्तर् फोर्बल
(मर्कुस् १४:३-९; युहन्न १२:१-८)
6येसु बेथानीया पङ्बे ग्लाकी सीमोन् पङ्बे पुन् स्यप्पे म्हीइ दीम्री मुबल। 7येसु स्य्हेःब सोल्बरी स्य्हुःबे बेलोरी अमकोल गी ङोर्थङ् खबे य्हक्को सेइ फाबे छ्युकु पोङ्री#२६:७ पोङ्री- चु पोङ्मी थो गीइ युङ्बचे स्य्हेङ्बल य्हीन्ब, चुत अलबास्टर पङ्ब। बज्यीम् खज्यी, ओसेम् जम्मनो छ्युकु थेङ्की क्ररी तेपीन्ज्यी। 8चु म्रङ्ज्यीम् डबमात बोमो रप्ज्यी, ओसेम् थेङ्यीमाचे पङ्ज्यी, “चोत्ते छ्युकु तले खेरो ख्लाबल? 9चु य्हक्को टङरी चुङ्ज्यीम् प्रङ्नमात पीन्सम् तस्येल।”
10थेङ्यीमाकी चु तम् थ्येःज्यीम् येसुचे सुङ्ज्यी, “तले एङ्यीमाचे चु अमकोलत दुख पीन्बल? चु अमकोलचेम् ङइ लागीरी ज्यबे लक् गी स्य्हेङ्बल मुब। 11प्रङ्नमाम् एङ्यीमातेङ् खेमा पङ्लेनो बक्च्य तब, तर ङ खेमा पङ्लेनो एङ्यीमातेङ् बक्च्य तस्ये अरे। 12चु अमकोलचे ङोर्थङ् खबे छ्युकु ङइ ल्हीःरी तेपीन्ज्यीम् ङइ ल्हीःत दुर्सरी थेन्बे लागीरी ङोन्ग्यम्नो टोप् स्य्हेङ्बल मुब। 13ङ एङ्यीमात देमेन्नो पङ्ब, जम्बुलीङ्की खजु-खजु ग्लारी चु ज्यबे सम्तर् स्येत्प, हुजु ग्लामारी चु अमकोलचे स्य्हेङ्बे लक्एनो व्हल् लस्ये मुब।”
येसुत चुङ्पीन्बरी यहुदा डीःबल
(मर्कुस् १४:१०-११; लुका २२:३-६)
14हुजु लीप्चे चुङ्ङ्य्ही डबमान्हङ्की यहुदा इस्करीयोत् पङ्बे डब गीम् ङ्हच्छ्यङ् लम्बुमाज ङ्यीज्यी, 15ओसेम् पङ्ज्यी, “ङचे येसुत एङ्यीमाकी यारी तनले चुङ्पीन्ज्यी पङ्सम् ङत एङ्यीमाचे ता पीन्ब?” ओसेम् थेङ्यीमाचे थेत म्हुइकी डबल् खल् गीस्यी च्यी#२६:१५ म्हुइकी डबल् खल् गीस्यी च्यी- म्हुइकी डबल् खल् गीस्यी च्यी म्ही गील ल ङ्हइ म्हेलतेङ् बरबर् तब। पीन्ज्यी। 16हुजु बेलो य्हङ्से यहुदाचे येसुत चुङ्पीन्बरी ज्यब्ज्यीम् च्याब तीप्ज्यी।
येसुचे थेङ्की डबमातेङ् ज्युःकी डोन् सोल्बल
(मर्कुस् १४:१२-२६; लुका २२:७-२३; युहन्न १३:२१-३०; १ कोरीन्थी ११:२३-२५)
17खमीर् अयुबे ग्येङ् चबे पर्ब चुःबे दीन्री डबमा येसुइज खज्यीम्, “थेङ्की लागीरी ङ्यीमाचे नीस्तार् पर्बइ डोन् खन टोप् लब?” बी ङ्योत्ज्यी। 18येसुचे थेङ्यीमात सुङ्ज्यी, “सहर्री म्ही गीज ङ्यीउ, ओसेम् थेत पङो, ‘लोप्पोन्चे सुङ्ब, ङइ बेलो खबल मुब, ओसेम् ङ एइ दीम्री ङइ डबमातेङ् बक्च्य नीस्तार् पर्बइ डोन् चबे सेम् मुब।’” 19होत्तज्यीम् डबमाचे येसुचे कुल्जेत्प र्हङ्लेनो नीस्तार् पर्बइ डोन् टोप् लज्यी।
20ङ्येसे तब बीसेम् येसु डबमा चुङ्ङ्य्हीतेङ् बक्च्य सोल्बरी स्य्हुज्यी। 21थेङ्मा सोल्टीबे बेलोरी येसुचे, “ङ एङ्यीमात देमेन्नो पङ्ब, एङ्यीमा न्हङ्लनो गीचे ङत चुङ्पीन्स्ये मुब” बी सुङ्ज्यी। 22चु थ्येःब बीसेम् थेङ्यीमा छेर्बे लीः थोःज्यीम् जम्मचेनो काकर्ले थेङ्त, “प्रभु, हुजु ङनो य्हीन्ब?” बी ङ्योत्ज्यी। 23येसुचे थेङ्यीमात जोहप् न्हङ्ज्यी, “ङतेङ् बक्च्य तङ्लोरी ग्येङ् नुत्टीबलचे ङत चुङ्पीन्स्ये मुब। 24म्हीइ ज धर्म छ्येःरी ब्रीब र्हङ्ले स्यीनोथोस्ये मुब। तर धीक्कार् हुजु म्हीत, खल्चे म्हीइ जत चुङ्नलपीन्स्ये मुब। थेम् न्हनो अन्हबल य्हीन्सम् ज्यब तस्ये मुबल।” 25हुजुलीप्चे थेङ्त चुङ्पीन्स्येकी यहुदाचे ङ्योत्ज्यी, “लोप्पोन्, देमेन्नो हुजु म्ही ङनो य्हीन्ब?” ओसेम् येसुचे थेत, “हुजुम् ए र्हङ्चेनो पङ्ज्यी” बी सुङ्ज्यी।
26थेङ्यीमा सोल्टीबे बेलोरी येसुचे ग्येङ् कीन्जेत्ज्यीम् पर्मेस्वर्त व्होर्छ्ये न्हङ्जेत्ज्यीम् ग्येङ् स्योइजेत्ज्यी, ओसेम् डबमात न्हङ्ज्यीम् सुङ्ज्यी, “न चु कीनो, ओसेम् चउ, चु ङइ ल्हीः य्हीन्ब।”
27हुजु लीप्चे थेङ्चे खोरे कीन्जेत्ज्यीम् पर्मेस्वर्त व्होर्छ्ये न्हङ्ज्यीम् डबमात पीन्ज्यीम् सुङ्ज्यी, “चु एङ्यीमा जम्मचेनो थुङो। 28चु ङइ का ग्यम्से पर्मेस्वर्चे थेङ्की करार् थेङ्की म्हीमातेङ् स्य्हेङ्ब। चु का य्हक्को म्हीमाइ पाप्माकी क्षमा तबे लागीरी य्हर्पुङ्स्ये मुब। 29ङ एङ्यीमात पङ्ब, छार् अङ्गुर्की नीङ्गु एङ्यीमातेङ् बक्च्य ङइ अपइ य्हुल्री अथुङ्गदे ङ खेमेएनो अङ्गुर्की नीङ्गु थुङ्स्ये अरे।”
30हुजुलीप्चे व्हइ गी#२६:३० व्हइ गी- यहुदीमाचे नीस्तार् पर्बइ डोन्की ङ्येसेइ चब चब बीसेम् थेङ्यीमाचे भजन्सङ्ग्रह ११५ य्हङ्से ११८ सम्मइ व्हइमा कोब मुबल। कोजेत्ज्यीम् येसुतेङ् थेङ्की डबमा जैतुन् पङ्बे गङ्तोर् स्येःज्यी।
पत्रुस्चे येसुत अस्ये पङ्स्ये मुब बी येसुचे ङोन्नो सुङ्बल
(मर्कुस् १४:२७-३१; लुका २२:३१-३४; युहन्न १३:३६-३८)
31हुजु बेलोरी येसुचे डबमात सुङ्ज्यी, “तीङ्यी म्हुन एङ्यीमा जम्मचेनो ङत ख्लेथेन्ज्यीम् छ्योङ्य्हर्स्ये मुब। तलेपङ्सम् धर्म छ्येःरी चोले ब्रीबल मुब-
‘ङचे गोर्तेन्त सेत्स्ये मुब,
ओसेम् ग्युःमा छर्छुर् तस्ये मुब।’ #
जकरीया १३:७
32 “तर ङ स्यीब ग्यम्से सोब बीसेम् एङ्यीमा बीमम् ङोन्ग्यम् गालील्री ङ ङ्यीस्ये मुब।” 33ओसेम् पत्रुस्चे येसुत, “जम्मचेनो थेङ्त ख्लेथेन्लेनो ङचे थेङ्त ख्लेथेन्स्ये अरे” बी पङ्ज्यी। 34येसुचे थेत, “ङ एत देमेन्नो पङ्ब, तीङ्यी म्हुननो एचे ङत नक व्हब ङ्य्हब बीम ङोन्ग्यम् सोम्ख्यप्सम्म अस्ये पङ्स्ये मुब” बी सुङ्ज्यी। 35पत्रुस्चे थेङ्त पङ्ज्यी, “ङ थेङ्तेङ् बक्च्य स्यीथोलेनो ङचे खेमेनो थेङ्त अस्ये पङ्स्ये अरे।” ओसेम् ल्हो-ल्हो जम्म डबमाचेएनो होलेनो पङ्ज्यी।
गेत्समनीरी येसुइ प्रार्थना
(मर्कुस् १४:३२-४२; लुका २२:३९-४६)
36हुजुलीप्चे येसु र्हङ्की डबमातेङ् गेत्समनी पङ्बे ग्लारी स्येःजेत्ज्यी। ओसेम् डबमात सुङ्ज्यी, “एङ्यीमा चुरीनो टीटीउ, ङ चेक्पजाकी क्योर् ङ्यीज्यीम् प्रार्थना स्य्हेङ्ब।” 37थेङ्चे पत्रुस्तेङ् जब्दीयाकी ज याकुब्तेङ् युहन्नत बक्च्य नोम्जेत्ज्यी। ओसेम् थेङ् य्हक्को दुख म्हन्दीज्यीम् तलइ-तलइ तजेत्ज्यी। 38हुजुलीप्चे थेङ्चे थेङ्यीमात सुङ्ज्यी, “ङइ सेम् दुखचे पोतोक्-पोतोक् तज्यीम् तीङ्नो थील र्हङ् तटीबल मुब। एङ्यीमा चुरीनो ङतेङ् बक्च्य अम्हेर्नले टीउ।”
39ओसेम् थेङ् चेक्पजाकी क्योर् स्येःज्यीम् सरी पब्लु लजेत्ज्यीम् चोले प्रार्थना स्य्हेङ्जेत्ज्यी, “ङइ अप, तसम् चु दुख ङ ग्यम्से स्यलाजेतो। तर ङचे म्हेन्ब र्हङ्ब अय्हीन्, थेङ्चे म्हेन्ब र्हङ्ब तखइ।”
40येसु डबमा सोम् मुबे ग्लारी दोःखजेत्मम् थेङ्यीमात म्हेर्टीबल यङ्जेत्ज्यी, ओसेम् येसुचे पत्रुस्त सुङ्ज्यी, “एङ्यीमा ङतेङ् बक्च्य घन्टा गीएनो अम्हेर्नले टीअखम्? 41अम्हेर्नले टीउ, ओसेम् परीक्षारी अदोखइ बी प्रार्थना स्य्हेङो। आत्मामी देमेन्नो तयार् मुब तर ल्हीःमी अखम्बल मुब।”
42येसु देबेएनो चेक्पजाकी क्योर् स्येःज्यीम् चोले प्रार्थना स्य्हेङ्जेत्ज्यी, “ङइ अप, चु दुख ङचे अना गदे अतसम् थेङ्चे थुःलजेत्प र्हङ्बनो तखइ।” 43थेङ् देबेएनो डबमाज दोःखजेत्मम् थेङ्यीमा म्हेर्टीबल यङ्जेत्ज्यी, तलेपङ्सम् थेङ्यीमा य्हक्को न्हुटबल मुबल।
44होत्तज्यीम् थेङ्यीमात ख्लेथेन्ज्यीम् देबेएनो थेङ्चे ङोन्ग्यम्की छीःमानो तेत्ज्यीम् प्रार्थना स्य्हेङ्जेत्ज्यी। 45हुजुलीप्चे थेङ् डबमाज ब्योन्खज्यीम् थेङ्यीमात सुङ्ज्यी, “एङ्यीमा दवम् सम्म म्हेर्ज्यीम् दुःब न्हटीबल? च्याको, म्हीइ जत पापीमाकी यारी सोप्तीस्येकी बेलो खज्यीन्बल मुब। 46रेःको, ओसेम् ब्रे! च्याको, ङत चुङ्पीन्स्येकी म्ही खज्यीन्बल मुब।”
येसुत चुङ्बल
(मर्कुस् १४:४३-५०; लुका २२:४७-५३; युहन्न १८:३-१२)
47येसुचे चु तम् सुङ्टीन-सुङ्टीननो चुङ्ङ्य्ही डबमान्हङ्की यहुदा पङ्बे डब दोखज्यी। थेतेङ् बक्च्य तर्वालमातेङ् रोलेमा नाबे य्हक्को म्हीमा मुबल। थेङ्यीमा ङ्हच्छ्यङ् लम्बुमातेङ् एल्डर्माचे पीत्खबल मुबल। 48थेङ्त चुङ्पीन्स्येकी यहुदाचे हुजु म्हीमात, “ङचे खल म्हीत च्योक्प, थेनो येसु य्हीन्ब, थेतनो चुङो” पङ्ज्यीम् चीनो पीन्बल मुबल। 49ओसेम् यहुदा सर्-सर् येसुइज ङ्यीज्यीम्, “लस्सो, लोप्पोन्” पङ्ज्यीम् थेङ्की ग्रम्बरी च्योक्ज्यी। 50ओसेम् येसुचे सुङ्ज्यी, “ङइ र्हो, ए ङत ता लबरी खबल ग्योन् स्य्हेङो।” हुजुलीप्चे थेङ्यीमाचे येसुत चुङ्ज्यी।
51चु म्रङ्ज्यीम् येसुतेङ् बक्च्य मुबे डब गीचे र्हङ्की तर्वल् तेत्ज्यीम् गोदोब्न्हङ्की ङ्हच्छ्यङ् लम्बुइ बान गीकी न्हबीङ् थालाज्यी। 52येसुचे थेत सुङ्ज्यी, “एइ तर्वल् स्युप्री जङो, तलेपङ्सम् तर्वल् कोल्बलमा तर्वल् ग्यम्सेनो स्यीस्ये मुब। 53एचे ता म्हेन्ब, ङचे ङइ अपत फ्या लअखम्, ओसेम् थेङ्चे ङइ लागीरी पल्टन चुङ्ङ्य्ही बीमम् य्हक्को स्वर्गदुत्मा पीत्यु अजेतो स्यीम्? 54तर होले स्य्हेङ्सम् धर्म छ्येःरी ब्रीबे चु तम् खले टोप् तब?”
55हुजु लीप्चे येसुचे य्हक्को म्हीमात सुङ्ज्यी, “एङ्यीमा तले ङत डाकुत चुङ्बरी र्हङ्ले तर्वालमातेङ् रोलेमा बज्यीम् खबल? दीन्लनो ङ पर्मेस्वर्की दीम्री लोप्ज्यीम् टीबे बेलोरी अचुङ्मु स्यीम्! 56तर अगम्बक्तमाचे धर्म छ्येःरी ब्रीबे चु तम् टोप् तखइ बी चु जम्मनो तबल य्हीन्ब।”
ओसेम् थेङ्की डबमाचे थेङ्त ख्लेथेन्ज्यीम् य्हर्ज्यी।
ङ्हच्छ्यङ् सभाइ ङोन्री येसु
(मर्कुस् १४:५३-६५; लुका २२:५४-५५,६३-७१; युहन्न १८:१३-१४,१९-२४)
57ओसेम् येसुत चुङ्बलमाचे थेङ्त गोदोब्न्हङ्की ङ्हच्छ्यङ् लम्बु कैयाफाकी दीम्री बोर्ज्यी। हुजुरी धर्म लोप्पोन्मातेङ् अगुवामा र्हुब् तबल मुबल। 58पत्रुस् चेक्-चेक् खेत्नले येसुइ लीप्-लीप् ङ्यीज्यीम् गोदोब्न्हङ्की ङ्हच्छ्यङ् लम्बुइ दीम्की दोसम्म दोःज्यी। ओसेम् ज्युःरी ताता तमु बी च्याबरी न्हङ्री वङ्ज्यीम् दीम् रुङ्बलमातेङ् बक्च्य टीज्यी। 59देरेम् ङ्हच्छ्यङ् लम्बुमातेङ् ङ्हच्छ्यङ् सभाइ जम्मनो म्हीमाचे भ्युकी दस्यी म्हइब छ्येज्यी, तलेपङ्सम् थेङ्यीमाचे येसुत स्यीबे सजाय पीन्ब म्हइब मुबल। 60ओसेम् थेङ्त भ्युकी तम् प्लाबरी य्हक्को म्हीमा खज्यी, तर खल्चेएनो तइ दस्यीएनो पीन्ब अखम्। ज्युःरी म्ही ङ्य्ही ङोन्ग्यम् खज्यी, 61ओसेम् पङ्ज्यी, “चु म्हीचे ‘ङचे पर्मेस्वर्की दीम् स्हीलाज्यीम् सोम्रेत्री स्य्हेङ्ब खम्ब’ पङ्बल मुबल।”
62ओसेम् गोदोब्न्हङ्की ङ्हच्छ्यङ् लम्बु रेःज्यीम् येसुत ङ्योत्ज्यी, “एचे तले जोहप् अपीन्बल? चु म्हीमाचे एइ बीरोद्री पङ्बे तम्माकी बारेरी तेएनो पङ्थोस्ये अरे?” 63तर येसु कुटीले स्य्हुःजेत्ज्यी। ओसेम् देबेएनो गोदोब्न्हङ्की ङ्हच्छ्यङ् लम्बुचे थेङ्त पङ्ज्यी, “ङ एत पङ्ब, एचे सोम्बो पर्मेस्वर्की छेन्री ङ्यीमात स्येतो, ए मुक्ती न्हङ्बे ख्रीस्ट् पर्मेस्वर्की ज य्हीन्ब?” 64येसुचे जोहप् न्हङ्ज्यी, “हुजुम् थेङ्चेनो सुङ्ज्यी। ङ थेङ्मात पङ्ब, देरेम् ग्योनेनो थेङ्माचे म्हीइ जत सक्तीसाली पर्मेस्वर्की केत् फ्या पट्टीइ ठीरी टीटीबल, ओसेम् थेत स्वर्ग ग्यम्से मुक्पन्हङ् युटीबल म्रङ्स्ये मुब।”
65चु थ्येःज्यीम् गोदोब्न्हङ्की ङ्हच्छ्यङ् लम्बुत बोमो रप्ज्यीम् र्हङ्की येन् डेःज्यीम् पङ्ज्यी, “चुजे पर्मेस्वर्की नीन्द लज्यी! देरेम् ल्हो-ल्हो तइ दस्यी तोःज्यी स्यीम्? देरेकीनो चुजे पर्मेस्वर्त नीन्द लबल एङ्यीमाचे थ्येःज्यीन्ज्यी। 66देरेम् एङ्यीमा ता म्हेन्ब?” ओसेम् थेङ्यीमाचे “येसुचे स्यीबे सजाय यङ्नोथोब” बी पङ्ज्यी। 67हुजुलीप्चे थेङ्यीमाचे येसुइ स्य्हल्री थो साज्यीम् थेङ्त तोज्यी। ओसेम् डेत्-डेत्चेम् पातल्चे ग्यङ्ज्यी, 68ओसेम् पङ्ज्यी, “लो अगम्बानी पङो स्यीम्, मुक्ती न्हङ्बे ख्रीस्ट् एत खल्चे ग्याङ्ज्यी?”
पत्रुस्चे येसुत अस्ये पङ्बल
(मर्कुस् १४:६६-७२; लुका २२:५६-६२; युहन्न १८:१५-१८,२५-२७)
69होदे बेलोसम्म पत्रुस् फीर्च्योर् दोरीनो टीटीबल मुबल। अमकोल योक्पो गी खज्यीम् थेत पङ्ज्यी, “एएनो गालील्की येसुतेङ् बक्च्य मुबल अय्हीनो स्यीम्?” 70तर पत्रुस्चे जम्मइ ङोन्ग्यम्, “एचे तइ तम् लटीबल ङचे तेएनो अगो” बी पङ्ज्यी। 71ओसेम् पत्रुस् दोइ म्रप्क्योर् ङ्यीज्यी, हुजुरी ल्हो-ल्हो अमकोल योक्पो गीचे थेत म्रङ्ज्यीम् हुजुरी मुबे म्हीमात पङ्ज्यी, “चु म्हीएनो नासरत्की येसुतेङ् बक्च्य मुबल।”
72देबेएनो पत्रुस्चे सपथ् चज्यीम् पङ्ज्यी, “ङचेम् हुजु म्हीत स्येःबलनो अरे!”
73य्हम्बगी लीप्चे हुजुरी मुबे म्हीमा पत्रुस्की रेइरी खज्यीम् पङ्ज्यी, “देमेन्नो एएनो थेङ्यीमान्हङ्की गी य्हीन्ब, तलेपङ्सम् हुजुम् एइ तम्चेनो स्येःब।” 74ओसेम् पत्रुस्चे देबेएनो सपथ् चज्यीम् पङ्ज्यी, “ङचे भ्यु पङ्बल य्हीन्सम् पर्मेस्वर्की केम्लङ् ङत फोःखइ, ङचे हुजु म्हीत स्येःनो अस्ये!”
होलेपङ्ब साच्चेनो नक व्हब ङ्य्हज्यी। 75ओसेम् पत्रुस्त येसुचे, “नक व्हब ङ्य्हब बीम ङोन्ग्यम् सोम्ख्यप्सम्म एचे ङत अस्ये पङ्स्ये मुब” बी सुङ्बे फ्रोइ व्हल् खज्यी, ओसेम् दोरी ङ्यीज्यीम् य्हक्को क्राज्यी।
Currently Selected:
मत्ती 26: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
