मत्ती 25
25
कङ्य अमकोलमा च्यी
1येसुचे देबेएनो सुङ्ज्यी, “पर्मेस्वर्की य्हुल् कङ्य अमकोलमा च्यी र्हङ्-र्हङ्की बत्तीमा बोर्ज्यीम् दुलहत खतु लबरी ङ्यीब र्हङ्ब य्हीन्ब। 2हुजु अमकोलमा न्हङ्री ङ्ह मुर्ख, ओसेम् ङ्ह बुद्दी मुबे अमकोलमा मुबल। 3मुर्ख अमकोलमा ङ्हचे बत्तीम् बोर्ज्यी, तर ल्हो-ल्हो छ्युकुम् अबोर्। 4तर बुद्दी मुबलमाचेम् बत्तीतेङ् बक्च्य ल्हो-ल्हो छ्युकुएनो बोर्ज्यी। 5दुलहत ब्रेन्ज्यीम् टीटीमम् दुलह खबरी गेःज्यी। ओसेम् थेङ्यीमा जम्मनो न्हुटज्यीम् म्हेर्ज्यी।
6 “तर म्हुन्गुङ्री थेङ्यीमाचे ‘च्याको, देरेम् दुलह खटीब, खतु लबरी खोउ’ पङ्ज्यीम् क्रीङ्बल थ्येःज्यी। 7ओसेम् हुजु अमकोलमा जम्मनो रेःज्यीम् र्हङ्-र्हङ्की बत्तीमा टोप् लज्यी। 8मुर्ख कङ्य अमकोलमाचे बुद्दी मुबे कङ्यमात पङ्ज्यी, ‘एङ्यीमाकी छ्युकु ङ्यीमातेएनो चेक् पीनो ङ्यीमाइ बत्तीमी स्यीब म्हइज्यी।’ 9तर बुद्दी मुबे कङ्य अमकोलमाचे पङ्ज्यी, ‘एङ्यीमातेएनो योःबे छ्युकु ङ्यीमातेङ् अरे, एङ्यीमा पसलरी ङ्यीज्यीम् र्हङ्की लागीरी छ्युकु ग्लुउ।’
10 “हुजु मुर्ख कङ्य अमकोलमा छ्युकु ग्लुबरी ङ्यीबे बेलोरी दुलह दोखज्यी। ओसेम् टोप्ले छ्येज्यीम् टीटीबे बुद्दी मुबे कङ्य अमकोलमा दुलहतेङ् बक्च्य भ्याइ डोन् चबरी न्हङ्री वङ्ज्यी, ओसेम् म्रप् दुङ्ज्यी।
11 “य्हम्बगी लीप्चे हुजु मुर्ख कङ्य अमकोलमाएनो दोखज्यी ओसेम् पङ्ज्यी, ‘प्रभु, प्रभु, ङ्यीमाइ लागीरीएनो म्रप् ठोङ्जेतो!’ 12तर दुलहचे जोहप् पीन्ज्यीम् पङ्ज्यी, ‘ङ एङ्यीमात देमेन्नो पङ्ब, ङचे एङ्यीमात स्येःबल अरे।’”
13ओसेम् येसुचे सुङ्ज्यी, “होत्तज्यीम् एङ्यीमा चोङ् लज्यीम् टीउ, तलेपङ्सम् म्हीइ ज खजु दीन्तेङ् खजु बेलोरी युब बी एङ्यीमाचे स्येःबल अरे।
योक्पो सोम्
(लुका १९:११-२७)
14 “तलेपङ्सम् स्वर्गइ य्हुल् म्ही गी थारीङ् ग्लारी ङ्यीब र्हङ्ब तस्ये मुब। थे य्हर्बे बेलोरी थेचे र्हङ्की योक्पोमात ङ्होत्ज्यीम् र्हङ्की छोङ् स्य्हेङ्बरी टङइ जीम्मा पीन्ज्यी। 15थेचे जम्मनो योक्पोमात र्हङ्-र्हङ्की योग्यत अनुसार् गीत म्हर्की डबल् हजार् ङ्ह, ल्हो-ल्हो गीत हजार् ङ्य्ही, ओसेम् ल्हो-ल्हो गीत हजार् गी पीन्ज्यीम् थे थारीङ् ङ्यीबरी ब्रज्यी। 16ओसेम् म्हर्की डबल् हजार् ङ्ह यङ्बे योक्पोचे यङ्ब साच्चेनो ङ्यीज्यीम् हुजु टङचे छोङ् स्य्हेङ्ज्यी, ओसेम् ल्हो-ल्होएनो म्हर्की डबल् हजार् ङ्ह छाज्यी। 17होलेनो म्हर्की डबल् हजार् ङ्य्ही यङ्बलचेएनो ल्हो-ल्हो म्हर्की डबल् हजार् ङ्य्ही छाज्यी। 18तर म्हर्की डबल् हजार् गी यङ्बलचेम् ङ्यीज्यीम् सरी व्हङ् ठाज्यीम् न्याबोइ टङ छुम्ज्यीम् थेन्ज्यी।
19 “य्हक्को बेलो लीप्चे योक्पोमाकी न्याबो दोःखज्यीम् योक्पोमात हीसाब् र्हीत्ज्यी। 20म्हर्की डबल् हजार् ङ्ह यङ्बे योक्पोचे न्याबोज खज्यीम् पङ्ज्यी, ‘मालीक्, थेङ्चे ङत म्हर्की डबल् हजार् ङ्ह न्हङ्बल मुबल, ओसेम् ङचे ल्हो-ल्होएनो म्हर्की डबल् हजार् ङ्ह छाबल मुब।’ 21न्याबोचे थेत पङ्ज्यी, ‘स्यबास्, ए ज्यबतेङ् बीस्वासीलो योक्पो! ए ज्यीत तम्रीएनो बीस्वासी तज्यी, होत्तज्यीम् देरेम् ङ एत य्हक्को तम्माकी जीम्मा पीन्स्ये मुब। ए खज्यीम् ङतेङ् बक्च्य तङो।’ 22ओसेम् म्हर्की डबल् हजार् ङ्य्ही यङ्बे योक्पोचेएनो खज्यीम् पङ्ज्यी, ‘मालीक्, थेङ्चे ङत म्हर्की डबल् हजार् ङ्य्ही न्हङ्बल मुबल, ओसेम् ङचे ल्हो-ल्होएनो म्हर्की डबल् हजार् ङ्य्ही छाबल मुब।’ 23न्याबोचे थेत पङ्ज्यी, ‘स्यबास्, ए ज्यबतेङ् बीस्वासीलो योक्पो! ए ज्यीत तम्रीएनो बीस्वासी तज्यी, होत्तज्यीम् देरेम् ङ एत य्हक्को तम्माकी जीम्मा पीन्स्ये मुब। एएनो खज्यीम् ङतेङ् बक्च्य तङो।’
24 “हुजुलीप्चे म्हर्की डबल् हजार् गी यङ्बे योक्पोचे खज्यीम् पङ्ज्यी, ‘मालीक्, थेङ् र्हङ्चे असुःबे ग्लाचे अन्न दुत्जेत्प, ओसेम् र्हङ्चे ब्लु अब्लुत्पे ग्लाचे अन्न र्हुब्बे सेम् कोङ्बे म्ही य्हीन्ब बी ङचे स्येःबल मुबल। 25होत्तज्यीम् ङ थेङ्तेङ् लोङ्ज्यी, ओसेम् ङचे ङ्यीज्यीम् थेङ्की टङ व्हङ्न्हङ् छुम्थेन्ज्यी। स्हीःगो! थेङ्की टङ कीन्जेतो।’ 26ओसेम् न्याबोचे पङ्ज्यी, ‘ओ अज्यबतेङ् ब्लेकु योक्पो! ङ र्हङ्चे असुःबे ग्लाचे अन्न दुत्पे ओसेम् र्हङ्चे ब्लु अब्लुत्पे ग्लाचे अन्न र्हुब्पे म्ही य्हीन्ब बी एचे स्येःबल पङ्सम्, 27तले ङइ टङ बेङ्री अथेन्बल? थेन्बल य्हीन्सम् ङचे ङइ टङ चोक्तेङ् छ्यम् दोःज्यीम् यङ्स्येल।’
28 “हुजु लीप्चे न्याबोचे पङ्ज्यी, ‘होत्तज्यीम् थेतेङ् मुबे म्हर्की डबल् ब्येनो, ओसेम् म्हरकी डबल् हजार् च्यी मुबलत पीनो। 29तलेपङ्सम् खल्तेङ् मुज्यी, थेत ल्हो-ल्होएनो य्हक्को पीन्स्ये मुब, ओसेम् थेतेङ् ल्हाब सम्मनो तस्ये मुब। तर खल्तेङ् अरेज्यी हुजुतेङ् चेक् मुबलेएनो थे ग्यम्से ब्येन्स्ये मुब। 30देरेम् चु लक् अतबे योक्पोतम् दोरी म्हुन्दुङ्न्हङ् ख्लापीतो, हुजुरी थे क्राज्यीम् स क्रीतीक्स्ये मुब।’
न्यायकी दीन्
31 “म्हीइ ज जम्मनो स्वर्गदुत्मातेङ् बक्च्य र्हङ्की महीमारी युस्ये मुब, ओसेम् र्हङ्की महीमाकी ठीरी टीस्ये मुब। 32ओसेम् जम्मनो जात्की म्हीमा थेइ ङोन्री र्हुब् तस्ये मुब, ओसेम् गोर्तेन्माचे रतेङ् ग्युःमात फेःब र्हङ्ले थेचे हुजु म्हीमात फेःस्ये मुब। 33थेचे ग्युःमात र्हङ्की केत्पट्टीचे ओसेम् रमात र्हङ्की ल्होम्पट्टीचे थेन्स्ये मुब। 34हुजुलीप्चे ग्यल्बोचे र्हङ्की केत्पट्टीचे मुबलमात पङ्स्ये मुब, ‘ङइ अप ग्यम्से मोलम् यङ्बलमा खोउ! जम्बुलीङ् ठुङब य्हङ्सेनो एङ्यीमाकी लागीरी टोप् लज्यीम् थेन्बे य्हुल्री यङ्बे हक् कीनो। 35ङ ख्रेन्बल मुबल एङ्यीमाचे चब पीन्ज्यी, ङ फीःबल मुबल एङ्यीमाचे यी थुङ्बुङ्ज्यी, ओसेम् ङ ल्हो-ल्हो य्हुल्ल मुबल एङ्यीमाइ दीम्री वङ्पुङ्ज्यी, 36ङ क्लीङ्दो मुबल एङ्यीमाचे येन् येन्पीन्ज्यी, ङ नबल मुबल एङ्यीमाचे ङइ स्य्हप्तो स्य्हेङ्ज्यी, ङ जेल्न्हङ् मुबल एङ्यीमा ङत खतु लबरी खज्यी।’
37 “हुजुलीप्चे धर्मीमाचे थेत जोहप् पीन्स्ये मुब, ‘प्रभु, ङ्यीमाचे थेङ्त खेमा ख्रेन्जेत्पल म्रङ्ज्यी, ओसेम् थेङ्त स्य्हेःब पीन्ज्यी? वुइ खेमा फीःजेत्पल म्रङ्ज्यी, ओसेम् यी सोल्बरी पीन्ज्यी? 38वुइ ङ्यीमाचे खेमा थेङ् ल्हो-ल्हो य्हुल्ल तबल म्रङ्ज्यी, ओसेम् ङ्यीमाइ दीम्री वङ्पुङ्ज्यी? वुइ खेमा क्लीङ्दो म्रङ्ज्यी ओसेम् न्हम्ज येन्पीन्ज्यी? 39वुइ ङ्यीमाचे खेमा थेङ्त नबलतेङ् जेल्री म्रङ्ज्यी वुइ थेङ्त खतु लबरी खज्यी?’ 40ओसेम् ग्यल्बोचे जोहप् पीन्स्ये मुब, ‘ङ एङ्यीमात देमेन्नो पङ्ब, एङ्यीमाचे ङइ चु अलेमा न्हङ्री ज्यीद बीम ज्यीद अले गीत ताता स्य्हेङ्ज्यी, हुजु एङ्यीमाचे ङतनो स्य्हेङ्ज्यी।’
41 “हुजु लीप्चे थेङ्चे र्हङ्की ल्होम्पट्टीचे मुबलमात सुङ्स्ये मुब, ‘पर्मेस्वर्की केम्लङ् यङ्बलमा! एङ्यीमा ङ ग्यम्से थारीङ् य्हरो, ओसेम् सैतान्तेङ् थेइ चवमाकी लागीरी टोप् लबे खेमेएनो अस्यीबे मेन्हङ् य्हरो! 42एङ्यीमाचे ङ ख्रेन्बल मुबल चब अपीन्, ङ फीःबल मुबल यी थुङ्अपुङ्, 43ङ ल्हो-ल्हो य्हुल्ल तबल मुबल, एङ्यीमाइ दीम्री वङ्अपुङ्, ङ क्लीङ्दो मुबल एङ्यीमाचे येन् येन्अपीन्, ङ नबल ओसेम् जेल्न्हङ् मुबल ओसेम् एङ्यीमा ङत खतु लबरी अख।’
44 “ओसेम् थेङ्यीमाचे जोहप् पीन्स्ये मुब, ‘प्रभु, ङ्यीमाचे थेङ्त खेम ख्रेन्जेत्पल, फीःजेत्पल, ल्हो-ल्हो य्हुल्ल तबल, क्लीङदो तजेत्पल, नबल, वुइ जेल्न्हङ् म्रङ्ज्यी, ओसेम् थेङ्की स्य्हप्तो अस्य्हेङ् स्यीम्?’ 45ओसेम् ग्यल्बोचे जोहप् पीन्स्ये मुब, ‘ङ एङ्यीमात देमेन्नो पङ्ब, एङ्यीमाचे ङइ चु अलेमा न्हङ्री ज्यीद बीम ज्यीद अले गीत ताता अस्य्हेङ्ज्यी हुजु एङ्यीमाचे ङत अस्य्हेङ्बल य्हीन्ब।’ 46ओसेम् थेङ्यीमाचे खेमेएनो अबेबे सजाय यङ्स्ये मुब, तर धर्मीमाचेम् खेमेनो अबेबे जीवन् यङ्स्ये मुब।”
Currently Selected:
मत्ती 25: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
