रोमी 16
16
पावलौ अभिवादान
1कानुङ बहिनी फिबीयो बारेयाङ नाखुरीकुङ म्याहासाङ ङा प्रशंसा जाट्ले। होसे किंक्रियाङ लेच मण्डलीयाङ सेवा जाट्च विश्वासी बहिनी हो। 2ङा नाखुरीककी डेले, होसे बहिनी नाखुरीक लेठाङ रान्हाङ प्रभुओ म्यार्मीनाङ स्वागत जाट्नी र इट जाट्की चहिँ सन्तकुङ लागि सेछ हो। होसकी ही चहडीस्नाङ र ह्योक्ठर सहायता जाट्नी। हीजैडेनाङ होचे अरु वास्टै भर्मीकोलाक सहयोग जाट्नने र ङाकीर सहायता जाट्नने।
3ङाखाटा न ख्रीष्ट येशूओ सेवाङ काम जाट्चको प्रिस्का र मेन लेन्जा अकिलासकी ङै झोर्ले डेम सेटाक्ङ यान्ही। 4होखुरीकै ङाकी जीवाटाक्की डेम होखुरीकुङ जीवन न जोखिमाङ पार्नन्या। ङा होखुरीकै जाट्च बाड्को गुण आर्मीट्ले, ङै मट्टै होइन, तर पट्ट न अन्यजातिकुङ मण्डलीयुङ विश्वासी भर्मीकै र होखुरीकुङ गुण सेन र माम्ह्याक्ले। 5होखुरीकुङ इमाङ भेला छान्च विश्वासी पट्टकी ङै झोर्ले डेम यान्ही। ङौ प्यारो लाफा इपेनितसकी र ङै झोर्ले डेम यान्ही। होसे एशिया प्रदेशुङ पट्ट डेनाङ पहिला ख्रीष्टकी विश्वास जाट्च भर्मी हो।
6नाखुरीकुङ लागि कडा मेहनत जाट्च मरियमकी र ङै झोर्ले डेम यान्ही। 7अनि एन्ड्रोनिकस र होच्यो मास्टो युनियाकी र ङै झोर्ले डेम यान्ही। होखुरीक ङाखाटा न झ्यालखानाङ पर्च ङौ यहूदी लाफाको हो। होखुरीक प्रेरितकुङ मीघ्याङ कह्राङ्छ सम्मान डुप्चको हो र ङै विश्वास जाट्की डेनाङ पहिला न होखुरीकै ख्रीष्टकी विश्वास जाट्नन्या।
8प्रभुकी विश्वास जाट्च ङौ प्यारो लाफा एम्प्लीआतसकी ङै झोर्ले डेम यान्ही। 9ख्रीष्टौ लागि ङाखाटा सेवा जाट्च उर्बानसकी र ङौ प्यारो लाफा स्ताखुसकी ङै झोर्ले डेम यान्ही। 10ख्रीष्टकी जाट्च विश्वासाङ योग्य लेच अपेल्लेसकी झोर्ले डेम ले। अरिस्तोबुलसौ परिवाराङ लेच पट्टकी झोर्ले डेम यान्ही। 11ङौ यहूदी लाफा हेरोदियनकी झोर्ले डेम यान्ही। प्रभुकी विश्वास जाट्च नर्किससौ इमाङ लेच पट्टकी झोर्ले।
12प्रभुओ लागि खुब कठिन काम जाट्च त्रुफेना र त्रोफोसा बहिनीकोलाक ङै झोर्ले डेम यान्ही। प्रभुओ लागि कठिन काम जाट्च ङौ प्यारी बहिनी परसीसकी र ङै झोर्ले डेम यान्ही। 13प्रभुओ सेवा जाट्की भाक्च रुफस र होच्यो मोइकी झोर्ले। होच्यो मोये ङाकी सधैँ लहो लेन्जा मीजाकी लेखा न जाट्नन्या। 14असिंक्रितस, फ्लेगन, हर्मेस, पत्रोबास, हर्मास र होखुरीकखाटा लेच अरु पट्ट न विश्वासी डाजेभाइकोलाक ङा झोर्ले। 15फिलोलोगस, युलिया, नेरियस र होच्यो बहिनी, ओलिम्पास र होखुरीकखाटा लेच पट्ट न परमेश्वरौ विश्वासीकोलाक ङै झोर्ले डेम यान्ही।
16नाखुरीक काटै काटकी पवित्र प्रेमखाटा झोर्नी, र ख्रीष्टकी विश्वास जाट्च पट्ट न विश्वासीकै नाखुरीककी झोर्ले डेमकामने।
पावलौ अन्तिम सल्लाह
17ङौ विश्वासी डाजेभाइको र डैबहिनीको, ङा नाखुरीककी बिन्ती जाट्ले, फाटो राक्च र भर्मीयो विश्वासकी बिथोल्डीचको लकीङ होस जाट्नी। होखुरीक नाखुरीकै पाछ साँचो शिक्षौ विरुद्धाङ झूटो शिक्षा पाहाकार भर्मीकोलाक होखुरीकुङ विश्वासाङ बाधा याल्हे। होङ्च भर्मीको लकीङ सधैँ लोस ङुनी। 18हीजैडेनाङ याङ्च भर्मीकै काल्हौ प्रभु येशूओ सेवा होइन, लहो मीटुकौ लागि मट्टै सेवा जाट्ले। होखुरीकै जाप्च जाप्च कुरा जाटार सीधा भर्मीकोलाक झुक्कडीले। 19नाखुरीकै आज्ञा मन्डीच कुरा पट्टलाक भर्मीकै सेमने, इसे कुराङ ङाकी माह्राङ्ङ सेमने। नाखुरीक सेछ कुरा जाट्की वार्छ छान्नी तर मास्च कुरा जाट्की वार्ह्र माह्वार्नी डेच ङा मीमन जाट्ले। 20शान्ति याछ परमेश्वरै छिटो न शैतानकी नाखुरीकुङ मीकु म्होकी पार्न याल्हे। काल्हौ प्रभु येशू ख्रीष्टौ अनुग्रह नाखुरीकखाटा ङुम ङुख्यो।
21ङाखाटा काम जाट्च तिमोथीये नाखुरीककी झोर्ले डेमकामने। होटजाट्न न ङौ यहूदी भाइको लुकियस, यासोन र सोसिपात्रोसै नाखुरीककी झोर्ले डेमकामने।
22पावलौ इसे चिठी रीक्च ङा तर्तियसै र नाखुरीककी प्रभुओ म्यार्मीनाङ झोर्ले डेमकामने। 23गायसै र नाखुरीककी झोर्ले डेमने। ङा पावल, गायसौ इमाङ ङुम ङुमने र होच्यो इमाङ न इसे ठाउँङ विश्वासीको भेला छान्ने। इसे सहरौ कोषाध्यक्ष इरास्तस र कानुङ विश्वासी भाइ क्वार्टसै र नाखुरीककी झोर्ले डेमने। 24काल्हौ प्रभु येशू ख्रीष्टौ अनुग्रह नाखुरीक पट्टकोखाटा ङुम ङुख्यो। आमेन।
25परमेश्वरकी महिमा छान्ख्यो। ङै प्रचार जाट्च सेछ समाचार र येशू ख्रीष्टौ बारेयाङ जाट्च प्रचारै नाखुरीककी विश्वासाङ बलियो खास्ले। खायाक लकीङ आर्च्युह्वार ङुच परमेश्वरौ वचनौ गोप्य रहस्य होसकुङ योजना अनुसार छ्याङ्गै डाङ्ङने। 26ख्रीष्टौ बारेयाङ माबुझडीस्च कुराको अब अगमवक्ताकै रीक्च किताबकोवाङ बुझडीस्की ह्योक्च छान्नने। सेन र मासीच परमेश्वरौ आज्ञा मन्डीख्यो र अन्यजाति भर्मीकै होसकोकी विश्वास जाट्ख्यो डेयार इसे आर्च्युम्ह ङुच सेछ समाचार पट्टलाक सेटाक्च हो। 27पट्ट ठोक वार्छ काट मट्टै परमेश्वरकी येशू ख्रीष्ट लकीङ सधैँभरि महिमा छान्न ङुख्यो। आमेन।
Currently Selected:
रोमी 16: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.