रोमी 15
15
अरुकुङ वास्ता जाट्की पर्ले
1कान विश्वासाङ बलियो लेचको लाहा मट्टै खुसी छान्च कुरा जाट्की माछान्ने, तर विश्वासाङ कमजोर लेचकोलाक र सहायता जाट्की पर्ले। 2कान पट्टकै लहो छिमेकीकुङ आत्मिकी सुधार छान्ख्यो डेयार होखुरीकुङ भलायो लागि होखुरीककी खुसी खास्की पर्ले। 3हीजैडेनाङ ख्रीष्टै र लाहाकी खुसी माखासा। धर्मशास्त्राङ रीक्ङने, “नाकोकी गिल्ला जाट्चकुङ गिल्ला ङा मीटाक पार्नने।”#भजनसंग्रह ६९:९ 4खायाक धर्मशास्त्राङ रीक्च कुरै कानकी शिक्षा याल्हे। कानुङ आशाकी ल्होङाक्की धर्मशास्त्राङ लेच कुरै कानकी सहडीकी ह्योक्च शक्ति र उत्साह याल्हे। 5सहडीकी ह्योक्च शक्ति र उत्साह याछ परमेश्वरै न नाखुरीककी येशू ख्रीष्टौ चालाङ ह्वाच र काट न मीमनौ छान्च शक्ति याख्यो। 6होटजाट्न न नाखुरीक पट्टको काट न मीमनौ छानार काट न स्वराङ काल्हौ प्रभु येशू ख्रीष्टौ परमेश्वर बोयो प्रशंसा जाट्की ह्योक्ले।
अन्यजातिकुङ लागि सेछ समाचार
7परमेश्वरौ महिमौ लागि ख्रीष्टै नाखुरीककी स्वीकार जाट्नाङ लेखा न नाखुरीक र काटै काटकी स्वीकार जाट्च जाट्नी। 8-9ङा नाखुरीककी डेले, परमेश्वरै यहूदीकुङ बोइ बाज्युकोखाटा जाट्च प्रतिज्ञा पूरा जाट्ले र होसको सत्य ले डेम टान्हाक्कीयो लागि ख्रीष्ट यहूदीकुङ सेवक छाना, ताकि अन्यजाति भर्मीकै र परमेश्वरौ दया डुप्कीयो लागि होसकुङ प्रशंसा जाट्ख्यो। धर्मशास्त्राङ इटजाट्न रीक्ङने,
“होटबाटै अन्यजातिकुङ मीघ्याङ ङा नाकुङ प्रशंसा जाट्ले
र नाकुङ न म्यार्मीनौ प्रशंसौ ल्हीङ ल्हीङ्ले।”#भजनसंग्रह १८:४९
10फेरि धर्मशास्त्रौ अर्को ठावाङ इट डेम रीक्ङने,
“ए अन्यजाति भर्मीको,
परमेश्वरै भाक्च भर्मीकोखाटा आनन्द मन्डीनी।”#व्यवस्था ३२:४३
11अनि फेरि र धर्मशास्त्राङ इटजाट्न रीक्ङने,
“पट्ट न अन्यजाति भर्मीको, प्रभुकी प्रशंसा जाट्नी,
संसारुङ पट्ट न भर्मीको, होसकुङ प्रशंसा जाट्नी।”#भजनसंग्रह ११७:१
12अनि फेरि यशैया अगमवक्तै डेले,
“यिशैओ वंश लकीङ काट जना राल्हे,
होसकै पट्ट न अन्यजातिको मीटाक राज्य जाट्ले,
अनि पट्ट न भर्मीकै लहो आशा होसको मीटाक न डाले।”#यशैया ११:१०
13आशा याछ परमेश्वराङ नाखुरीकै विश्वास जाट्नने। होसकै न नाखुरीककी आनन्द र शान्ति याख्यो। होटजाट्न न पवित्र आत्माङ लेच शक्तिये नाखुरीकखाटा लेच आशा ल्होङ्चै-ल्होङ्चै नुङ्ख्यो।
अन्यजातिकुङ सेवक पावल
14ङौ विश्वासी डाजेभाइको र डैबहिनीको, नाखुरीकै भर्मीकोलाक सेछ व्यवहार जाट्ले डेम ङाकी थाहा ले। साँच्ची न नाखुरीकै परमेश्वरौ वचन सेम्हखाटा वार्न्हने र काटै काटकी पाहाक्की ह्योक्ले डेम ङा ढुक्क ले। 15तर पनि इसे चिठीयाङ नाखुरीककी कुडीक कुराको आर्मीटाक्की साहस जाटार रीक्ङन ले। हीजैडेनाङ परमेश्वरै ङाकी अनुग्रह याम्हने। 16अन्यजातिकुङ मीघ्याङ ङा ख्रीष्ट येशूओ सेवक छान्नने। परमेश्वरौ म्याहासाङ जाक्ङ सेच भेटी पूजाहारीये राक्नाङ लेखा न ङा र पूजाहारीयो सेवा पूरा जाट्ले। अन्यजाति भर्मीकोलाक होसको लेठाङ राक्की र होखुरीककी पवित्र आत्मै पवित्र खासार होसकोकी जाक्ङ सेच भेटी छान्ख्यो डेम ङा होसकुङ सेछ समाचार सेटाक्ले। 17होटबाटै परमेश्वरौ लागि ख्रीष्ट येशूखाटा काट न छानार सेवा जाट्कीयाङ ङा घमण्ड जाट्ले। 18वचन र कामै अन्यजाति भर्मीकोलाक आज्ञा मन्डीच खास्की ख्रीष्टै ङौ जीवन लकीङ ही जाट्नने, होसे बाहेक कुसे कामौ बारेयाङ र ङा ङाक्च आँट माजाट्ले। 19होसकै ङा लकीङ शक्तिशाली चिन्हको र अचम्मौ कामको पवित्र आत्मौ शक्तिये जाट्नने। होटजाट्न न यरूशलेम लकीङ इल्लुरिकन डेच ठाउँसम्म न ङै ख्रीष्टौ सेछ समाचार सेटाक्ङ भ्यामने। 20अरु भर्मीकै जग बाट्च ठावाङ इम खास्नाङ लेखा ङा अरुकै ख्रीष्टौ सेछ समाचार सेटाक्च ठावाङ मासेटाक्ले। ख्रीष्टकी सेर मासेच र अरुकै सेछ समाचार मासेटाक्च ठावाङ मट्टै सेछ समाचार सेटाक्च मीमन जाट्ले। 21इटजाट्न न धर्मशास्त्राङ रीक्ङने,
“होसकुङ बारेयाङ सेन र सुयेर मासेटाक्च भर्मीकै होसकोकी डाङ्ले
र होसकुङ बारेयाङ सेन र मासेचकै होसकुङ कुरा बुझडीस्ले।”#यशैया ५२:१५
पावलौ रोम नुङ्च योजना
22इटजाट्न अरु नयाँ ठाउँकोवाङ प्रचार जाट्की पर्चबाटै ङा नाखुरीक लेठाङ वास्टै खेप राखी पानाङ र राखी माह्योका। 23तर इसे ठाउँकोवाङ ङै प्रचार जाट्च काम भ्यामने। वास्टै वर्ष लकीङ नाखुरीककी डुप्च खुब मीमन जाट्न ङुमने। 24ङा होसे न लाम छानार स्पेन नुङ्नाङ नाखुरीककी डुप्च आशा जाट्नने। हीर समय नाखुरीकखाटा सङ्गतियो आनन्द लाच मीमन जाट्नने। होटै स्पेनसम्म नुङ्च सहयोग र नाखुरीकखाटा डुप्च आशा जाट्ले। 25तर ङा इसे पटक चहिँ यरूशलेमुङ सन्तकुङ लागि अखैया र माकेडोनियाङ लेच विश्वासीकै याम्हकाच सहयोग पैसा लार ङा यरूशलेम नुङ्ङ न ले। 26हीजैडेनाङ अखैया र माकेडोनियाङ लेच मण्डलीकै यरूशलेमुङ गरीब विश्वासीकोलाक भेटी पैसा याम्हकामने। 27होखुरीकै इसे भेटी पैसा खुसीखाटा लहे न जम्मा जाट्च हो, र साँच्ची न होसे गरीबकोलाक सहयोग जाट्की पर्च न हो। हीजैडेनाङ अन्यजाति भर्मीकै होखुरीक लकीङ न आत्मिक आशिषको डुप्मने डेनाङ होटजाट्न न अन्यजाति भर्मीकै यहूदी विश्वासीकुङ खाँचो र पूरा जाट्न याखी पर्ले। 28होटबाटै होखुरीकै भेला जाटार याम्हकाच सहयोग भेटी पैसा होखुरीककी याहार स्पेन नुङ्च बेलाङ नाखुरीककी डुपार ङा नुङ्ले। 29जब ङा नाखुरीक लेठाङ राल्हे, तब ख्रीष्टै याछ पूरा आशिषै न्हेपार राल्हे। 30ङौ प्यारो विश्वासी डाजेभाइको र डैबहिनीको, काल्हौ प्रभु येशू ख्रीष्ट र पवित्र आत्मै याछ प्रेमौ कारणै ङौ कष्टाङ सहायता जाट्ख्यो डेम ङौ लागि परमेश्वरखाटा जोडखाटा प्रार्थना जाट्न यान्ही डेम ङा बिन्ती जाट्ले। 31यहूदियाङ लेच अविश्वासीको लकीङ परमेश्वरै ङाकी जोगडीख्यो अनि यरूशलेमाङ ङै आल्छ सहयोग भेटी ख्रीष्टौ पवित्र भर्मीकोलाक ग्रहण योग्यौ छान्की ह्योक्ख्यो डेयार प्रार्थना जाट्न यान्ही। 32अनि परमेश्वरौ इच्छा छाना डेनाङ खुसीखाटा नाखुरीक लेठाङ राहार खाटा न ङुवार आनन्द जाट्की डीन्हीङ डेयार प्रार्थना जाट्न यान्ही। 33शान्ति याछ परमेश्वर नाखुरीक पट्टकोखाटा लेम ङुख्यो। आमेन।
Currently Selected:
रोमी 15: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.