मर्कूस 6
6
नासरताङ येशूकी विश्वास माजाट्च
(मत्ती १३:५३-५८; लूका ४:१६-३०)
1होटै ख्योहार येशू लहो न सहर#६:१लहो न सहर: इसे सहरौ म्यार्मीन नासरत लेया, होला न येशू होर्नन्या। नासरताङ ल्हेसा। होसकुङ चेलाको र होसकोकी डुटा। 2म्हुङ बाट्च दिनाङ होसकै यहूदीकुङ सभा ङुच इमाङ परमेश्वरौ शिक्षा याखी ठाला। होसकुङ शिक्षा सेच वास्टै भर्मीको छक्क पर्यार डेया, “इसे भर्मीये इसे पट्ट न कुटै वाह्रा? इसकोकी याछ इसे ज्ञान कुङ्च हो? होसकै याङ्च अचम्मौ कामको कुटजाट्न जाट्की ह्योका? 3ही इसे होसे सिकर्मी काम जाट्च न होइन र? ही इसे मरियमौ मीजा याकूब, योसेफ, यहूदा र सिमोनौ डाजे होइन र? ही होच्यो बहिनीको काल्हाखाटा न माले र?” होखुरीकै येशूकी इन्कार जाटा। 4येशूये होखुरीककी डेया, “अगमवक्ताकी पट्ट न ठावाङ आदर जाट्ले, तर लहो न लाङ्घा र लहो न इमुङ भर्मीकै चहिँ आदर माजाट्ले।” 5हीजैडेनाङ भर्मीकै येशूकी विश्वास माजाट्चबाटै येशूये अचम्मौ काम जाट्की माह्योका। होटबाटै होसकै होला काट नीस बिरामीको मीटाक मट्टै लहो मीहुट डार गेपाक्च काम जाट्की ह्योका। 6होखुरीकुङ अविश्वास डाङार होसको छक्क पर्या।
चेलाकोलाक प्रचार जाट्की बीर्न्हकाच
(मत्ती १०:५-१५; लूका ९:१-६)
होसको लाङ्घा-लाङ्घाङ परमेश्वरौ शिक्षा पाहाक्चै ह्वा। 7येशूये लहो बाह्र जना चेलाकोलाक लाहा लेठाङ आर्घा। होटै होखुरीककी अशुद्ध आत्मा खेट्डीच अधिकार याहा र नीस-नीस जना जाटार बीर्न्हका। 8येशूये चेलाकोलाक याङ्च आज्ञा याहा “लामाङ नुङ्नाङ ज्याच ठोक र पैसा हीर माबुकी, तर काट डाङ्गा मट्टै बुकी। 9जुत्ता बील्खी तर अरु फेर्म्या बढीनको माबुकी। 10होसे लाङ्घाङ टान्हाङ नाखुरीक कुसे इमाङ ङुले होसे लाङ्घा माडास्ठर नाखुरीक होसे न इमाङ ङुकी। 11इडीक कुसेर ठावाङ नाखुरीककी स्वागत माजाटा डेनाङ र भर्मीकै नाखुरीकुङ वचन सेकी मामन्डीया डेनाङ होसे ठाउँ लकीङ ख्योन्हाङ होखुरीकुङ विरुद्धाङ गवाहीयो लागि लहो पाइतालुङ धुलो खाह्राम्ह याखी।” #६:११ पाइतालुङ धुलो खाह्राकी डेच अर्थ चहिँ येशूकी विश्वास माजाट्च सहरुङ भर्मीकोलाक इन्कार जाट्की हो। होटै होखुरीकुङ लागि नाकै हीर ठोक जाट्की बाँकी मालेकी हो।
12होटै न्हुइङ चेलाको ख्योहार नुङा र भर्मीकै पश्चात्ताप जाट्ख्यो डेम प्रचार जाटा। 13होखुरीकै वास्टै भर्मीको लकीङ भूतको छ्युका र वास्टै छाचकोलाक सीडीये अभिषेक जाट्न गेपाका।
बप्तिस्मा याछ यूहन्नाकी साट्च
(मत्ती १४:१-१२; लूका ९:७-९)
14येशूओ बारेयाङ पट्ट ठावाङ न कुरा क्योस्चबाटै हेरोद राजै र होसकुङ बारेयाङ सेया। कुडीक जनै डेया, “बप्तिस्मा याछ यूहन्ना सीम र जीवालेसा, होटबाटै च होसे लकीङ याङ्च अचम्मौ शक्तियो काम छान्नने।” 15तर अरुकै डेया, “इसको च एलिया#६:१५ एलिया: धेरै लेखो यहूदीकै एलिया अगमवक्ता चहिँ मसीहौ लागि लाम तयार जाट्की राछ हो डेयार आशा जाट्नन्या। हो।” अझै अरुकै डेया, “इसको च पहिलुङ समयुङ अगमवक्ताको ल्याक्च न काट अगमवक्ता हो।” 16इसे पट्ट न कुरा सेरखीङ हेरोदै डेया, “होसे च यूहन्ना न हो। होसकी च ङै मीघाटी छ्योलोकार साट्की लैडीच, होसे न टी सीच लकीङ फेरि जीवाम सोलेसा।”
17होसे डेनाङ चेक अगाडि हेरोद राजै यूहन्नाकी घोकी लैडीयार झ्यालखानाङ कामन्या। हीजैडेनाङ हेरोदै लहो न भाइ फिलिपौ मास्टो हेरोदियासकी लहो मास्टोओ रुपाङ डामन्या। 18होटबाटै बप्तिस्मा याछ यूहन्नै डेमन्या, “भायो मास्टो इटजाट्न डाकी ठिक होइन।”
19होट डेचबाटै हेरोदियासकी यूहन्नाखाटा झोँक ख्योम्हन्या र साट्की मीमन जाट्नन्या तर साट्की माह्योक्न्या। 20हीजैडेनाङ यूहन्ना धर्मी र पवित्र भर्मी हो डेम हेरोदकी थाहा लेया, होटबाटै होचे यूहन्नाकी हीर माजाटा, र होसकी सुरक्षित डा। हेरोदै यूहन्नौ कुरा सेयार मीमन बीगारीस्नाङ र होचे यूहन्नौ कुरा खुसी छानार सेमन्या। 21तर हेरोदियासै यूहन्नाकी बदला लाच मौका डुपा, जब हेरोदै लाहा डीन्छ दिननीक लहो बाड्सो भर्मीको, सिपाहीको र गालीलुङ मुख्य-मुख्य भर्मीकोलाक आर्घार बाड्को भोज कासा। 22होला हेरोदियासौ मास्टो मीजा राहार स्याहा। होचे स्याछ डाङार हेरोद र पट्ट न पाहुनाको माह्राङा। होटै हेरोद राजै होसे मास्टो जजाकी डेया, “नाङ्की ही ङेछ मीमन ले ङेहो, ङा होसे न याल्हे।” 23फेरि हेरोद राजै शपथ ज्याचै होसकी डेया, “नाङ ङाखाटा ही ङेल्हे ङा ङौ आधा राज्यसम्म र नाङ्की याल्हे।”
24तब होसे बाहिर ख्योहार डेया, “मोइ, ङा ही ङेहीङ?” मोये डेया, “बप्तिस्मा याछ यूहन्नौ मीटालु ङेहो।”
25होडीक न बेला भित्री राजा लेठाङ नुङा र इट डेयार ङेहा, “हजुर ङाकी चाहाँ न बप्तिस्मा याछ यूहन्नौ मीटालु थालाङ डार यान्ही।”
26इसे कुरा सेयार राजा साप्फी दु:खी छाना तर लहे पट्ट न पाहुनाकुङ अगाडि शपथ ज्यार याल्हे डेचबाटै होसे वचन तोडीकी माह्योका। 27राजै तुरुन्तै काट जना सिपाहीकी बीर्न्हका र यूहन्नौ मीटालु छ्योलोकार राको डेम हुकुम याहा। होटै होचे झ्यालखानाङ नुङार यूहन्नौ मीटालु छ्योलोका, 28र थालाङ डार मास्टो जजाकी याहा होटै जजै मेन मोइकी याहा।
29यूहन्नौ चेलाकै जब इसे कुरा सेया होटै होखुरीक राहार होच्यो लाश आल्हार चिहानाङ ठाका।
येशूये बाङा हजार भर्मीकोलाक कास्च
(मत्ती १४:१३-२१; लूका ९:१०-१७; यूहन्ना ६:१-१४)
30होसे न्हुइङ प्रेरितको ल्हेसा र#६:३० ल्हेसा र: येशूये पहिला बीर्न्हकाच ठाउँ लकीङ होखुरीक ल्हेसार राहा। येशू लेठाङ भेला छाना र मेखुरीकै ही-ही जाटा र पाहाका होसे पट्ट न होसकोकी सेटाका। 31होसकै होखुरीककी डेया, “काल्हा सुर मालेच ठावाङ नुङार म्हुङ बाटीङ।” हीजैडेनाङ होला राम्ह नुङ्ङ जाट्च भर्मीको वास्टै लेया र होखुरीककी ज्याकी र फुर्सद माछान्नन्या। 32होटबाटै येशू र मेखोल्हौ चेलाको डुङ्गाङ काल्हार काटपट्टी सुर मालेच ठावाङ नुङा। 33तर वास्टै भर्मीकै होखुरीककी नुङ्चै जाट्च डाङार होखुरीककी चीन्डीया। होटै पट्ट न भर्मीको सहरको लकीङ खेर्न नुङार होखुरीक डेनाङ अगाडि टाहा। 34जब येशू डुङ्गा लकीङ बाहिर ख्योहा होसकै भर्मीकुङ भीड डाङार होसे भीडकी डाङ्रखीङ रोम सेया, हीजैडेनाङ होखुरीक गोठ्ला मालेच भेडाको लेखा न छान्न ङुमन्या। अनि होसकै होखुरीककी वास्टै कुराको पाहाक्की ठाला।
35नामबीक्की पारखीङ चेलाकै येशूकी डेया, “इसे ठाउँ एकान्त ले अब नामबीक्च बेला र छाना। 36इसे भर्मीकोलाक लाङ्घालाक नुङ्की यान्ही र होखुरीकै लहो लागि ज्याच ठोक लोख्यौ।” 37येशूये होखुरीककी डेया, “नाखुरीकै न इखुरीककी ज्याच ठोकको ज्याकी यान्ही।” तर होखुरीकै येशूकी डेया, “ही कानै नीस सय चाँदीयो सिक्का#६:३७ चाँदीयो सिक्का: काट सिक्का चाँदी चहिँ काट जना भर्मीयो कायाकौ कमाइ बराबर हो। खर्च जाटार इखुरीककी रोटो लोवार ज्याकी याखी र?” 38होसकै होखुरीककी डेया, “नाखुरीकखाटा कुडीक रोटो ले? ङोस्नी ट!” होखुरीकै ङोसा र होसकोकी डेया, “बाङा रोटो र नीस डीस्या ले।”
39होटै न्हुइङ येशूये लहो चेलाकोलाक डेया, भर्मीकोलाक झुरुम-झुरुम पार्चै फीच चउराङ ङुकी लैडीनी। 40होखुरीक सय-सय र पचास-पचास जनाकी भाकार ङुकी लैडीया। 41येशूये बाङा रोटो र नीस डीस्या लार स्वर्गलाक ङोसार परमेश्वरकी धन्यवाद याहा। रोटो ग्याकार भर्मीकोलाक पुङ्ङ यान्ही डेयार चेलाकोलाक अह्रडीया। होटजाट्न होसकै होसे नीस डीस्या र चेलाकोलाक पुङ्की लैडीया। 42होटै पट्टये न ह्रास्ठर ज्या। 43चेलाकै ओबारीस्च रोटो र डीस्यौ टुक्राको बटुलीनाङ बाह्र डालो छाना। 44होला ज्याचको लेन्जा भर्मीको मट्टै बाङा हजार जना लेया।
येशू डीमीटाक ह्वाच
(मत्ती १४:२२-३३; यूहन्ना ६:१५-२१)
45येशूये लहो चेलाकोलाक तुरुन्तै डुङ्गाङ काल्हार मेखोल्हा डेनाङ अगाडि न पारी ताल छेउङ बेथसेदा डेच ठावाङ नुङ्की डेम बीर्न्हका। तर होसको चहिँ भर्मीकोखाटा बिदा लाकी डेम होला न ङुवा। 46होखुरीकखाटा बिदा लाम भ्यारखीङ होसको चहिँ डाँडाङ प्रार्थना जाट्की नुङा। 47नामबीक्च बेलाङ डुङ्गा तालौ मीघ्याङ लेया र येशू चहिँ लाहा काट न ताल बाहिर लेया। 48नाम्सु क्योस्चबाटै चेलाकै डुङ्गा क्योट्की गाह्रो छान्च येशूये डाङा। गोराकुङ सोम बजे पट्टी होसको तालौ मीटाक ह्वाचै चेलाको पट्टी राहा, अनि होखुरीककी रीटार नुङ्की पा।
49तर चेलाकै होसकोकी ताल मीटाक ह्वामन लेच डाङार भूत डेम आर्मीटार होखुरीक चीघारीस्की ठाला। 50हीजैडेनाङ होसकोकी डाङार होखुरीक पट्ट न बीह्रीमन्या तर तुरुन्तै येशूये होखुरीककी डेया, “माबीह्रीनी, ङा न हो, साहस जाट्नी!” 51होटै होसको डुङ्गाङ काल्हा र नाम्सु बाहा। इसे डाङार चेलाको छक्क पर्या। 52येशूये बाङा हजार जनाकी रोटो र डीस्या कास्च डाङ्नाङ र होखुरीकै होच्यो पूरा अर्थ वार्खी माह्योक्नन्या हीजैडेनाङ होखुरीकुङ मीमन साह्रै कठोर लेया।
53ताल तरीसार होखुरीक गनेसरेत ठावाङ टाहार होखुरीकै डुङ्गाकी छेउ लैडीया। 54जब होखुरीक डुङ्गा लकीङ ख्योहा होडीक न बेला भर्मीकै येशूकी चीन्डीया। 55होखुरीक छेउछाउङ पट्ट न लाङ्घालाक खेर्न नुङा र येशू राम्हने डेयार सेटाका। होटै भर्मीकै छाचकोलाक टाङ्माखाटा न बुवार येशू लेठाङ राक्की ठाला। 56लाङ्घा, सहर र बस्ति, कुला-कुला येशू नुङ्न्या होला-होला भर्मीकै छाचकोलाक बुवार राक्ङन्या र बजार बजाराङ डाम याम्हन्या। होखुरीकै छाचकोलाक येशूओ बढीनौ छेउ मट्टै लेनाङ र छुकी यान्ही डेयार बिन्ती जाट्नन्या र होसकुङ बढीन छुच जति पट्ट न गेप्मन्या।
Currently Selected:
मर्कूस 6: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
