मर्कूस 5
5
अशुद्ध आत्मा लग्डीस्च भर्मी गेप्च
(मत्ती ८:२८-३४; लूका ८:२६-३९)
1येशू मेखोल्हौ चेलाकोखाटा गालील तालौ पारी पट्टी गेरासेनसौ मुलुकाङ टाहा। 2होसको डुङ्गा लकीङ पाखा ख्योछ बित्तिकै चिहान#५:२ चिहान: याङ्च चिहानको चहिँ बा-बाड्सो चट्टानौ ल्हुङाङ लेया। भर्मीकै चिहानकी डेम चट्टानाङ बाड्को ह्वाङ ख्वाक्ङन्या। याङ्च चिहान अरुये कोम्ह डाच र डुप्नन्या। घारीङ ख्योहार काट अशुद्ध आत्मा लग्डीस्च भर्मीये होसकोकी डुपा। 3होसे भर्मी चिहान घारीयाङ ङुमन्या। होसकी सुयेर छ्याकार डाकी माह्योक्न्या। 4होसकी वास्टै खेप मीहुट र मीखुट्या साङ्लीये छ्याक्नाङ र होचे साङ्लीकी टुक्रा-टुक्रा जाटार भाराक्ङन्या। सुयेर होसकी तहाङ राक्की माह्योक्ङन्या। 5नाबीक नाम्सीन चिहानौ डाँडाकोवाङ चीघारीस्चै लहे लाहाकी न ल्हुङै चेचै ह्वामन्या।
6जब होचे लोसीङ न येशूकी डाङा तब खेर्न राहार होसकोकी झोरा। 7होटै होसे भर्मी बाड्को स्वरै चीघारीसार डेया, “ए कह्राङ्छ परमेश्वरौ मीजा येशू, नाकै ङाखाटा ही पाच? ङा परमेश्वरौ म्यार्मीनाङ नाकोकी बिन्ती जाट्ले, ङाकी दु:ख माह्यानी!” 8होचे इट डेया, हीजैडेनाङ येशूये होसकी डेमन्या, “ए अशुद्ध आत्मा, होसे भर्मी लकीङ ख्योम्ह रान्हा!” 9होटै येशूये होसकी गीना, “नुओ म्यार्मीन ही हो?” होचे डेया, “ङौ म्यार्मीन अशुद्ध आत्मौ हुद्दा हो, हीजैडेनाङ कानको वास्टै ले।” 10होसे भूत आत्माकोलाक होसे इलाका लकीङ बाहिर माछ्युक्ङ यान्ही डेम होचे येशूकी बिन्ती जाटा।
11होला डाडौ पाखालाक काट हुल वाक#५:११वाक: यहूदी भर्मीकै वाककी अशुद्ध जनावर डेम भाक्ले। होखुरीककै सेन र वाकौ सेयाको माज्याले। स्यास्न ङुमन्या। 12होसे भूत आत्माकै इट डेयार बिन्ती जाटा, “कानकी वाक लेठाङ नुङ्की यान्ही र कान होखुरीक भित्री पर्ले।” 13होटै येशूये होखुरीककी नुङ्की अनुमति याहा र अशुद्ध आत्माको बाहिर ख्योहार वाककुङ भित्री पर्या। होटै नीस हजार वाकौ हुलको भीर लकीङ हुर्रडीसार तालाङ ठाहार सीया।
14याङ्च घटना डाङार वाक आर्छाचको भोग्डीसा, सहर र लाङ्घा-लाङ्घाङ इसे कुरा सेटाका। होटै ही छान्च हो डेम ङोस्की भर्मीको होला राहा। 15होखुरीक येशू लेठाङ राहार पहिला भूतको लग्डीस्च भर्मी गेपार बढीन बील्हार ङुम-ङुच डाङा। इसे डाङार होखुरीक बीह्रीया। 16सुये इसे घटना डाङ्ङन्या, होखुरीकै भूतको लग्डीस्च भर्मी र वाककोलाक ही छान्नन्या डेम सेटाक्ङ याहा। 17याङ्च कुरा सेरखीङ भर्मीकै येशूकी लहो इलाका लकीङ नुङ्की क्योट्नी डेम बिन्ती जाटा।
18येशू डुङ्गाङ काल्खी पानाङ होसे गेप्च भर्मी होसकोखाटा बिन्ती जाट्चै डेया “ङाकीर नाकोखाटा न आल्न्ही!” 19तर येशूये होसे भर्मीकी अनुमति माह्या र डेया, “नाको लहो इमाङ ल्हेस्नी र प्रभुये नाकोकी जाट्च कह्राङ्छ दया र कामौ बारेयाङ पट्ट न भर्मीकोलाक सेटाक्नी।” 20होटै होसे भर्मी ह्वाकी क्योटा र दश वटा सहर लेच डेकापोलिस डेच सहराङ नुङार येशूये जाट्च कह्राङ्छ कामौ बारेयाङ पट्ट न भर्मीकोलाक सेटाका। होसे कुरा सेयार भर्मीको अचम्म मन्डीया।
याइरसौ मास्टो मीजा र छाच मास्टो
(मत्ती ९:१८-२६; लूका ८:४०-५६)
21येशू फेरि डुङ्गाङ काल्हार तालपारी नुङा। होला भर्मीकुङ बाड्को भीड होसकुङ वरिपरि भेला छाना। होसको चहिँ तालौ छेवाङ लेया। 22सभा ङुच इमुङ शासकको मध्याङ याइरस म्यार्मीनुङ काट जना भर्मी येशू लेठाङ राहार होसकोकी डाङ्च बित्तिकै होसकुङ मीकुवाङ घोप्टो छाना, 23र बिन्ती जाट्चै डेया, “ङौ मार्जा मास्टो मीजा सीकी पामने। नाकै राहार होसे मीटाक नाकुङ मीहुट डाम यान्ही र होसे गेपार जीवाख्यो।”
24येशू याइरसखाटा नुङा। अनि काट बाड्को भर्मीकुङ भीड होसकुङ न्हुङ-न्हुङ नुङा, र भर्मीको होसकुङ वरिपरि ढुसा-ढुस जाट्की ठाला। 25होसे भीडाङ बाह्र वर्ष अगाडि लकीङ ह्यु नुङार छाच काट मास्टो र लेया। 26कुडीक बैद्यको लैडीनाङ र गेप्की माह्योक्न्या। लाहाखाटा लेच पट्ट न धन सम्पत्तिको खर्च जाट्न भ्यानाङर मागेप्म झन् साह्रो छान्नन्या। 27अनि होचे येशूओ बारेयाङ सेमन्या होटबाटै भीडाङ न येशूओ बढीन न्हुङ्लकीङ राहार छुवा। 28हीजैडेनाङ “ङै येशूओ बढीन मट्टै छुकी डुपा डेनाङ र ङा गेप्ले” डेम होच्यो मीमनाङ लेया। 29येशूओ बढीन छुच बित्तिकै होच्यो ह्यु नुङ्की डासा र लाहा गेप्च थाहा छाना। 30लाहा लकीङ शक्ति ख्योहार नुङ्च झट्टै येशूये थाहा डीन्हा र भीडकी न्हुङलाक ल्हेसार डेया, “ङौ बढीन सुये छुवा?” 31चेलाकै होसकोकी डेया, “भीडै ढुसा-ढुस जाट्च च नाकै डाङ्ङ न ले र पनि नाको डेले ‘सुये ङाकी छुवा?’” 32तर येशूये लाहाकी छुच सु आले डेम वार्लाक-पार्लाक ङोसा। 33मास्टो भर्मी लाहाकी ही छान्नन्या होसे थाहा डुपार बीह्रीया र बुरुक्चै राहार येशू अगाडि खुखुप छानार पट्ट न सत्य कुरा सेटाका।#५:३३ होसे मास्टोओ बिमारीये जाट्नाङ होसकी अशुद्ध खास्नन्या। काट अशुद्ध भर्मी छान्चबाटे भीडाङ ङुकी होटै येशूकी छुचबाटै होचे यहूदीकुङ कानुङ र नियमकी भङ्ग जाट्नन्या। लहे जाट्च कुरा सुयेर थाहा माछान्ख्यो डेम होसे मास्टोये विचार जाट्नन्या तर अब होचे ही जाटा होसे येशूये थाहा डुपा डेच कुरा होसे मास्टोये वाह्रा। भर्मीको र येशू मीरीस ख्योले डेम होसे मास्टो बीह्रीमन्या। 34होटै येशूये होसकी डेया, “ए मास्टो मीजा, नाकुङ विश्वासै नाको गेप्मने। शान्तिखाटा नुङ्नी। अब नाको गेपा।”
35होटै येशू ङाक्ङन लेनाङ याइरसौ इमीङ भर्मीको राहार डेया, “नाकुङ मीजा सीम भ्या, गुरु ज्युकी अब अरु कष्ट हीजै याखी?” 36तर होखुरीकै जाट्च कुरा ही हो डेम सेयार येशूये सभा ङुच इमुङ याइरसकी डेया, “माबीह्रीनी, विश्वास मट्टै जाट्नी।” 37अनि होसकै पत्रुस, याकूब र होच्यो भाइ यूहन्नाकी बाहेक अरु सुकीर लाहाखाटा राखी माह्या। 38होखुरीक याइरसौ इमाङ राहा। होला येशूये खैलाबैला जाट्चको, राप्चको र बाड्सो स्वरै बिलौना जाट्चकोलाक डाङा। 39भित्री पर्यार येशूये होखुरीककी डेया, “नाखुरीक हीजै खैलाबैला जाट्ले र राप्ले? इसे मास्टो जजा मीस्नने मट्टै मासीमने।” 40तर होखुरीक होसकुङ कुरा सेयार रेटा। होटै होसकै होखुरीककी बाहिर छ्युका र मास्टो जजौ बोइ-मोइ र मेखोल्हाखाटा लेच सोम चेलाको लार भित्री मास्टो जजा लेठाङ नुङा। 41होटै मास्टो जजौ मीहुट घोवार येशूये डेया, “तालिता कूमी#५:४१तालिता कूमी: इसे शब्दको आरामीक भाषौ हो। येशूओ समायाङ इसे भाषा चहिँ इस्राएलाङ ङाकन्या।” इच्यौ अर्थ चहिँ इसे हो, “ए नानी, ङा नाकोकी डेले, सोनी।” 42अनि मास्टो जजा तुरुन्तै सोवार ह्वाकी ठाला। होसे बाह्र वर्षौ लेया। होटै भर्मीको इसे डाङार छक्क पर्या। 43येशूये होखुरीककी इसे कुरा सुयेर थाहा माडीन्ख्यो डेम कडा आज्ञा याहा र मास्टो जजाकी चहिँ हीर ज्याच ठोक ज्याकी यान्ही डेम होखुरीककी डेया।
Currently Selected:
मर्कूस 5: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
