मर्कूस 3
3
मीहुट छोक्च भर्मी गेप्च
(मत्ती १२:९-१४; लूका ६:६-११)
1होटै न्हुइङ फेरि येशू यहूदीकुङ सभा ङुच इमाङ नुङा। होला मीहुट छोक्च काट जना भर्मी लेया। 2होसकै म्हुङ बाट्च याकाङ होसे भर्मीकी गेपाक्लेकी डेयार होसकोकी दोष लैडीकी डेम भर्मीको चीवा जाट्न ङुमन्या। 3येशूये होसे मीहुट छोक्च भर्मीकी डेया, “इला रान्ही अनि पट्टकुङ म्याहासाङ टोङ्न्ही।” 4होटै न्हुइङ येशूये होखुरीककी डेया, “म्हुङ बाट्च याकाङ भलो जाट्की की मासेछ जाट्की, भर्मीयो जीवन जीवाटाक्की की नाश जाट्की, कुसे चहिँ व्यवस्थौ लागि ठिक ले?” तर होखुरीक माच्याक्ङ ङुवा। 5र होखुरीकुङ कठोर मीमनौ कारणै होसको दु:खी छाना होटै मीरीसै होखुरीककी ङोसार मीहुट छोक्च भर्मीकी डेया, “नाकुङ मीहुट तन्कडीनी।” अनि होचे मीहुट तन्कडीयार होच्यो मीहुट गेपा।
6फरिसीको सभा इमीङ ख्योहार नुङा र येशूकी कुटजाट्न साट्की डेयार तुरुन्तै हेरोद राजाकी डुट्च भर्मीकोखाटा सल्लाह जाटा।
7येशू लहो चेलाकोखाटा तालौ छेउलाक नुङा। होला गालील लकीङ वास्टै भर्मीकुङ भीडै होसकोकी डुटा। 8होला यहुदिया, यरूशलेम, इदुमिआ, यर्दन नदीपारी टुरोसौ वरिपरि र सीदोन लकीङ भर्मीकुङ भीड होसकुङ अचम्मौ काम सेयार होसको लेठाङ राहा। 9भर्मीयो भीडै लाहाकी मापीचीख्यो डेम येशूये लहो चेलाकोलाक काट डुङ्गा मेखोल्हौ लागि तयार जाट्की लैडीया। 10होसकै वास्टै छाच भर्मीकोलाक गेपाक्च बाटै छाचको पट्टकै न होसकोकी छुकी डेयार ढुसा-ढुस जाट्न न लेया। 11अशुद्ध आत्मा लग्डीस्च भर्मीकै येशूकी डाङ्च बित्तिकै होसकुङ अगाडि खुखुप छानार इट डेचै च्याक्ङन्या, “नाको परमेश्वरौ मीजा हो!” 12तर येशूये लाहाकी अरु भर्मीकै माचीन्डीख्यो डेम होखुरीककी कडा आज्ञा याहा।
येशूये बाह्र जना प्रेरितको भाक्च
(मत्ती १०:१-४; लूका ६:१२-१६)
13होटै येशू डाँडाङ नुङार लहे मीमनै ज्याचकोलाक आर्घा र होखुरीक होसको लेठाङ राहा। 14अनि लाहाखाटा ह्वास्की र प्रचार जाट्की बीर्न्हकाकी डेम बाह्र जनाकी प्रेरित डेयार भाका। 15होटै होखुरीककी भूतको छ्युक्च अधिकार याहा। 16होसे बाह्र जना चेलाकुङ म्यार्मीन इसे न हो सिमोन, होसकी येशूये पत्रुस म्यार्मीन डा। 17अनि जब्दियौ मीजाको याकूब र मेन भाइ यूहन्ना, होसकै होखुरीककी “बोअनर्गेश” डेच म्यार्मीन डा। इच्यौ अर्थ चहिँ गर्जनौ मीजा हो। 18र अन्द्रियास, फिलिप, बारथोलोमाइ, मत्ती, थोमा, अल्फयासौ मीजाको याकूब र थेदियस, सिमोन कनानी होसे चहिँ लहो देशकी माया जाट्च भर्मी डेयार चीन्डीमन्या, 19र येशूकी घोवाक्च यहूदास इस्करियोत।
येशू र बालजिबुल भूत
(मत्ती १२:२२-३२; लूका ११:१४-२३; १२:१०)
20येशू इमाङ नुङा। फेरि होला वास्टै भर्मीकुङ भीड भेला छाना र येशू र होसकुङ चेलाकै ज्यामा ज्याच फुर्सद धरी माढीना। 21जब येशूओ जहानकै इसे कुरा सेया तब होसकोकी आल्खी डेयार होखुरीक येशू लेठाङ नुङा। हीजैडेनाङ होखुरीकै होसकुङ मीमन ठेगानाङ माले डेयार डेमन्या।
22यरूशलेम लकीङ राछ व्यवस्थौ धर्मगुरुकै डेया, “होसेखाटा बालजिबुल#३:२२ बालजिबुल: शैतानौ अर्को म्यार्मीन बालजिबुल र हो। भूत ले र भूतकुङ मालिक लकीङ न होचे भूतको छ्युक्ले।”
23तर येशूये होखुरीककी लाहा लेठाङ आर्घार उदाहरण याछै डेया, “शैतानै शैतानकी कुटजाट्न छ्युक्की ह्योक्ले? 24होसे राज्यौ लाहा लाहाङ न झगडा छाना डेनाङ होसे राज्य टीक्डीस्की माह्योक्ले। 25कुसेर इमाङ लाहा लाहाङ न झगडा छाना डेनाङ होसे इम र टीक्डीस्की माह्योक्ले। 26होटजाट्न न इडीक शैतानै शैतानौ न विरुद्धाङ सोवार झगडा राका डेनाङ होसे टीक्डीस्की माह्योक्ले तर होच्यो अन्त्य छानार नुङ्ले। 27सुयेर बलियो भर्मीयो इमाङ नुङार होच्यो मालमत्ताको स्याट्की माह्योक्ले, तर होचे होसे बलियो भर्मीकी पहिला छ्याका डेनाङ होच्यो इमाङ पर्यार मालमत्ताको स्याट्की ह्योक्ले।
28 “साँच्ची न ङा नाखुरीककी डेले, भर्मीकुङ पट्ट न पाप र निन्दा क्षमा छान्की ह्योक्ले। 29तर पवित्र आत्मौ विरुद्धाङ निन्दा जाट्चकी ही जाट्न र क्षमा माछान्ने। होसे सधैँभरि पापौ दोषी ठहरीस्ले।” 30होसकै इसे वचन डेया, हीजैडेनाङ “होसेखाटा दुष्टआत्मा ले” डेयार होखुरीकै डेमन्या।
येशूओ मोइ र भाइको
(मत्ती १२:४६-५०; लूका ८:१९-२१)
31होडीक बेला येशूओ मोइ र भाइको होला टाह्रा र बाहिर टोङ्हा अनि होसकोकी आर्घाकी लैडीया।
32भर्मीकुङ भीड होसकुङ वरिपरि ङुमङुमन्या र होखुरीकै येशूकी डेया, “ङोस्नी, नाकुङ मोइ र भाइको बाहिर नाकोकी आर्घामनले।” 33अनि होसकै होखुरीककी जवाफ याछै डेया, “ङौ मोइ र ङौ भाइको सु हो?” 34होटै लहो वरिपरि ङुम-ङुच भर्मीकोलाक ङोसार होसकै डेया, “ङोस्नी इखुरीक न हो ङौ मोइ र भाइको। 35हीजैडेनाङ सुये परमेश्वरौ इच्छा मन्डीले होखुरीक न ङौ भाइ, बहिनी र मोइ हो।”
Currently Selected:
मर्कूस 3: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
