मर्कूस 2
2
पक्षाघात छान्चकी गेपाक्च
(मत्ती ९:१-८; लूका ५:१७-२६)
1कायाक नीसयाक न्हुइङ येशू कफर्नहुमाङ ल्हेसा र भर्मीकै होसको इमाङ न ले डेम सेया। 2वास्टै भर्मीको होसको लेठाङ भेला छाना। होखुरीक होला मासीन्हार गालाम बाहिरसम्म र ठाउँ मालेया। येशूये होखुरीककी परमेश्वरौ वचन पाहाक्ङन लेया। 3होडीक न बेला भर्मीको राहा, र बुली जना भर्मीकै काट पक्षाघात छानार छाच भर्मीकी होसको लेठाङ बुवार राका। 4तर भर्मीकुङ बाड्को भीडै जाट्नाङ होखुरीकै छाच भर्मीकी भित्री येशू लेठाङ टाहाक्की माह्योका। होटबाटै होसको ङुच ठाऔ सीधा ढेनामुङ छाना#२:४ छाना: होसे बेला इस्राएलीकुङ इमकुङ छानाको फराकिलो छान्ननन्या। भर्मीको छानाङ म्हुङ बाट्की डेम नुङ्ङन ङुमन्या। की होखुरीकै खोल्हार होसे पक्षाघाती छानार छाच भर्मी मीस्च होसे खाटखाटा न म्हाका झालाका। 5येशूये होखुरीकुङ विश्वास डाङार होसे पक्षाघातीकी डेया, “ए मीजा, नाकुङ पापको क्षमा छाना।”
6तर होला लेच धर्मगुरुकै लहो मीमनाङ इट डेयार विचार जाट्नन लेया, 7“इसे भर्मी हीजै इटजाट्न ङाक्ने? इसे च परमेश्वरौ निन्दा टी हो! परमेश्वरै बाहेक अरु सुयेर पाप क्षमा जाट्की ह्योक्ले र?” 8होखुरीकै याङ्च कुरा विचार जाट्न न ले डेच येशूये तुरुन्तै लहो मीमनाङ थाहा छानार होखुरीककी डेया, “हीजै नाखुरीक याङ्च विचार जाट्ले? 9इसे पक्षाघातीकी ‘नाकुङ पापको क्षमा छाना’ डेकी र ‘सोनी, नाकुङ खाट सोटार ह्वानी’ डेकी कुसे चहिँ सजिलो ले? 10तर भर्मीयो मीजाकी इसे पृथ्वीयाङ पाप क्षमा जाट्च अधिकार ले डेम नाखुरीकै वार्न्ही।” अनि होसकै होसे पक्षाघात छानार छाच भर्मीकी डेया,#२:१०भर्मीयो मीजा: येशूये धेरै लेखो लाहाकी इसे म्यार्मीन क्योट्न्या। 11“ङा नाकोकी डेले, सोनी, नाकुङ खाट सोट्नी र इमाङ नुङ्नी।” 12होसे सोवार तुरुन्तै खाट सोटार पट्टकुङ म्याहासीङ ह्वाकी क्योटा अनि भर्मीको अचम्म मन्डीचै छक्क पर्या “कानै याङ्च च सेन र न माडाङन्या” डेचै होखुरीकै परमेश्वरौ प्रशंसा जाटा।
येशूये लेवीकी मेखोल्हाकी डुट्की डेम आर्घाच
(मत्ती ९:९-१३; लूका ५:२७-३२)
13येशू फेरि कायाक गालील तालौ छेवाङ नुङा। भर्मीकुङ बाड्को भीड होसको लेठाङ राहार होसकै होखुरीककी शिक्षा याहा। 14होटै नुङ्चै जाट्नाङ होसकै अल्फयासौ मीजा लेवीकी कर सोट्च ठावाङ ङुम-ङुच डाङार येशूये होसकी डेया, “ङाकी डुट्नी।” होटै होसे सोवार येशूकी डुटा।#२:१४लेवी: आसकोकी होखुरीककै मत्ती डेम र डेमन्या। #मर्कूस २:१४; लूका ५:२७
15अनि होसको र चेलाको लेवीयो इमाङ ज्यामा ज्याकी डेम ङुनाङ होसकोकी डुट्च वास्टै जना कर सोट्चको र अरु पापी भर्मीको र येशूखाटा न ज्याकी ङुवा। 16येशू पापीको र कर सोट्चकोखाटा ज्याम ङुच डाङार फरिसी दलुङ धर्मगुरुकै होसकुङ चेलाकोलाक डेया, “होसको हीजै कर सोट्चको र पापीकोखाटा ङुवार ज्याच?”#२:१६ यहूदीकुङ अगुवाकै पापीको येशूखाटा ङुम ज्याच डाङार माजाका, हीजैडेनाङ होखुरीक अशुद्ध भर्मीको लेया। होसे अगुवाकै इट डेया, इडीक अशुद्ध भर्मीकोखाटा सुर ङुवार ज्या डेनाङ होसे र अशुद्ध छान्ने।
17इसे कुरा सेयार येशूये होखुरीककी डेया, “माछाचकोलाक वैद्यौ खाँचो मापर्ले, तर छाचकोलाक मट्टै खाँचो पर्ले। ङा धर्मीकोलाक होइन तर पापीकोलाक आर्घाकी डेम राछ हो।”
उपवास ङुच बारेयाङ गीन्च
(मत्ती ९:१४-१७; लूका ५:३३-३९)
18बप्तिस्मा याछ यूहन्नौ चेलाको र फरिसीको उपवास ङुमन्या। अनि कुडीक जना भर्मीकै चहिँ येशू लेठाङ राहार डेया, “यूहन्नौ चेलाको र फरिसीकुङ चेलाको च उपवास ङुले, तर नाकुङ चेलाको हीजै उपवास माङुले?” 19येशूये होखुरीककी डेया, “ही ब्याहुला होखुरीकखाटा लेठर जन्तिको उपवास ङुले र? ब्याहुला होखुरीकखाटा लेठर होखुरीक उपवास माङुले। 20तर समय राल्हे, जब ब्याहुलाकी होखुरीक लकीङ भाग्ले, तब होखुरीक होसनीक उपवास ङुले।
21 “सुयेर ठोट्र्या बढीनाङ नयाँ बढीनौ टाल्हो माकाले, नभा च नयाँ बढीन खुम्चडीस्ले र च्याहार ख्योल्हे, होटै झन् मास्च र बाड्को ह्वाङ छान्ने।
22 “सुयेर नयाँ अङ्गुरौ मद्य ठोट्र्या छालौ मशकाङ माकाले, नभा च होसे दाखमद्यै छालौ मशककी भास्न याल्हे र अङ्गुरौ मद्य र मसक नीस न नाश छान्ने। तर नयाँ दाखमद्यकी चहिँ नयाँ मसकाङ न काले।” # २:२२ अङ्गुरौ रस छीप्चै नुङ्नाङ हान लेखा न बीर्छ छान्ने। होटै इसकी जनावरौ नयाँ छालौ थैलाङ काम डाच जाट्न्या। हीजैडेनाङ नयाँ छाला तन्कडीस्ले तर ठोट्र्या छाला मातन्कडीसार होसे मसकौ थैलो भाट्नन्या।
म्हुङ बाट्च दिनौ प्रभु
(मत्ती १२:१-८; लूका ६:१-५)
23कायाक म्हुङ बाट्च दिनाङ येशू गहुँ बारीयो लाम छान्चै नुङ्ङ न लेया। नुङ्चै जाट्नाङ होसकुङ चेलाकै गहुँओ बाला ढुम्की ठाला।#२:२३ भर्मीको बारीयो लाम छानार ह्वाच बेलाङ इडीक सुकीर मीटुक रन्छीनाङ होखुरीकै गहुँओ बाला ढुमार आर्जुम ज्याकी ह्योक्ङन्या। तर इसकी खुस्च चहिँ मामन्डीमन्या। 24इसे डाङार फरिसीकै होसकोकी डेया, “ङोस्नी, म्हुङ बाट्च दिनाङ व्यवस्थै ही जाट्की माछान्ने डेमने होसे न हीजै जाट्ले इखुरीकै?” 25येशूये होखुरीककी डेया, “जब दाऊद र होसेखाटा लेचको हीर मालेम मीटुक रन्छीच बेलाङ दाऊदै ही जाटा? नाखुरीकै सेन र मापरेस्ने? 26प्रधान पूजाहारी अबियाथारौ पालोवाङ परमेश्वरौ मन्दिराङ दाऊद पर्यार परमेश्वरकी चढडीच रोटो ज्या। होसे रोटो चहिँ पूजाहारीकै बाहेक अरु सुयेर ज्याकी माछान्च लेया। अनि होसे रोटो दाऊदै मेल्हाखाटा लेचकोलाक र याहा।”
27अनि येशूये होखुरीककी डेया, “म्हुङ बाट्च दिन भर्मीकुङ लागि खास्च हो तर भर्मी म्हुङ बाट्च दिनौ लागि होइन। 28होटबाटै भर्मीयो मीजा म्हुङ बाट्च दिनौ र प्रभु हो।”
Currently Selected:
मर्कूस 2: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
