लूका 1
1
लूकै थियोफिलसकी येशूओ बारेयाङ रीक्च चिठी
1आदरणिय थियोफिलस, कानुङ मीघ्याङ पूरा छान्च घटनाकुङ विवरण भेला जाट्च काम वास्टै भर्मीकै जिम्मा ला। 2इसे कुराकुङ जिम्मा कानकी होखुरीकै न याहा, सुये इसे घटनाको सुरुलकीङ लहो मीमीकै डाङ्च र सेछ समाचार सेटाक्चको लेया। 3होटै ङै र सुरुलकीङ न सेम्हखाटा पट्ट न कुराकी पा, र मीङारैखाटा होसे बारेयाङ रीक्की ङाकी सेम्ह सेया। 4होटबाटै नाकै सेच कुराकुङ पट्ट न सत्यता नाकोकी थाहा छान्ख्यो।
स्वर्गदूतै बप्तिस्मा याछ यूहन्ना डीन्ल्हे डेम सेटाक्च
5यहूदिया डेठुङ राजा हेरोदौ पालो लेनाङ जकरिया म्यार्मीनौ पूजाहारी लेया। होसे अबिया डेच पूजाहारी समुहौ काट भर्मी लेया। होच्यो मास्टोओ म्यार्मीन एलीशिबा लेया। होसे चहिँ हारुन कुलुङ पूजाहारीयो मास्टो मीजा लेया। 6होखुरीक नीस न परमेश्वरौ म्याहासाङ सेम्ह जीवाम्या। होखुरीकै परमप्रभुओ पट्ट न आज्ञा र धार्मिक नियमको मन्डीमन्या। 7तर होखुरीकुङ मीजाको मालेया, हीजैडेनाङ एलीशिबा बाँझी लेया र होखुरीक नीसौ न वास्टै उमेर छान्न भ्यामन्या।
8कायाक जकरिया लहो समुहौ पालोवाङ परमेश्वरौ मन्दिराङ पूजाहारीयो काम जाट्नन लेया। 9होटै पूजाहारीकुङ चलन अनुसार चिठ्ठा कानाङ परमप्रभु परमेश्वरौ मन्दिर भित्री पर्यार धूप ढाक्च काम जकरियाकी पर्या। 10धूप ढाक्च बेलाङ वास्टै भर्मीको बाहिर प्रार्थना जाट्न ङुमन्या। 11होला परमप्रभुओ काट स्वर्गदूत धूप ढाक्च ठाऔ डोर पट्टी टोङ्ह ङुच डाङा। 12होटै जकरिया होसे डाङार साप्फी बीह्रीया। 13तर स्वर्गदूतै होसकी डेया, “माबीह्रीनी जकरिया, हीजैडेनाङ नाकुङ प्रार्थना परमेश्वरै सेमने। अब नाकुङ मास्टो एलीशिबै काट लेन्जा मीजा डीन्ल्हे, र नाकै होच्यो म्यार्मीन यूहन्ना डाकी। 14होडीक बेला नाको माह्राङ्ले अनि वास्टै अरु भर्मीको र होसे डीन्हाङ माह्राङ्ले। 15हीजैडेनाङ होसे परमप्रभुओ म्याहासाङ बाड्को काम जाट्च छान्ने। होचे अङ्गुरौ मद्य र मागाले। मोयो मीटुकाङ लेनाङ न होसे पवित्र आत्मै न्हेप्ले। 16अनि होचे इस्राएली जातिकुङ वास्टै भर्मीकोलाक लहो परमप्रभु परमेश्वर पट्टी ल्हेसाक्ले। 17बोइकुङ मीमन मीजाको पट्टी र अनाज्ञाकारीकोलाक धर्मीकुङ बुद्धि पट्टी ल्हेसाक्की प्रभुओ लागि योग्य छान्च काट जाति तयार खास्की होसकुङ अघि होसे एलियौ आत्मा र शक्तियाङ नुङ्ले।”
18स्वर्गदूतकी जकरिये डेया, “ङै इसे कुरा साँच्ची न छान्ने डेयार कुटजाट्न पट्डीकी? ङा बुढा छान्न भ्यामे र ङौ मास्टो र बुढी छान्न भ्यामने।” 19होटै स्वर्गदूतै होसकी डेया, “ङा परमेश्वरखाटा ङुच गब्रिएल हो। होसकै न ङाकी नाङखाटा कुरा जाट्की र इसे सेछ समाचार सेटाक्की डेम बीर्न्हकाच हो। 20इसे कुरा पूरा माछान्ठर नाङ लाटा छान्ने र ङाक्की माह्योक्ले। हीजैडेनाङ नीये ङै ङाक्च वचनकी विश्वास माजाटा। अब इसे वचन लहो समयाङ पूरा छान्ने।”
21होडीक बेला जकरियाकी वास्टै भर्मीकै लेन्न ङुमन्या। जकरिये परमेश्वरौ मन्दिराङ ढिलो जाट्नाङ होखुरीक अचम्म मन्डीम ङुमन्या। 22होटै बाहिर ख्योम्ह रान्हाङ जकरिया भर्मीकोखाटा ङाक्की माह्योका। होटबाटै होखुरीकै परमेश्वरौ मन्दिर भित्री जकरिये दर्शन डाङा डेच कुरा थाहा छाना। होचे होला लेच भर्मीकोलाक मीहुटै इशारा जाटा, र होसे लाटा छान्न ङुवा।
23जकरिया लहो पूजा जाट्च काम भ्यारखीङ इमाङ ल्हेसा। 24होटै न्हुइङ होच्यो मास्टो एलीशिबौ मीटुकाङ गर्भ ङुवा, अनि बाङा महिनासम्म आर्च्युम्ह ङुवार एलीशिबै इट डेया, 25“भर्मीकुङ म्याहासाङ ङाकी मीजा माडीन्छ बाँझी डेयार डेच म्यार्मीनकी मेट्डीकी डेम परमप्रभुये ङा मीटाक इटजाट्न दया जाट्नने।”
येशूओ जन्मओ भविष्यवाणी छान्च
26एलीशिबौ मीटुकाङ मीजा छ महिनौ छान्नाङ परमेश्वरै गब्रिएल स्वर्गदूतकी गालीलौ नासरत डेच सहराङ बीर्न्हका। 27स्वर्गदूत काट जना मरियम म्यार्मीनौ कन्या मास्टो लेठाङ नुङा। होसे कन्यौ ब्याहा छान्की डेम दाऊद राजौ कुलुङ योसेफ म्यार्मीनुङ काट भर्मीखाटा पक्का छानन्या।
28स्वर्गदूत होसे लेठाङ नुङार डेया, “ए नानी झोर्ले! नाकोकी परमप्रभुये आशिष याम्हने र होसको नाकोखाटा ले।” 29तर मरियम इसे कुरै साह्रै आटडीसा। अनि हीजै ङाकी इटजाट्न झोर्च औला डेम मीमनाङ विचार जाटा। 30स्वर्गदूतै डेया, “माबीह्रीनी मरियम हीजैडेनाङ नाकै परमेश्वर लकीङ अनुग्रह डुप्मने। 31अब ङोस्नी, नाकुङ मीटुकाङ गर्भ ङुले, र काट लेन्जा मीजा डीन्ल्हे। अनि नाकै होसकुङ म्यार्मीन येशू डाकी। 32होसको कह्राङ्छ छान्ने र होसकोकी कह्राङ्छ परमेश्वरौ मीजा डेले। होटै परमप्रभु परमेश्वरै होसकोकी होसकुङ पुर्खा दाऊद राजाकी लेखा न राज्य जाट्की अधिकार याल्हे। 33होटै होसकै याकूबौ शाखा-सन्तान मीटाक सधैँभरि राज्य जाट्ले। र होसकुङ राज्य सेन र न अन्त्य माछान्ने।” 34स्वर्गदूतकी मरियमै डेया, “इसे कुटजाट्न छान्की ह्योक्ले? हीजैडेनाङ ङा च काट कन्या मास्टो हो।” 35स्वर्गदूतै होसकी डेया, “पवित्र आत्मा नाको लेठाङ राल्हे, र सर्वोच्चौ शक्तियो छाया नाको मीटाक पर्ले। होटबाटै डीन्छ बालक पवित्र छान्ने र होसकोकी न परमेश्वरौ मीजा डेले। 36सेनी, नाकुङ लहो भर्मी एलीशिबै र लेन्जा मीजा डीन्छ छान्नने भर्मीकै होसकी मीजा माडीन्छ बाँझी मास्टो डेमन्या तर होसे बुढी छान्न भ्यानाङ र चाहाँ होच्यो मीटुकाङ छ महिनौ मीजा ले। 37ङोस्नी, परमेश्वरै जाट्की माह्योक्च कुरा हीर माले।” 38अनि मरियमै डेया, “छान्ने, ङा परमप्रभुओ दासी, ङाकी नाकै डेच वचन लेखा न छान्ख्यो।” तब स्वर्गदूत होसे लकीङ बिदा छाना।
मरियमै एलीशिबाकी डुप्की नुङ्च
39होटै न्हुइङ मरियम हतारीस्चै पहाड पट्टी यहूदियुङ काट लाङ्घाङ नुङा। 40होला जकरियो इमाङ नुङार एलीशिबाकी झोरा। 41मरियमै झोरा डेच स्वर सेच बित्तिकै एलीशिबौ मीटुकाङ लेच मीजा फोर्झोवा। होडीक बेला न एलीशिबा पवित्र आत्मै न्हेपा।
42अनि होचे बाड्को स्वरै डेया, “मास्टोको मध्याङ नाको च पट्ट डेनाङ आशिष डुप्च हो, र नाकुङ मीटुकाङ लेच मीजै र आशिष डुप्ले। 43ङौ प्रभुओ मोइ न ङाकी आर्मीटार डुप्की राहा इसे कुङ्च खालुङ मान औला? 44ङोस्नी, नाकै झोर्ले डेच स्वर ङौ मेनेकेपाङ पर्च बित्तिकै ङौ मीटुकाङ मीजा माह्राङ्छै फोर्झोवा।
45“परमप्रभुये नाकोकी डेच कुरा ओल्हे डेम विश्वास जाट्च बाटै नाकै आशिष डुप्मने।”
मरियमै जय-जयकार जाट्चै ल्हीङ्च
46अनि मरियमै डेया,
“ङा भित्री मीमनीङ न प्रभुओ जय-जयकार जाट्ले,
47होटबाटै ङा मुक्ति याछ परमेश्वरखाटा माह्राङ्ले,
48हीजैडेनाङ होसकै ङा ल्याक्च तुच्छ दासीकी दया जाट्नने।
अब इटै आलाक पट्ट न पुस्तौ भर्मीकै ङाकी आशिष डुप्च डेले।
49हीजैडेनाङ होसको शक्तिशाली ले, होसकै ङौ लागि बाड्को काम जाट्नने। होसकुङ म्यार्मीन पवित्र ले।
50अनि होसकोकी मन्डीचकोलाक होसकुङ दया पुस्तौं पुस्तासम्म ङुमन ङुले।
51होसकुङ शक्ति लेच मीहुटै घमण्डीकुङ विचारकोलाक लथालिङ्ग खास्न याम्हे।
52होसकै घमण्डी राजाकोलाक मेखुरीकुङ सिंहासन लकीङ झालाक्ङ याम्हने, तर
नम्रकोलाक होसकै ढेनाम सोट्नने।
53होसकै मीटुक रन्छीचकोलाक असल ठोकै ह्रासाक्ने। तर धनीकोलाक
चहिँ मोर्ल्हयाङ मीहुट ल्हेटाक्ङने।
54होसकै कानुङ बोइ बाज्युकोखाटा जाट्च प्रतिज्ञा आर्मीटार पूरा जाट्न लहो सेवक
इस्राएलकी सहायता जाट्नने,
55र कानुङ बोइ बाज्युकोलाक डेनाङ लेखा न, अब्राहाम र मेकुङ राछ सन्तानकी सधैँभरियो
लागि दया जाट्नने।”
56होडीक बेला मरियम सोम महिना एलीशिबाखाटा ङुवा होटै न्हुइङ लहो इमाङ ल्हेस्न राहा।
बप्तिस्मा याछ यूहन्ना डीन्छ
57अब एलीशिबै मीजा डीन्छ बेला छाना, होटै होचे लेन्जा मीजा डीन्हा। 58परमप्रभुये होसकी इडीक बाड्को दया जाट्नने डेच सेयार होच्यो छिमेकीको र लहो भर्मीको एलीशिबाखाटा माह्राङा। 59आठ याक ओल्रखीङ होखुरीक बालककी खतना जाट्की जम्मा छाना। होखुरीकै बोयो लेखा न मीजौ म्यार्मीन र जकरिया डाकी पामन्या। 60तर मेन मोये डेया, “होइन, इच्यौ म्यार्मीन च यूहन्ना डाकी पर्ले।” 61होखुरीकै एलीशिबाकी डेया, “नाकुङ लहो भर्मीकुङ च याङ्च म्यार्मीन लेच सुर माले ट!” 62होटबाटै होखुरीकै बालकौ बोइकी मीहुटै इशारा जाटार गीना, “नाको इच्यौ म्यार्मीन ही डाले?” 63होचे काट रीक्च पाटी ङेहार “इच्यौ म्यार्मीन यूहन्ना हो” डेयार रीक्ङ याहा। इसे डाङार होखुरीक पट्ट न छक्क पर्या। 64होडीक न बेला जकरियो बोली भाटार ङाक्की ह्योका अनि होचे परमेश्वरौ जय-जयकार जाट्की ठाला। 65इसे पट्ट न कुरा डाङार छिमेकीको बीह्रीया। अनि इसे कुरा यहूदियुङ पट्ट न पहाडी मुलुकभरि इसे घटनौ चर्चा फैलडीसा। 66इसे कुरा सेचको पट्टकै इसे बालक पीहीन कुङ्च छान्ने औला डेम लहो मीमनाङ आर्मीटा। हीजैडेनाङ परमप्रभुओ शक्ति होसे मीटाक लेया।
जकरिये जय-जयकार जाट्च र भविष्यवाणी
67बालकौ बोइ जकरिया पवित्र आत्मै न्हेपार अगमवाणी ङाक्की ठाला,
68“इस्राएलीकुङ परमप्रभु, परमेश्वरौ प्रशंसा छान्ख्यो, हीजैडेनाङ होसको
राम्हने, र लहो भर्मीकोलाक जीवाटाक्ने!
69होसकै कानुङ लागि लहो सेवक दाऊदौ वंशाङ काट शक्तिशाली
मुक्तिदाता खडा जाट्नने।
70-71होसकै काल्हाकी शत्रुकुङ मीहुटीङ र काल्हाकी घृणा जाट्चको लकीङ
जीवाटाक्ले डेच कुरा लहो पवित्र
अगमवक्ताकुङ मेङ्गेरीङ खायाक लकीङ ङाक्ङन्या।
72होसकै काल्हौ बोइ बाज्युकोखाटा जाट्च पवित्र
करारकी आर्मीटार दया जाट्नने।
73होसकै काल्हौ पुर्खा अब्राहामखाटा ङा पूरा जाट्ले डेम बाचा जाट्नन्या।
74र काल्हा शत्रुकुङ मीहुटीङ छुटकारा छानीङ।
75अनि काल्हा माबीह्रीम होसकुङ म्याहासाङ सेम्ह र पवित्र छानार जीवनभरि न होसकुङ सेवा जाट्की डीन्हीङ।
76ए बालक, नाकोकी सर्वोच्चओ अगमवक्ता डेम पट्टकै चीन्डीले।
हीजैडेनाङ नाको प्रभुओ अघि-अघि होसकुङ लाम तयार खास्की नुङ्ले।
77होसकुङ भर्मीकोलाक पाप लकीङ कुटजाट्न क्षमा छानार मुक्ति डुप्ले डेम
नाकै पाहाक्ले। 78हीजैडेनाङ कानुङ परमेश्वरै रोच बाटै स्वर्ग लकीङ गोराकुङ ज्योति कान मीटाक पर्ले।
79छुम्ठाङ र मृत्युओ छायाङ ङुचकै ज्योति डुप्ले। होसे ज्योतिये न काल्हाकी शान्तियो लामाङ डोरीले।”
80होटै बालक यूहन्ना ल्होङ्चै र आत्माङ बलियो छान्चै नुङा। र इस्राएलीकुङ मीघ्याङ प्रचार सुरु माजाट्ठर होसे उजाड-ठाँवाङ न ङुवा।
Currently Selected:
लूका 1: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
