प्रेरित 23
23
1पावलै महासभा पट्टी मीमीक चिम माजाट्न ङोसार डेया, “ए डाजेभाइको, छीनीसम्म परमेश्वरौ मीमीकाङ ङै शुद्ध विवेकै जीवन बीतडीमने।” 2इसे कुरा सेयार प्रधान पूजाहारी हननिये मेन छेवाङ टोङ्छकोलाक पावलौ मेङ्गेराङ हीर्कडीकी डेम आज्ञा याहा। 3तब पावलै होसकी डेया, “ए चुनै लाक्च बोच भित्ता! नाकोकी र परमेश्वरै हीर्कडीले। नाको मोशौ व्यवस्था अनुसार ङौ न्याय जाट्की ङुवार ही मोशौ व्यवस्था विपरित ङाकी हीर्कडीकी आज्ञा याल्हे?” 4अनि होच्यो छेवाङ टोङ्छकै डेया, “ही नाङ परमेश्वरौ प्रधान पूजाहारीयो अपमान जाट्ले?” 5तब पावलै डेया, “ए डाजेभाइको, होसे प्रधान पूजाहारी हो डेच ङाकी थाहा मालेया। हीजैडेनाङ रीक्ङने, ‘नीये लहो जनतौ शासकौ विरुद्धाङ मासेछ कुरा माङाक्की।’”
6तर होसे महासभाङ काट दल सदुकी र अर्को दल फरिसीको लेसा डेच थाहा छानार पावलै बाड्को स्वराङ डेया, “ए भाइको, ङा फरिसी हो र फरिसीकुङ न मीजा हो। सीच लकीङ जीवाले डेच आशा डाचबाटै ङौ मुद्दा क्योस्नने।”
7अनि पावलै इसे कुरा डेच कारणै सदुकी र फरिसीकुङ मीघ्याङ माखाटा र भीडाङ फाटो छाना। 8हीजैडेनाङ सदुकीकै इट डेले सीचको फेरि जीवाम सोले, स्वर्गदूत, आत्मा डेच हीर माले। तर फरिसीको होसे पट्ट न मन्डीले। 9होचे जाट्न महासभाङ बाड्को हल्ला छाना। फरिसी समुहुङ कोइ-कोइ धर्मगुरु खडा छानार इट डेचै विरोध जाटा, “इसे भर्मीयाङ कानै हीर खराबी माडुप्ने। इडीक आत्मा वा स्वर्गदूतै इसकोकी इट डेच हो डेनाङ ही ट?”
10होला बाड्को मतभेद छान्रखीङ होखुरीकुङ मीहुट लकीङ पावलकी च्याटचुट पार्यार साट्ले औला डेम बीह्रीयार सेनापतिये पावलकी होखुरीकुङ मीघीङ जबरजस्ती डोनार ब्यारेक भित्री आल्खी डेम सिपाहीकोलाक आज्ञा याहा।
11होसनीक नाबीक प्रभुये पावलौ खेरेप टोङ्हार डेया, “पावल, साहस जाट्नी! कुटजाट्न नाकै यरूशलेमाङ ङौ विषयाङ गवाही याहा, होटजाट्न न नाकै रोमाङ र गवाही याखी पर्ले।”
पावलकी साट्की षड्यन्त्र जाट्च
12गोराक ट्याङ्ह्रखीङ यहूदीको भेला छानार पावलकी साट्च सल्लाह जाटा र होखुरीकै इट डेम शपथ ज्या, “पावलकी मासाट्ठर कान हीर माज्याले र डी र मागाले।” 13इटजाट्न साट्ले डेम शपथ ज्याच भर्मीको चालीस जना डेनाङ वास्टै लेया। 14होस न्हुइङ होखुरीकै मुख्य पूजाहारीको र यहूदी अगुवाको लेठाङ नुङार डेया, “पावलकी मासाट्ठर कान हीर माज्याले डेम कानै बलियो शपथ ज्यामने। 15होटबाटै नाखुरीक र महासभा खाटार सेनापतिकी अनुरोध जाट्नी र पावलौ मुद्दौ निर्णय अझै ठिक तरिकै जाट्की पर्ले डेच बहाना खासार होसकी डोनाक्ङ यान्ही। अनि होसे इला राछै जाट्नाङ न कान होसकी साट्की तयार छानार ङुले।”
16तर पावलौ भान्जै इसे कुरा थाहा डीन्हा। होटै होचे ब्यारेक भित्री नुङार पावलकी सेटाका। 17पावलै कप्तानको मध्याङ काट जनाकी आर्घार डेया, “इसे रेन्जा जजाकी सेनापति लेठाङ टाहाक्ङ यान्ही, हीजैडेनाङ इच्यौ आसकोखाटा हीर डेच कुरा ले।” 18कप्तानै पावलौ भान्जाकी सेनापति लेठाङ टाहाक्ङ याहार डेया, “बन्दी पावलै ङाकी आर्घार इसे रेन्जा जजाकी नाको लेठाङ आल्खी डेमने, नाकोकी डेकी पर्च हीर कुरा ले, टा।”
19सेनापतिये होच्यो मीहुट घोवार सुर मालेठाङ आल्हार गीना, “नीये ङाकी डेकी पाच कुरा ही हो?” 20होचे डेया, “यहूदीकै पावलौ विषयाङ अझै सेम्ह गीन्च निहुँ जाटार पीउह्राक होसकी महासभाङ राक्ङ यान्ही डेम नाकोखाटा अनुरोध जाट्च छान्नने। 21तर नाकै होखुरीकुङ कुरा मासेनी हीजैडेनाङ चालीस जना डेनाङ वास्टै यहूदीकै ‘पावलकी मासाट्न हीर माज्याले र डी र मागाले’ डेम शपथ ज्यार होसकी साट्की रुङार ङुमने। अब होखुरीक होसकी साट्की डेम तयार छान्नने र नाकुङ निर्णयौ आशा जाट्नने।”
22होटबाटै सेनापतिये होसे रेन्जा जजाकी इट डेम निर्णय जाट्न का, “नीये ङाकी इसे खबर याछ कुरा सुकीर माडेकी।”
पावलकी बडा-हाकिम फेलिक्स लेठाङ बीर्न्हकाच
23होटै न्हुइङ सेनापतिये कप्तानको मध्याङ नीस जनाकी आर्घार डेया, “छीनी नाबीक नौ बजे पट्टी नीस सय सिपाहीको, सत्तरी जना घोडा काल्छको र नीस सय भाला लाचकोलाक कैसरियासम्म नुङ्की तयार खास्न डानी। 24अनि पावलौ लागि र घोडा ठिक पार्की आसकोकी सुरक्षाखाटा बडा-हाकिम फेलिक्स लेठाङ टाहाक्की।” 25इडीक डेम भ्यारखीङ होसे सेनापतिये बडा-हाकिमकी इट डेयार चिठी रीका:
26“माननीय हाकिम फेलिक्सकी, क्लौडियस लुसियसौ अभिवादान! 27इसे भर्मीकी यहूदीकै घोवार साट्की पामन्या तर इसे रोमी नागरिक लेसा डेम ङै थाहा डुपार ङा फौजखाटा होला टाम्ह इसकी भाकार राक्च। 28कुसे दोषाङ होखुरीकै इसकी दोष लैडीमनेसा डेम वार्छ मीमनै ङै इसकी होखुरीकुङ महासभाङ राका। 29होखुरीकै मोशौ व्यवस्थौ प्रश्नओ बारेयाङ इसकी दोष लैडीमनेसा। तर साट्की अथवा ठुन्की पर्च हीर दोष ङै माडुपा। 30यहूदीकै इसे भर्मीकी साट्की पामने डेच कुरा ङै थाहा डीन्छ बाटै इसकी तुरुन्तै नाको लेठाङ बीर्न्हकामने। इसकी दोष लैडीच यहूदीकोलाक र नाको लेठाङ न उजुर जाट्की डेम आज्ञा याम्हने।”
31होटै आज्ञा डुप्म भ्यारखीङ सिपाहीकै पावलकी नाबीक न एन्टिपाट्रिसाङ टाहाका। 32पीउह्राक लेखो पैदल नुङ्च सिपाहीकै चहिँ पावलकी घोडाङ काल्हार नुङ्ङ न लेच सिपाहीकोलाक जिम्मा याहार यरूशलेमाङ ल्हेसा। 33कैसरियाङ टाछ न्हुइङ होखुरीकै हाकिमकी चिठी याहार पावलकी र होच्यो म्याहासाङ हाजिर जाटाका। 34होचे चिठी परेस्रखीङ होसे कुसे जिल्लुङ हो डेम गीना। होसे किलकियुङ हो डेम थाहा डीन्रखीङ होचे डेया, 35“नाकोकी दोष लैडीचको राछ न्हुइङ नाकुङ मुद्दा सेले।” अनि होचे होसकी हेरोदै खास्च दरबाराङ कैदी खासार डाकी डेम हुकुम जाटा।
Currently Selected:
प्रेरित 23: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.