प्रेरित 22
22
1“डाजेभाइ तथा बोइको, नाखुरीकुङ म्याहासाङ ङै ङाल्हौ पक्षाङ डेकी पर्च कुरा अब सेनी।” 2इटजाट्न पावल हिब्रू भाषाङ ङाक्च सेयार होखुरीक झन् माच्याक्ङ ङुवा। होटै पावलै डेया, 3“ङा किलिकियुङ टार्सस सहराङ डीन्छ काट यहूदी हो। तर ङा इसे यरूशलेम सहराङ गमलिएलौ शिक्षाङ होर्च हो। कानुङ बोइ बाज्युकै मन्डीम राछ मोशौ व्यवस्था धर्मशास्त्रओ शिक्षा अनुसार ङै सेम्हखाटा पाम्हने। छीनी नाखुरीक परमेश्वराङ कुडीक जोशिलो ले, होडीक न जोशिलो ङा र लेया। 4ङै प्रभुओ लामाङ ह्वाच भर्मीकोलाक साप्फी दु:ख याहार साट्की र पा। लेन्जा, मास्टो पट्टकी घोवार ठुन्की लैडीया। 5र इसे बारेयाङ प्रधान पूजाहारी र पट्ट न महासभै र ङौ पक्षाङ गवाही याल्हे। होखुरीकै न ङाकी दमस्कसाङ लेच यहूदी डाजेभाइकुङ म्यार्मीनाङ पुर्जीको याहा, र होला लेच विश्वासीकोलाक छ्याकार यरूशलेमाङ राक्ङ सजाय याखी डेम ङा दमस्कसाङ नुङ्ङन लेया।
लहो परिवर्तनौ बारेयाङ पावलौ बयान
(प्रेरित ९:१-१९; २६:१२-१८)
6“ङा दमस्कसाङ टाखी पानाङ मध्य दिन छान्नन्या। होडीक न बेला मोसोमायाङ स्वर्ग लकीङ काट बाड्को ज्योति ङौ वरिपरि चम्कडीसा, 7ङा झाङ कुरुह्वा। अनि ङाकी इट डेचै जाट्च काट आवाज ङै सेया, ‘ए शाऊल, ए शाऊल नाकै ङाकी हीजै सतडीच?’ 8अनि ङै गीना, ‘ए प्रभु, नाको सु हो?’ होसकै ङाकी डेया, ‘नासरतुङ येशू ङा न हो, होसकी न नाकै सतडीमन ले।’ 9ङाखाटा लेचकै ज्योति च डाङा, तर ङाखाटा ङाक्च आवाज चहिँ माबुझडीसा। 10अनि ङै डेया, ‘ए प्रभु, अब ङा ही जाटीङ?’ प्रभुये ङाकी डेया, ‘सोनी, दमस्कसाङ नुङ्नी र नाकै जाट्की पर्च कामौ बारेयाङ नाकोकी पट्ट न डेम याल्हे।’ 11होसे ज्योतियो तेजै जाट्न ङै हीर डाङ्की माह्योका होटबाटै ङाखाटा लेचकै ङौ मीहुट घोवार डोरीम ङाकी दमस्कसाङ राका।
12“होसे सहराङ हननिया डेच काट जना भर्मी ङुमन्या। होसे परमेश्वरौ भक्त र मोशौ व्यवस्था सेम्ह मन्डीच भर्मी लेया र दमस्कसाङ लेच पट्ट यहूदीकै होसकी मान जाट्नन्या। 13होसे भर्मी ङा छीनी राहार ङाकी डेया, ‘ए शाऊल भाइ, मीमीक डाङ्नी।’ अनि होडीक न बेला ङै मीमीक डाङा, र होसकी डाङ्की ह्योका। 14अनि होचे डेया, ‘कानुङ बोइ बाज्युकुङ परमेश्वरै होसकुङ इच्छा नाकै वार्खी, र होसे धार्मिक भर्मी येशूकी डाङ्की, र होसकुङ मेङ्गेरीङ ख्योछ वचन सेकी नाकोकी चुन्डीमनेसा। 15हीजैडेनाङ पट्ट न भर्मीकुङ म्याहासाङ होसकुङ लागि नाकै ही डाङ्ङने र सेमने, होच्यो साक्षी नाको छान्ने। 16होटबाटै अब हीजै लेन्की? सोनी र बप्तिस्मा लानी, अनि होसकुङ म्यार्मीन लार लहो पाप हुर्नी।’
17“होटै न्हुइङ ङा यरूशलेमाङ ल्हेसार राहा अनि मन्दिराङ नुङार प्रार्थना जाट्चै जाट्नाङ ङै दर्शन डाङा। 18होडीक बेला ङै प्रभुकी डाङा र होसकै ङाकी डेया, ‘छिटो जाटार यरूशलेम लकीङ नुङ्की क्योट्नी, हीजैडेनाङ ङौ बारेयाङ नाकै याछ गवाही इलुङ भर्मीकै ग्रहण माजाट्ले।’ 19ङै डेया, ‘ए प्रभु, ङै पट्ट न सभा ङुच इमाङ नुङार नाको मीटाक विश्वास जाट्चकोलाक झ्यालखानाङ काच र डुङ्च इखुरीक पट्टकी थाहा ले। 20र नाकुङ साक्षी याछ स्तिफनसकी ह्यु झ्याङ्री खासार साट्च बेलाङ ङा र होला लेया र होसकी साट्चकोखाटा खाटार होखुरीकुङ बढीन रुङार ङुमन्या।’ 21अनि प्रभुये ङाकी डेया, ‘नुङ्नी, हीजैडेनाङ ङा नाकोकी अन्यजातिको लेठाङ लोस-लोससम्म बीर्न्हकाले।’”
22इट डेठरसम्म मट्टै होखुरीकै पावलौ कुरा सेया। तर होटै न्हुइङ होखुरीकै अन्यजाति डेच शब्द सेच बित्तिकै बाड्को स्वरै च्याक्चै डेकी ठाला, “याङ्च भर्मीकी पृथ्वी लकीङ हटडीनी! हीजैडेनाङ होसे जीवाकी योग्यौ माले!” 23अनि होखुरीकै च्याक्चै लहो बढीन लोछै धुलो भुरुक्की ठाला। 24होटै सेनापतिये आज्ञा जाटा, “होसकी ब्यारेक भित्री राकार कोर्रा ङापार जाँच्डीनी, ही कारणै होच्यो विरुद्धाङ होखुरीक इटजाट्न च्याक्ङने ङा र वार्खी ह्योकीङ।” 25जब सिपाहीकै पावलकी डुङ्की डेम छालौ डोरीये छ्याका, तब पावलै लाहा छीनी टोङ्छ कप्तानकी गीना, “ही काट रोमी नागरिककी, हीर दोषी माठहरीस्च भर्मीकी कोर्रा ङाप्की कानुनै याल्हे?” 26अनि कप्तानै इसे कुरा सेरखीङ सेनापति लेठाङ नुङार इट डेया, “नाकै ही जाट्की पामने? हीजैडेनाङ इसे भर्मी च रोमी नागरिक टी लेसा!”
27तब सेनापतिये राहार पावलकी गीना, “ङाकी डेउ, ही नाङ रोमी नागरिक हो?” पावलै डेया, “हो।” 28होटै होसे सेनापतिये डेया, “ङै च इसे रोमी नागरिकतौ हक वास्टै पैसा तेरीयार लोच हो।” पावलै डेया, “तर ङा च डीन्छ न रोमी हो।” 29तब इसे कुरा सेच बित्तिकै पावलकी केरकार जाट्की तयार छान्चको पट्ट न हटडीसा। अनि पावल रोमी नागरिक लेसा डेम थाहा छान्रखीङ सेनापति बीह्रीया, हीजैडेनाङ होचे पावलकी छ्याक्ङन्या।
पावल महासभौ म्याहासाङ
30अनि पीउह्राक लेखो यहूदीकै पावलकी खास कुसे कारणै दोष लैडीमनेसा डेच कुरा बुझडीस्की, सेनापतिये पट्ट न मुख्य पूजाहारीको र महासभुङ भर्मीकोलाक जम्मा छान्की आज्ञा जाटा। अनि होसे सेनापतिये पावलकी झ्यालखाना लकीङ डोनार होसकी म्हाका राका र होखुरीकुङ म्याहासाङ टोङ्हाका।
Currently Selected:
प्रेरित 22: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.