प्रेरित 17
17
थेसलोनिके सहराङ
1पावल र सिलास अम्फिपोलिस र अपोल्लोनियो सहरौ लाम छान्चै थेसलोनिके सहराङ टाहा। होला यहूदीकुङ काट सभा ङुच इम लेया। 2अनि पावल सधैँ लेखा न होसे सभा ङुच इम भित्री नुङा। सोम हप्तासम्म धर्मशास्त्रओ कुरा लकीङ होखुरीकखाटा बहस जाट्की ङुवा। 3होचे अर्थ खोलीम प्रमाण याहार होखुरीककी इटजाट्न बुझडीम याहा, “मुक्ति याछ ख्रीष्टै दु:ख भोग्डीकी र सीच लकीङ जीवाम सोकी पर्च लेया र इसे न येशूओ सेछ समाचार ङा नाखुरीककी सेटाक्ङन ले, होसको न मुक्ति याछ ख्रीष्ट हो।” 4अनि होला लेचको मध्याङ कुडीक जना विश्वास जाट्च यहूदीको पावल र सिलासखाटा लग्डीसा। इटजाट्न बाड्को संख्याङ परमेश्वरौ भक्ति जाट्च ग्रीकको र कुडीक जना म्यार्मीन क्योस्च मास्टोको र विश्वास जाटार होखुरीक पट्टी लग्डीसा।
5तर अरु यहूदीकै चहिँ होखुरीककी मीरीस जाटार बजारुङ बदमासकोलाक सोटार सहराङ खैला-बैला मचडीकी लैडीया। अनि यासोनौ इमाङ हमला जाटार पावल र सिलासकी भर्मीकुङ भीडौ म्याहासाङ राक्की पा। 6तर पावल र सिलासकी होला माडुपा, होटै होखुरीकै यासोन र कुडीक जना विश्वास जाट्च डाजेभाइकोलाक सहरुङ शासकको लेठाङ आर्ढुस्चै राका र च्याक्चै डेया, “संसारभरि उलट-पुलट जाट्च इसे भर्मीको इला र टाह्रामने! 7यासोनै होखुरीककी पाहुना खासार डामने। होखुरीक पट्टये येशू डेच काट अर्को न राजा ले डेयार रोमी महाराजौ हुकुम विरुद्ध काम जाट्ले।” 8इसे कुरा सेयार भर्मीको र सहरुङ शासकको आटडीसा। 9यासोन र होसेखाटा लेच भर्मीकै होखुरीककी धरौटी लार होखुरीककी डास्न याहा।
बेरिया सहराङ
10विश्वासी डाजेभाइकै तुरुन्तै नाबीक न पावल र सिलासकी बेरिया सहराङ बीर्न्हका। जब होखुरीक होला टाहा तब यहूदीकुङ सभा ङुच इमाङ पर्या। 11होलुङ यहूदीको थेसलोनिकेयुङ भर्मीकुङ डेनाङ होखुरीकुङ मीमन खुल्ला लेया। हीजैडेनाङ होखुरीकै साप्फी चासो जाटार वचन सेया र पावलै डेच कुराको खाट्ले की माखाट्ले डेयार दिन-दिनै धर्मशास्त्र परेसार जाँच्डीमन्या। 12होटबाटै होखुरीक मध्याङ वास्टै जनै विश्वास जाटा र म्यार्मीन क्योस्च कुडीक जना ग्रीक मास्टोको र लेन्जा भर्मीकै समेत विश्वास जाटा।
13बेरियाङ र परमेश्वरौ वचन पावलै प्रचार जाट्न न ले डेच कुरा थेसलोनिकेयुङ यहूदीकै थाहा डीन्हा। अनि होखुरीक होला र भर्मीकोलाक गाराङ्की र सुरडीकी टाह्रा। 14तुरुन्तै डाजेभाइकै पावलकी समुद्र पट्टी बीर्न्हका। तर सिलास र तिमोथी चहिँ होला बेरियाङ न ङुवा। 15पावलकी साखी नुङ्च डाजेभाइकै होसकी एथेन्स सहरसम्म टाहाका। होटै मेल्हाकी साखी नुङ्चकोलाक सिलास र तिमोथीकी ह्योक्ठर मेल्हा लेठाङ छिटो राख्यो डेम खबर याम्हका।
एथेन्स सहराङ
16पावलै सिलास र तिमोथीकी एथेन्स सहराङ लेन्न ङुच बेलाङ, होसे सहरकी मूर्ति न मूर्तिये न्हेप्च डाङार होच्यो मीमन भित्री साह्रै न व्याकुल छाना 17होटबाटै पावल यहूदीको र परमेश्वरखाटा बीह्रीछ अन्यजातिको खाटा सभा ङुच इमाङ येशूओ बारेयाङ छलफल जाट्नन्या। होटजाट्न न बजाराङ डुप्चकोखाटा र दिन-दिनै छलफल जाट्नन्या। 18होटै इपिक्युरी र स्तोइकी डेच गुरुको मध्याङ र कुडीक जनै पावलखाटा वादविवाद जाटा। होखुरीक कुडीकै डेया, “इसे बकबकेइ ही डेले?” अरुकै र डेया, “इचे च अरु न विदेशी देवताकुङ प्रचार जाट्नने।” होखुरीकै याङ्च डेया हीजैडेनाङ पावलै येशू र होसको सीच लकीङ जीवाम सोचओ बारेयाङ प्रचार जाट्नन्या। 19होटबाटै होखुरीकै पावलकी अरियोपागसुङ#१७:१९ अरियोपागस: इसे चहिँ एथेन्साङ लेच काट डाँडौ म्यार्मीन हो। होसे न्याय जाट्की भेला छान्च ठाउँ हो। सभाङ आल्हार डेया, “नाकै प्रचार जाट्च इसे नयाँ शिक्षाओ बारेयाङ कानकी र वार्छ मीमन ले। 20हीजैडेनाङ नाको कानुङ मेनेकेपाङ नयाँ कुराको सेटाक्ङन ले। होटबाटै इसे कुरा ही हो, होसे कानकी वार्खी मीमन ले।” 21एथेन्स सहरुङ पट्ट न भर्मीको र होला ङुच विदेशीको, होखुरीकै लहो पट्ट न समय नयाँ कुराको डेकी र सेकीयो लागि बीतडीमन्या।
22पावलै अरियोपागस डेच सभाङ खडा छानार डेया, “ए एथेन्स सहरुङ भर्मीको, नाखुरीक साह्रै न धर्मकी माया जाट्चको लेसा डेम ङै थाहा डीन्हा। 23हीजैडेनाङ सहराङ छेह्राछै नुङ्नाङ ङै नाखुरीकुङ पूजा जाट्च ठाउँको डाङा। अनि ङै होला काट याङ्च वेदी र डुपा, ‘माह्वार्छ देवतौ लागि’ डेयार खोप्डीमनेसा। होटबाटै माचीन्डीम न नाखुरीकै पूजा जाट्च होसे न देवतौ बारेयाङ ङा छीनी नाखुरीकुङ मीघ्याङ घोषणा जाट्ले। 24संसार र इला लेच पट्ट न ठोक खास्च परमेश्वर न स्वर्ग र पृथ्वीयुङ प्रभु हो, होटबाटै होसको भर्मीकुङ मीहुटै खास्च मन्दिरकोवाङ बास माङुले। 25होसकै हीर खाँचो पर्च लेखा जाटार भर्मीको लकीङ सेवा मालाले, बरु होसकै न पट्टकी जीवन, सास र पट्ट ठोक याल्हे। 26अनि होसकै काट जना भर्मी लकीङ पृथ्वी भरि न बास जाट्की डेम पट्ट जातिको खासा। होखुरीकुङ बास ङुच समयको, सिमानाको र तोक्डीम याहा। 27होखुरीकै परमेश्वरकी पार, सुहार डुप्ले की डेम होसकै इट जाटा। तर पनि परमेश्वर काल्हाको लकीङ लोस चहिँ माले। 28हीजैडेनाङ काल्हा होसकोखाटा जीवाले, होसकोखाटा न ह्वाम ङुम जाट्ले र होसको लकीङ जीवामने। कुडीक जना नाखुरीकुङ कविकै र इट डेमने, ‘साँच्ची न काल्हा होसकुङ न सन्तान हो।’ 29हीजैडेनाङ काल्हा परमेश्वरौ सन्तान छान्चबाटै, परमेश्वरकी भर्मीकुङ सिपलकीङ र कल्पना जाटार खास्च सुन, चाँदी र ल्हुङौ मूर्ति ल्याक्च न हो डेयार कानै आर्मीट्की माछान्ने। 30पहिला माह्वार्न न जाट्च कामकी परमेश्वरै माङोस्ले। तर अब पट्ट न ठावाङ पट्ट भर्मीकोलाक पश्चात्ताप जाट्की आज्ञा याम्हने। 31हीजैडेनाङ होसकै कायाक तोक्डीम याम्हने, होसनीक होसकै लहे भाक्च काट जना भर्मी लकीङ धार्मिकताङ संसारौ न्याय जाट्ले। होसे न भाक्च भर्मीकी सीच लकीङ जीवाटाकार होसकै पट्ट न भर्मीकोलाक इच्यौ प्रमाण याम्हने।”
32जब होखुरीकै पावलै सीच लकीङ जीवाले डेच बारेयाङ सेया, तब कुडीक जनै होसकी गिल्ला जाटा। तर अरु कुडीकै चहिँ डेया, “कान फेरि इसे बारेयाङ नाकुङ कुरा सेले।” 33होटै पावल होखुरीकुङ मीघीङ ख्योहार नुङा। 34तर कुडीक जना भर्मीको होसेखाटा लग्डीसार विश्वास जाटा। होखुरीक मध्याङ अरियोपागस सभुङ डियनुसियस डेच भर्मी, दामारिस डेच काट जना मास्टो भर्मी र अरुकै र विश्वास जाटा।
Currently Selected:
प्रेरित 17: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.