प्रेरित 16
16
पावल र सिलासखाटा तिमोथीयो भेट
1पावल डर्बी सहर छान्चै लुस्त्रा सहराङ टाह्रा। होला तिमोथी म्यार्मीन जाट्च काट जना विश्वासी ङुमन्या। होसे काट जना विश्वासी यहूदी मास्टोओ लेन्जा मीजा लेया तर होच्यो बोइ चहिँ ग्रीक लेया। 2लुस्त्रा र आइकोनियनुङ डाजेभाइकै डेमन्या तिमोथी चहिँ सेछ भर्मी लेया। 3पावलै होसकी लाहाखाटा आल्खी मीमन जाटा। होसे ठाउँकोवाङ लेच यहूदीकुङ मीमन डाम याखीयो लागि डेम पावलै तिमोथीकी आल्हार खतना जाट्न याहा, हीजैडेनाङ होच्यो बोइ ग्रीक हो डेम होलुङ पट्ट न यहूदीकोलाक थाहा लेया।
4होखुरीक सहरकुङ लाम छान्चै नुङ्नाङ होखुरीकै यरूशलेमुङ प्रेरितको र अगुवाकै जाट्च निधो विश्वासीकोलाक मन्डीकी पर्ले डेयार सेटाक्ङ याहा। 5इटजाट्न मण्डलीयुङ भर्मीको विश्वासाङ बलियो छान्चै र संख्याङ दिन-दिनै बड्डीस्चै नुङा।
पावलै त्रोआस सहराङ डुप्च दर्शन
6होस बेला पवित्र आत्मै एशियाङ वचन प्रचार जाट्की रोकडीचबाटै पावल र मेन लाफाको फ्रिगिया र गलातीयुङ क्षेत्र लकीङ छानार नुङा। 7माइसीयुङ क्षेत्रौ साँधाङ टाह्राछ न्हुइङ होखुरीकै बिथिनियालाक नुङ्च विचार जाटा। तर येशूओ आत्मै होखुरीककी होलाक र नुङ्की माह्या। 8होटबाटै होखुरीक माइसिया छान्चै सीधा त्रोआस सहराङ झाला। 9होसनीक नाबीक परमेश्वरै पावलकी माङनामाङ काट दर्शन याहा। दर्शनाङ होचे काट जना माकेडोनियुङ भर्मीकी डाङा अनि होसे भर्मी टोङ्हार होसकी इट डेम बिन्ती जाट्न न लेया, “दया जाटार माकेडोनीयाङ राम्ह यान्ही र कानकी सहायता जाट्नी।” 10पावलै इसे दर्शन डुपरखीङ तुरुन्तै कान#१६:१० कान: इसे कान डेच चहिँ लूका हो र होसे पावलको खाट-खाट न लेया। इसे किताब लूकै रीक्च हो। माकेडोनिया नुङ्की तयार छाना। हीजैडेनाङ कानै इसे निधो जाटा की होखुरीककी होला सेछ समाचार सेटाक्की डेम परमेश्वरै कानकी आर्घाच लेसा।
लिडियो विश्वास
11कान त्रोआसीङ जहाजाङ काल्हार सीधा सामोथ्राके पट्टी नुङा र पीउह्राक लेखो नियापोलिस सहराङ टाह्रा। 12होटै कान फिलिप्पीयाङ टाह्रा। होसे माकेडोनियौ मुख्य सहर र रोमी उपनिवेश र हो। कान होसे सहराङ हीर याकसम्म ङुवा।
13म्हुङ बाट्च याकाङ कान सहरौ गालाम बाहिर नदीयो छेवाङ नुङा, हीजैडेनाङ होला यहूदीकुङ प्रार्थना जाट्च ठाउँ ले औला डेम कानै अनुमान जाट्नन्या। अनि कान होला ङुवा र होला जम्मा छान्च मास्टोकोखाटा कान ङाक्की ठाला। 14कानुङ कुरा सेचको मध्याङ थिआटीरा सहरुङ काट जना महङ्गो बैजनी रङुङ बढीनको व्यापार जाट्च अन्यजाति लिडिया डेच यहूदीकुङ परमेश्वरकी मन्डीच मास्टो लेया। होसकी पावलै ङाक्च वचन ध्यान याहार सेख्यो डेम प्रभुये होच्यो मीमन खोलीम याहा। 15लिडिया र मेन पट्ट न इमुङ परिवारकै विश्वास जाटा र बप्तिस्मा ला। अनि होचे कानकी इट डेयार बिन्ती जाटा, “इडीक नाखुरीकै ङाकी प्रभुओ विश्वासी डेले डेनाङ ङौ इमाङ राहार ङुम यान्ही” डेम कर लैडीया।
पावल र सिलासकी झ्यालखानाङ ठुन्च
16कायाक कान प्रार्थना जाट्च ठावाङ नुङ्ङ न लेया, तब काट जना कमारी मास्टो जजाकी डुपा। होसकी दुष्टआत्मा लग्डीस्नन्या र होसे दुष्टआत्मौ शक्तिये होचे भर्मीकुङ भाग्य डेम याहार लहो मालिककोलाक वास्टै पैसा कमडीयार याम्हन्या। 17अनि होचे पावल र कान न्हुङ-न्हुङ राछै इट डेचै च्याका, “इसे भर्मीको महान परमेश्वरौ सेवकको हो। इखुरीकै नाखुरीककी मुक्तियो लामौ बारेयाङ सेटाक्ले।” 18होचे वास्टै याकसम्म होटन जाट्न ङुवा। तब पावलै झर्को मन्डीयार होसे मास्टो जजा पट्टी खार्लाप ल्हेसार होसे दुष्टआत्माकी डेया, “येशू ख्रीष्टौ म्यार्मीनाङ ङा नाङ्की आज्ञा जाट्ले होसे लकीङ ख्योन्हा।” अनि होसे दुष्टआत्मा होडीक न बेला ख्योखी क्योटा।
19तर होच्यो मालिकै होखुरीकुङ पैसा कमडीच लाम बन्द छान्च डाङार पावल र सिलासकी घोवार बजारौ चोकाङ शासकको लेठाङ टान्डीचै आल्हा। 20अनि होखुरीककी सहरुङ हाकिमको लेठाङ आल्हार डेया, “इसे भर्मीको यहूदीको हो, इखुरीकै कानुङ सहराङ गडबडी मचडीमने। 21इखुरीकै याङ्च रीतिथिति पाहाक्ङन ले की कान रोमीकै मन्डीकी र पालना जाट्की माखाट्ले।” 22तब होला भेला छान्च पट्ट न भर्मीकुङ भीड खाटार पावल र सिलासौ विरुद्धाङ सोवा। सहरुङ हाकिमकै पावल र सिलासौ बढीन च्याट्न याहा र होखुरीककी कोर्रै हीर्कडीकी डेम आज्ञा याहा। 23होटै पावल र सिलासकी साप्फी कोर्रै हीर्कडीया र होखुरीककी आल्हार झ्यालखानाङ काम याहा। होलुङ हाकिमकी इसे नीस जनाकी भीस्की माह्योक्च जाट्न ठुन्की डेम कडा हुकुम याहा। 24याङ्च हुकुम डुपार होसे हाकिमै होखुरीककी झ्यालखानौ भित्री कोठाङ आल्हार होखुरीकुङ मीखुट्याङ ठिंगुरो कार डा।
25तर आधा राताङ पावल र सिलास प्रार्थना जाट्चै परमेश्वरौ भजन ल्हीङ्ङ न लेया र अरु कैदीकै चहिँ सेम ङुमन्या। 26तब ठाहार माढीन्न बाड्को भूइँचालो राहार झ्यालखानौ जगको होयोवा। होटै तुरुन्तै पट्ट न गालामको फोवा र पट्टकुङ बन्धनको र फोसा। 27झ्यालखानुङ हाकिम रीङ्हा र होचे पट्ट न झ्यालखानुङ गालामको फोस्च डाङार होलुङ कैदीको पट्ट न भोग्डीस्लेसा डेम आर्मीटार होचे सीकी डेम लहो तरवार डोना। 28तर पावलै बाड्को स्वरै डेया, “नाकै लाहाकी हीर हानी माजाट्नी, हीजैडेनाङ कान पट्ट न इला न ले!”
29तब होसे हाकिम बत्ती ढाक्ङ ङेहा र खेर्न राहा र बीह्रीयार बुरुक्चै पावल र सिलासौ अगाडि खुखुप छाना। 30होटै होखुरीककी बाहिर आल्हार होचे डेया, “ए हजुरको, मुक्ति डुप्की ङै ही जाट्की पर्ले?” 31तब पावल र सिलासै डेया, “प्रभु येशूकी विश्वास जाट्नी अनि नाकै मुक्ति डुप्ले। इसे नाको र नाकुङ पट्ट न घरानौ लागि सत्य हो।” 32होटै होखुरीकै होसे हाकिम र होच्यो पट्ट परिवारकी प्रभुओ वचन सेटाका। 33तब होसे नाबीक न होचे पावल र सिलासकी आल्हार होखुरीकुङ म्हा हुर्न याहा। होटै तुरुन्तै होसे हाकिम र मेन परिवारै बप्तिस्मा ला। 34होटै होखुरीककी मेन इमाङ आल्हार ज्यामा-गामा कासा। परमेश्वरकी विश्वास जाट्च बारेयाङ मेन पट्ट न परिवारकोखाटा हाकिम माह्राङा।
35गोराक ट्याङ्ह्रखीङ सहरुङ हाकिमकै सिपाहीकोलाक इट डेम आदेश याहार बीर्न्हका, “होसे भर्मीकोलाक डास्न यान्ही।” 36अनि झ्यालखानुङ हाकिमै पावलकी इसे कुरा सेटाका, “सहरुङ हाकिमकै नाखुरीककी डास्न याछ आदेश याम्हने। होटबाटै अब ख्योहार शान्तिखाटा नुङ्नी।” 37तर पावलै होसे खबर राक्च सिपाहीकोलाक डेया, “कान रोमी नागरीक लेनाङ र हीर दोष माडुप्म न होखुरीकै भर्मीकुङ म्याहासाङ डुङा र झ्यालखानाङ र का। अझै कानकी सुटुक्कै डास्की पाले? इसे माछान्ने! होखुरीक लाहा न राहार कानकी डास्न याखी पर्ले।”
38इसे कुरा सिपाहीकै नुङार हाकिमकोलाक सेटाका। होखुरीक च रोमी नागरिकको टी लेसा डेम सेयार होखुरीक बीह्रीया। 39होखुरीक राहार पावल र सिलासखाटा क्षमा ङेहार होखुरीककी झ्यालखाना लकीङ बाहिर आल्हार “इसे सहर डासार नुङ्नी” डेम बिन्ती जाटा। 40होटै पावल र सिलास झ्यालखाना लकीङ ख्योहार होखुरीक लिडियो इमाङ नुङा। होखुरीकै होला प्रभुकी विश्वास जाट्च डाजेभाइकोखाटा भेटघाट जाटा र होखुरीककी उत्साह याहार होटै बिदा छानार ह्वा।
Currently Selected:
प्रेरित 16: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.