प्रेरित 18
18
कोरिन्थ सहराङ
1होटै न्हुइङ पावल एथेन्स सहरीङ बिदा छानार कोरिन्थ सहराङ नुङा। 2होचे होला पोन्टसुङ अकिलास म्यार्मीनुङ काट जना यहूदीकी डुपा। होसे मेन मास्टो प्रिस्काखाटा इटालिया लकीङ चाम-चाम राम्हन्या, हीजैडेनाङ सम्राट क्लौडियसै पट्ट न यहूदीकोलाक रोम लकीङ ख्योहार नुङ्की डेम आज्ञा जाट्नन्या। अनि पावल होखुरीककी डुप्की डेम नुङा। 3होखुरीक काट न काम जाट्च बाटै पावल र होखुरीकखाटा न ङुवार काम जाटा, हीजैडेनाङ होच्यो काम र पाल खास्च लेया। 4पावल म्हुङ बाट्च पट्ट याकाङ सभा ङुच इमाङ नुङार बहस जाट्नन्या र यहूदी र ग्रीककोलाक बुझडीच कोशिस जाट्नन्या।
5जब सिलास र तिमोथी माकेडोनिया लकीङ राहा तब पावल वचन प्रचारौ कामाङ पूरा लग्डीसा। होचे यहूदीकोलाक येशू न मुक्ति याछ ख्रीष्ट हो डेम साक्षी याहा। 6तर होखुरीकै पावलौ विरोध जाटार मासेम्हखाटा च्याका। तब पावलै लहो बढीन खाराहार होखुरीककी चेतावनी छान्ख्यो डेम डेया, “नाखुरीकुङ ह्यु नाखुरीक मीटाक न पर्ख्यो, ङा निर्दोष ले। अब इटौ आलाक ङा अन्यजातिको लेठाङ सेछ समाचार सेटाक्की नुङ्ले।”
7होटै न्हुइङ पावलै यहूदीकुङ सभा ङुच इम डासार परमेश्वरौ भक्ति जाट्च काट अन्यजाति तीतस युस्तस डेच भर्मीयो इमाङ नुङा। होच्यो इम होसे सभा ङुच इमौ खेरेप लेया। 8सभा ङुच इमुङ शासक क्रिस्पस र होच्यो पट्ट न परिवारै प्रभुकी विश्वास जाटा। अनि कोरिन्थ सहरुङ अरु वास्टै जनै र पावलौ शिक्षा सेयार विश्वास जाटा र बप्तिस्मा ला।
9कायाक नाबीक दर्शनाङ प्रभुये पावलकी डेया, “माबीह्रीनी, तर ङाक्चै नुङ्नी र माच्याक्ङ माङुनी। 10हीजैडेनाङ ङा नाकोखाटा न ले, सुयेर नाकोकी हानी जाट्की माह्योक्ले, हीजैडेनाङ इसे सहराङ ङौ भर्मीको वास्टै ले।” 11होटै पावल परमेश्वरौ शिक्षा पाहाक्चै काट वर्ष छ महिनासम्म होखुरीकखाटा न ङुवा।
12जब गलियोन डेच अखैयुङ शासक छाना, तब यहूदीको काट छानार पावलकी घोवार अदालताङ आल्हार 13इट डेया, “इसे भर्मीये कानुङ व्यवस्थौ विरुद्धाङ परमेश्वरौ आराधना जाट्की डेम भर्मीकोलाक पाहाक्ङन ले।”
14जब पावल ङाक्की ठाला, तब गलियोनै होसे यहूदीकोलाक डेया, “ए यहूदीको, इडीक साँच्ची न इसे मासेछ बाड्को अपराधौ कुरा हो लेसा डेनाङ च ङै नाखुरीकुङ कुरा सेकी ठिक छान्च लेया। 15तर इसे शब्दको, म्यार्मीनको र नाखुरीकुङ लहो व्यवस्थौ बारेयाङ लेचबाटै नाखुरीक न विचार जाट्नी। ङा चहिँ याङ्च कुराकुङ न्याय माजाट्ले।” 16होटै गलियोनै होखुरीककी अदालत लकीङ खेट्डीम याहा। 17तब होखुरीक पट्टकै सभा ङुच इमुङ शासक सोस्थेनेसकी घोवार अदालतौ अगाडि न डुङा। तर गलियोनै होसे कुरौ हीर वास्ता माजाटा।
पावल एन्टिओखिया सहराङ ल्हेस्च
18पावल वास्टै दिनसम्म विश्वासी डाजेभाइकोखाटा कोरिन्थ सहराङ ङुवा। होस न्हुइङ डाजेभाइकोखाटा बिदा छानार होसे प्रिस्का र अकिलासखाटा किंक्रिया डेच सहराङ नुङा। हीर समय अगाडि जाट्च भाकल पूरा जाट्कीयो लागि सिरिया नुङ्की जहाजाङ काल्खी डेनाङ अगाडि पावलै लहो मीछाम हुला। 19होखुरीक एफिससाङ टाहा। अनि प्रिस्का र अकिलासकी चहिँ होला न डास्न डा र पावल चहिँ होलुङ सभा ङुच इमाङ पर्यार यहूदीकोखाटा बहस जाट्की ठाला। 20होखुरीकै पावलकी अझै कालाप दिन मेखुरीकखाटा ङुकी डेयार बिन्ती जाटा, तर होसे मामन्डीया। 21होटै होखुरीकखाटा बिदा छान्नाङ पावलै डेया, “परमेश्वरौ इच्छा छाना डेनाङ ङा नाखुरीक लेठाङ फेरि ल्हेसार राल्हे।” अनि होसे जहाजाङ काल्हार एफिसस लकीङ ह्वा।
22जब पावल कैसरियाङ टाहा तब यरूशलेमुङ मण्डलीयुङ विश्वासीकोखाटा डुप्की डेम ढेम्लाक काल्हा र डुपार होसे एन्टिओखिया पट्टी झाला। 23होसे होला कालाप याक ङुवा र होटै ख्योहार गलातिया र फ्रिगियुङ इलाकाको छान्चै नुङार पट्ट न विश्वासीकोलाक विश्वासाङ बलियो खासा।
अपोल्लोस एफिसस सहराङ
24अलेक्जेन्ड्रिया सहरुङ अपोल्लोस डेच काट जना यहूदी एफिससाङ राहा। होसे सेम्ह ङाक्की वार्छ र धर्मशास्त्रौ कुरा वार्छ लेया। 25होचे मुक्ति याछ प्रभुओ बारेयाङ शिक्षा डुप्मन्या र आत्माङ जोशिलो छानार येशूओ बारेयाङ ठिकखाटा ङाक्च र पाहाक्च जाट्न्या। तर पनि होसकी यूहन्नौ बप्तिस्मा मट्टै थाहा लेया। 26होटै होचे सभा ङुच इमाङ साहसखाटा ङाक्की ठाला। तर होचे ङाक्च कुरा सेयार प्रिस्का र अकिलासै होसकी लहो इमाङ आल्हार परमेश्वरौ लामौ अर्थ होसकी अझै सेम्ह बुझडीम याहा।
27अपोल्लोसै अखैया इलाकाङ नुङ्की मीमन जाटा र डाजेभाइकै होसकी नुङ्की उत्साह याहा। अपोल्लोसकी सेम्ह स्वागत जाट्की डेम होलुङ विश्वासीकोलाक उत्साह याहार चिठी रीका। अनि होचे अखैयाङ टाह्रखीङ परमेश्वरौ अनुग्रह लकीङ विश्वास जाट्च विश्वासीकोलाक साप्फी सहायता जाटा। 28हीजैडेनाङ होचे बहस जाटा र धर्मशास्त्रओ वचन लकीङ येशू न मुक्ति याछ ख्रीष्ट हो डेच कुरा टान्हाकार पट्ट यहूदीकुङ म्याहासाङ प्रमाण याहा।
Currently Selected:
प्रेरित 18: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.