प्रेरित 10
10
कर्नेलियसै पत्रुसकी आर्घाच
1कैसरिया सहराङ कर्नेलियस डेच काट जना भर्मी लेया र होसे इटालिया डेच रोमी पल्टनुङ कप्तान लेया। 2होसे परमेश्वराङ भक्ति जाट्च भर्मी लेया अनि होसे र होच्यो पट्ट न परिवारको परमेश्वरखाटा बीह्रीमन्या। होचे गरीबकोलाक भित्री मीमनीङ सहायता जाट्चै र सधैँ परमेश्वरखाटा प्रार्थना जाट्नन्या।
3कायाक नाम्सीन होचे सोम बजे पट्टी दर्शनाङ परमेश्वरौ काट स्वर्गदूतै लाहा पट्टी राहार इट डेच सेया, “ए कर्नेलियस!” 4अनि कर्नेलियस बीह्रीयार स्वर्गदूतकी सेम्हजा ङोसार डेया, “हजुर, प्रभु?” स्वर्गदूतै होसकी डेया, “नाकुङ प्रार्थना र नाकै गरीबकोलाक जाट्च सहायताकुङ पट्ट न कुरा परमेश्वर लेठाङ टाम्हने र होसे पट्ट न होसकै आर्मीट्न डामने। 5अब योप्पा सहराङ सिमोन डेच पत्रुसकी आर्घाकी भर्मीकोलाक बीर्न्हकौ। 6होसे छालौ काम जाट्च सिमोनौ इमाङ ङुमने, होच्यो इम समुद्रओ छेवाङ ले।” 7इट डेम भ्यारखीङ स्वर्गदूत कर्नेलियसखाटा बिदा छाना। होटै कर्नेलियसै नोकरको मध्याङ लहो नीस जनाकी र परमेश्वरकी मन्डीच काट जना सिपाहीकी आर्घा। होसे सिपाहीये चहिँ सधैँ कर्नेलियसौ सेवा जाट्नन्या। 8होखुरीककी पट्ट न कुरा डेयार योप्पा सहराङ बीर्न्हका।
9पीउह्राक लेखो नाम्सीन बाह्र बजे पट्टी होखुरीक योप्पा सहर खेरेप टाह्रामन्या र होडीक बेला पत्रुस चहिँ प्रार्थना जाट्की डेम इमौ कौसीयाङ नुङा। 10पत्रुसकी मीटुक रन्छीमन्या र हीर ज्याच गाच मीमन जाटा र अरुकै ज्यामा-गामा तयार जाट्नन लेनाङ होडीक बेला न होसे प्रार्थनाङ ध्यान-मग्न छाना। 11पत्रुसै स्वर्ग फोस्च र होटै बुलीकोनाङ न छ्याक्च बाड्को तन्ना ल्याक्च पृथ्वी पट्टी झाल्न न लेच डाङा। 12होसे तन्नाङ पृथ्वीयुङ पट्ट न खाल्या पशुको, झाङ घसारीसार ह्वाच जीव जन्तु र सर्घाङ भुर्च ग्वाजाको लेया। 13होचे याङ्च काट स्वर सेया, “ए पत्रुस सोना, होखुरीककी साटार ज्यौ।” 14तर पत्रुसै डेया, “होइन प्रभु, ङै सेन र हीर अशुद्ध ठोक र व्यवस्थै ज्याकी माछान्ने डेच ठोक माज्यामे।” 15होसे स्वर फेरि होचे सेया, “परमेश्वरै शुद्ध खास्च ठोककी नीये अशुद्ध मामन्डीयो।” 16याङ्च सोम खेपसम्म छाना होटै होसे तन्ना तुरुन्तै स्वर्गपट्टी आल्हा।
17पत्रुस लहे डाङ्च दर्शनौ अर्थ ही औला डेम मीमनाङ अलमल्ल छान्न ङुमन्या र होडीक न बेला कर्नेलियसै बीर्न्हकाच भर्मीको सिमोनौ इम पाचै गालामटुआङ टाह्रा। 18र होखुरीकै बाड्को स्वरै गीना, “सिमोन डेच पत्रुस इला ङुमे की?” 19जब पत्रुसै दर्शनौ बारेयाङ विचार जाट्न न लेया, पवित्र आत्मै होसकी डेया, “ङोस्नी, सोम जना भर्मीकै नाकोकी इला पामन ले। 20सोनी र म्हाका नुङ्नी अनि दोधार मामन्डीम होखुरीकखाटा नुङ्नी, हीजैडेनाङ होखुरीककी ङै बीर्न्हकाच हो।” 21होटै पत्रुस म्हाका झाला र होसे भर्मीको लेठाङ नुङार डेया, “नाखुरीकै पाच भर्मी ङा न हो, नाखुरीक इला ही कामै राछ औला?” 22होखुरीकै डेया, “काट जना कप्तान कर्नेलियसै कानकी बीर्न्हकाच हो। आसको इमान्दारी र परमेश्वरखाटा बीह्रीछ भर्मी ले। आसकोकी पट्ट यहूदी जातिकै र आदर जाट्ले। नाकोकी आसकुङ इमाङ आर्घार नाको लकीङ सन्देश सेकी डेम काट पवित्र स्वर्गदूतै आसकोकी आज्ञा याम्हने।” 23पत्रुसै होखुरीककी इम भित्री आर्घा र होखुरीक होसे नाबीक होला न बास ङुवा।
पीउह्राक लेखो पत्रुस र योप्पाङ लेच कुडीक जना विश्वासी डाजेभाइको र होसे भर्मीकोखाटा नुङा। 24आपीह्रीन लेखो होखुरीक कैसरियाङ टाहा। कर्नेलियसै लहो कुटुम्बको र खाट्च लाफाकोलाक आर्घार होखुरीककी लेन्न ङुमन्या। 25जब पत्रुस इमाङ टाह्राछ बित्तिकै कर्नेलियसै डुपा र होच्यो मीहीलाङ झोरा। 26तर पत्रुसै होसकी इट डेचै सोटा, “सोनी, ङा च काट भर्मी मट्टै हो।” 27पत्रुस कर्नेलियसखाटा ङाक्चै इम भित्री पर्या। होला होचे वास्टै जना भर्मीको जम्मा छान्च डुपा। 28पत्रुसै होखुरीककी डेया, “अरु जातिकोखाटा सङ्गत जाट्की र होखुरीकखाटा डुप्की चहिँ काट यहूदीयो लागि व्यवस्थौ विरुद्ध हो डेच कुरा नाखुरीककी थाहा न ले। तर परमेश्वरै ङाकी सुकीर अशुद्ध माठहरीकी डेयार टान्हाक्ङने। 29होटबाटै आर्घाच बित्तिकै हीर अप्ठ्यारो मामन्डीम ङा नाखुरीक लेठाङ राहा। नाखुरीकै ङाकी हीजै आर्घाच औला? अब डेनी।”
30कर्नेलियसै डेया, “बुलीयाक अगाडि ङा नाम्सीन सोम बजे इमाङ प्रार्थना जाट्न न लेया। होडीक न बेला चहकिलो बढीन बील्छ काट जना भर्मी ङौ म्याहासाङ टोङ्हा 31र डेया, ‘ए कर्नेलियस, परमेश्वरै नाकुङ प्रार्थना सेमने र नाकै गरीबकोलाक याछ दानौ बारेयाङ होसकै आर्मीट्नने। 32होटबाटै योप्पाङ लेच सिमोन डेच पत्रुसकी आर्घाकी भर्मी बीर्न्हकौ। होसे समुद्रओ छेवाङ छालौ काम जाट्च सिमोनौ इमाङ ङुमने।’ 33होस न्हुइङ ङै तुरुन्तै नाको लेठाङ भर्मी बीर्न्हका अनि नाको दया जाटार राम्ह याहा। अब प्रभुये नाकोकी आज्ञा याछ पट्ट न कुराको सेकी कान पट्टको परमेश्वरौ अगाडि भेला छान्नने।”
पत्रुसै वचन सेटाक्च
34पत्रुस ङाक्की ठाला, “साँच्ची न चाहाँ ङै डाङ्ने, परमेश्वरै सुकीर पक्षपात माजाट्ले। 35भर्मी कुसे जातियो लेनाङ र होसकोखाटा बीह्रीले र ठिक काम जाट्ले, होसे होसकुङ म्याहासाङ ग्रहण योग्यौ छान्ने। 36परमेश्वरै येशू ख्रीष्ट लकीङ इस्राएलीकोलाक बीर्न्हकाच शान्तियो सेछ समाचार नाखुरीककी थाहा न ले। होसको न पट्टकुङ प्रभु हो। 37यूहन्नै बप्तिस्मौ प्रचार जाट्च न्हुइङ, गालील लकीङ सुरु जाटार पट्ट यहूदियाभरि प्रचार जाट्च वचन इसे न हो। 38नाखुरीककी थाहा न ले, परमेश्वरै नासरतुङ येशूकी पवित्र आत्मा र शक्तिये अभिषेक जाटा। अनि होसको सेछ काम जाट्चै र शैतानै सतडीच पट्टकोलाक गेपाक्चै ह्वा, हीजैडेनाङ परमेश्वर होसकोखाटा लेया। 39होसकै यहूदिया क्षेत्राङ र यरूशलेमाङ जाट्च पट्ट न कुराकुङ कान साक्षी ले। अनि होसकोकी होखुरीकै क्रूसाङ टङ्गडीयार साटा। 40तर सोम याकाङ होसकोकी परमेश्वरै सीच लकीङ जीवाटाका र होसकोकी डाङ्की डीन्हा। 41पट्ट न भर्मीकोलाक चहिँ होइन, तर कानकी परमेश्वरै साक्षी खास्कीयो लागि अगाडि लकीङ न चुन्डीमन्या। अनि होसको सीच लकीङ जीवाच न्हुइङ कानखाटा डुपा र कान होखुरीक न हो सुये होसकोखाटा ज्याम-गाम जाटा। 42होसकै कानकी भर्मीकोलाक प्रचार जाट्की र होसको जीवाचकुङ र सीचकुङ न्याय जाट्च छान्कीयो लागि परमेश्वर लकीङ न चुन्डीच भर्मी हो डेच गवाही याखी आज्ञा याम्हने। 43पट्ट अगमवक्ताकै र होसकुङ बारेयाङ इट डेयार गवाही याम्हने होसको मीटाक विश्वास जाट्चको पट्टकै होसकुङ म्यार्मीनाङ पाप क्षमा डुप्ले।”
44पत्रुसै इसे कुरा ङाक्नाङ-ङाक्नाङ न वचन सेचको पट्ट मीटाक पवित्र आत्मा राहा। 45पत्रुसखाटा राछ योप्पुङ यहूदी विश्वासीको अन्यजातिको मीटाक र परमेश्वरौ वरदान पवित्र आत्मा राछ डाङार अचम्म मन्डीया। 46हीजैडेनाङ अन्य भाषाकोवाङ ङाकार होखुरीकै परमेश्वरौ प्रशंसा जाट्च होखुरीकै सेया। अनि पत्रुसै डेया, 47“कानै लेखा न इखुरीकै र पवित्र आत्मा डुप्मने। अब इखुरीककी डीयो बप्तिस्मा लाकी सुये ठुन्की ह्योक्ले र?” 48होटबाटै पत्रुसै होखुरीककी येशू ख्रीष्टौ म्यार्मीनाङ बप्तिस्मा लाकी डेम आज्ञा याहा। होटै होखुरीकै पत्रुसकी कालाप दिनसम्म मेखुरीकखाटा ङुकी डेयार बिन्ती जाटा।
Currently Selected:
प्रेरित 10: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.