प्रेरित 9
9
शाऊलौ जीवन परिवर्तन छान्च
(प्रेरित २२:६-१६; २६:१२-१८)
1तर शाऊल चहिँ अझैसम्म र प्रभुओ विश्वासीकुङ विरुद्धाङ लेया, होखुरीककी साट्च सुरै धम्की याछै प्रधान पूजाहारी लेठाङ नुङा 2र होचे प्रधान पूजाहारीकी र दमस्कसुङ सभा ङुच इमकुङ अगुवाकोलाक होसे प्रभुओ लामाङ ह्वाच पट्ट न लेन्जा मास्टोको सुकी डुप्ले होखुरीककी घोवार दण्ड याखी यरूशलेमाङ राक्की डीन्हीङ डेम पुर्जी रीक्की लैडीया।
3शाऊल दमस्कस नुङ्ङ न लेया अनि टाखी पाच बेलाङ मोसोमायाङ सर्घा लकीङ काट ज्योति होच्यो वरिपरि चम्कडीसा। 4होटै होसे झाङ कुरुह्वा र होचे इट डेच स्वर सेया, “शाऊल, ए शाऊल, नाकै ङाकी हीजै सतडीच?”
5शाऊलै डेया, “प्रभु, नाको सु आले?”
होसकै डेया, “सुकी नाकै सतडीमन ले होसे येशू ङा न हो। 6अब सोवार सहराङ नुङ्नी, नाकै ही जाट्की पर्च हो होला नाकोकी डेम याल्हे।”
7शाऊलखाटा नुङ्च भर्मीकै स्वर चहिँ सेया तर सुकीर माडाङा होट छान्नाङ होखुरीक बीह्रीयार टोङ्ह ङुवा। 8होटै शाऊल सोवार मीमीक फोनाङ होचे हीर माडाङा र लाफाकै होसकी मीहुटाङ घोवार डोरीयार दमस्कसाङ राका। 9होला सोम याकसम्म होचे हीर डाङ्की माह्योका र हीर माज्या र मागा।
10दमस्कसाङ हननिया डेच काट जना विश्वासी लेया। होसकी प्रभुये दर्शनाङ डेया, “ए हननिया!” होचे डेया, “हजुर प्रभु?”
11प्रभुये होसकी डेया, “सोना र सीधा डेच गल्लीयाङ नुङ्ना र होला यहूदौ इमाङ शाऊल म्यार्मीन लेच काट जना टार्सस सहरुङ भर्मीयो बारेयाङ गीन्की, होचे प्रार्थना जाट्न ङुमने। 12होचे दर्शनाङ हननिया डेच काट जना भर्मी भित्री राहार मेन मीमीक डाङ्ख्यो डेम लाहा मीटाक होचे मीहुट डाच डाङ्ङने।”
13हननिये डेया, “प्रभु, होसे भर्मीये च यरूशलेमाङ लेच नाकुङ पवित्र भर्मीकोलाक साप्फी सतडीच कुरा ङै धेरै भर्मीको लकीङ सेमने। 14नाकुङ म्यार्मीन लाच पट्टकी घोच अधिकार मुख्य पूजाहारीको लकीङ होचे इला र डुप्मने।”
15तर हननियाकी प्रभुये डेया, “नुङ्ना, हीजैडेनाङ अन्यजातिको, राजाको र इस्राएलीकुङ मीघ्याङ ङौ म्यार्मीन प्रचार जाट्की ङै होसकी न चुन्डीमने। 16र ङौ म्यार्मीनौ लागि होचे कुडीक कष्ट भोग्डीकी पर्ले, डेम ङा होसकी टान्हाक्ले।”
17हननिया नुङार होसे इम भित्री पर्या र शाऊल मीटाक लहो मीहुट डार डेया, “शाऊल भाइ, जुन प्रभु येशू नाको राम्हन लेच लामाङ नाकै डाङ्ङन्या, होसकै नाकुङ मीमीक डाङ्ख्यो र नाको पवित्र आत्मै न्हेप्ख्यो डेम ङाकी बीर्न्हकाच हो।”
18होस बेला न होचे मीमीकीङ पाप्रा ल्याक्च हीर झाल्नाङ लेखा सेया र होचे डाङ्की ह्योका। अनि होचे सोवार बप्तिस्मा ला, 19होस न्हुइङ ज्यामा-गामा ज्यार होचे बल डुपा।
शाऊलै दमस्कसाङ प्रचार जाट्च
अनि शाऊल कालाप दिनसम्म दमस्कसाङ लेच विश्वासीकोखाटा ङुवा। 20तुरुन्तै होचे सभा ङुच इमकोवाङ नुङार “येशू न परमेश्वरौ मीजा हो” डेम प्रचार जाट्की ठाला। 21शाऊलौ कुरा सेचको पट्ट न अचम्म मन्डीचै डेकी ठाला, “यरूशलेमाङ येशूओ म्यार्मीन लाच जतिकी साट्की पाच भर्मी ही इसे न होइन र? अनि इसे भर्मी न इला राहार येशूओ चेलाकोलाक घोवार मुख्य पूजाहारीको लेठाङ आल्छ होइन र?” 22शाऊलै जाट्च प्रचार झनै शक्तिशाली छान्चै नुङा र येशू मुक्ति याछ ख्रीष्ट हो डेच प्रमाण याहा र दमस्कसाङ ङुच यहूदीकोलाक अकमक्क पार्न याहा।
23होटै वास्टै दिन छान्रखीङ यहूदीकै होसकी साट्च योजना जाटा। 24तर लाहाकी साट्की पाच होखुरीकुङ योजना शाऊलै थाहा डीन्हा। यहूदीको होसकी साट्की रातदिन दमस्कसुङ वार्लाक-पार्लाक लेच पर्खालुङ गालामकोवाङ रुङ्ङ ङुमन्या। 25तर होसकी लहो विश्वासीकै नाबीक न डालोवाङ कार पर्खालौ झ्याल लकीङ डोरी कार झालाक्ङ याहा।
शाऊल यरूशलेम सहराङ
26शाऊल यरूशलेमाङ ल्हेस्रखीङ विश्वासीकोखाटा खाट्की पा। तर पट्ट न विश्वासीको होसेखाटा बीह्रीया हीजैडेनाङ होसे विश्वासी हो डेम होखुरीकै पट्डीकी माह्योका। 27तर बारनाबासै शाऊलकी प्रेरितको लेठाङ आल्हा। शाऊलै प्रभु येशूकी कुटजाट्न लामाङ डाङा, कुटजाट्न प्रभु होसेखाटा ङाका र कुटजाट्न दमस्कसाङ साहसखाटा येशूओ म्यार्मीनाङ प्रचार जाटा डेच कुरा बारनाबासै प्रेरितकोलाक सेटाका। 28होटबाटै शाऊल होखुरीकखाटा ङुवा र यरूशलेमाङ खुल्ला रुपाङ ह्वाचै साहसखाटा प्रभुओ म्यार्मीनाङ प्रचार जाट्की ठाला। 29शाऊलै ग्रीक ङाक्च यहूदीकोखाटा वादविवाद जाटा र होखुरीकै होसकी साट्की पा। 30तर इसे कुरा थाहा डीन्हार विश्वासीकै शाऊलकी कैसरिया सहराङ राका र टार्सस सहराङ बीर्न्हका।
31यहूदिया, गालील र सामरियुङ पट्ट न मण्डलीकोवाङ शान्ति छाना र मण्डलीको बलियो छाना। होखुरीक प्रभुखाटा बीह्रीमन्या र होखुरीककी पवित्र आत्मै उत्साह याहा। होटबाटै मण्डलीयाङ भर्मीको ठप्डीस्चै नुङा।
पत्रुस लुड्डा र योप्पा सहराङ
32पत्रुस वार्लाक-पार्लाक पट्ट ठावाङ छेह्राछै विश्वासीकोलाक डुपा। जब होसे लुड्डाङ लेच प्रभुओ पवित्र भर्मीको लेठाङ टाहा, 33होचे होला एनियास डेच काट जना भर्मीकी डुपा। होसे आठ वर्षसम्म पक्षाघातौ रोगै छामो ओछ्यानाङ ठला पर्न ङुमन्या। 34पत्रुसै होसकी डेया, “ए एनियास, येशू ख्रीष्टै नाकोकी चाहाँ न गेपाक्ले। सोनी र नाकुङ ओछ्यान खाटाक्नी।” होटै होसे तुरुन्तै सोकी क्योटा। 35होसे गेप्च डाङार लुड्डा र शारोनाङ ङुच पट्ट न भर्मीकै प्रभु मीटाक विश्वास जाटा।
36योप्पा सहराङ तबीता म्यार्मीनुङ काट जना प्रभुवाङ विश्वास जाट्च मास्टो भर्मी लेया। ग्रीक भाषाङ होसकी (डोरकास डेले र होच्यो अर्थ चहिँ हरिणी हो।) होसे सधैँ सेछ कामाङ र गरीबकोलाक सहायता जाट्कीयाङ लग्डीस्न ङुमन्या। 37कायाक होसे बिरामी छानार सीया र भर्मीकै होच्यो लाशकी ठाक्की आल्खी डेम नहडीम याहार इमौ ढेम्च तलौ काट कोठाङ होसकी डा। 38लुड्डा योप्पा लकीङ खेरेप लेया। पत्रुस लुड्डाङ ले डेच कुरा विश्वासीकै थाहा डीन्हा। होटै होखुरीकै नीस जना भर्मीकी पत्रुस लेठाङ इट डेम बिन्ती जाट्की बीर्न्हका, “ढिलो माजाट्न कान लेठाङ राम्ह यान्ही!” 39तब पत्रुस सोवार होखुरीकखाटा नुङा र टाछ बित्तिकै पत्रुसकी होखुरीकै ढेम्च तलौ कोठाङ आल्हा। विधवाको पट्ट न पत्रुस छीनी टोङ्हार राप्चै डोरकास होखुरीकखाटा लेनाङ होचे खास्न डाच बढीनको टान्हाका।
40तर पत्रुसै होखुरीक पट्टकी कोठा लकीङ बाहिर बीर्न्हका र घुँडा टुसार प्रार्थना जाटा। होटै होचे लाश पट्टी ल्हेसार डेया, “तबीता, सोना!” होचे मीमीक फोवार पत्रुसकी ङोसा र होसे सोवार ङुवा। 41पत्रुसै होसकी मीहुटाङ घोवार सोटा अनि प्रभुओ पवित्र भर्मीको र विधवाकोलाक आर्घाम सीचकी जीवाटाकार टान्हाका।
42इसे कुरा पट्ट न योप्पा सहरभरि फैलडीसार वास्टै भर्मीकै प्रभुवाङ विश्वास जाटा। 43होस न्हुइङ पत्रुस वास्टै दिनसम्म छालौ काम जाट्च काट जना सिमोन डेच भर्मीखाटा योप्पाङ ङुवा।
Currently Selected:
प्रेरित 9: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.