प्रेरित 11
11
पत्रुसै यरूशलेमुङ मण्डलीकी बयान याछ
1यहूदियाङ लेच प्रेरितको र अरु विश्वासी डाजेभाइकै अन्यजातिकै र परमेश्वरौ वचन विश्वास जाट्लेसा डेम सेया। 2अनि पत्रुस यरूशलेमाङ राहा, तब खतना जाट्च यहूदी विश्वासीकै होसकी दोष याखी ठाला, 3“नाको खतना माजाट्च भर्मीकुङ इमाङ नुङार होखुरीकखाटा ज्याकी गाकी माछान्च लेया।” 4होटबाटै पत्रुसै ही-ही घटना छानन्या, होसे कुराको सुरुलकीङ न पट्ट न डेकी ठाला। 5“ङा योप्पा सहराङ प्रार्थना जाट्न ङुनाङ ङै काट दर्शन डाङा। बाड्को तन्ना ल्याक्च बुली पट्टी छ्याक्च स्वर्ग लकीङ म्हाका झाल्चै जाट्च डाङा र होसे ङा लेठाङ राहा। 6ङै होसकी सेम्हजा ङोसा, होला पृथ्वीयुङ पट्ट न पशुको र जङ्गली जनावरको, घस्रडीस्च जन्तुको र सर्घाङ भुर्च ग्वाजाको डाङा। 7ङै इट डेच काट स्वर सेया, ‘ए पत्रुस सोनी, होखुरीककी साटार ज्यानी।’ 8तर ङै डेया, ‘होइन प्रभु, ङै सेन र हीर अशुद्ध ठोक र व्यवस्थै ज्याकी माछान्ने डेच ठोक माज्यामे।’ 9तर फेरि स्वर्ग लकीङ होसे न स्वरै ङाकी डेया, ‘परमेश्वरै शुद्ध खास्न भ्याच ठोककी नाकै अशुद्ध मामन्डीनी।’ 10अनि सोम खेपसम्म होटन छाना र होसे पट्ट न ठोकको फेरि स्वर्गलाक न ल्हेसा। 11होडीक न बेला कैसरिया लकीङ ङाकी आर्घाकी बीर्न्हकाच सोम जना भर्मीको ङा ङुच इमाङ टाह्रा। 12पवित्र आत्मै ङाकी होखुरीकखाटा अप्ठ्यारो मामन्डीम नुङ्की डेया। होखुरीक छ जना विश्वासी डाजेभाइको र ङाखाटा नुङा र कान कर्नेलियसौ इम भित्री पर्या। 13अनि होचे कानकी डेया, काट स्वर्गदूत होच्यो इमाङ राहार इट डेच होचे डाङा, ‘योप्पा सहराङ लेच पत्रुस डेच सिमोनकी आर्घाम कानी। 14होचे नाकोकी वचन सेटाक्ले, र होसे वचन लकीङ न नाकुङ पट्ट न परिवारै मुक्ति डुप्ले।’
15“होटै ङा ङाक्की ठाला, तब सुरुवाङ काल्हा मीटाक पवित्र आत्मा रान्हाङ लेखा न होखुरीक मीटाक र राहा। 16तब प्रभुये डेच होसे वचन ङै आर्मीटा, ‘यूहन्नै च डीये बप्तिस्मा याहा तर नाखुरीकुङ चहिँ पवित्र आत्माङ बप्तिस्मा छान्ने।’ 17प्रभु येशू ख्रीष्ट मीटाक विश्वास जाट्नाङ परमेश्वरै कानकी पवित्र आत्मौ वरदान याम्हन्या, होखुरीककी र होसे न वरदान याह्रखीङ परमेश्वरकी रोकडीकी ह्योक्च ङा सु हो र?”
18पत्रुसौ इसे कुरा सेरखीङ यहूदी विश्वासीको होसकी दोष याखी डासार “अहो! परमेश्वरै अन्यजातिकोलाक र सेन र मासीच जीवन डुप्कीयो लागि पश्चात्ताप जाट्च मौका याल्हेसा” डेयार परमेश्वरौ प्रशंसा जाटा।
एन्टिओखिया सहरौ मण्डली
19स्तिफनसकी साट्रखीङ यरूशलेमाङ सतावट छान्चबाटै होलुङ विश्वासीको पट्टलाक छरपष्ट छानार नुङा। होखुरीक फोनिके, साइप्रस र एन्टिओखियासम्म टाहा तर अरु जातिकोलाक चहिँ होइन यहूदीकोलाक मट्टै वचन प्रचार जाटा। 20तर होखुरीक कुडीक जना चहिँ साइप्रस र कुरेनीयुङ विश्वासीको लेया र होखुरीक एन्टिओखियाङ नुङार अन्यजातिकोलाक र प्रभु येशूओ बारेयाङ सेटाका। 21होखुरीकखाटा प्रभुओ शक्ति लेचबाटै वास्टै भर्मीकै विश्वास जाटा र बाड्को संख्याङ प्रभुपट्टी ल्हेसा।
22इसे खबर यरूशलेमाङ लेच मण्डलीयुङ भर्मीकै सेया। होटै होखुरीकै बारनाबासकी एन्टिओखियाङ बीर्न्हका। 23होला टाहार होलुङ भर्मीकोवाङ परमेश्वरौ अनुग्रह डाङार होसे माह्राङा। होटै होचे होखुरीक पट्टकोलाक प्रभुवाङ पूरा मीमनै विश्वासी छान्न ङुकी डेम उत्साह याहा। 24बारनाबास पवित्र आत्मा र विश्वासै न्हेप्च असल भर्मी लेया। होचे जाट्न वास्टै भर्मीकै प्रभुकी विश्वास जाटा।
25होस न्हुइङ शाऊलकी पाकी डेम बारनाबास टार्सस सहराङ नुङा। 26होचे शाऊलकी डुपार होसकी एन्टिओखियाङ राका। होखुरीक काट वर्षसम्म मण्डलीयुङ भर्मीकोखाटा सङ्गति जाट्चै र वास्टै भर्मीकोलाक शिक्षा याहा। एन्टिओखियाङ न पट्ट डेनाङ पहिला विश्वासीकोलाक ख्रीष्टियान डेच हो।
27होडीक बेला कुडीक जना अगमवक्ताको यरूशलेम लकीङ एन्टिओखियाङ राहा। 28अनि होखुरीक मध्याङ अगाबस डेच काट जना सोवार संसाराङ बाड्को अनिकाल छान्की पामने डेच कुरा पवित्र आत्मा लकीङ भविष्यवाणी ङाका। (होसे अनिकाल क्लौडियस राजै राज्य जाट्च बेलाङ छाना।) 29होटै याङ्च कुरा सेयार पट्ट न विश्वासीकै लाहा-लहे ह्योक्ठर यहूदियाङ ङुच डाजेभाइकुङ सहायतौ लागि भेटी याम्हकाच निश्चय जाटा। 30अनि होखुरीकै सोट्च भेटी बारनाबास र शाऊलौ मीहुटीङ यरूशलेम मण्डलीयुङ अगुवाकोलाक याम्हका।
© 2025 by Mother Tongue Translators Society and Wycliffe Bible Translators, Inc.