সখরিয় 1
1
লগেপ্রভু ইধু ফিরি এজানার ডাগনি
1দারিয়াবসর রাজাগিরির দ্বিবজরর্ আস্তো মাসত্ লগেপ্রভুর কধানি সখরিয় ইধু ফগদাং অলঅ। সখরিয় এলদে বেরিখিয়র পুয়ো আর বেরিখিয় ইদ্দোর পুয়ো।
2লগপ্রভু সখরিয়রে কলঅ, “তমা পুরোণি মানুচ্চুনো উগুরে মুই অমকদ বেজার্ ওইয়োং। 3সেনত্তে তুই মানুচ্চুনোরে কঅ, মুই বেগত্তুন্ খেমতাবলা লগেপ্রভু কঙর্, ‘তুমি মইন্দি ফিরো, সেক্কে মুইয়ো তমা ইন্দি ফিরিম। 4তুমি তমা পূরোণি মানুচ্চুনো ধোক্ক্যেন ন-ওইয়ো। তারা ইধু আগ ভাববাদিগুনে মর্ এ কধাগান ফগদাং গোজ্যন্দে যে, তারা যেন তারার ভান্ন্যেই পথ আর ভান্ন্যেই অভ্যেসত্তুন্ ফিরোন্। মাত্তর্ তারা সিয়েন ন-শুনোন্ আর মঅ কধাগান মনযোগঅ ন-দুয়োন। 5তমা সেই পূরোণি মানুচ্চুনে ইক্কিনে কুদু? আর ভাববাদীগুনে কি উমরত্যে বাঁজি থান্? 6মাত্তর্ মুই মর্ চাগরুনোরে, অত্তাৎ ভাববাদীগুনোরে যেদক্কানি উগুম দুয়োং, মর্ সেই বেক্ কধানি আর সুদোম্ মজিম কি তমা পূরোণি মানুচ্চুনে সাজা ন-পান্? সেক্কে তারা মনানি ফিরেইনে কোইয়োন্দে যে, বেগত্তুন খেমতাবলা লগেপ্রভু তারার্ আচার-বেবহার আর অভ্যেস্ মজিম তারা উগুরে যিয়েনি গুরিবো বিলি ঠিগ্ গোজ্যে তে সিয়েনই গোজ্যে।’ ”
একঝাগ্ ঘোড়া
7দারিয়াবসর রাজাগিরির দ্বিবজরর্ এগার মাজত্, অত্তাৎ শবাট মাসর চোব্বিশ দিনোত্ বেরিখিয়র পুয়ো ভাববাদী সখরিয় ইধু লগেপ্রভুর কধা ফগদাং অলঅ। 8রেদোত্ মুই সখরিয় এক্কান দর্শন পেলুং। মুই দেগিলুং, মান্জ্য ধোক্ক্যেন রিনি চাদে এক্কো স্বর্গদূত রাঙা ঘোড়া উগুরে চড়িনে এজের্। ঘোড়াবো গাদ ভিদিরে গুলমেঁদি গাজ্চুনো সংমোধ্যে থিয়্যেই আঘে। মানুচ্চো পিজেদি আগেদে রাঙা, মাদি রঙর্ আর ধুব্ রংয়র কয়েক্কো ঘোড়া।
9মুই পুযোর্ গুরিলুং, “ও মর্ প্রভু, ইয়েনি কি?” আর এক্কো স্বর্গদূত যিবে মঅ লগে কধা কোইয়্যে জোবত্ তে কোইয়্যেদে, “সিগুন কি মুই তরে দেগেম।”
10যিবে গুলমেঁদি গাজ্চুনো সংমোধ্যে থিয়্যেই এলঅ তে মরে কোইয়্যেদে, “গোদা পিত্থিমীগান ঘুরিনে রিনি চেবাত্তে লগেপ্রভু ইগুনোরে পাদেয়্যে।”
11লগেপ্রভুর যে দূদ্তো গুলমেঁদি গাজ্চুনোর সংমোধ্যে থিয়্যেই এলঅ তারে ঘোড়াবলাগুনে কলাক্, “আমি গোদা পিত্থীগান গুরিনে চেলং যে, পুরো দুনিয়েগান ন-দোরেয়্যেগুরি আর গমেডালে আঘে।”
12সেক্কে লগেপ্রভুর দূত্তো কলঅ, “ও বেগত্তুন খেমতাবলা লগেপ্রভু, তুই যিরূশালেম আর যিহূদার অন্য শঅরানি উগুরে এই যে সত্তুর বজর্ সং বেজার্ ওই রোইয়োচ্ তারা উগুরে আর কয়দিন তুই মেয়্যে ন-গুরি থেবে?” 13সেক্কে যে স্বর্গদূত্তো মঅ সমারে কধা কোইয়্যে লগেপ্রভু তারে বোউত্ ভালেদির আর সান্তনার কধা কলঅ।
14সেনত্তে সেই স্বর্গদূত্তো মরে কলঅ, “তুই এই কধাগান ফগদাং গর্ যে, বেগত্তুন খেমতাবলা লগেপ্রভু কোইয়্যেদে, ‘যিরূশালেমত্তে, অত্তাৎ সিয়োনত্তে মর্ মনত্ অমকদ জ্বলের্। 15মুই নিচিদে থেইয়্যে সেই বেক জাদ্তুনো উগুরে অমকদ বেজার্ ওইয়োং, কিত্যে মুই যেক্কে মঅ মানুচ্চুনো উগুরে বানা এক্কানাগুরি বেজার্ ওইয়োং সেক্কে সেই বেক জাদ্তুনে মঅ মানুচ্চুনোর দুদ্দশা সমারে আরঅ দুদ্দশা দুয়োন্। 16সেনত্তে মুই যিরূশালেমানরে মেয়্যে গুরিবাত্তে ফিরি এইম্। সিয়েনত্ মঅ ঘরান আরঅ বানা অবঅ আর যিরূশালেম শঅরানরে মাবিনে আরঅ বানা অবঅ। 17মুই বেগত্তুন খেমতাবলা লগেপ্রভু এ এগেমান্ গরঙর্, মর্ শঅরানিত্ আরঅ ভালেদি উগুরি পড়িবো আর মুই আরঅ সিয়োনানরে সান্ত্বনা দিম আহ্ আরঅ যিরূশালেমানরে বেঈ নেযেম।’ ”
চের্বো শিং আর চের্বো কালিগর্
18সে পরেদি মুই রিনি চেইনে চের্বো শিং দেগিলুং। 19যে স্বর্গদুত্তো মঅ লগে কধা কোইয়্যে মুই তারে পুযোর্ গুরিলুং, “ইগুন কি?”
জোবত্ তে মরে কলঅ, “ইগুন সেই শিং যিগুন যিহূদা, ইস্রায়েল আর যিরূশালেমর মানুচ্চুনোরে নানান্ জাগাত্ ছিদি দিয়্যে।”
20লগেপ্রভু সে পরেদি মরে চের্জন কালিগররে দেগেল। 21মুই পুযোর্ গুরিলুং, “ইগুনে কি গুরিবাত্তে এচ্চোন্?”
জোবত্ তে কলঅ, “সেই শিঙুন্ অলাক্ সেই বেক্ জাদ্তুনোর খেমতা যিগুনে যিহূদার মানুচ্চুনোরে এমনভাবে ছিদি দুয়োন যে, তারা কনজনে মাঢা তুলি ন-পারন। সেই বেক্ জাদ্তুনোরে দর্ দেগেবাত্তে আর তারার্ খেমতাগানরে ভস্ত গুরিবাত্তে এ কালিগরুনে এচ্চোন্।”
Currently Selected:
সখরিয় 1: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
