পরমগীত 2
2
1মুই যেন শারোণর্ এক্কো গোলাপ,
লাঙেলর্ লিলি ফুল।
পরাণ্যের্ কধা:
2কাদাবন ভিদিরে যেধোক্ক্যেন্ লিলি ফুল্,
মিলেগুনোত্তুন্ সেধোক্ক্যেন মর্ পরাণি।
পরাণির্ কধা:
3ঝারর্ গাজ্পালাগুনো ভিদিরে যেধোক্ক্যেন্ আপেল গাজ্,
সেধোক্ক্যেন্ গাবুজ্যেগুনো ভিদিরেত্তুন্ মর্ পরাণ্যে।
মুই তা ছাবাবোত্ বোইনে গম্ পাং,
মঅ মুয়োদি তা ফলুন্ মিদে লাগে।
4তে মরে হানা ঘরত্ নেযেল,
আর বাবতা টাঙাইদ্যে ধোক্ক্যেন্ গুরিনে
মঅ উগুরে তা কোচ্পানাগান ফগদাং গুরিলুং।
5কিশ্মিশ হাবেইনে মরে দরমর গরঅ
আর আপেল হাবেইনে মরে তরুনো গুরি তুল্,
কিত্তে কোচ্পানালোই মুই পাগল ধোক্ক্যেন ওইয়োং।
6মঅ মাঢাবো তলেদি আগেদে তার বাঙ্ আঢ্তান,
আর ডেন্ আঢ্তানে মরে আজাবোদে ধোজ্যে।
7ও যিরূশালেমর্ মিলেগুন্,
মুই চুন্নু উরিং আর মাঢ ভোলি উরিঙুনো নাঙে কোজোলি গুরিনে কঙর্,
তুমি কোচ্পানাগানরে ন-জাগেয়ো বা উত্তেজিত ন-গোজ্জ্য
যেদক্কন্ সং তার যগাজ্যে সময় ন-অয়।
8উই শুন্, মঅ পরাণ্যের্ রবো,
উই চাহ্, তে এজের্;
তে মুড়ো-মুড়ি উগুরেদি
ফাল্যে ফাল্যে এজের্।
9মর্ পরাণ্যে যেন কৃষ্ণসার বা উরিঙো ছঅ ধোক্ক্যেন্।
উই চাহ্, তে আমা দেবাল পিজেদি থিয়্যেই আঘে,
তে জানালাদি রিনি চাহ্র,
জালি ভিদিরেদি ইজিরে দের্।
10মর্ পরাণ্যে মরে কোইয়্যেদে,
“মঅ পরাণি, উঠ্;
মর্ দোল্বি, মঅ সমারে আয়।
11চাহ্, ঝার্কাল্ যেইয়্যে;
বারিজে শেজ্ ওইয়্যে, যেইয়্যেগোইও।
12মাঢত্ ফুল ফুত্যন্,
গানর্ সময়ান্ লুম্মেগি;
আমা দেজত্ কগুনোর্ রঅ শুনো যার্।
13ডোমোর্ গাজত্ ফল ধরানা আরাম্ভ ওইয়্যে;
আংগুর লুদিত্ ফুল ধুরিনে তুম্বাজ্ নিগিলের্।
মঅ পরাণি, উঠ্, আয়;
মর্ দোল্বি, আয় মঅ সমারে।”
পরাণ্যের্ কধা:
14মর্ কবো, তুই মুড়োবোর্ ফাদাগানত্,
মুড়োবো ইদু লুগেয়্যে জাগানত্ আগচ্;
মরে তঅ মুয়োন্ দেগা,
তঅ মুয়োর্ রবো শুনিবাত্তে দে,
কিত্তে তঅ রবো মিদে আর মুয়ো চেঙারাগান্ দোল্।
15তুমি সেই শিয়েলুনোরে,
সেই চিগোন্ চিগোন্ শিয়েলুনোরে ধর,
কিত্তে তারা আমা আংগুর খেদ্তানি বর্বাদ্ গরন্;
আমা আংগুর খেদত্ ফুলোর্ কুড়ি ধোজ্যন্।
পরাণির্ কধা:
16মঅ পরাণ্যে মত্তে আর মুই তার্;
তে লিলি ফুলোর্ ঝারত্ বেড়ায়।
17ও মর্ পরাণ্যে, তুই ফিরি আয়;
যেদক্কন্ সং বেন্যে পহ্র ন-অয় আর আন্ধারান্ ন-যায়
সেদক্কন্ তুই থাক্।
অজল্ মুড়োবো উগুরে তুই কৃষ্ণসার
বা উরিঙো ছঅ ধোক্ক্যেন্ অ।
Currently Selected:
পরমগীত 2: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
