রোমীয় 11
11
ইস্রায়েল জাদ উগুরে গোজেনর্ দোয়্যে
1মুই সালে পুযোর্ গরং, গোজেনে কি তা মানুচ্চুনোরে এলাফেলা গোজ্জ্যে? কনদিন্অ নয়। মুই নিজেই এক্কো ইস্রায়েলীয়, অব্রাহাম গুট্টির্ আর বিন্যামীন-গুট্টির্ মানুচ্। 2গোজেনে তার্ যে মানুচ্চুনোরে আগেত্তুন্ ধুরি বেঈ লোইয়্যে তারারে এলাফেলা ন-গরে। ভাববাদী এলিয় পৌইদ্যেনে পবিত্র বোইবো কি কয় সিয়েন্ কি তুমি কোই ন-পারঅ? তে ইস্রায়েলীয়গুনো বিরুদ্ধে গোজেন ইধু কোইয়্যেদে, 3“প্রভু, ইগুনে তঅ ভাববাদীগুনোরে মারে ফেল্ল্যন্ আর তঅ পূজোগুন্ ভাঙি ফেল্ল্যন্। বানা মুই বাগি আগং, আর মরেয়ো তারা মারে ফেলেবার্ চেট্ট্যা গোজ্জ্যন্।” 4মাত্তর্ গোজেনে এলিয়রে কি জোব্ দিয়্যে? তে কোইয়্যেদে, “মুই সাত আজার্ মান্জ্যরে মত্যে থোই দুয়োং যিগুনে বাল-দেবেদা ইধু মাঢা ন-নিগিরোন্।” 5গোজেনে সেই একই ধগে এজঅ দোয়্যে গুরি ইস্রায়েলীগুনোরে বিশেষ এক্কো ভাগরে বেঈ রাগেয়্যে। 6গোজেনে যুনি দোয়্যে গুরিনে বেঈ রাগায় সালে দঅ সিয়েন কনঅ কামর্ ফল নয়। যুনি সিয়েন অদঅ সালে দোয়্যে আর দোয়্যে ন-থেদঅ।
7সালে বুঝো যায়, ইস্রায়েলীয়গুনে যিয়েন্ পেবার চেট্ট্যা গোজ্জ্যন্ সিয়েন তারা ন-পান্, মাত্তর্ গোজেনে যিগুনোরে বেঈ থোইয়্যে সিগুনে সিয়েন পেইয়োন, আর অন্য বেক্কুনোর্ মনানি পাত্তর ধোক্ক্যেন্ দর ওই যেইয়্যে। 8পবিত্র বোইবোত্ লেগা আঘে, “গোজেনে তারার্ মনানি এমন্ অকেজো গুরিলো যে, তারা এজঅ সং তারার্ চোগ্কুন্দোই দেগিনেয়ো ন-দেগন্ আর কানানিলোই শুনিনেয়ো ন-শুনোন্।” 9রাজা দায়ূদেয়ো কোইয়্যেদে,
তারার্ হানার্ পরব্পুন্
ফাল্ আর জাল ধোক্ক্যেন্ ওক্,
সিয়েনি যেন তারার্ উজোত্ হেবার্ কারন অয়,
আর তারার্ যিয়েন পাওনা সিয়েন যেন তারা পান্।
10তারার্ চোগ্কুন্ কান্ ওদোক্
যেন তারা চোগেদি ন-দেগন্,
আর নিত্য তারার্ কমরুনোত্ বেঙাতেরা ওক্।
11সালে যিহূদীগুনে উজোট্ খেইনে কি জনমত্তে পড়ি গেলাক্? নিচ্চোই নয়, মাত্তর্ তারার্ পাপত্যে অযিহূদীগুনে উদ্ধোর্ পেবার্ জু পেলাক্ যেন যিহূদীগুনে আয়োজে জাগি উদোন্। 12সালে দেগা যায়, যিহূদীগুনোর পাপর্ কারনে জগদ মানুচ্চুনোর্ বোউত্ লাভ অলঅ, অয়, তারার ক্ষতির্ কারনে অযিহূদীগুনোর্ বোউত্ লাভ অলঅ। সেনত্যে যিহূদীগুনো উগুরে গোজেনর্ পুরো আশিদ্বাদ্তান যেলক্কে লামি এবঅ, সেলক্কে তা সমারে আরঅ কত্তমান বেচ্ আশিদ্বাদ এবঅ।
অযিহূদীগুনোর উদ্ধোর্
13অযিহূদীগুন, মুই তমারে কঙর্, অযিহূদীগুনো ইধু প্রচারক্ ইজেবে মুই মর্ কামানরে ভারী সর্মানর্ চোগেদি দেগঙর্। 14ইয়েন্দোই যেন মুই মঅ নিজো জাদর্ মানুচ্চুনোরে আওজ্ জাগেইনে তারাত্তুন্ কয়েক্কো মান্জ্যরে উদ্ধোর্ গুরি পারং। 15গোজেনে যিহূদীগুনোরে এলাফেলা গোজ্জ্যে বিলি যুনি গোজেন সমারে জগদর্ অন্য মানুচ্চুনোর্ মিলেমিলি অলঅ মাত্তর্ তে যেক্কে যিহূদীগুনোরে মানি লবঅ সেক্কে অবস্থাগান্ কি অবঅ? সিয়েন কি মরা মান্জ্যর্ জিংকানি পাইদ্যে ধোক্ক্যেন্ অবস্থা ন-অবঅ? 16মোইদ্যে তালত্তুন্ বানেয়্যে পত্তম্ রুটিগান যুনি পবিত্র অয় সালে দঅ গোদা তাল্লো পবিত্র। জলপাই গাজ্চোর্ গড়াগান্ যুনি পবিত্র অয় সালে তা ডেলাগুন্অ দঅ পবিত্র।
17যুনি সেই জলপাই গাজর্ কুদুক্কুন্ ডেলা ভাঙি ফেলেইনে সেই জাগানত্ তঅ ধোক্ক্যেন্ ঝার্বো জলপাই গাজর্ ডেলা জড়া দিয়্যে অয় আর তুই আজল্ জলপাই গাজর্ গড়াত্তুন্ রচ্ টানি লচ্, 18সালে ভাঙি ফেল্ল্যে ডেলাগুনোত্তুন্ নিজোরে দাঙর্ মনে ন-গুরিচ্। যুনি গরচ্ সালে মনত্ রাগেচ্, তুই গড়াগানরে ধুরি ন-রাগর্ বরং গড়াগানে তরে ধুরি রাগেয়্যে।
19তুই অয়ত কবে, “মরে জড়া লাগেবাত্তে ডেলাগুন্ ভাঙি ফেলা ওইয়্যে।” 20ভারী গম্। মাত্তর্ তারারে ভাঙি ফেলা ওইয়্যে তারার্ অবিশ্বেজর্ কারনে আর তুই সিয়েনত্ উদ্ধোর্ ওই আঘচ্ তর্ বিশ্বেজত্তে। ইয়েনত্ বার্বো ন-গুরিচ্ বরং ভোক্তি গুরিনে দোরেচ্, 21কিয়া গোজেনে যেক্কে এলঅ ডেলাগুন্অ রেহাই ন-দে সেক্কে তরেয়ো রেহাই ন-দিবো।
22সেনত্তে গোজেনে যে কত্তমান্ দোয়্যেলু আর আগাত্ত্যে সিয়েন একবার্ ভাবি চাহ্। যিগুনে পড়ি যেইয়োন্ তারা উগুরে তে দরমর, মাত্তর্ তঅ উগুরে তে দোয়্যেলু-খালিক্ যুনি তুই তার্ দোয়্যে ভিদিরে থাচ্। সেধোক্ক্যেন্ ন-অলে তরেয়ো কাবি ফেলা অবঅ। 23আর যুনি তারা অবিশ্বেজত্তুন্ ফিরোন্ সালে তারার্ নিজো গাজ সমারে আরঅ জড়া দিয়্যে অবঅ, কিয়া এই জড়া দেনার্ কামান্ গোজেনে গুরি পারে। 24আজলে তুই এক্কো ঝার্বো জলপাই গাজর্ ডেলা এলে, আর সেই গাজ্চোত্তুন্ তরে কাবি লোইনে বাগান জলপাই গাজত্ এনেবাদে জড়া দিয়্যে ওইয়্যে। সালে যিগুনে সেই গাজ্চোর্ আজল্ ডেলা এলাক্, কত্তমান্ সহজে তারারে নিজো গাজ ইধু আরঅ জড়া দিয়্যে অবঅ।
বেক্কুনো উগুরে গোজেনর্ দোয়্যে
25ভেইলগ্, তুমি যেন নিজোরে জ্ঞানী মনে ন-গরঅ সেনত্তে মুই এক্কান গুমুরো সত্য তমারে জানেই রাগেবাত্তে চাং। সেই সত্যগান্ ইয়েন-অযিহূদীগুনোরে গুণীনে ন-পুরোনা সং বেচ্ ভাগ্ ইস্রায়েলীগুনোর মনানি দরমর ওই থেবঅ। 26আর এবাবোত্যেগুরি গোদা ইস্রায়েল জাদ্তো উদ্ধোর্ পেবঅ। পবিত্র বোইবোত্ লেঘা আঘে,
সিয়োনত্তুন্ উদ্ধোর্ গুরিয়্যেবো এবঅ; তে যাকোব গুট্টির্ মানুচ্চুনো ভিদিরেত্তুন্ মঅ উগুরে ভোক্তি নেইয়্যেগান্ দূর্ গুরিবো। 27মুই যেক্কে তারার্ পাপ্পানি দূর্ গুরিম সেক্কে ইয়েনই অবঅ তারাত্তে মর্ বর্ পেইয়্যে বেবস্থা।
28গম্ হবর্ ইন্দিত্তুন্ তমার্ ভালেদিত্তে তারা ইক্কিনে গোজেনর্ শত্রু। মাত্তর্ গোজেনর্ বেঈ লয়দ্যে ইন্দিত্তুন্ পূরোণি মানুচ্চুনোত্তে তারা গোজেনর্ কোচ্পেইয়্যে মানুচ্। 29গোজেনে যিয়েন দান গরে আর যিবেরে ডাগে সে পৌইদ্যেনে তা মনান্ তে ন-বদলায়। 30যেধোক্ক্যেন্ তুমি এক সময়োত্ গোজেনর্ অবাধ্য এলা মাত্তর্ যিহূদীগুনোর্ অবাধ্যতার্ কারনে ইক্কিনে গোজেনর্ দোয়্যে পেইয়ো, 31ঠিগ্ সেবাবোত্যেগুরি তুমি দোয়্যে পেইয়ো বিলি তারায়ো ইক্কিনে অবাধ্য ওইয়োন্ যেন তারায়ো ইক্কিনে দোয়্যে পেই পারন্। 32গোজেনে যেন বেক্কুনোরে দোয়্যে দেগেই পারে সেনত্তে তে বেক্কুনোরে অবাধ্যতা ভিদিরে বন্দী গুরি রাগেয়্যে।
33গোজেনর্ ধন ন-পুরেইয়্যে। তার্ জ্ঞান আর বুদ্ধি কত্তমান্ গভীন্! তার্ বিচের্ আর তার্ বেক্ কামানি বুঝোনা অসম্ভব। 34কন্না প্রভুর্ মনান্ বুঝি পাজ্জ্যে? আর কন্না বা তার্ সল্লা দিয়্যে ওইয়্যে? 35গোজেন বিরুদ্ধে কার্ দাবি আঘে যে, তা দাবিগান্ তাত্তুন্ মানা পুরিবো? 36বেক্কানি দঅ তাত্তুন্ আর তা মাধ্যমে এজে আর বেক্কানি তা নাঙে। উমরত্তে তার্ বাঈনী ওক্। আমেন।
Currently Selected:
রোমীয় 11: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
