গণাণা 31
31
মিদিয়নীয়গুনোর্ ভস্ত অনা
1লগেপ্রভু মোশিরে কলঅ, 2“তুই ইস্রায়েলীয়গুনোর পক্ষত্তুন্ মিদিয়নীয়গুনোরে অন্যেয়ানিত্তে তারার্ পাওনা সাজা দে। সে পরেদি তত্তুন্ তর্ পুরোণি মানুচ্চুনো ইদু যাহ্ পুরিবো।”
3সেক্কে মোশি ইস্রায়েলীয়গুনোরে কলঅ, “মিদিয়নীয়গুনোর বিরুদ্ধে যুদ্ধো গুরিবাত্তে তমা ভিদিরেত্তুন্ কিজু মান্জ্যরে যুদ্ধোর্ পোজাক্কোই সাজেইনে নেযঅ, যেনে তারা লগেপ্রভুর ওইনে মিদিয়নীয়গুনোর্ পাওনা সাজা দি পারন্। 4ইস্রায়েলীয়গুনোর্ পত্তি গুট্টিত্তুন্ এক আজার্ গুরিনে মানুচ্ নেযেইনে যুদ্ধোত্ পাধেই দে।”
5সেনত্তে ইস্রায়েলীয়গুনোর বারবো গুট্টিত্তুন্ এক আজার্ গুরিনে বার আজার্ মান্জ্যরে যুদ্ধোর্ পোজাক্কোই সাজা অলঅ। 6মোশি পত্তি গুট্টিত্তুন্ এক আজার্ গুরি মানুচ্ নেযেইনে তারারে যুদ্ধোত্ পাধেই দিলো। তারা সমারে ধর্মগুরু ইলিয়াসরর্ পূঅ পীনহসে গেলঅ। ইজিরে দিবার তূরীগুন্ আর কয়েক্কো সুদ্ধো-সাংগ জিনিস তে লগে নেযেল।
7মোশিরে দিয়্যে লগেপ্রভুর উগুম মজিম তারা মিদিয়নীয়গুনো লগে যুদ্ধো গুরিনে বেক্ মরদ্ মানুচ্চুনোরে মারে ফেলেলাক্। 8অন্যগুনো লগে মিদিয়নীয়গুনোর্ পাঁচজন রাজারেয়ো তারা মারে ফেলেলাক্। তারার্ নাঙানি অলঅ ইবি, রেকম, সূর, হূর আর রেবা। ইস্রায়েলীয়গুনে বিয়োরর পূঅ বিলিয়মরেয়ো মারে ফেলেলাক্। 9তারা মিদিয়নীয়গুনোর্ মিলেমানুচ্চুনোরে আর ঝি-পূঅগুনোরে বোন্দী গুরিলাক্ আর তারার্ বেক্ গোরু, ছাগল আর ভেড়াছাগলর পালুন আর পযাপিরানি লুদেলাক্। 10মিদিয়নীয়গুনে যেদক্কানি শঅরত্ বজত্তি গুরিদাক সেই বেক শঅরানি আর শঅরর্ বারেন্দি তাম্বুল বানেইনে বজত্তি গুরিবার জাগায়ানি তারা পুড়ি ফেলেলাক্। 11-12সে পরেদি তারা মোশি, ধর্মগুরু ইলিয়াসর আর বেক্ ইস্রায়েলীয়গুনো ইদু যেবাত্তে তারার্ লুদেয়্যে পযাপিরানি, মানুচ্ আর য়েমানপালুন নেযেইনে তাম্বুল ইন্দি উজেই গেলাক্। সেক্কে তারার্ তাম্বুলান্ এলদে যিরীহোর উগুদোন্দি যর্দন গাঙর্ পাড়ত্ মোয়াবর সংজাগানত্।
13মোশি, ধর্মগুরু ইলিয়াসর আর ইস্রায়েলীয়গুনোর্ নেতাগুনে বেক্কুনে তাম্বুলোর্ বারেন্দি তারা লগে দেগা গুরিবাত্তে গেলাক্। 14-15যিদুক্কুন সেনাপতি, অত্তাৎ যিদুক্কুন আজার উগুরে নেতা আর শত উগুরে নেতা যুদ্ধোত্তুন্ ফিরি এলাক্ মোশি তারা উগুরে রাগ গুরিনে পুযোর্ গুরিলো, তুমি সালে বেক্ মিলেগুনোরে বাঁজেই রাগেয়ো! 16পিয়োর মুড়োবোর্ ঘটনাত্ ইগুনে দঅ বিলিয়মর্ সল্লামজিম ইস্রায়েলীয়গুনোরে লগেপ্রভুর ইত্তুন্ দূরোত্ সোরেই যানার্ কারণ ওইয়োন, যিয়েনর্ কারনে লগেপ্রভু মানুচ্চুনো ভিদিরে ভানা(বড়্পিড়ে) দেগা দিয়্যে। 17ইক্কিনে তুমি এই বেক্ পূঅগুনোরে আর যিগুনে গাবুজ্যে মিলে নয় এধোক্ক্যেন বেক্ মিলেগুনোরে মারে ফেলঅ; 18মাত্তর্ যিগুন গাবুজ্যেমিলে তারারে তুমি নিজোত্তে বাঁজেই রাগঅ।
19“তমা ভিদিরে যিগুনে কাররে মাজ্যন্ বা মারে ফেলেইনে কাররে ধোজ্যন্ তারাত্তুন সাত দিন সং তাম্বুলোর্ বারেন্দি থাহ্ পুরিবো। তিন দিনোত্ বা সাত দিনোত্ তমার্ নিজোর্ বা বোন্দী গুরি আন্যে মানুচ্চুনোরে সিজি গুরি নেযা পুরিবো। 20বেক্ কাবড়-চুগোরানি আর চামানি, তক্তা আর ছাগল কেশ্চোই বানেয়্যে বেক্ পযাপিরানি তুমি সিজি গুরিবা।”
21যিদুক্কুন সৈন্য যুদ্ধোত্ যেইয়োন্ ধর্মগুরু ইলিয়াসরে তারারে কলঅ, “ইবে অলঅ মোশিরে দিয়্যে লগেপ্রভুর্ রীদি-সুদোমর্ এক্কো ধারা। 22-23সনা, রূবো, পিদোল, লো, টোন্, সিজে আর যিয়েনি আগুনো গরমে বর্বাদ্ ন-অয় সিয়েনি আগুনোর্ ভিদিরেন্দি তমাত্তুন্ চালেই যাহ্ পুরিবো, সে পরেদি সিয়েনি সিজি অবঅ। মাত্তর্ তো সিয়েনি সিজি গরেদে পানিলোই শুদ্ধো গুরি নেযা পুরিবো। যিয়েনি আগুনো গরমে বর্বাদ্ ওই যায় সিয়েনি সিজি গরেদে পানিত্ ভুরে থঅ পুরিবো। 24সাত দিনোত্ তুমি তমার্ কাবড়-চুগোরানি ধোয় ফেলেবা আর্ সেক্কে তুমি সিজি অবা আর তাম্বুলো ভিদিরে যেই পারিবা।”
লুদেয়্যে পযাপিরানি ভাগ গরানা
25ইয়েনর্ পরেদি লগেপ্রভু মোশিরে কলঅ, 26“ধর্মগুরু ইলিয়াসর, ইস্রায়েলীয়গুনোর্ বংশর নেতাগুন আর তুই বোন্দী গুরি আন্যে বেক্ মানুচ্চুন্ আর য়েমানুনোর্ সোংখ্যেগুন গুণি নেযা। 27লুদেয়্যে বেক পযাপিরানি দ্বিভাগ গুরিনে এক ভাগ দুয়ো সৈন্যগুনোরে যিগুনে যুদ্ধো গোজ্যন্ আর অন্য ভাগ দুয়ো সমাজর্ বাদবাগী মানুচ্চুনোরে। 28সেই বেক্ সৈন্যগুনোর ভাগত্ যিদুক্কুন্ মানুচ্, গোরু, গাধা, ভেড়াছাগল আর ছাগল পরিবাক্ তার্ পত্তি পাঁচশতত্তুন্ এক্কো গুরি লগেপ্রভুর খাজানা ইজেবে ফারগ্ গুরি রাগা পুরিবো। 29সৈন্যগুনোর্ ভাগত্ এই খাজানাগুন তুই লগেপ্রভুর পাওনা ভাগ ইজেবে ধর্মগুরু ইলিয়াসরর্ আঢত্ দিবে। 30ইস্রায়েলীয়গুনোর্ ভাগত্ যিদুক্কুন্ মানুচ্, গোরু, গাধা, ভেড়াছাগল, ছাগল বা অন্য যে কনঅ য়েমান পরিবাক্ তার্ পত্তি পঞ্চাশ্চুয়োত্তুন্ এক্কোত্ ধরে ফারগ গুরি রাগেবে। সিগুন্ তুই লেবীয়গুনোর্ আঢত্ দিবে যিগুনো উগুরে থেবার্-তাম্বুলান দেগাশুনোর্ ভারান্ আঘে।” 31লগেপ্রভু মোশিরে যেদক্কানি উগুম্ দিলো সেধোক্ক্যেন তে আর ধর্মগুরু ইলিয়াসরে বেক্কানি গুরিলো।
32সৈন্যগুনোর আন্যে লুদেয়্যেত্তুন্ যিয়েনি বাগী রলঅ সিয়েনি অলঅ ছয় লাখ্ পাঁচাত্তোর্ আজার্ ভেড়াছাগল আর ছাগল, 33-35বায়োত্তুর্ আজার্ গোরু, একষোট্টি আজার্ গাধা আর বোত্রিশ আজার্ গাবুজ্যে মিলে।
36-40যিগুনে যুদ্ধো গোজ্যন্ তারার্ ভাগ্কো অলঅ, তিন লাখ্ সাত্রিশ আজার্ পাঁচশত ভেড়া আর ছাগল, ছোত্রিশ আজার্ গোরু, ত্রিশ আজার্ পাঁচশত গাধা আর ষোল আজার্ গাবুজ্যে মিলে। ইগুনো ভিদিরে লগেপ্রভুর পাওনা খাজানা অলঅ ছয়শ পাঁচাত্তোর্বো ভেড়াছাগল আর ছাগল, বায়োত্তুর্বো গোরু, একষট্টিবো গাধা আর বোত্রিশজন গাবুজ্যে মিলে।
41লগেপ্রভু মোশিরে যে উগুমান্ দিয়্যে সেধোক্ক্যেন তে লগেপ্রভুর এই পাওনা খাজানা নেযেইনে ধর্মগুরু ইলিয়াসর আঢত্ দিলো। 42-43যে অদ্দেক্ ভাগ মোশি ইস্রায়েলীয়গুনোর, অত্তাৎ সমাজর্ বাদবাকি মানুচ্চুনোর পাওনা ইজেবে সৈন্যগুনোর্ ভাগত্তুন্ সোরেই রাগেল সেই ভাক্কোত্ এলদে তিন লাখ্ সাত্রিশ আজার্ পাঁচশত্ ভেড়াছাগল আর ছাগল, 44-46ছোত্রিশ আজার্ গোরু, ত্রিশ আজার্ পাঁচশত্ গাধা, আর ষোল আজার্ গাবুজ্যে মিলে। 47সেই ইস্রায়েলীয়গুনে যে অদ্দেক্ ভাগ পেলাক্ সে ভিদিরেত্তুন্ মোশি পত্তি পঞ্চাশজন গাবুজ্যে মিলেত্তুন্ এক্কো গুরি আর পত্তি পঞ্চাশচুয়ো য়েমানত্তুন্ এক্কো গুরি নেযেইনে লগেপ্রভুর উগুম মজিম লেবীয়গুনোরে দিলো, যিগুনো উগুরে লগেপ্রভুর থেবার-তাম্বুলোর দেগাশুনোর ভারান্ এলঅ।
48-49ইয়েনর্ পরেদি সৈন্যগুনোর্ নানান্ দলর সেনাপতিগুনে, অত্তাৎ আজার উগুরে নেতাগুনে আর শত উগুরে নেতাগুনে মোশি ইদু যেইনে কলাক্, “তর্ চাগরুনে, অত্তাৎ আমি আমা অধীনোত্ সৈন্যগুনোরে গুণি চেলং তারা ভিদিরে কনজনে মারা ন-যান। 50সেনত্তেই আমি পত্তিজনে যিদুক্কুন্ সনার বাজু, হারু, সীলমহ্র মারিবার্ আংটি, কানফুল আর গত্তনার্ হার পেইয়্যেই, আমার্ পাপ ঢাগি দিবার আজাই আমি সিগুন্ লগেপ্রভু ইদু উৎসর্ব গুরিবাত্তে আন্যেই।”
51সেক্কে মোশি আর ধর্মগুরু ইলিয়াসরে তারাত্তুন্ সেই বেক্ সনার্ গহনাগুন্ নিলাক। 52মোশি আর ইলিয়াসরে আজার উগুরে নেতা আর শত উগুরে নেতাগুনে যেদক্কানি সনা লগেপ্রভুর নাঙে উৎসর্ব গুরিলাক্ সিয়েনির্ ওজনান্ অলদে প্রায় একশ আটষট্টি কেজি। 53ইয়েনিবাদে সৈন্যগুনে বেক্কুনে নিজোর্ নিজোত্তে পযাপিরানি লুদিইনে লোই এচ্চ্যন্। 54লগেপ্রভু যেনে ইস্রায়েলীয়গুনো উগুরে খিয়েল্ রাগায় সেনত্তে মোশি আর ধর্মগুরু ইলিয়াসরে আজার উগুরে নেতা আর শত উগুরে নেতাগুনোত্তুন্ সনার জিনিস্চানি নেযেইনে মিলন-তাম্বুলোত্ রাগেলাক্।
Copyright © 2021 Bangladesh Bible Society