গণাণা 30
30
মান্যে ছিড়েনার সুুদোমান্
1-2মোশি ইস্রায়েলীয়গুনোর গুট্টি-নেতাগুনোরে কলঅ, লগেপ্রভু উগুম্ গোজ্যেদে যুনি কনঅ মানুচ্ লগেপ্রভু ইদু কনঅ কিজু মানন্ বা শমক্ খেইনে কনঅ এগেম্বোই নিজোরে বাঁনন্, সালে তে যেন তার্ কধাগান্ রাগায়; তে যিয়েন্ কোইয়্যে সিয়েন্ তাত্তুন্ গরা পুরিবো। 3-4কনঅ গাবুজ্যে মিলে তা বাবর্ ঘরত্ থাগদে যুনি লগেপ্রভু ইদু কিজু মান্যে থায়্ বা কনঅ এগেম্ গুরি নিজোরে বাঁনি ফেলায় আর তা বাবে সেই কধাগান শুনিনেয়ো তারে কিচ্ছু ন-কয়, সালে তার্ মান্যেগান্ বা যিয়েন্ এগেম্ গুরি তে নিজোরে বাঁন্যে সিয়েন্ তাত্তুন্ পূরোণ গরা পুরিবো। 5মাত্তর্ সেই কধাগান্ শুনোনার্ লগে লগে যুনি তা বাবে তারে মানা গরে সালে তার্ মান্যেগান্ বা যিয়েন্ এগেম্ গুরি তে নিজোরে বাঁন্যে সিয়েন্ বাদ্ ওই যেবঅ। তা বাবে মানা গোজ্যে বিলি লগেপ্রভু তা মান্যেগান বা এগেমান ভাঙানা ক্ষেমা গুরিবো।
6-7কনঅ মানত্ গরানার্ পরেদি বা চিদে-সজ্জা ন-গুরিনে কনঅ এগেম্বোই নিজোরে বাঁনানার পরেদি যুনি সেই মিলেবো বৌ যায় আর তা নেক্কো সেই কধাগান্ শুনিবার্ লগে লগে তারে কিচ্ছু ন-কয়, সালে তার্ মান্যেগান্ বা যিয়েন্ এগেম্ গুরি নিজোরে বাঁন্যে সিয়েন্ তাত্তুন্ পূরোণ গুরিদে পুরিবো। 8মাত্তর্ সেই কধাগান্ শুনোনার্ লগে লগে যুনি তা নেক্কো তারে মানা গরে সালে তার্ সেই মান্যেগান্ বা চিদে-সজ্জা ন-গুরিনে গোজ্যে এগেমান্ শেজ্ ওই যেবঅ আর লগেপ্রভুয়ো তার্ মান্যে বা এগেমান্ ভাঙানা ক্ষেমা গুরিবো।
9রানিমিলে বা নেক্কো যিবেরে ছাড়ি দিয়্যে এধোক্ক্যেন কনঅ মিলে যুনি কনঅ মানত্ গরন্ বা এগেম্বোই নিজোরে বাঁনন্ সালে সিয়েন্ পূরোণ গরা পুরিবো।
10-11“নেগ সমারে বজত্তি গোজ্যে এধোক্ক্যেন কনঅ মিলে যুনি কনঅ মানত্ গরে বা শমক্ খেইনে কনঅ এগেম্বোই নিজোরে বাঁনে আর তা নেক্কো সেই কধাগান্ শুনিনেয়ো তারে কিচ্ছু ন-কয় বা মানায়ো ন-গরে, সালে তার্ বেক্ মান্যেগানি বা যেদক্কানি এগেম্বোই তে নিজোরে বাঁন্যে সিয়েনি তাত্তুন্ পূরোণ গরা পুরিবো। 12মাত্তর্ যুনি তা নেক্কো সেই কধাগান্ শুনোনার্ লগে লগে সিয়েন্ নাকচ্ গুরি দে সালে তার্ সেই মানত্ বা এগেমান্ বাদ্ ওই যেবঅ। তা নেক্কো বেক্কানি নাকচ্ গোজ্যে বিলি লগেপ্রভু তা মান্যেগান্ বা এগেমান্ ভাঙানা ক্ষেমা গুরিবো। 13মোক্কো যে মানত্ গুরিবো বা শমক্ খেইনে কনঅ কিজু ইড়িবার্ এগেম্ গুরিবো সিয়েনি মানি নেযানা বা বাদ্ দি দিবার্ অধিকার্ নেক্কোর্ থেবঅ। 14মাত্তর্ যুনি তা নেক্কো দিনোর্ পর্ দিন সে পৌইদ্যেনে কিচ্ছু ন-কোইনে অলর্ গুরি থায়্ সালে সেক্কে তা মোক্কোর্ মানত্ বা এগেমর্ বাঁনা খেইয়্যেগান পাগানা ওই যায়। বেক্ কধানি শুনোনার্ লগে লগে তার্ এই যে অলর্ গুরি থানাগান্ সিয়েন্ তা মোক্কোর্ মান্যেগান্ বা এগেমানরে ধর গুরি দে। 15মাত্তর্ বেক্ কধানি শুনোনার্ পরেদি সেদিন্যে যেবাত্তে দেদে যুনি নেক্কো সিয়েনি বাদ ন-দে সালে মোক্কোর্ সিয়েন্ পূরোণ ন-গরানার্ দুষ্চান্ তা নেক্কো উগুরে যেইনে পড়িবোগোই।”
16এদক্কানি পৌইদ্যেনে নেক্কো আর মোক্কোর্ সম্পর্ক আর বাপ্পো আর বাপ্পোর ঘরত্ থেইয়্যে ঝিবোর্ সম্পর্ক পৌইদ্যেনে লগেপ্রভু মোশিরে এই বেক্ সুদোমানি দিলো।
Copyright © 2021 Bangladesh Bible Society