গণাণা 27
27
সলফাদর মিলেগুনে
1সলফাদর মিলেগুনে এলাক্ যোষেফর পূঅ মনঃশির বংশর। মনঃশির পূঅবোর্ নাঙান মাখীর, মাখীরোর পূঅবোর নাঙান্ গিলিয়দ, গিলিয়দর পূঅবোর্ নাঙান্ হেফর আর হেফরর পূঅবোর্ নাঙান্ সলফাদ। সলফাদরর্ ঝিগুনোর্ নাঙানি অলঅ মহলা, নোয়া, হগ্লা, মিল্কা আর তির্সা। 2এই মিলেগুনে মিলন-তাম্বুলোত্ সুমিবার পদথ্ যেইনে মোশি আর ধর্মগুরু ইলিয়াসর আর বেক্ নেতাগুনে আর ইস্রায়েলীয়গুনোর্ মুজুঙোত্ থিয়্যেইনে কলাক্, 3“আমা বাপ্পো ধূল্যেচর-চাগালাত্ মুরি যেইয়্যে। কোরহর যিদুক্কুন্ মান্জ্যে লগেপ্রভুর বিরুদ্ধে দল পাগেয়োন্ তে তারা ভিদিরে ন-এলঅ; তে নিজোর্ পাপ্পোই মুরি যেইয়্যে। তার্ কনঅ পূঅ ন-এলাক, 4মাত্তর্ সিয়েন্ অই বিলিনে কিত্তে আমা বাপ্পো নাঙান্ তা বংশত্তুন্ বাদ যেবঅ? বাবর্ বংশর্ মানুচ্চুনো সমারে আমা সোম্বোত্তির্ অধিকার্ দে।”
5সেক্কে মোশি তারার্ এই বেপারান্ লগেপ্রভুর মুজুঙোত্ তুলি ধুরিলো। 6ইয়েনর জোবত্ লগেপ্রভু তারে কলঅ, 7“সলফাদের মিলেগুনে ঠিগ্ কধা কোইয়োন। তারার্ বাবর্ বংশর্ মানুচ্চুনো সমারে তারারঅ হামাক্কায় সোম্বোত্তির্ অধিকার্ তত্তুন্ দিয়্যে পুরিবো। তারা যেনে তারার্ বাবর্ সোম্বোত্তি পান্ সিয়েন্ তত্তুন্ চাহ্ পুরিবো। 8তুই ইস্রায়েলীয়গুনোরে কঅ যুনি কনজনে পূঅ ন-রাগেইনে মুরি যান সালে তার্ সোম্বোত্তির্ অধিকার্ তার্ ঝিবো পেবঅ। 9যুনি তার্ ঝিবো ন-থায় সালে তার্ ভেইয়ুনে তার্ সোম্বোত্তির গিরোজ্ অবাক। 10যুনি তার্ ভেইবো ন-থায় সালে সোম্বোত্তির্ অধিকারান্ তার্ বাবর্ ভেইয়ুনে পেবাক। 11যুনি বাবর্ কনঅ ভেই ন-থান্ সালে তার্ বংশর্ বেগত্তুন্ সদর্ কুদুম্মোবোরে সেই সোম্বোত্তির্ অধিকার্ দিয়্যে পুরিবো। সেই সোম্বোত্তি তেয়ই পেবঅ। মোশিরে দিয়্যে লগেপ্রভুর উগুম্ মজিম ইয়েনই অবঅ ইস্রায়েলীয়গুনোর্ আইনোর্ এক্কান্ ধারা।”
মোশির পদথানত্ যিহোশূয়
12ইয়েনর্ পরেদি লগেপ্রভু মোশিরে কলঅ, “তুই অবারীম মুড়োমুরির্ সংমধ্যে এই মুড়োবোত্ উদিনে যে দেজ্চান্ মুই ইস্রায়েলীয়গুনোরে দুয়োং সিয়েন্ চেই লঅ। 13তর্ ভেই হারোণে যেধোক্ক্যেন তার্ পুরোণি মানুচ্চুনো ইদু যেয়েগোই দেজ্চান্ চেবার্ পরেদি তত্তুনো সেধোক্ক্যেন তর্ পুরোণি মানুচ্চুনো ইদু যাহ্ পুরিবো। 14ইয়েনর্ কারনান্ অলঅ, সীন ধূল্যেচর-চাগালাত্ ইস্রায়েলীয়গুনে যেক্কে পানিত্যে উল্লোমী গোজ্যন্ সেক্কে ইস্রায়েলীয়গুনো মুজুঙোত্ মরে সুদ্ধো-সাংগ বিলি মান্য গুরিবার্ উগুমান্ তুমি অমান্য গোজ্য।” ইয়েন্ সীন ধূল্যেচর-চাগালাত্ কাদেজর্ মরীবার পানিগানর কধা।
15-17এ কধাগান শুনিনে মোশি লগেপ্রভুরে কলঅ, “লগেপ্রভু, যিবে বেক্ মানুচ্চুনোর্ পরাণান্ দান গোজ্যে গোজেন, তেয়ই ইস্রায়েলীয়গুনো উগুরে এন্ এক্কো মান্জ্যরে নেযোক্, যে নেতা ওইনে বেক্কানিত্ এ মানুচ্চুনোরে পরিচালনা গুরি পারিবো। সেক্কে লগেপ্রভুর্ মানুচ্চুনে ন-চোরেইয়্যে ভেড়াছাগল ধোক্ক্যেন ন- অবাক্।”
18ইয়েনর্ জোবত্ লগেপ্রভু মোশিরে কলঅ, “নূনোর পূঅ যিহোশূয় ভিদিরে গোজেনর্ আত্মাগান্ আঘে। তুই তারে আনিনে তা উগুরে তর্ আত্তান্ রাগেচ্। 19তুই তারে ধর্মগুরু ইলিয়াসর আর ইস্রায়েলীয়গুনো মুজুঙোত্ আঝিল্ গুরিনে তারা মুজুঙোত্ তারে কামর্ ভারান্ দে। 20তরে যে খেমতাগান্ দিয়্যে ওইয়্যে সিয়েনর্ কিজু তুই তা আদত্ দে যেনে ইস্রায়েলীয়গুনে বেক্কুনে তারে মানন্। 21তাত্তুন্ ধর্মগুরু ইলিয়াসর ইদু যাহ্ পুরিবো, আর ইলিয়াসরে তার্ ওইনে ঊরীমোর সাহায্যলোই লগেপ্রভুর উগুমান জানি লবঅ। ইলিয়াসরর উগুমে তাত্তুন্ আর ইস্রায়েলীয়গুনোর্ অন্য বেক্কুনোত্তুন চলা পুরিবো।”
22মোশি গোজেনর্ উগুম মজিম কাম্ গুরিলো। তে যিহোশূয়রে ধর্মগুরু ইলিয়াসর আর ইস্রায়েলীয়গুনো মুজুঙোত্ আঝিল্ গুরিলো। 23সে পরেদি লগেপ্রভুর উগুম মজিম তা উগুরে আত্তান্ রাগেইনে তারে কামর্ ভারান্ দিলো।
Copyright © 2021 Bangladesh Bible Society