গণাণা 24
24
1বিলিয়মে যেক্কে দেগিলো, ইস্রায়েলীয়গুনোরে আশিদ্বাদ গরানা লগেপ্রভুর্ আওজ্ আঘে সেক্কে তে অন্য বার ধোক্ক্যেন যাদুমন্ত্রর্ সাহায্য নিবার্ চেট্ট্যা ন-গুরিলো। তে ধূল্যেচর-চাগালা ইন্দি তার্ মুয়োন্ ফিরেল। 2তে চেইনে দেগিলোদে, ইস্রায়েলীয়গুনোর্ নানান্ বাবোত্ত্যে গুট্টির্ তাম্বুলানি এক্কানর পর এক্কান্ তাঙেয়্যে আঘে। সেক্কে গোজেনর্ আত্মাগান তা উগুরে এলঅ, 3আর তে গোজেনর্ দিয়্যে এই কধাগান্ কুয়া ধুরিলো:
“বিয়োরর পূঅ বিলিয়মে
এ কধাগান্ কত্তে,
যিবের্ চোখ মেল্যে আঘে তে
এ কধাগান্ কত্তে,
4যে মানুচ্চো গোজেনর্ কধা শুন্যে
আর গোজেনর্ দিয়্যে জ্ঞ্যানান্ দেখ্যে,
যে মাদি উগুরে আদু পাড়িনে পোজ্যে
আর যিবের্ চোগো পাদাগান মেলা যেইয়্যে,
5তে এই কধাগান কত্তে:
ও যাকোব, তর্ তাম্বুলানি কি দোল!
ও ইস্রায়েল, কি দোল্ তর্
থেবার্ জাগাগান!
6সিয়েনি পড়ি আঘে কিজিঙো ধোক্ক্যেন,
পড়ি আঘে গাঙ পারর্ বাগান ধোক্ক্যেন,
লগেপ্রভুর্ লাগেয়্যে অগুরু গাজঅ ধোক্ক্যেন,
পানি পাড়র্ এরস গাজঅ ধোক্ক্যেন।
7বুয়োদে গুয়োড় কুমোত্তুন্ পানি
উগুরি পরিবো,
তারার্ বিঝিগুনে বোউত্ পানি পেবাক্।
তারার্ রাজাবো অবঅ অগাগরত্তুন্ বেশ্ দাঙর্,
তারার্ রেজ্যগান্ মহিমায় বোউত্
অজলত্ থেবঅ।
8গোজেনে মিসর দেজত্তুন্ তারারে
নিগিলেই আন্যে,
তেয়ই তারার্ পক্ষেন্দি ঝাড়্বো গভর্
বল ধোক্ক্যেন।
তারার্ বিরুদ্ধে যিদুক্কুন জাদে থিয়্যেবাক্
তারা তারারে গিলি ফেলেবাক্
তারার আরুন্ কট্টা কট্টা গুরিবাক,
শেল্লোই তারারে আঘাত্ গুরিবাক।
9সিংহ আর সিংহী ধোক্ক্যেন তারা বেজা মারিবাক্
আর মাদিত্ পড়িবাক্,
সেক্কে কন্না তারারে জাগেবাত্তে সাহস গুরিবো?
যিগুনে তমারে আশিদ্বাদ গরন্
তারা উগুরেয়ো সেধোক্ক্যেন আশিদ্বাদ পোরোক;
আর যিগুনে অভিশাব্ দুয়োন,
তারা উগুরেয়ো সেধোক্ক্যেন অভিশাব্ পোড়োক।”
10এই কধাগান শুনিনে বালাকে বিলিয়ম উগুরে রাগে আগুন ধোক্ক্যেন অলঅ। তে আদ চাবর্ মারিনে তারে কলঅ, “মর্ শত্রুগুনোরে অভিশাব দিবাত্তে মুই তরে ডাগি আন্যং মাত্তর্ ইয়েন্ ন-গুরিনে তুই তারারে তিনবার্ আশিদ্বাদ গুরিলে। 11তুই ইক্কিনে ঘরত্ আদি যাগোই। মুই তরে বোউত্ বক্শিজ্ দিম্ কোইয়োং মাত্তর্ লগেপ্রভু সিয়েনি তরে পেবাত্তে ন-দিলো।”
12জোবত্ বিলিয়মে বালাকরে কলঅ, “মুই কি তর্ পাদেয়্যে মানুচ্চুনোরে ন-কঙে, 13যুনিয়ো বালাকে সোনা-রূবোয় ভোজ্যে রাজ্ঘরান্ মরে দে তো মর্ নিজোর্ আওজে মুই গম্-ভান্ন্যেই কিচ্ছু গুরি ন-পারিম বা লগেপ্রভুর্ উগুমোর্ বারেন্দি যেই ন-পারিম, আর লগেপ্রভু যিয়েনি কবঅ বানা সিয়েনিই মত্তুন্ কুয়া পুরিবো। 14মুই ইক্কিনে মর্ মানুচ্চুনো ইদু ফিরি যাঙর্, মাত্তর্ তা আগেন্দি মুই তরে উজিয়ার্ গুরি কোই দি যাঙর্ এই জাদ্তো আগামিদি তর্ জাদ্তো উগুরে কি গুরিবো।”
বিলিয়মর্ মুয়োত্ গোজেনর্ দিয়্যে চের্ লম্বর আগাম্ কধা
15বিলিয়মে সেক্কে গোজেনর্ দিয়্যে এই কধাগান্ কুয়া দোজ্যে:
“বিয়োরর পূঅ বিলিয়িমে
এ কধাগান্ কত্তে,
যিবের্ চোক্কুন্ মেল্যে আগন্ তে
এ কধাগান কত্তে,
16যে মানুচ্চো গোজেনর্ কধানি শুন্যে
আর দাঙর্ গোজেনর্ ইত্তুন্ জ্ঞান পার্,
যে বেগত্তুন্ খেমতাবলা গোজেনর্ দিয়্যে জ্ঞানান্ দেখ্যে,
যে মাদি উগুরে আদু পাড়িনে পোজ্যে,
আর যিবের্ চোগো পাদা খুলি যেইয়্যে,
তে এই কধাগান কত্তে:
17‘ইক্কিনে ন-অলেয়ো মুই তারে
দেগঙর্,
যুনিয়ো তে কোয়-কুরে নয়
তো তা উগুরে মর্ চোগ্ পোজ্যে।
এক্কো তারা উদিবো যাকোবর্ বংশত্,
এক্কো রাজদন্ড উদিবো ইস্রায়েলর
মোধ্যেত্তুন।
মোয়াবীয়গুনোর্ আর শেথর পুয়োগুনোর্ মাঢাগুন
তে গুড়ি গুরি দিবো।
18শত্রুগুনে ইদোমরে, অত্তাৎ সেয়ীররে
গজক্ গুরিবাক,
মাত্তর্ ইস্রায়েলীয়গুনে বীরো ধোক্ক্যেন
কাম্ গুরিবাক।
19যাকোবর্ বংশত্তুন
এক্কো শাজন্ গুরিয়্যে এবঅ,
শঅরর্ বাদবাগি বাঁজি থেইয়্যে ইদোমীয়গুনোরে
তে ভস্ত গুরি ফেলেব।’”
বিলিয়মর মুয়োত্ গোজেনর্ দিয়্যে বেগ থুমোর্ আগাম্ কধা
20অমালেকীয়গুনোরে দেগিনে বিলিয়মে গোজেনর্ দিয়্যে এ কধাগান কুয়ো ধুরিলো:
“বেক্ জাদ্তুনো ভিদিরে
অমালেকীয়গুনে দাঙর্ এলাক্,
মাত্তর্ ভস্ত ওইনে শেজ্ অবাক্।”
21সে পরেন্দি বিলিয়মে কেনীয়গুনোরে দেগিনে গোজেনর্ দিয়্যে এ কধাগান কুয়া ধুরিলো:
“তমার্ থেবার জাগানি উমরত্যে;
মুড়ো-মুড়িত্ তমার্ থেবার জাগা আঘে।
22মাত্তর্ কেনীয়গুন, শেজদি তুমি
ভস্ত ওই যেবা;
আসিরিয়া কয়দিন তমারে
আর বোন্দী গুরি রাগেব?”
23পরেদি বিলিয়ম গোজেনর্ দিয়্যে এ কধাগান কুয়া ধুরিলো:
“হায়! গোজেনে যেক্কে এই বেক্কানি গুরিবো,
সেক্কে কি কনজনে বাঁজি থেই পারিবাক্?
24সাইপ্রাস দ্বীবোর্ দুজিত্তুন্
জাহাজ এইনে
দমন গুরিবো আসিরীয় আর এবরীয়গুনোরে;
মাত্তর্ সাইপ্রাসর মানুচ্চুনে
ভস্ত ওই যেবাক্।”
25ইয়েনর্ পরেদি বিলিয়মে উদিনে ঘরন্দি যাহ্ ধুরিলো আর বালাকেয়ো তার্ নিজোর পথ্তান ইন্দি গেলগোই।
Copyright © 2021 Bangladesh Bible Society